1. ¿Kenon tokniuan siuamej tlapaleuiyaj ipan ikalpan toTajtsin, niman tlenon kixnamikij? (Xkita tlaixkopinajli tlen onka ixpan yejuin revista).

MELAK tiyolpakij ika ipan totlanechikol nemij miyekej tokniuan siuamej akin chikauak tekitij. Yejuamej tlapaleuiyaj ipan tlanechikojli, tenojnotsaj niman kinpaleuiyaj tokniuan. Noijki, tlapaleuiyaj ijkuak nochipaua noso noyektlalia Kajli kampa tosentlaliaj. Melauak, yejuamej noijki kixnamikij tlen ouijtika. Sekimej kintlajpiyaj intajuan akin iuejueyimej. Oksekimej nokojtilijtokej chikauak kitekichiuiliskej Jehová maski inchanejkauan kintlauelitaj. Niman sekimej inselti kimiskaltijtokej inkoneuan niman noneki chikauak tekitiskej niman ijkon kinmakaskej tlen kinpoloua.

2. ¿Tleka noneki tikinpaleuiskej tokniuan siuamej?

² ¿Tleka noneki tikinpaleuiskej tokniuan siuamej? Pampa miyekej tlaltikpakchanejkej xkintlakaitaj siuamej ijkon ken noneki. Noijki, pampa Biblia techijlia ika noneki matikinpaleuikan. San matikonnemilikan yejuin, apóstol Pablo okitlajtlanili tlanechikojli tlen onkatka Roma kuajli makiselikan tokniuj Febe niman makipaleuikan “ika on tlen kipoloua” (Rom. 16:1, 2). Ijkuak Pablo ok fariseo katka, xkintlakaitaya siuamej pampa yejua ualeuaya kampa ijkon nochiuaya. San ika, ijkuak onochiuj inomachtijkauj Cristo, okichiuj ijkon ken Jesús niman okimititi siuamej ika kintlakaitaya niman kintlasojtlaya (1 Cor. 11:1).

3. ¿Tleka tikijtouaj ika Jesús xkichiuaya ijkon ken tlayekankej itech tlaneltokiltin akin nemiyaj ipan yejon tonaltin?

³ Jesús okintlakaitak nochimej siuamej (Juan 4:27). Yejua xkichiuaya ijkon ken tlayekankej itech tlaneltokiltin akin nemiyaj ipan yejon tonaltin. Se libro tlen tlajtoua itech Biblia kijtoua ika Jesús xkeman okijto itlaj tlen xkuajli intech siuamej. Aman tej, yejua melak kintlakaitaya on siuamej akin kitekichiuiliayaj iTajtsin. Yejua okijto ika on tlakamej niman siuamej akin kitekichiuiliayaj Jehová katkaj kentla ichanejkauan (Mat. 12:50).

4. ¿Tlenon tikitaskej ipan yejuin tlamachtijli?

 ⁴ Jesús nochipa okinpaleui siuamej akin kitekichiuiliayaj Jehová. Yejua noijki okintlakaitak niman otlajto inpampa. Matikitakan kenon uelis tikchiuaskej ijkon ken Jesús.

5. ¿Tleka sekimej tokniuan siuamej ouijtika kitaj kinnextiskej kuajli iminamigos?

⁵ Tinochimej, maski tla titlakamej noso tisiuamej, tiknekij tikinpiyaskej kuajli amigos. San ika, sekimej tokniuan siuamej ouijtika kitaj kinnextiskej akin kuajli imiuan nouikaskej. ¿Tleka? Matikitakan tlen kijtouaj sekimej tokniuan. Se tokniuj siuatl akin itoka Jordan * kijtoua: “Pampa xninonamiktia, miyekpa ouijtika nikita nikinnextis akin imiuan ninouikas ipan notlanechikol, nikmachilia kentla xakaj nechasikamati”. Kristen, se precursora akin otlapaleuito ipan okse tlanechikojli, kijtoua: “Ijkuak kemach tajsis ipan se tlanechikojli, uelis san moselti timomachilis”. Melauak, tokniuan tlakamej noijki uelis ijkon nomachiliskej. Niman tokniuan akin chantij imiuan inchanejkauan akin xiteixpantijkauan Jehová kanaj uelis kimachiliskej ika inchanejkauan xkimasikamatij, niman kanaj hasta ipan tlanechikojli ijkon nomachiliaj. Niman noijki uelis inselti nomachiliskej akin xuelij kisaj de inchan pampa kipiyaj se kokolistli noso pampa noneki kitlajpiyaskej se inchanejkauj akin kualo. Se tokniuj siuatl akin itoka Annette kijtoua: “Pampa nejua akin nonekiya niktlajpiyas nonan, xnikpiaya tiempo para ninemis imiuan oksekimej tokniuan”.

6. Itech tlen kijtoua Lucas 10:38-42, ¿kenon Jesús okinpaleui Marta niman María?

⁶ Jesús okixelo tiempo niman ijkon nemis imiuan sekimej siuamej akin kitekichiuiliayaj Jehová. Okimititi ika yejua katka iminamigo. San matikonnemilikan kenon onouikak iuan María niman Marta, akin kanaj xinonamiktiayaj (xpoua Lucas 10:38-42). Tikitaj ika yejuamej kuajli nomachiliayaj pampa Jesús kuajli kinnotsaya niman pampa kimititiaya ika kintlasojtlaya. María xonomojti notlalis ikxitlan Jesús niman ijkon kuajli kikakis. * Niman Marta xopinauj kijlis Jesús ika kualantoya pampa María xkipaleuijtoya. Ijkuak ijkon opanok, Jesús okimijli tlen ueliskia kinpaleuis. Noijki, okiteititi ika kintlasojtlaya yejuin siuamej niman imikniuj, Lázaro, pampa miyekpa komintlajpalouaya (Juan 12:1-3). Ika yejon, xtechmojkatlachialtia ika María niman Marta okitlajtlanilijkej makinpaleui ijkuak Lázaro opeuj kualo (Juan 11:3, 5).

7. ¿Kenon uelis tikinyolchikauaskej tokniuan siuamej?

⁷ Sekimej tokniuan siuamej san ueli kimitaj tokniuan ijkuak yauej ipan tlanechikoltin. Ika yejon, noneki tikintlajpaloskej, imiuan tonojnotsaskej niman tikimititiskej ika tikintlasojtlaj. Jordan, akin yotikteneujkaj, kijtoua: “Melak kuajli ninomachilia ijkuak nechijliaj ika okuelkakej kenon onitlanankili ipan tlanechikojli, ijkuak tokniuan nechijliaj imiuan manitenojnotsa noso ijkuak nechititiaj ika kinekij nechpaleuiskej”. Kuakon, matokojtilikan tikimititiskej tokniuan siuamej ika tikintlasojtlaj. Se tokniuj siuatl akin itoka Kia kijtoua: “Tla kemantika xniauj ipan tlanechikojli, kuajli nikmatstok ika tokniuan nechuajtlajtoltiskej ipan se mensaje tla kuajli ninemi. Yejon nechititia ika tokniuan najmanaj nopampa”.

8. ¿Kenon uelis tikchiuaskej ijkon ken Jesús?

⁸ Matikchiuakan ijkon ken Jesús niman matikxelokan tiempo niman ijkon uelis titlajtlajtoskej imiuan tokniuan siuamej. Uelis tikinnotsaskej touan matlakuatij tochan  niman ijkon imiuan toyolchikauaskej. Ijkuakon matitlajtokan itech tlen techpaleuis machikaui totlaneltokil (Rom. 1:11, 12). Tlayekankej noneki kichiuaskej ijkon ken Jesús. Yejua kimatstoya ika sekimej kintekiyomakaskia inselti nemiskiaj noso xnonamiktiskiaj, san ika, noijki okijto ika xkijtosneki tla akin nonamiktiaj niman kinpiyaj inkoneuan nochipa pakiskiaj (Luc. 11:27, 28). Yejua okijto ika nochipa tipakiskej tla tiktekichiuiliaj Jehová (Mat. 19:12).

9. ¿Kenon tlayekankej uelis kinpaleuiskej tokniuan siuamej?

⁹ Tlayekankej noneki kimitaskej tokniuan siuamej kentla innanuan niman imikniuan yeskiaj (1 Tim. 5:1, 2). Melak kuajli ijkuak tlayekankej kixelouaj tiempo niman ijkon nonojnotsaskej imiuan yejuin tokniuan achto peuas tlanechikojli noso ijkuak yotlan. Kristen kijtoua: “Se tokniuj tlayekanketl okitak ika miyek tekitl nikpiaya niman onechtlajtolti tleka melak nitekimikiya. Melak oniktlasojkamachili pampa kinekiya nechpaleuis”. Ijkuak tokniuan tlayekankej kixelouaj tiempo niman ijkon tlajtlatoskej imiuan tokniuan siuamej, kimititiaj ika najmanaj inpampa. * Annette noijki kijtoua: “Pampa ijkon kichiuaj, nejua más kuajli nikimixmati niman yejuamej noijki kuajli nechixmatij. Niman ijkuak nikixnamiki se tlauejli, xouijtika nikita nikintlajtlanilis manechpaleuikan”.

10. ¿Tlenon uelis tikchiuaskej niman ijkon kuajli manomachilikan tokniuan siuamej?

¹⁰ Tinochimej tiyolpakij ijkuak oksekimej kitaj tlen kuajli tikchiuaj niman ijkuak techijliaj ika kitlasojkamatij totekiyo. Ijkuak xakaj ijkin kichiua, tajmanaj. Se precursora akin xnonamiktia, itoka Abigaíl, kijtoua ika kemantika kimachilia ika xakaj kixmati. Kijtoua ika san kimixmatstokej ikniuan noso itajuan, san ika, yejua ka, hasta kimachilia ika xakaj kimati tla nemi. San ika, aman matikitakan tlen kijtoua se tokniuj akin xnonamiktia itoka Pam. Yejua miyek xiuitl okitekichiuili Jehová ken misionera, san ika, sakin ononek uajnokuepas ichan niman ijkon kintlajpiyas itajuan. Aman ikipiya ipantsin 70 xiuitl niman tlapaleuijtika ken precursora. Yejua kijtoua: “Melak nechpaleuiya ijkuak oksekimej nechijliaj ika kitlasojkamatij notekiyo”.

11. ¿Kenon okiteititi Jesús ika kinpatiojkaitaya siuamej akin inomachtijkauan katkaj?

¹¹ Jesús kipatiojkaitaya intekiyo sekimej siuamej akin “kipaleuiyayaj ikan on tlen kipiyayaj” (Luc. 8:1-3). Yejua xsan okinkauili makichiuakan yejuin kualtsin tekitl, noijki okimijli miyek tlemach itech tlen kinekiya kichiuas toTajtsin. Jesús okimijli ika mikiskia niman ika oksejpa yoliuiskia (Luc. 24:5-8). Niman ijkon ken yokimijlika inomachtijkauan, Jesús noijki okimasikamachilti yejuin siuamej ika kitaskiaj kenon tlajyouiskia niman mikiskia (Mar. 9:30-32; 10:32-34). Ijkuak okajsikej Jesús niman iapóstoles ocholojkej, sekimej itech yejon siuamej xokikaujteujkej ijkuak pilkatoya ipan kojtli melaktik (Mat. 26:56; Mar. 15:40, 41).

12. ¿Tlen tekitl okinmakak Jesús sekimej siuamej?

¹² Jesús okinmakak sekimej siuamej seki tekitl tlen ueyi kijtosnekiya. Matikilnamikikan ika akin kachtopa okitakej ika Jesús yoyoliujka katkaj sekimej siuamej. Jesús okintitlan makimijlitij inomachtijkauan ika yoyoliujka (Mat. 28:5, 9, 10). Ipan Pentecostés itech xiuitl 33, ijkuak toTajtsin okitemakak iespíritu santo, kanaj noijki ompa nemiyaj sekimej siuamej. Tla melauak ijkin opanok, yejuin tokniuan siuamej noijki opeuj kijtouaj nochi “on tlamauisoltin yejuan Dios okichiu” ika miyek tlajtoltin (Hech. 1:14; 2:2-4, 11).

13. a) ¿Kenon kitekichiuiliaj Jehová tokniuan siuamej? b) ¿Kenon uelis tikimititiskej ika tiktlasojkamatij tlen kichiuaj?

¹³ Kinamiki matikintlasojkamachilikan tokniuan siuamej ipampa tlen kichiuaj ipan ikalpan Jehová. Yejuamej tlapaleuiyaj ijkuak nochijchiuaj niman noyektlaliaj Kaltin kampa tosentlaliaj, ontlapaleuiyaj ipan tlanechikoltin kampa tlajtouaj okse tlajtojli niman noijki ontlapaleuiyaj Betel. Noijki, tlapaleuiyaj kampa tlaixpoliui, kampa kintlajtolkuepaj toamatlajkuiloluan, niman sekimej tekitij ken precursoras niman misioneras. Niman, ijkon ken tokniuan tlakamej, yejuamej noijki kiseliaj Tlamachtijli tlen kiselia se Precursor, Tlamachtijli tlen kiseliaj Akin Tenojnotsaj itech iTekiuajyo toTajtsin niman noijki iTlamachtil Galaad. Niman sekimej tokniuan siuamej akin yononamiktijkej kipaleuiyaj inueuentsin kuajli makichiua itekiyo tlen kipiya ipan tlanechikojli. Pampa yejuin tokniuan kipaleuiyaj inueuentsin akin tekiti ken tlayekanketl ipan tlanechikojli, yejua kuajli kichiua itekiyo (Efes. 4:8, TNM). ¿Kenon ueliskia tikinpaleuiskej tokniuan siuamej akin chikauak kitekichiuiliaj Jehová?

14. Ipampa tlen kijtoua Salmo 68:11, ¿tlenon kimatstokej tlayekankej akin kuajli kichiuaj intekiyo?

¹⁴ Tlayekankej akin kuajli kichiuaj intekiyo kimatstokej ika miyekej tokniuan siuamej melak tekitkej niman melak kuajli tenojnotsaj (xpoua Salmo 68:11, TNM). * Kuakon, tlayekankej kitaj kenon yejuin tokniuan uelis tlapaleuiskej ipan tlanechikojli. Tokniuj Abigaíl,  akin yotikteneujkaj, kijtoua ika kuajli nomachilia ijkuak tokniuan kitlajtoltiaj tlenon kipaleuiya kuajli matenojnotsa. Yejua kijtoua: “Yejon nechititia ika Jehová yonechmakak se tekitl ipan tlanechikojli”. Tlayekankej kuajli kimatstokej ika tokniuan siuamej akin kipiyaj chikauak intlaneltokil uelis kinpaleuiskej oksekimej tokniuan akin xmás iuejueyimej (Tito 2:3-5). Kuajli nesi ika kinamiki matikintlasojtlakan tokniuan siuamej niman matikintlasojkamachilikan nochi tlen kichiuaj.

15. ¿Kemanon nonekis matikinpaleuikan tokniuan siuamej?

¹⁵ Kemantika, sekimej tokniuan siuamej noneki yakaj makinpaleui niman inpampa matlajtokan (Is. 1:17). San matikonnemilikan yejuin, se tokniuj siuatl akin kauajli noso akin iueuentsin yokikauj kanaj nonekis yakaj ipampa matlajto noso makipaleui makichiua seki tlemach tlen iueuentsin kichiuaya. Se tokniuj lamajtsin kanaj nonekis yakaj makipaleui ijkuak tlajtos imiuan tlapajtikej. Niman se precursora akin kichiua okseki tekitl ipan ikalpan toTajtsin kanaj nonekis makipaleuikan tla oksekimej peuaj kijtouaj ika yejua xtenojnotsa ijkon ken yejuamej. ¿Kenon uelis tikinpaleuiskej? Oksejpa matikitakan tlen okichiuj Jesús.

16. Ijkon ken kijtoua Marcos 14:3-9, ¿kenon Jesús okipaleui María?

¹⁶ Jesús okinpaleui sekimej siuamej akin kitekichiuiliayaj Jehová ijkuak oksekimej kijtouayaj tlen xkuajli intech. Yejua okipaleui María ijkuak Marta opeuj xkuajli tlajtoua itech (Luc. 10:38-42). Niman noijki okipaleui María ijkuak oksekimej okajuakej pampa okinemilijkej ika okichiujka tlen xkinamikiya (xpoua Marcos 14:3-9). Jesús kimatstoya tleka ijkon okichiujka. Ika yejon, okijto: “In tlen nechchiuilia sanoyej kuajli. [...] In siuatl okichiu hasta kampa ouel”. Niman noijki okijto: “Nochiuiyan ipan in tlaltikpaktli kampa kiteijliskej on kuajli tlajtojli [...], no kiteijliskej on tlen okichiu in siuatl”. Niman yejon tlen kichiujtok yejuin tlamachtijli. ¡San matikonnemilikan kenon yejuin okiyolseui María! Melak temojkatlachialti ika ijkuak Jesús okijli María ika kuajli tlen okichiujka, noijki okijto ika notenojnotsaskia itech iTlajtol toTajtsin ipan nochi tlaltikpaktli.

17. ¿Kemanon nonekis titlajtoskej ipampa se tokniuj siuatl? Xkijto se neskayotl.

¹⁷ ¿Titlajtouaj inpampa tokniuan siuamej ijkuak noneki? Matikonnemilikan ika sekimej tokniuan kitaj ika se tokniuj siuatl, akin iueuentsin xnomachtia, xsaniman ajsi ipan tlanechikoltin niman nimantsin uajkisa ijkuak tlami. Niman noijki kitaj ika xmás kinuika ikoneuan. Kuakon tokniuan peuaj kitejteneuaj niman kinemiliaj ika nonekiskia kijlis iueuentsin makinkauili mauiyan tlanechikoltin. San ika, tokniuj siuatl kema kichiujtok nochi tlen ueli. Matikilnamikikan ika yejua noneki kitlakamatis iueuentsin, niman ikoneuan noijki noneki kitlakamatiskej. ¿Tlenon ueliskia tikchiuaskej niman ijkon tikpaleuiskej tokniuj? Tla tikijliaj ika techyolpaktia pampa nokojtilia kichiuas nochi tlen ueli niman tla tikimijliaj oksekimej tlen yejua kichiujtok, kanaj yejuin kichiuas maka sa makitejteneuakan.

18. ¿Tlenon más uelis tikchiuaskej inpampa tokniuan siuamej?

¹⁸ Noijki tikimititiaj tokniuan siuamej ika titlanemiliaj inpampa ijkuak tikchiuaj itlaj tlen kinpaleuiya (1 Juan 3:18). Annette, se tokniuj akin kitlajpiaya inan pampa kualouaya, kijtoua: “Sekimej noamigos kemantika nechuajpaleuiayaj maniktlajpiya nonan, ijkon nejua ueliya nikchiuaya okseki tlemach tlen nechpolouaya. Niman kemantika yejuamej nechuajkuiliayaj tlakuajli. Nikmachiliaya ika nechtlasojtlayaj niman ika niteuan katka ipan tlanechikojli”. Jordan noijki okipaleuijkej. Se tokniuj tlakatl  okijli kenon más kuajli kitlajpiyas icarro. Yejua kijtoua: “Nechyolpaktia nikitas ika tokniuan xkinekij nopan manochiua tlen xkuajli”.

19. ¿Tlenon más uelis kichiuaskej tokniuan tlayekankej inpampa tokniuan siuamej?

¹⁹ Tokniuan tlayekankej noneki kitaskej tlenon kinpoloua tokniuan siuamej. Kimatstokej ika Jehová kitstok tla kuajli kintlajpiyaj (Sant. 1:27). Ika yejon, tlayekankej nokojtiliaj kimasikamatiskej, ijkon ken Jesús okichiuj. Yejuamej nokojtiliaj kinnotsaskej ika tetlakaitalistli maski ijkuak nopopolouaj (Mat. 15:22-28). Ijkuak nokojtiliaj kinpaleuiskej, tokniuan siuamej kuajli nomachiliaj. Ijkon onomachili Kia ijkuak onochanpatlak. Ijkuak tokniuj akin kiyekana igrupo itech tenojnotsalistli okimat yejuin, nimantsin okimijli tokniuan tla ueliskiaj kipaleuiskej. Kia kijtoua: “Onechpaleuijkej maka sa maninotekipacho. Tlen onechijlikej niman tlen okichiujkej nopampa, melak onechpaleui. Tlayekankej onechititijkej ika najmanaj nopampa niman ika nochipa nechpaleuiskiaj”.

20, 21. ¿Kenon uelis tikteititiskej ika tikintlasojtlaj nochimej tokniuan siuamej?

²⁰ Ipan nochi tlanechikoltin, nemij miyekej tokniuan siuamej akin melak tekitkej niman noneki matikinpaleuikan. Tlen yeuejkaui okichiuj Jesús techititia ika noneki tokojtiliskej tikxeloskej tiempo niman ijkon imiuan tonojnotsaskej niman tikimixmatiskej. Noijki noneki tikimititiskej ika tiktlasojkamatij tlen kichiuaj ipampa Jehová. Niman noneki titlajtoskej inpampa ijkuak nonekis.

²¹ Apóstol Pablo okinteneuj chiknaui tokniuan siuamej ipan itlamiyan iamatlajkuilol tlen okintitlanili romanos (Rom. 16:1, 3, 6, 12, 13, 15). Kuajli tikmatstokej ika yejuin tokniuan melak kuajli onomachilijkej ijkuak okitakej ika Pablo kinuajtlajpalouaya niman pampa kuajli tlajtouaya intech. Tla tejuamej tikinpaleuiyaj nochimej tokniuan siuamej akin nemij ipan totlanechikol, tikimititiskej ika melak tikintlasojtlaj.