Xtlajtlani mamitspaleuikan

“Se san iselti uelis kitlaniskej, pero omemej uelis tetlaniskej” (Eclesiastés 4:12).

IJKUAK oksekimej techpaleuiyaj, más nimantsin ueli titetlanij. Kuakon, tla tikneki tijkajkauas ika tipoki, melak kuajli tla tiktlajtlanilia mamitspaleui se mochanejkauj, se moamigo noso yakaj akin tikmati ika mitspaleuis niman mitsijyouis.

¿Tleka xtikintlajtlanilia mamitspaleuikan akin yokikajkaujkej ika pokij? Yejuamej mitsasikamatiskej niman uelis mitspaleuiskej. Torben, se tlakatl akin nomachtia Biblia niman chanti Dinamarca, kijtoua: “Melak niktlasojkamati pampa onechpaleuijkej”. Niman Abraham, akin chanti India, yejuin okijkuilo: “Ouel onijkajkauj ika nipoki pampa nochanejkauan niman akin imiuan ninomachtia Biblia, onechititijkej ika nechtlasojtlaj”. San ika, kemantika xsan noneki ika tochanejkauan noso toamigos matechpaleuikan.

Se tlakatl akin itoka Bhagwandas, kijtoua: “Onipokik 27 xiuitl, san ika, ijkuak onikasikamat tlen Biblia kijtouaya itech tlen techijtlakoua, onijkajkauj. Onikyejyeko ika yolik nijkaujtias ika nipoki. Onikinkauj noamigos niman onikintlajtlanili tlapajtikej manechpaleuikan, san ika, yejon xonechpaleui. Ouel onijkajkauj ika nipoki ijkuak oniknots toTajtsin Jehová ika teoyotl. Onikijli nochi tlen nikmachiliaya niman oniktlatlaujtili para manechpaleui manikajkaua ika nipoki”.

Noijki noneki tikmatis ika miyek tlen tikixnamikis pampa tikneki tijkajkauas ika tipoki. Ipan okse tlamachtijli tikitaskej tlen uelis tikixnamikis.

[Recuadro]

¿NONEKI NIKINTEKITILTIS MEDICINAS?

Miyekej melak miyek tomin kitlanij pampa kinnemakaj medicinas para akin pokij, ken parches de nicotina. San ika, achto itlaj tiktekitiltis xtlanemili itech yejuin:

¿Kenon tepaleuiyaj? Kijtouaj ika medicinas tlen notekitiltiaj para tijkajkauas ika tipoki tepaleuiyaj maka sanoyej xkuajli xmomachili san pampa xtijkui cigarro. San ika, sekimej kijtouaj ika sakin xok más tepaleuiyaj.

¿Kenon teijtlakoua? Seki medicinas tlen kitekitiltiaj akin kinekij kikajkauaskej ika pokij, kichiuaj xelmoyaui, xajmankamiki niman hasta xnemili timomiktis. Noijki noneki tikmatis ika yejuin medicinas kipiyaj nicotina, kijtosneki ika tla tikintekitiltia san noijki yeskia ken tla tipoki niman noijki melak teijtlako.

¿Tlenon uelis mitspaleuis? Ijkuak okintlajtoltijkej sekimej akin xok pokij tlenon okinpaleui makikajkauakan ika pokij, melak miyekej okijtokej ika xokintekitiltijkej medicinas para kikajkauaskej yejon vicio.