Miyekej tlaltikpakchanejkej kinemiliaj ika tiknotsas toTajtsin san tikpolos tiempo, pampa xakaj nemi akin makinkaki. Sekimej kinotsaj toTajtsin, san ika, kimachiliaj ika xkinnankilia. Se ateo okinemili kenon katka toTajtsin niman okinots: “Maski san ichtaka xnechuajnotsa”. San ika, okijto ika toTajtsin xkeman onauat.

San ika, Biblia kijtoua ika yakaj nemi akin kikaki tlen tikijtouaj. Titlajtotokej itech toTajtsin akin nemi ipan iluikak. Ipan iTlajtol toTajtsin nesi tlajtoltin tlen okimijli ikalpan yeuejkaui: “Yejua yemelak mitsiknelis ijkuak mitskakis ika tiktlajtlanilia tlapaleuilistli; yejua mitsnankilis nimantsin ijkuak mitskakis” (Isaías 30:19). Niman okse tlaxelojli kijtoua: “Inteoyouj akin yolmelaujkej yejua kiyolpaktia” (Proverbios 15:8).

Biblia tlajtoua intech akin okinotskej toTajtsin niman okinkak. Se tlaxelojli ipan Biblia kijtoua ika Jesús “okichiu oraciones niman onoueyikatsajtsilij itech Dios. [...] Yejuan ueliskia kimanauiskia ipan on mikilistli. Niman Dios okak on tlen Cristo okijlij” pampa toTajtsin okiyoliti (Hebreos 5:7). Tiknextiaj okseki neskayomej ipan Daniel 9:20, 21 niman 2 Crónicas 7:1.

Kuakon, ¿tleka sekimej tlaltikpakchanejkej kimachiliaj ika xakaj kinkaki? Tla tiknekij matechkaki Jehová, * toTajtsin akin noteneua ipan Biblia, noneki tiknotsaskej san yejua niman xok yakaj okse. Niman toTajtsin kineki matiktlajtlanilikan tlen “yejua kineki”, kijtosneki, tlen yejua kuelita. Tla ijkon tikchiuaj, yejua kijtoua ika “techkakis” (1 Juan 5:14). Kuakon, tla tiknekij toTajtsin matechkaki, noneki tikixmatiskej niman tiktlakamatiskej.

Miyekej tlaltikpakchanejkej kuajli kimatstokej ika tiknotsas toTajtsin xsan itlaj tlen timomatis tikchiuas ipampa motlaneltokil. ToTajtsin yemelak kinkaki ijkuak kinotsaj. Isaac, akin chanti Kenia, kijtoua: “Oniknots toTajtsin manechpaleui manikasikamati Biblia. Xouejkauj, se tlaltikpakchane onechnisiui niman onechmakak tlen nechpolouaya”. Hilda, akin chanti Filipinas, kinekiya kikajkauas ika poki noso tlachichina. Miyekpa okiyejyeko, san ika, xouel. Kuakon iueuentsin okijli makitlajtlanili toTajtsin makipaleui. Sakin ijkuak okinots toTajtsin, yejua kijtoua: “Onechmojkatlachialti ken onechpaleui. Opeuj xok nikneki nipokis noso nitlachichinas. Oniuel onijkauj cigarro”.

Tla tlen mitsajmana noijki kajmana toTajtsin, ¿tiknemilia ika kinekis mitspaleuis?