ONITLAKAT ipan xiuitl 1923, ipan Hemsworth, se kalpan tlen onka Yorkshire (Inglaterra). Onikpix se nokniuj akin iueyi, itoka katka Bob. Ijkuak nikpiaya chiknaui xiuitl, notaj, akin kitlauelitaya ika tlayekankej ipan tlaneltokiltin kipiayaj ome inxayak, okinpix seki amoxtin tlen kijtouayaj kenon tekajkayauaya tlaneltokijli tlen xmelauak. Tlen okipouj melak okimojkatlachialti. Seki xiujtin sakin, se tlakatl itoka Bob Atkinson ouajla tochan, niman okitlali ipan se gramófono se itlamachtil tokniuj Rutherford. Otikasikamatkej ika yejon tlamachtijli ualeuaya intech akin okichijchiujkej yejon amoxtin. Notajuan okijlikej yejon tokniuj mojmostla touan matlakuaki ika tlayoua niman matechnankili tlen totlajtoltiayaj itech Biblia, melak miyek tlajtoltilistin tikpiayaj. Yejua otechnots matiuiyan ipan tlanechikoltin tlen nochiuayaj ichan se tokniuj akin nisiuj chantiya. Nimantsin opeuj tiauej, niman onochiuj se pitentsin tlanechikojli ipan Hemsworth. Sakin, opeuj tikinseuiyaj tokniuan akin siervos de zona (tlayekankej ipan circuito) niman opeuj tikiminotsaj precursores touan matlakuakan. Melak onechpaleui ninouikas imiuan.

Yotipeujkaj titlanemakaj, san ika, notaj okijli nokniuj: “Tla tikneki tiyes precursor, tijkauaskej ika titlanemakaj”. Kuakon Bob okis tochan ijkuak kipiaya 21 xiuitl niman ijkon tekichiuas ken precursor. Opanok ome xiuitl, ijkuak nikpiaya 16, noijki oninochiuj precursora. Ipan semana, miyekpa san noselti nontenojnotsaya; san nikitkiya gramófono niman se tarjeta de testimonio. San ika, Jehová onechteochiuj ika se nonomachtijkauj akin nimantsin opeuj kichiua itekiyo toTajtsin. Uajsextli, onechtokayotijkej precursora especial, iuan Mary Henshall. Otechtitlankej matitenojnotsatij ipan se kalpan kampa xakaj tenojnotsaya tlen onkatka ipan Cheshire.

Ijkuakon, tinemiyaj ipan ika okpa Guerra ipan nochi tlaltikpaktli, niman akin tisiuamej otechnauatijkej matikinpaleuikan soldados. Tikchiayaj ika tribunales makinkauilikan precursores especiales maka mauiyan kampa nomachtiskej kenon tlaixnamikiskej ipan guerra, pampa nochipa tiktekichiuiliayaj toTajtsin, niman pampa oksekimej itech okseki tlaneltokiltin okinkauilijkej. San ika, touan xijkon okichiujkej niman onechijlikej ika nitsauktoskia 31 tonaltin.  Opanok se xiuitl, ijkuak onikpix 19, oninoijkuilo kampa nikteijliaya ika ipampa notlaneltokil, xniknekiya teuan manechpouakan ipan Guerra. Ononek nias ixpan ome tribunales, san ika, ipan yejon ojkan xonechtsajkej. Ipan nochi yejon tonaltin onikmachili ika Jehová nechajsitoya ipan noma, nechpaleuijtoya niman nechyolchikaujtoya (Is. 41:10, 13).

Ipan 1946, onikixmat Arthur Matthews. Yejua kemach yopanoka yeyi metstli ika tsauktoya pampa xokinek oyaj ipan guerra niman yejua aman otenojnotsato oksekan iuan ikniuj Dennis, akin tekitiya ken precursor especial ipan Hemswoth. Itaj okinmachtijka tlen melauak ijkuak pipitikej katkaj niman onoapolaktijkej ijkuak telpokamej katkaj. Ijkuak san kemach oyejkokaj Hemsworth, ikniuj Dennis okititlankej matlapaleuiti Irlanda. Kuakon notajuan okinotskej imiuan machantiti, pampa yejua katka se precursor melak tekitki niman okinmojkatlachialti ika kuajli kiyekanaya inemilis. Ijkuak nejua nikomintlajpalouaya, Arthur niman nejua tikteijliayaj ika tejuamej tikinpajpakaskiaj platos. Sakin, opeuj totlajkuilouiliaj. Niman maski ipan 1948 Arthur okitsajkej okseki yeyi metstli, otonamiktijkej ipan 1949. Tiknekiyaj chikauak tiktekichiuiliskej toTajtsin hasta kampa tiueliskiaj. Tokojtiliayaj kuajli tiktekitiltiskej totomintsin, niman ipan vacaciones tontekitiyaj kampa kitekij tlakilyotl. Ika itlapaleuilis Jehová, ouel otitekichiujkej ken precursores.

Se xiuitl sakin, otechnotskej matiuiyan Irlanda del Norte. Otiajkej Armagh niman sakin Newry, miyekej akin ompa chantiyaj católicos katkaj. Niman xkiminekiyaj akin kipiayaj okse tlaneltokijli, kuakon, nonekiya melak titlamachilisejkej yeskej ijkuak tontenojnotsaskiaj. Tlanechikoltin nochiuayaj ichan se tokniuj iuan isiuauj, akin chantiyaj kanaj 16 kilómetros ika uejka. San tichikueyimej katkaj akin ompa tosentlaliayaj. Tla ompa tokauayaj, tikochiyaj ipan tlajli, niman uajmostla melak kuajli titlakuayaj. Melak nechyolpaktia nikmatis ika aman nemij miyekej tokniuan ipan yejon kalpan.

Nokniuj niman isiuauj, Lottie, itekitiyaj ken precursores especiales ipan Irlanda del Norte. San sekan otiajkej ipan ueyi tlanechikojli yeyi tonajli tlen onochiuj Belfast, ipan 1952. Tokniuj akin otechseui ichan noijki okiseui Pryce Hughes, akin ijkuakon katka siervo de sucursal itech Gran Bretaña. Se yeuajli titlajtotoyaj itech amatlajkuilojli tlen kemach yokiska, El camino de Dios es el de amor, yejuin onochijchiuj ika makinpaleui akin chantiyaj Irlanda. Tokniuj Hughes okijto ika ouijtika katka tikinnojnotsas itech Biblia católicos akin chantiyaj República de Irlanda. Yejuamej kinkixtijtoyaj tokniuan kampa chantiyaj niman teopixkej kimijliayaj tlaltikpakchanejkej makimixnamikikan. Sakin okijto: “Tikiminekij tokniuan akin yononamiktijkej akin kipiyaj incarro niman kinektokej tenojnotsaskej ipan se ueyi tekitl kampa kitemamakaskej yejon amatlajkuilojli ipan nochi país”. * Niman tejuamej otitlanankilijkej ijkon ken kachtopa onikijto: “¡Tejuamej uelis tiaskej!”.

 Ipan Dublín, precursores nochipa ueliyaj nokauayaj ichan “mamá” Rutland, se tokniuj akin melak youejkaujka kitekichiuilia Jehová. Sakin ika tinauimej ompa achijtsin yotichantikaj niman yotiknemakakaj seki tlen tikpiayaj, ototepitsmiktijkej ipan se motocicleta tlen inakastlan kipiaya kan timotlalis tlen iyaxka katka Bob niman otijkouatoj se carro. Otiknextijkej se tlen yokikuikaj, san ika, kuajli nesiya. Otiktlajtlanilijkej akin otechnemakilti makuika tochan pampa xakaj ueliya kinejnemiltiaya. Nochi teotlak Arthur notlalijtoya ipan cama nomajmachtijtoya ika se palanca de cambios tlen san yejua kinemiliaya. Uajmostla, ijkuak Arthur kiyejyekojtoya kikixtis carro kampa otikejyeujkej, oyejkok Mildred Willett (se misionera akin sakin ononamikti iuan John Barr). ¡Yejua kema ueliya kuikaya carro! Achijtsin otechmajmachti niman sakin, itiueltoyaj tiaskej.

Aman, nonekiya tiknextiskej kampa tichantiskiaj. Otechijlikej maka matichantikan ipan se remolque pampa akin tetlauelitaj uelis kitlatiskej. Otiktejtemojkej se kajli, san ika, pampa xotiknextijkej ononek tikochiskej ipan tocarro. Uajmostla san otiknextijkej se remolque tlen kipiaya ome tlapechtsitsintin. Aman ompa tichantiskiaj. Otechmojkatlachialtij ika sekimej akin tlatokayaj kipiayaj kuajli inyojlo niman techkauiliayaj matijkauakan remolque ipan intlal. Titenojnotsayaj kanaj 20 kilómetros ika uejka itech kampa onkatka remolque. Sakin, oksekan tikitkiyaj remolque niman aman titenojnotsayaj kampa achto otijkaujkaj.

Otitenojnotskej ipan nochi kaltin tlen onkatkaj ipan sureste de Irlanda niman xotechtekiyomakak. Otiktemakakej ipantsin 20,000 amatlajkuiloltin niman otikpanoltilijkej sucursal itech Gran Bretaña intokayo nochimej akin kinekiyaj okseki kimatiskej. Nechyolpaktia nikmatis ika aman nemij miyekej Teixpantijkej ompa.

Opanokej seki xiujtin niman otechtitlankej kampa sur de Londres. Niman seki semanas sakin, itech Betel okuajnotskej Arthur niman okijlikej mapeua matekiti uajmostla ken tlayekanketl ipan circuito. Okimachtijkej se semana, niman ijkuak otlan, otiajkej Escocia kampa titlapaleuiskiaj. Arthur nion xokajxili nomachtis tlamachtiltin tlen kitemakaskia, maski ijkon nochipa kinektoya kiselis tekitl maski maouijtika. ¡Melak nechyolchikauaya ineskayo! Melak tiyolpakiyaj ika yejuin yenkuik tekitl. Pampa youejkaujka titenojnotstinemiyaj kampa xnemiyaj Teixpantijkej, tinemiskej aman intsajlan miyekej tokniuan onochiuj se ueyi tlateochiualistli.

Arthur okinotskej mauiya ipan iTlamachtil Galaad, ipan 1962. Ompa tlamachtijli uejkauiya majtlaktli metstli niman nejua xonechnotskej maniuiya, kuakon ononek tiktlapejpeniskej tlen ouijtika katka. San ika, otikijtokej ika kuajli yeskia tla Arthur kiseliskia yas Galaad, maski san noselti ninokauaskia. Onechtitlankej Hemsworth ken precursora especial. Ijkuak Arthur onokuep, se xiuitl sakin, okitokayotijkej tlayekanketl ipan distrito. Titenojnotsayaj Escocia, ipan norte de Inglaterra niman ipan Irlanda del Norte.

Ipan 1964, Arhur okimakakej se yenkuik tekitl. Yeskia siervo de sucursal ipan Irlanda. Melak otikuelitakaj tekitl tlen tikchiuayaj ipan circuito niman distrito,  ika yejon, achijtsin ninomojtiaya. San ika, aman melak niktlasojkamati pampa onechkauilijkej nitekitis Betel. Yonikitak ika, ijkuak tikseliaj nochi tekitl tlen Jehová techmaka maski xmelak tikuelitaj, yejua nochipa techteochiua. Ipan Betel nitekitiya ipan oficinas, nikintlatlaliaya amatlajkuiloltin, nitlakualchiuaya niman nitlachipauaya. Kemantika tikchiuayaj tekitl ipan distrito niman ijkon otikimixmatkej miyekej tokniuan itech nochi país. Noijki, otikitakej kenon akin tikinmachtiayaj itech Biblia onoskaltijtiajkej ipan tlen melauak. Nochi yejuin okichiuj melak matikintlasojtlakan tokniuan itech kalpan Irlanda akin katkaj kentla tochanejkauan. ¡Melak kualtsin tlateochiualistli!

Ipan 1965 onochiuj kachtopa ueyi tlanechikojli iuan miyekej países ipan Irlanda, onochiuj ipan Dublín. * Maski miyekej xkinekiyaj manochiua, nochi melak kuajli okis. Onosentlalijkej 3,948 niman onoapolaktijkej 65. Itech okseki países oyajkej 3,500, niman akin nisiuj chantiyaj ipan Dublín okinseuijkej. Akin oteseuijkej okiselijkej se amatl kampa okintlasojkamachilijkej, niman miyekej kuajli otlajtokej itech tokniuan. Yejon ueyi tlanechikojli okichiuj ika akin chantiyaj Irlanda kuajli makimitakan tokniuan.

Ipan 1966, sucursal itech Dublín aman kinyekanaskia norte niman sur de Irlanda, kuajli nesiya ika xtixeliujtoyaj ijkon ken Irlanda, se atlajkotian tlen xeliujtoya ika política niman tlaneltokiltin. Melak otechyolpakti tikitaskej kenon miyekej católicos okiselijkej tlen melauak niman san sekan otekipanojkej imiuan tokniuan akin oyajkej protestantes.

Ipan 2011, tonemilis onopatlak ken nion xtikchiayaj. Sucursales itech Gran Bretaña niman Irlanda san sekan okinsentlalijkej, niman otechtlajtlanilijkej matitekititi ipan Betel tlen onka Londres. Ipan yejon tonaltin melak ninajmanaya pampa noueuentsin kualouaya. Tlapajtikej okinextilijkej se kokolistli tlen itoka Parkinson. Ipan mayo 20, xiuitl 2015, sakin ika yotiuejkaujkaj 66 xiuitl ika san sekan otiktekichiuilijkej Jehová, noueuentsin Arthur omik.

Yejuin xiujtin tlen kemach yopanokej melak yoninajman niman yoninoyolkoko. Arthur nochipa nouan nemiya, niman melak niktemoua. San ika, tikixnamikis tlen ouijtika, kichikaua ken touikaj iuan Jehová. Noijki, melak teyolseui nikitas kenon tokniuan melak kitlasojtlayaj Arthur. Yonikinseli amatlajkuiloltin intech akin imiuan ninouika akin chantij Irlanda, Gran Bretaña niman hasta Estados Unidos. Yejuin tlen nechijkuilouiliaj, niman yolchikaualistli tlen yonikseli itech Dennis, akin ikniuj Arthur, isiuauj, itoka Mavis, niman nosobrinas Ruth niman Judy, melak yonechpaleuijkej; ken nion xuelis nikijtos ika tlajtoltin.

Onka se texto tlen melak nechyolchikaua. Yejua Isaías 30:18, tlen kijtoua: “San ika, Jehová sa kichiatika ika yolseuilistli ijkuak mechteochiuas, niman yejua nokuiteuas niman ijkon mechititis teiknelilistli, pampa Jehová yejua se toTajtsin akin kiteititia melajkayotl. Pakij nochimej akin itech tlamachixtokej”. Melak nechyolchikaua nikmatis ika Jehová tlamachixtok ika ijyouilistli ijkuak kiyektlalis nochi totlaueluan niman techmakas tekitl tlen techyolpaktis ipan yenkuik tlaltikpaktli.

Ijkuak niknemilia itech nochi tlen opanok ipan nonemilis, kuajli nikita ika Jehová yokiyekan niman yokiteochiuj tekitl itech tenojnotsalistli ipan Irlanda. Melak niyolpaki ika ouel onitlapaleui, maski san achijtsin. Kuajli nikmatstok ika Jehová techteochiua ijkuak tikchiuaj tlen techtlajtlanilia.