1. ¿Itech tlenon otlajto Jesús iuan inomachtijkauan ijkuak sa achijtsin poliuiya ika mikis?

IPAN yeuajli ijkuak sa achijtsin poliuiya ika mikis, Jesús nemiya iuan inomachtijkauan niman miyekpa okiteneuj tlasojtlalistli, kanaj 30. Yejua kuajli okimijli ika nonekiya notlasojtlaskej semej iuan oksekimej (Juan 15:12, 17). Melak miyekej kitaskiaj ika yejuamej notlasojtlayaj niman kimatiskiaj ika melauak kitokayaj Cristo (Juan 13:34, 35). Yejuin tlasojtlalistli tlen okiteneuj Jesús xsan kijtosneki tikmachilis ika titetlasojtla, kijtosneki tikchiuas seki tlemach inpampa oksekimej. Jesús okijto: “On tetlajsojtlalistli más ueyi yejuan se uelis kipias sa no yejua on ika ma miki impampa itetlajsojkauan. Niman nemejuamej nennotetlajsojkauan tla nenkichiuaj tlen nejua nemechnauatia” (Juan 15:13, 14).

2. a) ¿Kenon kimixmatij akin kitekichiuiliaj toTajtsin ipan yejuin tonaltin? b) ¿Tlenon tiknankiliskej ipan yejuin tlamachtijli?

² Ipan yejuin tonaltin, akin kitekichiuiliaj toTajtsin kimixmatij ika melauak notlasojtlaj, ika nopaleuiyaj niman ika san sekan nemij (1 Juan 3:10, 11). Tokojtiliaj ijkon titetlasojtlaskej maski oksekan tiualeuaj, okse tlajtojli titlajtouaj noso tlamantik otoskaltijkej.  San ika, kanaj totlajtoltiaj: “¿Tleka noneki matitetlasojtlakan ipan yejuin tonaltin? ¿Kenon techyolchikauaj Jehová niman Jesús? Niman ¿kenon noijki uelis ijkon tikinyolchikauaskej oksekimej?” (1 Cor. 8:1).

3. ¿Kenon yejuin tonaltin tlen melak xkuakualtin kimijtlakoua tlaltikpakchanejkej?

³ Tinemij ipan tonaltin tlen melak xkuakualtin, niman nemilistli “tentika ika tlauejli niman ajmantli”. Ika yejon, miyekej tlaltikpakchanejkej melak najmanaj (Sal. 90:10; 2 Tim. 3:1-5). Miyekej xok kinekij nemiskej. Nochi xiujtin nomiktiaj ipantsin 800,000 tlaltikpakchanejkej, kijtosneki ika ijkuak panoua 40 segundos nomiktia se tlaltikpakchane. Teajman ika hasta sekimej tokniuan ijkon yonomachilijkej niman yonomiktijkej.

4. ¿Akinomej itekipanojkauan toTajtsin okijtokej ika xok kinekiyaj nemiskej?

⁴ Yeuejkaui, sekimej itekipanojkauan toTajtsin akin oyolmelaujkanenkej melak xkuajli onomachilijkaj niman hasta xok kinekiyaj nemiskej. Se neskayotl, Job melak najmantoya niman hasta okijto ika xok kinekiya nemis, yejua kinekiya mikis (Job 7:16; 14:13). Jonás melak xkuajli onomachili pampa xopanok tlen yejua kinekiya, niman okijto: “Aman, oh Jehová, xnechkuili nonemilis, pampa kuajli yes tla nimiki niman xok niyoltos” (Jon. 4:3). Niman teotlajtoketl Elías melak xkuajli onomachilijka hasta okitlajtlanili toTajtsin makikauili mamiki. Okijli: “¡San ijkon! Aman, oh Jehová, xnechkuili nonemilis” (1 Rey. 19:4). San ika, Jehová kintlasojtlaya itekipanojkauan akin yolmelaujkej katkaj niman kinekiya manemikan. Yejua xokimajuak pampa ijkon tlanemiliayaj. Yejua okinpaleui niman ijkon oksejpa makinekikan nemiskej niman ok makitekichiuilijtokan ika yolmelaujkanemilistli.

5. ¿Tleka melak noneki matikinpaleuikan tokniuan ipan yejuin tonaltin?

⁵ Ipan yejuin tonaltin, miyekej tokniuan kixnamiktokej tlen melak ouijtika niman noneki matikinyolseuikan niman matikintlasojtlakan. Sekimej kintlaueltokaj noso kinpijpinaujtiaj. Oksekimej kintlajtolchijchiuiliaj ipan intekiyo niman xkuajli intech tlajtouaj. Noso kanaj melak yosiaujkej pampa miyek horas yotekitkej noso melak kintsontekonsiauitia intekiyo. Niman nemij akin kipiyaj ueyi tlauejli imiuan inchanejkauan, pampa kanaj imixnamik xtlaneltoka itech Jehová niman san kintejteneujtika. Pampa ijkon inpan nochiua, miyekej tokniuan kimachiliaj ika xok kipiyaj kojtilistli niman hasta kanaj kinemiliaj ika xakaj kinpatiojkaita. ¿Akinon uelis kinpaleuis?

6. ¿Kenon Jehová kinyolchikaua itekipanojkauan?

⁶ ¿Kenon Jehová kinyolchikaua itekipanojkauan? Jehová kuajli kimijlia itekipanojkauan ika yejua nochipa kintlasojtlas. Xnemili kenon melak okinyolchikauj israelitas itlajtoluan Jehová: “Pampa tejua yotimochiuj melak kualtsin ixpan noixtololojuan, yomitstlakaitakej, niman nejua yonimitstlasojtlak. [...] Maka xmomojti, pampa nejua mouan ninemi” (Is. 43:4, 5). Kuajli matikmatstokan ika toTajtsin techtlasojtla niman techpatiojkaita. * Jehová kimijlia itekipanojkauan: “Ken akin kipiya kojtilistli, temakixtis. Melak pakis motech ika ueyi pakilistli” (Sof. 3:16, 17).

7. ¿Tleka tikijtouaj ika Jehová techtlasojtla ijkon ken se nantli kitlasojtla ikonetsin? (Xkita tlaixkopinajli kampa peua tlen tomachtijtokej).

 ⁷ Jehová kuajli yokijto ika kinyolchikauas niman kinyolseuis itekipanojkauan maski san tlenon inpan panos. Itech amoxtli Isaías yejua okijto: “Nemejuamej nenchichiskej niman nejua nemechuikas ipan nopitsajkan, niman nemechuiuixos ipan noteteponuan” (Is. 66:12, 13). ¡Xnemili kenon kualtsin nomachilia se konetsintli ijkuak inan kinapaloua niman iuan nauiltia! Jehová noijki ijkon, melak techtlasojtla niman kineki kuajli matinemikan. Maka keman xnemili ika Jehová xmitspatiojkaita (Jer. 31:3).

8, 9. ¿Kenon itlasojtlalis Jesús techmaka kojtilistli?

⁸ Aman matikitakan okse itlaj tlen kuajli techititia ika Jehová techtlasojtla. Juan 3:16 kijtoua: “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa”. Noijki tikitaj ika Jesús melak otechtlasojtlak pampa okitemakak inemilis topampa. ITlajtol toTajtsin kuajli techijlia ika nion tlauejli nion tlajyouilistli xuelis techxeloskej “itech itetlajsojtlalis Cristo” (Rom. 8:35, 38, 39).

⁹ Kemantika tikixnamikij tlaueltin tlen kichiua matisiauikan noso maka sa matechyolpakti tiktekichiuiliskej Jehová. San ika, tla tikilnamikij kenon Cristo techtlasojtla, tikpiyaskej kojtilistli niman ijkon uelis titlaxikoskej (xpoua 2 Corintios 5:14, 15). “Itetlajsojtlalis Cristo” techyolchikaua niman kichiua matiknekikan nochipa tiktekichiuiliskej Jehová. Techpaleuiya matitlaxikokan ijkuak tlaixpoliui, ijkuak techtlaueltokaj, ijkuak panoua tlen xtikchiayaj noso ijkuak melak tajmanaj.

10, 11. ¿Akinon kipiya ika kinyolseuis tokniuan akin najmanaj? Xkijto tleka ijkon titlanankilia.

¹⁰ Jehová noijki kitekitiltia tlanechikojli niman ijkon techyolchikauas ika tlasojtlalistli. Ijkuak tikintlasojtlaj tokniuan, tikteititiaj ika tiktlasojtlaj Jehová. Tikchiuaj nochi tlen tiuelij niman ijkon tikinpaleuiyaj tokniuan makitakan ika toTajtsin kintlasojkaita niman kintlasojtla (1 Juan 4:19-21). Apóstol Pablo okijto: “Xmoyoleuakan se iuan okse, niman xmoyolchikauakan ikan  tlaneltoktli iuan oksekimej ijki ken nenkichijtokej” (1 Tes. 5:11). Melauak, xsan tlayekankej noneki kichiuaskej yejuin. Tinochimej uelis tikinyolseuiskej niman tikinyolchikauaskej tokniuan ijkon ken kichiua Jehová niman Jesús (xpoua Romanos 15:1, 2).

¹¹ Sekimej tokniuan akin melak najmanaj noso noyolkokouaj kanaj nonekis konitaskej se tlapajtiketl niman makinmakakan tlen koniskej noso tlen kitoloskej (Luc. 5:31). Tlayekankej niman oksekimej tokniuan kuajli kimatstokej ika yejuamej xtlapajtikej, san ika, melak ueyi kijtosneki ijkuak kinpaleuiyaj niman kinyolseuiyaj. Kimatstokej ika noneki kitlakamatiskej yejuin tlanauatijli: “Xkinyoleuakan on yejuan notsinkixtiaj; xkimpaleuikan on yejuan xkojtikej ipan intlaneltok, niman xpiakan ijyouilistli inuan nochimej” (1 Tes. 5:14). Melak noneki matikintlasojtlakan, matikimasikamatikan niman matikimijyouikan akin najmanaj. Noneki matikinnotsakan ika tlasojtlalistli niman ijkon tikinyolseuiskej. Matotlajtoltikan: “¿Nikyejyekoua nikinyolchikauas oksekimej? ¿Tlenon uelis nikchiuas niman ijkon nikinpaleuis nokniuan?”.

12. Xkijto se neskayotl kampa techititia ika tokniuan okiyolchikaujkej se tokniuj siuatl pampa okitlasojtlakej.

¹² ¿Tlenon panoua ijkuak tikintlasojtlaj akin najmanaj? Se tokniuj siuatl akin ualeua Europa kijtoua: “Kemantika niknemilia ninomiktis. San ika, melak miyekej nechpaleuiyaj. Tokniuan itech notlanechikol yonechpaleuijkej maka ijkon manitlanemili. Yejuamej nochipa nechyolchikauaj niman nechititiaj ika nechtlasojtlaj. Xmiyekej kimatstokej ika melak ninajmana, san ika, nochimej tokniuan kinektokej nechpaleuiskej maski san kemanon. Se tokniuj iuan isiuauj nechtlajpiyaj kentla notajuan yeskiaj. Yejuamej kinektokej nechpaleuiskej nochipa ijkuak nonekis, maski ika tonajli noso ika yeuajli”. Melauak ika xtinochimej uelis titepaleuiskej ijkon ken sekimej kichiuaj. San ika, onka miyek tlen uelis tikchiuaskej inpampa tokniuan akin melak najmanaj. *

13. ¿Tlenon noneki tikchiuaskej niman ijkon tikinyolchikauaskej tokniuan?

¹³ Kuajli matikinkakikan (Sant. 1:19). Tikteititiaj ika titetlasojtlaj ijkuak tikinkakij niman tikimasikamatij akin najmanaj. ¿Kenon uelis tikyolchikauaskej akin najmana? Matiknemilikan kenon tomachiliskiaj tejuamej tla ijkon topan nochiujtoskia, niman matiktlajtoltikan tlen techpaleuis matikasikamatikan kenon nomachilia. Noneki nesis ipan toxayak ika tiknekij tikpaleuiskej niman ika tiktlasojtlaj. Tla tokniuj kineki techijlis nochi tlen kajmana, matikteititikan ijyouilistli niman maka matiktlajtolkotonakan. Tla kuajli tijkakij, uelis tikasikamatiskej tlenon kajmana. Yejua kuajli nomachilis niman noijki kinekis techkakis. Ijkuak kitas ika tiknekij tikpaleuiskej, ika iyojlo nomachilis niman tikyolseuiskej.

14. ¿Tleka xtiknekij titeajuaskej?

¹⁴ Maka matikimajuakan. Tla akin najmantika kimachilia ika tikajuaj, melak noyolkokos. Niman maski melak tiknekiskej tikpaleuiskej, techtekiyomakas tikyolchikauaskej. Biblia kijtoua: “Tlajtojli tlen xnonemilia ijkuak noijtoua tlateki ken se espada, san ika, itlajtol akin tlamachilise tepajtia” (Prov. 12:18). Melauak ika xtiknekij titeyolkokoskej ika totlajtoluan, san ika, uelis titeyolkokoskej tla xtiknemiliaj tlen  tikijtouaj. Tla tiknekij titeyolchikauaskej ika tlasojtlalistli, noneki tokojtiliskej niman ijkon titeasikamatiskej (Mat. 7:12).

15. ¿Tlenon uelis tiktekitiltiskej niman ijkon titeyolchikauaskej?

¹⁵ Matiktekitiltikan iTlajtol toTajtsin (xpoua Romanos 15:4, 5). Biblia ualeua itech akin “kitemaka ijyouilistli niman teyoltlalilistli”, ika yejon, xtechmojkatlachialtia ika techyoltlalia tlen ompa ijkuiliujtika. Noijki tikpiyaj BIBLIOTECA IPAN INTERNET Watchtower niman Tlen kinpaleuiya ika nomachtiaj iteixpantijkauan Jehová. Nochi yejuin uelis techpaleuis matikinnextikan tlaxeloltin niman amatlajkuiloltin tlen uelis tiktekitiltiskej niman ijkon tikinyolchikauaskej tokniuan.

16. ¿Katlejua kualneskayomej techpaleuis ijkuak tikyolchikauaskej yakaj akin najmana?

¹⁶ Matikimiknelikan niman matikintlasojtlakan. Jehová yejua toTajtsin akin “techiknelijtikaj niman nochipa techyoltlalijtikaj”, niman yejua “sanoyej kimiknelia” itekipanojkauan (xpoua 2 Corintios 1:3-6; Luc. 1:78; Rom. 15:13). Pablo ouel okiteititi yejuin kualneskayomej pampa okixkopin Jehová. Yejua okijkuilo: “Tejuamej temechpiaj ken itlaj yejuan selik, ken yejua on nantli yejuan kimiskaltia ikonetsitsiuan ikan tetlajsojtlalistli. Nemejuamej temechpialiaj miyek tetlajsojtlalistli yejuan hasta tiknekiskiaj temechmakaskiaj, xsan yejua on kuajli tlajtojli yejuan kitemaka temakixtilistli, yej no hasta tonemilis pampa tejuamej otemechtlajsojtlakej sanoyej” (1 Tes. 2:7, 8). Tla tejuamej noijki titetlasojtlaj ken toTajtsin, uelis tiknankiliskej iteoyouj yakaj akin melak najmana.

17. ¿Kenon noneki tikimitaskej tokniuan niman ijkon tikinyolchikauaskej ika tlasojtlalistli?

¹⁷ Maka matiknemilikan ika tokniuan xkeman nopopoloskej. Matitlanemilikan ken kinamiki. Tla tikchiaj ika tokniuan maka manopopolokan yejon kichiuas matikualanikan tla kemantika xijkon kichiuaj ken tikchiayaj (Ecl. 7:21, 22). Matikilnamikikan ika Jehová xkichia matikchiuakan itlaj tlen kimatstika ika xtiuelij tikchiuaj. Kuakon, tla tiknekij tikchiuaskej ijkon ken Jehová, noneki toijyouiskej semej iuan oksekimej (Efes. 4:2, 32). Maka matikimijlikan ika xnokojtiliaj ken noneki, niman maka matikitakan tla ueyi kichiuaj noso xueyi kichiuaj, pampa yejon kinyolkokos. Kuakon, matomatikan tikimijliskej tlen kuajli kichiuaj. Yejon kinyolchikauas niman kinpaleuis makitekichiuilikan Jehová ika pakilistli (Gál. 6:4).

18. ¿Tleka tiknekij tikinyolchikauaskej tokniuan ika tlasojtlalistli?

¹⁸ Jehová kinpatiojkaita nochimej itekipanojkauan. Jesús noijki kinpatiojkaita, niman okitemakak inemilis inpampa (Gál. 2:20, TNM). Tikintlasojtlaj tokniuan ika nochi toyojlo niman tiknekij tikintlajpiyaskej ika tlasojtlalistli. Ika yejon, matikchiuakan “on tlajtlamach yejuan kuajkij yolseuilistli” niman tlen “kimiskaltiaj oksekimej impan intlaneltok” (Rom. 14:19). Melak tiknekij maajsi tonajli ijkuak tinemiskej ipan Xochitlalpan kampa xok yakaj najmanas. Xok onias kokolistli nion guerras. Tlaltikpakchanejkej xok mikiskej ipampa tlajtlakojli, xok yakaj kintlaueltokas, xok kipiyaskej tlaueltin imiuan inchanejkauan, xok najmanaskej ipampa tlen yeuejkaui opanok. Ijkuak tlamis mil xiuitl, tlaltikpakchanejkej xok kipiyaskej tlajtlakojli. Akin tlaxikoskej hasta ijkuak panos tlen ouijtika, Jehová kinnoyaxkatis ken ikoneuan niman yejuamej “kipiyaskej kualtsin makixtilistli” (Rom. 8:21, TNM). Kuakon, nochipa matiteyolchikauakan ika tlasojtlalistli, niman matikinpaleuikan oksekimej noijki manemikan ipan yejon kualtsin tlaltikpaktli tlen toTajtsin yotechijli techmakas.