1. ¿Tleka iteixpantijkauan Jehová melak yolpakij? (Xkita tlaixkopinajli kampa peua tlen tomachtijtokej).

MELAUAK, iteixpantijkauan Jehová melak yolpakij. Ijkuak yauej ipan tlanechikoltin, ipan uejueyimej tlanechikoltin noso ijkuak san sekan nosentlaliaj yejuamej nonojnotsaj imiuan oksekimej niman uetskaj. ¿Tleka melak yolpakij? Pampa yejuamej kixmatstokej Jehová, “toTajtsin akin paktika”. Yejuamej kitekichiuiliaj niman kiyejyekouaj kixkopinaskej (1 Tim. 1:11, TNM; Sal. 16:11). Pakilistli ualeua itech Jehová. Ika yejon, yejua kineki matipakikan, niman techmaka miyek tlemach tlen kichiua matiyolpakikan (Deut. 12:7; Ecl. 3:12, 13).

2, 3. a) ¿Tlenon kijtosneki tiyolpakis? b) ¿Tlenon uelis kichiuas maka matiyolpakikan?

² Matotlajtoltikan: “¿Tejuamej tiyolpakij? ¿Tlenon uelis tikchiuaskej niman ijkon yemelak tiyolpakiskej?”. Tiyolpakis kijtosneki kuajli timomachilis, tinemis ika moyojlo san ika tlen tikpiya niman hasta tiixpaktinemis. Biblia kijtoua ika tla tiknekij yemelak tiyolpakiskej, noneki touikaskej iuan Jehová. San ika, ipan yejuin tonaltin kemantika uelis onias itlaj tlen kichiuas maka matiyolpakikan. ¿Tleka?

 ³ Miyek onka tlen kichiua maka matiyolpakikan: kanaj tikpolouaj totekiyo, kanaj techkaua toixnamik, kanaj miki se tochanejkauj noso kanaj kikixtiaj tochanejkauj itech tlanechikojli. Noijki uelis kichiuas maka matipakikan ijkuak tikpiyaj tlauejli imiuan tochanejkauan, ijkuak techpijpinaujtiaj akin imiuan titekitij noso akin imiuan tomachtiaj, ijkuak techtlaueltokaj noso ijkuak techtsakuaj pampa tiktekichiuiliaj Jehová. Noso kanaj peua tikualoj, kanaj tikpiyaj se kokolistli tlen xueli techkaua noso kanaj melak tajmanaj. San ika, matikilnamikikan ika Jesús, “akin melak paki niman akin san yejua Ueyi Tlanauatijketl”, kineki kinyolseuis tlaltikpakchanejkej niman kinpaleuiya mapakikan (1 Tim. 6:15; Mat. 11:28-30). Ipan Tlamachtijli ipan Tepetl, Jesús okiteneuj seki tlemach tlen uelis techpaleuis matiyolpakikan maski tikpiyaskej miyek tlaueltin ipan yejuin tlaltikpaktli kampa tlayekana Satanás.

4, 5. ¿Tlenon noneki tikchiuaskej niman ijkon nochipa tiyolpakiskej?

⁴ Tlen kachtopa okiteneuj Jesús melak ueyi kijtosneki. Yejua okijto: “Yolpakij akin kimatstokej ika kipiya ika kitejtemoskej tlen ualeua itech toTajtsin, pampa yejuamej intlatki Tekiuajyotl tlen onka iluikak” (Mat. 5:3, TNM). ¿Kenon tikteititiaj ika tiknekij tikixmatiskej toTajtsin niman ika tiknekij matechyekana? Tikteititiaj yejon ijkuak tomachtiaj Biblia, ijkuak tiktlakamatij itlanauatiluan niman ijkuak kachtopa tikchiuaj ipan tonemilis tlen yejua kineki. Tla tikchiuaj yejuin, tiyolpakiskej niman kuajli tikmatstoskej ika kichiuas tlen yejua yokijto. Noijki, yejon tlen kualtsin tikchiaj ika tlayekapan tlen kiteneua iTlajtol toTajtsin, techpaleuis matitlaxikokan ijkuak tikpiyaskej tlaueltin (Tito 2:13, TNM).

⁵ Tla tiknekij nochipa tiyolpakiskej, noneki kuajli touikaskej iuan Jehová. Apóstol Pablo okijkuilo: “Nochipa xpakikan itech toTeko. Oksejpa nikijtoua: ¡Xpakikan!” (Filip. 4:4). Aman tej, noneki tikpiyaskej tlamachilistli tlen ualeua itech toTajtsin niman ijkon iuan touikaskej. ITlajtol toTajtsin kijtoua: “Yolpaki se tlakatl akin kinextia tlamachilistli niman tlakatl akin kuajli kasikamati itlaj”. Noijki kijtoua: “Akin itech najsij kitaj ken se kojtli itech nemilistli, niman akin kuajli itech najsitokej yolpakiskej” (Prov. 3:13, 18).

6. ¿Tlenon okse noneki tikchiuaskej niman ijkon tiyolpakiskej?

⁶ Tla tiknekij nochipa tiyolpakiskej, noneki nochipa matikchiujtokan tlen tiuelij ipan Biblia. Jesús otemachti yejuin ijkuak okijto: “Tla nenkimatij yejuin tlemach, nenpakiskej tla nenkichiuaj” (Juan 13:17, TNM; xpoua Santiago 1:25). Yejuin melak noneki matikchiuakan tla tiknekij tikpiyaskej chikauak totlaneltokil niman tla tiknekij nochipa tiyolpaktoskej. San ika ¿kenon uelis tiyolpakiskej tla onka miyek tlen kichiua maka matiyolpakikan? Matikitakan tlenon okseki okijto Jesús ipan Tlamachtijli ipan Tepetl.

7. ¿Tleka yolpakij akin najmanaj?

⁷ “Yolpakij akin melak najmanaj, pampa yejuamej kinyolseuiskej” (Mat. 5:4, TNM). Kanaj totlajtoltiaj: “¿Kenon uelis yolpakiskej akin najmanaj?”. Jesús xtlajtojtoya intech akin najmanaj ipampa nochi tlen panoua. Hasta miyekej tlaltikpakchanejkej akin xkuakualtin najmanaj pampa kixnamikij tlaueltin ipan yejuin “sanoyej xkuajli tonaltin” (2 Tim. 3:1). San ika, yejuamej san intech tlanemilijtokej niman xnouikaj iuan Jehová, ika yejon, yejuamej xyolpakij. Jesús kinteneujtoya akin kitejtemouaj tlen  ualeua itech toTajtsin. Yejuamej najmanaj pampa kitaj ika miyekej tlaltikpakchanejkej yokimapeujkej toTajtsin niman xkitlakamatij. Yejuamej kuajli kimatstokej ika kipiyaj tlajtlakojli niman kitaj tlen xkuajli nochiua ipan yejuin tlaltikpaktli. Jehová najmana inpampa yejuin tlaltikpakchanejkej, kinyolseuiya ika iTlajtol niman kinpaleuiya mayolpakikan (xpoua Ezequiel 5:11; * 9:4). *

8. Xkijto tleka tiyolpakij ijkuak tiyolyemankej.

⁸ “Yolpakij akin yolyemankej, pampa yejuamej kiseliskej tlaltikpaktli”(Mat. 5:5, TNM). ¿Tleka uelis tiyolpakiskej tla tiyolyemankej? Miyekej tlaltikpakchanejkej melak tlauelejkej katkaj niman teixnamikiyaj. San ika, pampa yokixmatkej tlen melauak kijtoua Biblia, aman yonopatlakej, yokiselijkej se “nemilistli yejuan yenkuik”. Aman yejuamej teikneliaj, tetlasojtlaj, yolyemankej, kuajli tenotsaj niman teijyouiyaj (Col. 3:9-12). Niman aman yejuamej kuajli nouikaj imiuan oksekimej niman yolpakij. Noijki, iTlajtol toTajtsin kijtoua ika yejuamej “kiseliskej tlaltikpaktli” (Sal. 37:8-10, 29).

9. a) ¿Tlenon okijtosnek Jesús ijkuak okijto ika akin yolyemankej “kiseliskej tlaltikpaktli”? b) ¿Tleka uelis pakiskej akin “kapismikij niman kamikij melajkayotl”?

⁹ ¿Tlenon okijtosnek Jesús ijkuak okijto ika akin yolyemankej “kiseliskej tlaltikpaktli”? Tlapejpeniltin kiseliskej tlaltikpaktli ijkuak yejuamej nochiuaskej teopixkej niman tekiuajkej (Apoc. 20:6). Niman akin xyaskej iluikak, akin melak miyekej, kiseliskej tlaltikpaktli ijkuak yejuamej chantiskej ipan xochitlalpan ika yolseuilistli, ika pakilistli niman ika se nemilistli tlen xkeman tlamis. Jesús noijki okijto yejuin intech tlapejpeniltin niman intech akin nemiskej ipan tlaltikpaktli: “Yolpakij akin kapismikij niman kamikij melajkayotl” (Mat. 5:6, TNM). Ipan yenkuik tlaltikpaktli, nochiuas tlen yejuamej melak kinekij (2 Ped. 3:13). Ijkuak toTajtsin kikixtis nochi tlen xkuajli, akin melajkanemij yemelak pakiskej niman xkeman najmanaskej ipampa tlen xkuajli kichiuaj tlaltikpakchanejkej (Sal. 37:17).

10. ¿Tlenon kijtosneki titeiknelis?

¹⁰ “Yolpakij akin teikneliaj, pampa yejuamej noijki kimikneliskej” (Mat. 5:7, TNM). Titeiknelis kijtosneki titetlasojtlas niman titeasikamatis. Noijki kijtosneki timajmanas inpampa akin tlajyouiyaj. San ika, titeiknelis xsan kijtosneki tikmachilis nochi yejon. Biblia kijtoua ika titeiknelis noijki kijtosneki tikchiuas itlaj niman ijkon titepaleuis.

11. ¿Kenon noijki uelis tikchiuaskej ken yejon samaritano akin Jesús okiteneuj?

¹¹ (Xpoua Lucas 10:30-37). Tlen okichiuj samaritano akin Jesús okiteneuj kuajli techititia tlenon kijtosneki titeiknelis. Ijkuak yejon samaritano okitak ika se tlakatl okichiuilijkaj tlen xkuajli, yejua okikneli niman okipaleui. Ijkuak otlan kitetomilia yejon tlamachtijli, Jesús okijto: “Xuiya niman no ijki xteikneli”. Ika yejon, matotlajtoltikan: “¿Nikchiua ken okichiuj yejon samaritano akin Jesús okiteneuj? Ijkuak nikita ika oksekimej tlajyouiyaj, ¿nikimiknelia? ¿Uelis nikchiuas okseki niman ijkon nikinpaleuis? Se neskayotl, ¿nikinpaleuiya tokniuan akin iuejueyimej, tokniuan siuakaualtsitsintin niman telpokamej akin intajuan xnomachtiaj? ¿Uelis nikinyolseuis akin najmanaj?” (1 Tes. 5:14; Sant. 1:27).

12. ¿Tleka tiyolpakij ijkuak titeikneliaj?

 ¹² ¿Tleka tiyolpakij ijkuak titeikneliaj? Ijkuak tikinpaleuiyaj oksekimej, tikitaj ika “más paki on yejuan kitemaka xken on yejuan kiselia”. Niman noijki tikmatij ika tikyolpaktijtokej Jehová (Hech. 20:35; xpoua Hebreos 13:16). Tekiuaj David okijto yejuin itech akin teiknelia: “Jehová kitlajpiyas niman kichiuas mayolto. Yejua kiteneuaskej ika nemi ika pakilistli ipan tlaltikpaktli” (Sal. 41:1, 2). Tla tikimikneliaj oksekimej, Jehová techiknelis, niman yejuin kichiuas nochipa matinemikan ika pakilistli (Sant. 2:13).

13, 14. ¿Tleka yolpakij akin “yolchipaujkej”?

¹³ “Yolpakij akin yolchipaujkej, pampa yejuamej kitaskej toTajtsin” (Mat. 5:8, TNM). Tla tiknekij tiyolchipaujkej yeskej, noneki machipauak totlamachilis niman maka matikileuikan tlen tsokuiltik. Yejuin melak noneki matikchiuakan tla tiknekij ika Jehová makiyolpakti tlen tikchiuaj ipampa (xpoua 2 Corintios 4:2; 1 Tim. 1:5).

¹⁴ Akin yolchipaujkej yolpakij pampa nouikaj iuan Jehová, akin okijto: “Yolpakij akin kipakaj intlaken tlen ueyak” (Rev. 22:14, TNM). ¿Tlenon kijtosneki yejuin? Ijkuak titlajtouaj intech tlapejpeniltin akin “kipakaj intlaken tlen ueyak”, kijtosneki ika toTajtsin kimita chipaujkej, niman ika nemiskej ne iluikak kampa xuelis mikiskej niman ika nochipa pakiskej. Ijkuak titlajtouaj intech tlaltikpakchanejkej akin nemiskej ipan tlaltikpaktli akin “kipakaj intlaken tlen ueyak”, kijtosneki ika toTajtsin kinkauilia iuan manouikakan pampa kita ika yolmelaujkanemij. Biblia kijtoua ika “okimpakkej intlaken niman okimistalijkej ikan iyesyo on Borreguito” (Apoc. 7:9, 13, 14).

15, 16. ¿Kenon uelij kitaj toTajtsin akin yolchipaujkej?

¹⁵ Biblia kijtoua ika nion se tlaltikpakchane xuelis kitas toTajtsin niman ok nemis. Kuakon, ¿tleka okijto Jesús ika akin yolchipaujkej “kitaskej toTajtsin”? (Éx. 33:20). Ipan griego, tlajtojli “tikitas” kijtosneki “tiknemilis, tikasikamatis niman tikixmatis”. Kuakon, akin kitaj toTajtsin, yejuamej kuajli kixmatij niman kipatiojkaitaj ikualneskayouan (Efes. 1:18). Jesús kuajli okixkopin toTajtsin. Ika yejon, yejua okijto: “On yejuan nechita, no kita on Tajtli” (Juan 14:7-9).

¹⁶ Noijki tikitaj toTajtsin ijkuak tikasikamatij tlenon kichiua topampa niman ijkon techpaleuis (Job 42:5). Noijki uelis tikitaskej toTajtsin tla titlanemiliaj ipan yejon tlateochiualistin tlen kinmakas akin nokojtiliaj chipaujkej yeskej niman akin yolmelaujkanemij. Niman tlapejpeniltin yemelak kitaskej Jehová ijkuak kinyolitiskej niman yaskej iluikak (1 Juan 3:2).

17. ¿Tleka yolpakij akin kitejtemouaj maonia yolseuilistli?

¹⁷ Jesús noijki okijto: “Yolpakij akin kitejtemouaj maonia yolseuilistli” (Mat. 5:9, TNM). Yemelak tej, yejuin kichiua mayolpakikan. Santiago, inomachtijkauj Cristo, okijkuilo: “Yejuamej kichiuaj kanika para onyas yolyemanalistli niman ijkon yolmelajkanemij” (Sant. 3:18). Tla otokualanijkej iuan se tokniuj akin nemi ipan totlanechikol noso iuan se tochanejkauj, matiktlajtlanilikan Jehová matechpaleui niman ijkon maka sa iuan matokualanijtokan. Yejua techmakas iespíritu santo niman techpaleuis matikpiyakan kualneskayomej niman matipakikan. Jesús kuajli okijto ika tejuamej noneki tiktejtemoskej maonia yolseuilistli. Yejua okijto: “Tla ijkuak tiktemaka mouen ne tlaixpan tikelnamiki ika okse itlaj ika motech kualani, xkaua mouen ne ipan on tlaixpan niman xuiya itech on tlakatl. Achtopa iuan xmoyoltlaliti, niman kemaj oksejpa xuiya ne itech on tlaixpan niman xtemaka mouen” (Mat. 5:23, 24).

18, 19. ¿Tleka yolpakij akin kichiuaj ken Cristo maski tla kintlaueltokaj?

¹⁸ “Nenyolpakij nemejuamej ijkuak mechuijuikaltiskej niman mechtlaueltokaskej niman ijkuak kijtoskej tlen xkuajli niman tlen xmelauak nemotech san nopampa” (Mat. 5:11, TNM). ¿Tleka Jesús okijto yejuin? Yejua sakin okijto: “Xpakikan niman xnemikan ikan paktli, pampa ne iluikak nenkiseliskej se ueyi tetlayokolijli. On tlakamej no ijki okintlauelitakej niman tlajtlamach ika okintlajyouiltijkej on tiotlajtojkej yejuan onemikoj yeuejkaui ijkuak xe nennemiyaj” (Mat. 5:12). Ijkuak itlatitlankauan Cristo okinchiuilijkej tlen xkuajli niman okinnauatijkej maka matenojnotsakan, yejuamej “ouajkiskej ne imixpan on tetlakanojnotskej ikan paktli”. Melauak, xokinyolpaktij ika okinuijuitekej, yejuamej pakiyaj pampa okinpijpinaujtijkaj ipampa Jesús (Hech. 5:41).

¹⁹ Ipan yejuin tonaltin, akin tiktekichiuiliaj Jehová noijki tikxikouaj ika pakilistli ijkuak techtlaueltokaj noso ijkuak tikixnamikij uejueyimej tlaueltin ipampa Jesús (xpoua Santiago 1:2-4). Ijkon ken itlatitlankauan Cristo, tejuamej noijki xtechyolpaktia matechtlajyouiltikan noso matechtlaueltokakan. San ika, tla tiyolmelaujkanemij itech Jehová, yejua techmakas kojtilistli niman ijkon titlaxikoskej. Matikitakan tlen inpan onochiuj Henryk Dornik niman ikniuj. Ipan agosto, xiuitl 1944, okinuikakej ne kampa chikauak kintekitiltiskiaj niman kampa kintlajyouiltiskiaj. Akin kintlauelitayaj okijtokej: “Xtiuelij tikinchiualtiaj itlaj makichiuakan. Nesi kinyolpaktia ika tikintlajyouiltiaj”. Tokniuj Dornik okijto: “Xnechyolpaktiaya ika nechtlajyouiltiayaj; san ika, melak nipakiya pampa nikteititijtoya ika niknekiya niyolmelaujkanemis itech Jehová. Ika yejon, nikxikojtoya nochi tlen xkuajli nexchiuilijtoyaj”. Noijki kijtoua: “Melak onechpaleui nikchiuas teoyotl, pampa okichiuj maninonisiui itech Jehová. ¡Niman yejua yemelak onechpaleui!”.

20. ¿Tleka techyolpaktia tiktekichiuiliskej “toTajtsin akin paktika”?

²⁰ Ijkuak tikyolpaktiaj Jehová, “toTajtsin akin paktika”, tejuamej tiyolpakij maski techtlaueltokaj, maski techtlauelitaj tochanejkauan, maski tikualoj noso maski itiuejueyimej (1 Tim. 1:11, TNM). Noijki tiyolpakij pampa kuajli tikmatstokej ika toTajtsin, akin “xueli tekajkayaua”, kichiuas tlen yokijto (Tito 1:2). Ijkuak Jehová kichiuas yejon, tejuamej nion xtikilnamikiskej yejon tlaueltin tlen aman tikixnamiktokej. Ipan xochitlalpan, Jehová melak techteochiuas ken nion xtiknemiliaj. Ompa tinemiskej ika yolseuilistli (Sal. 37:11). Kema, ijkuak ijkon panos, yemelak tiyolpakiskej.