1. ¿Tleka kinamiki ika san Jehová matikueyichiuakan?

SAN Jehová kinamiki matikueyichiuakan pampa yejua akin otexchijchiuj niman otechmakak tonemilis (Apoc. 4:11). San ika, ouijtika ijkon tikchiuas. Maski tiktlasojtlaj niman tiktlakaitaj Jehová, onka tlen uelis techyoltilanas niman xtechkauilis matikueyichiuakan ken kinamiki. Tla xtiknekij ijkon topan manochiua, noneki tikasikamatiskej tleka ijkon uelis panos. San ika, kachtopa matikitakan tlenon kijtosneki san toTajtsin tikueyichiuaskej.

2. Ken kijtoua Éxodo 34:14, ¿tlenon xtikchiuaskej tla san Jehová tikueyichiuaj?

² Biblia kijtoua ika ijkuak yemelak tiktlasojtlaj Jehová, san yejua tikueyichiuaj. Kuakon, xtiknekij yakaj noso itlaj okse tikueyichiuaskej (xpoua Éxodo 34:14).

3. ¿Tleka tikueyichiuaj Jehová?

³ Tikueyichiuaj Jehová ipampa tlen yotiuelkej itech. Melak tikuelitaj ikualneskayouan, tlen melak kualtsitsintin. Tikmatstokej tlen kuelita niman tlen xkuelita, niman noijki ijkon titlanemiliaj. Tikasikamatij tlenon kineki matikchiuakan niman tikintlakamatij itlanauatiluan. Melak tipakij ika techkauilia iuan matouikakan (Sal. 25:14). Nochi tlen tiuelij itech Jehová, akin otexchijchiuj, kichiua melak nisiuj itech matinemikan (Sant. 4:8).

4. a) ¿Tlenon kikui Satanás niman ijkon maka san Jehová matikueyichiuakan? b) ¿Tlenon tikitaskej ipan yejuin tlamachtijli?

 ⁴ Satanás kiyekana yejuin tlaltikpaktli, niman kikui tlaltikpaktli niman ijkon kichiuas matikchiuakan tlen tikileuiyaj niman ouijtika matikitakan tikixnamikiskej tlen xkuajli (Efes. 2:1-3; 1 Juan 5:19). Kineki matiktlasojtlakan okseki tlemach niman maka san Jehová matikueyichiuakan. Matikitakan kenon ueli ijkon kichiua. Kachtopa, kichiua matiknekikan tikpiyaskej miyek tomin. Niman, ika ome, kichiua matiknekikan toyolpaktiskej ika tlen yejua kuelita.

5. ¿Tleka noneki totlajpiyaskej maka tiktlasojtlaskej tomin?

⁵ Tinochimej tiknekij tikpiyaskej tlen tijkuaskej, tlen ika totlakentiskej niman kampa tichantiskej. San ika, noneki totlajpiyaskej maka tiktlasojtlaskej tomin. Aman, miyekej sajnoye kitlasojtlaj tomin niman melak kinekij kikouaskej miyek tlemach (2 Tim. 3:2). Jesús kimatstoya ika inomachtijkauan ueliskiaj kinekiskej notomintiskej, kuakon okimijli: “Xakaj ueli kitekichiuilia ome iteko, pampa se kitlajsojtlas niman okse kitlauelitas, noso se kipiyalis kuajli iyojlo niman okse kitlaluelkauas. Ijkon tej, xakaj uelis kitekichiuilis Dios niman no kinotekimakas on tomin” (Mat. 6:24). Akin kiueyichiua toTajtsin niman melak notekimiktia niman ijkon notomintis kentla kinekiskia kitekichiuilis ome iteko. Xsan Jehová kiueyichiujtika.

6. ¿Tlenon tiuelij itech tlen Jesús okimijli akin nemiyaj ipan tlanechikojli Laodicea?

⁶ Itlamiyan kachtopa siglo, tokniuan akin nemiyaj Laodicea noueyimatiyaj pampa kipiayaj tomin niman xitlaj kinpolouaya. San ika, ixpan Jehová niman Jesús  yejon tokniuan ixpoliujtoyaj, kinamikiya makimiknelikan, xkipiayaj tomin niman xtlachiayaj, niman tetsotsoltikej katkaj. Jesús xokimajuak tla pampa yejon tokniuan kipiayaj tomin, yejua okimajuak pampa melak kitlasojtlayaj tomin niman xok kuajli nouikayaj iuan Jehová (Apoc. 3:14-17). Tla tikmachiliaj ika peua tiknekij tikpiyaskej miyek tlemach, nimantsin noneki matoyektlalikan (1 Tim. 6:7, 8). Tla xnimantsin toyektlaliaj, toyojlo xeliujtos niman Jehová xkuelitas ken tikueyichiuaskej, pampa kineki san yejua matikueyichiuakan (Deut. 4:24). ¿Tlenon uelis kichiuas melak matiktlasojtlakan tomin?

7-9. ¿Tlenon tiuelij itech tlen ipan onochiuj se tokniuj akin itoka David?

⁷ Matitlajtokan itech David, se tlayekanketl akin ualeua Estados Unidos. Yejua kijtoua ika melak kuajli tekitiya kampa yeuejkaui tekipanouaya, niman hasta okseki tekitl okimakakaj niman más kitlaniya. Ipan nochi país, okixmatkej ken se tlakatl akin melak kuajli kichiuaya itekiyo. Techijlia: “Ijkuak ijkon panotoya, oniknemili ika Jehová nechteochiujtoya”. San ika ¿yompa katka ken tlanemiliaya?

⁸ David opeuj kita ika itekiyo kichiujtoya maka melak kuajli manouika iuan Jehová. Yejua kijtoua: “Ijkuak ninemiya ipan tlanechikojli niman ijkuak nontenojnotsaya, san nitlanemilijtoya itech notekiyo. Miyek tomin niktlaniya, san ika, melak nechkuaajmanaya notekiyo niman opeuj nikpiya tlauejli iuan nosiuatsin”.

⁹ Kuakon, David okimat ika nonekiya kitas itech tlenon notekimakatoya. Kijtoua: “Onikijto nikyektlalis tlen panotoya”. Tokniuj okinemili xok miyek horas tekitis niman otlajtoto iuan akin itech tekitiya. Yejon tokniuj  okipolo itekiyo. ¿Niman tlenon okichiuj? Kijtoua: “Uajmostla, oniktemilti solicitud niman ijkon nitlapaleuis ken precursor auxiliar”. Tokniuj iuan isiuatsin opeujkej tlachipauaj niman ijkon notekipanoskej. Oajsik tonajli ijkuak David onochiuj precursor regular niman sakin, isiuauj noijki onochiuj precursora regular. Yejuamej okitlapejpenijkej se tekitl tlen miyekej xkuelitaj, san ika, yejuamej xkinmajmana yejon. Maski xok miyek tomin kitlanij ken yeuejkaui, nochipa kipiyaj tlen ika nopanoltiskej. Yejuamej nochipa kinekij kitlakamatiskej Jehová, niman kuajli kitaj ika Jehová kintlajpiya akin kachtopa kichiuaj tlen yejua kineki (Mat. 6:31-33).

10. ¿Kenon uelis tiktlajpiyaskej toyojlo?

¹⁰ Maski tla tikpiyaj miyek tlemach noso ka, noneki tiktlajpiyaskej toyojlo. ¿Kenon uelis tikchiuaskej yejuin? Tla xtiktlasojtlaj tomin niman tla más tikpatiojkaitaj tiktekichiuiliskej Jehová xijkon ken totekiyo. Matotlajtoltikan yejuin: “¿San nitlanemilijtika itech notekiyo ijkuak ninemi ipan tlanechikojli noso ijkuak nitenojnotstika? ¿San nitlanemilijtika itech kenon ninopanoltis ika tlayekapan? ¿Nikpiya tlauejli iuan nosiuauj noso noueuentsin san ipampa tomin noso okseki tlemach? ¿Nikseliskia se tekitl tlen miyekej xkuelitaj tla yejon nechkauiliskia más kuajli maniktekichiuili Jehová?” (1 Tim. 6:9-12). Ijkuak totlajtoltiskej nochi yejuin, matikilnamikikan ika Jehová techtlasojtla niman kimijlia yejuin akin kitekichiuiliaj ika nochi inyojlo: “Xkaman nimitskauas nion nimitstlalkauis”. Ika yejon, apóstol Pablo okijto yejuin: “Maka sanoyej xnekikan nenkipiyaskej tomin” (Heb. 13:5, 6).

11. ¿Kenon uelis techijtlakos tlen ika toyolpaktiskej?

¹¹ Jehová kineki matiyolpakikan. Biblia kijtoua ika “xitlaj onkaj okse más kuajli kichiuas on tlakatl, yej san ma tlakua niman ma tlaoni, niman ma paki ika on tlen okitlan ijkuak otekit” (Ecl. 2:24). San ika, miyek tlen ika noyolpaktilo melak teijtlakoua, pampa kichiua maka matiktlakamatikan toTajtsin niman matikchiuakan noso hasta matiktlasojtlakan tlen iTlajtol toTajtsin kijtoua ika xkuajli.

12. Ken kijtoua 1 Corintios 10:21, 22, ¿tleka noneki kuajli tiktlapejpeniskej tlen ika toyolpaktiskej?

¹² Tiknekij san Jehová tikueyichiuaskej, kuakon, xuelis titlakuaskej “ipan imesa  toTEKO” niman “ipan inmesa on xkuajkualtin espíritus” (xpoua 1 Corintios 10:21, 22). Miyekpa, ijkuak titlakuaj iuan yakaj kijtosneki ika iuan touikaj. Tla tiktlapejpeniaj toyolpaktiskej ika tlen kipiya naualyotl, auilnemilistli, noso kampa uajnesi kenon nouisokilo noso okseki tlen xkuajli, san noijki kentla titlakuaskiaj imiuan itlauelikniuan toTajtsin niman tijkuaskiaj tlen yejuamej okichijchiujkej. Tla ijkon tikchiuaj, san tejuamej toijtlakouaj niman xok kuajli touikaskej iuan toTajtsin.

13, 14. Itech tlen kijtoua Santiago 1:14, 15, ¿tleka noneki totlajpiyaskej ijkuak tiktlapejpeniskej tlen ika toyolpaktiskej? Xkijto se neskayotl.

¹³ ¿Tleka tikijtouaj ika ijkuak toyolpaktiaj san noijki ken ijkuak titlakuaj? Pampa ijkuak titlakuaj, tejuamej tikijtouaj tlenon tijkuaskej. San ika, ijkuak tiktolouaj, xok tikmatij tlenon panoua. Totlalnakayo peua san iselti tekiti niman ijkon matechpaleui tlen yotikuajkej. Tla tijkuaj tlen tepaleuij, xtikualoskej, san ika, tla tijkuaj tlen xtepaleuij, uelis techijtlakos. Yejuin xnimantsin nesi, san ika, sakin kema melak kuajli nesi.

¹⁴ Noijki ijkon, ijkuak tiktlapejpeniaj tlenon ika toyolpaktiskej, tejuamej tikijtouaj tlenon tijkalaktiskej ipan totlamachilis. San ika, sakin, tlen otiktlapejpenijkej uelis kijtlakos tlen tiknemiliaj noso tikmachiliaj. Tla tiktlapejpeniaj tlen kuajli, kichiuas kuajli matomachilikan, san ika, tla tiktlapejpeniaj tlen xkuajli, uelis techijtlakos (xpoua Santiago 1:14, 15). Kanaj xnimantsin nesis kenon techijtlakoua, san ika, sakin, kema kuajli nesis. Ika yejon, Biblia techijlia: “Maka sano nemejuamej xmokajkayauakan, pampa xakaj uelis kikajkayauas Dios. Tlen kitôkas sen tlakatl, sano yejua kipixkas. Tla tiktôkaskej on tlen xkuajli yejuan keleuiya totlalnakayo, ikan totlalnakayo tikpixkaskej on xoxotonilistli niman mikilistli” (Gál. 6:7, 8). Kuakon, melak noneki matikmapeuakan nochi tlen Jehová kitlauelita (Sal. 97:10).

15. ¿Tlenon yotechtlayokoli Jehová?

¹⁵ Miyekej itekipanojkauan Jehová kuelitaj kitaskej JW Broadcasting^®, se página tlen tikpiyaj ipan Internet. Se tokniuj itoka Marilyn okijto: “Yejuin página yonechpaleui maniknemili tlen tepaleui, niman uelis nikitas nochi tlen ompa uajnesi pampa nochi kuajli. Ijkuak san noselti ninomachilia noso melak ninajmana, nochipa niknextia itlaj tlen melak nechyolchikaua. Yejuin melak kichiua maninonisiui itech Jehová niman itech ikalpan. JW Broadcasting melak yokipatlak nonemilis”. ¿Tiktekitiltijtokej yejuin tlen Jehová yotechtlayokoli? Melak kuajli tla tikitaj programa tlen notlejkoltia ipan JW Broadcasting nochi metstin, san ika, noijki uelis tikimitaskej okseki videos tlen ompa onka niman tikinkakiskej tlamachtiltin niman tlakuikaltin tlen teyolchikauaj.

16, 17. ¿Tleka noneki tikitaskej kech tiuejkauij ijkuak toyolpaktiaj, niman kenon uelis tikchiuaskej?

¹⁶ Xsan noneki kuajli tiknemiliskej tlenon ika toyolpaktiskej. Noijki noneki tikitaskej kech tiuejkauij ijkuak toyolpaktiaj, pampa, tla xijkon tikchiuaj, uelis melak tiuejkauiskej toyolpaktijtoskej niman xok sajnoye tiktekichiuiliskej Jehová. Miyekej ouijtika kimachiliaj noteltiskej. Abigail se tokniuj akin kipiya 18 xiuitl kijtoua: “Sakin ijkuak melak yonisiauj, melak nechpaleuiya niuajnotlalis niman nikitas televisión. San ika, tla xninotlajpiya, uelis melak niuejkauis ompa neuatos”. Niman se telpochtli  akin itoka Samuel kijtoua: “Kemantika, melak niuejkaui nikimitstok miyekej videos ipan Internet. Nipeua san ika se video niman, nion xnikmachilia kenon panoua yeyi noso naui hora”.

¹⁷ ¿Kenon uelis tikitaskej ika maka melak matiuejkauikan ijkuak toyolpaktiskej? Kachtopa, noneki tikitaskej kech yemelak tiuejkauij ijkuak toyolpaktiaj. Ika yejon, uelis tikijkuiloskej ipan se amatl kech horas ipan se semana tikitstokej televisión, tikalakij ipan Internet niman tauiltiaj ika tocelular noso totableta. Tla tikitaj ika melak tiuejkauij ijkuak tikchiuaj nochi yejuin, matikchijchiuakan se horario. Kachtopa matikijkuilokan tlen melak noneki tikchiuaskej niman sakin matikijkuilokan kech tiuejkauiskej toyolpaktiskej. Sakin, matiktlajtlanilikan Jehová matechpaleui ijkon matikchiuakan ken yotikijkuilojkej. Ijkon tiueliskej tomachtiskej Biblia, tikueyichiuaskej toTajtsin imiuan tochanejkauan, tiaskej ipan tlanechikoltin, titenojnotsaskej niman titemachtiskej. Noijki, tomachiliskej ika toyojlo ijkuak toyolpaktiskej pampa kachtopa otikchiujkej tlen noneki.

18, 19. ¿Kenon uelis tikteititiskej ika san Jehová tikueyichiuaj?

¹⁸ Sakin ika apóstol Pedro yokijtoka ika popoliuis tlaltikpaktli tlen kiyekana Satanás niman ika oniaskia se yenkuik tlaltikpaktli, noijki okijto: “Notlajsojkaikniuan, chika nemejuamej nenkimachixtokej on tonajli, xchiuakan kanika para Dios mechnextijtejkos nenkipiyaj yolseuilistli, nenyolchipajkej niman xikan tlajtlakojli” (2 Ped. 3:14). Ijkuak tikchiuaj tlen okijto apóstol Pedro niman tikueyichiuaj Jehová ken yejua kuelita, kuakon tikteititiaj ika san Jehová tikueyichiuaj.

¹⁹ Satanás niman tlaltikpaktli tlen kiyekana ok texchiualtisnekiskej matikchiuakan tlen yejuamej kuelitaj (Luc. 4:13). San ika, maski san tlenon tikixnamikiskej, matokojtilikan ika Jehová nochipa manemi ipan toyojlo. Yotikijtokej ika nochipa san Jehová tikueyichiuaskej, ijkon ken kinamiki.