ITECH TLEN TLAJTOUA IXPAN | ¿TLENON KINEMILIA TOTAJTSIN ITECH GUERRAS?
Ken toTajtsin kimitaya guerras tlen opanokej yeuejkaui
Se kalpan kitlajyouiltijtoyaj. Niman yejon kalpan miyekpa okitlajtlanili toTajtsin makipaleui, san ika, xnimantsin okinankili ijkon ken kichiaya. Titlajtouaj itech kalpan Israel tlen toTajtsin yokitlapejpenijka yeuejkaui. Niman Egipto akin tetlajyouiltiaya (Éxodo 1:13, 14). Israelitas miyek xiuitl otlamachixkej ika toTajtsin makitelti ken tetlajyouiltiayaj egipcios. Kuakon, oyejkok yejon tonajli ijkuak toTajtsin okinpaleui (Éxodo 3:7-10). Biblia kijtoua ika toTajtsin opeuj kixnamiki Egipto. Okititlanili majtlaktli tlajyouilistin niman okipopolo faraón ipan mar Rojo iuan akin tlaixnamikiya (Salmo 136:15). Jehová okiteititi ika yejua tlaixnamiki ika kojtilistli ipampa ikalpan (Éxodo 15:3, 4).
Pampa toTajtsin okimixnamik Egipto, nesi ika yejua kita kuajli seki guerras. Noijki okitekauili ika israelitas makimixnamikikan oksekimej. Se neskayotl, okimijli makichiuakan guerras iuan cananeos, akin melak xkuakualtin katkaj (Deuteronomio 9:5; 20:17, 18). David okinauati makimixnamiki filisteos hasta okijli kenon kichiuiliskia niman ijkon tetlanis (2 Samuel 5:17-25).
Tlen kijtoua ipan Biblia nesi ika ijkuak kintlajyouiltiayaj israelitas, toTajtsin kitekauiliaya maonia guerras niman ijkon kichiuaya maka mapoliui ken nonekiya noueyichiuas. San ika, onkatka yeyi tlemach ijkuak toTajtsin kitekauiliaya maonia guerras. Matikitakan kemanon.
-
SAN TOTAJTSIN KITLAPEJPENIAYA AKINON YAS IPAN GUERRA. Se tonajli, toTajtsin okimijli israelitas ika xnonekiya ika tlaixnamikiskej ipan yejon guerra. Ijkon okimijli pampa toTajtsin tlaixnamikiskia inpampa (2 Crónicas 20:17; 32:7, 8). Yejon okichiuj miyekpa ken ijkuak okimixnamik egipcios. San ika, noijki toTajtsin okinauati ikalpan matlaixnamikikan niman ijkon kipiyaskiaj Tlajli tlen yokijtoka kinmakas (Deuteronomio 7:1, 2; Josué 10:40).
-
SAN TOTAJTSIN KITOUAYA KEMANON PEUAYA GUERRA. Itekipanojkauan toTajtsin noneki tlamachiaskiaj ijkuak toTajtsin kimijliskia kemanon nochiuaskiaj guerras imiuan akin xkuakualtin akin kinyeualouayaj. Tla xkimijliaya toTajtsin xueliskiaj tlaixnamikiskej. Niman tla kichiuayaj, toTajtsin xok kintlajpiaya. Ipan Biblia nesi ika ijkuak san yejuamej kinemiliaya kichiuaskej se guerra, melak xkuajli onkisayaj. *
-
Maski toTajtsin okimixnamik kalpamej tlen onkatkaj Canaán, san ika, sekimej xokinmikti ken Rahab niman ichanejkauan
TOTAJTSIN XKUELITA YAKAJ MAMIKI. Itech Jehová ualeujtika nemilistli niman yejua otechtlali matinemikan (Salmo 36:9). Yejua kitlasojtla nemilistli niman xkineki yakaj mamiki. Teyolkoko ika sekimej tlaltikpakchanejkej kinemiliaj kenon kintlajyouiltiskej oksekimej niman hasta kinmiktiskej (Salmo 37:12, 14). Kemantika toTajtsin kitekauilia maonia guerras niman ijkon manotelti tlen xkuajli nochiua. San ika, nochipa ijkuak okinnauati israelitas mayakan ipan guerras, yejua okiteititi ika teikneliani niman kimijyouiya akin kixnamiki israelitas (Salmo 86:15). Okiteititi yejon ijkuak israelitas xkiteijliayaj ika onias guerra, nonekiya kiteijliskiaj ika manemikan ika yolseuilistli niman ijkon makipatlakan tlen kichiuayaj niman maka maonia guerra (Deuteronomio 20:10-13). Ijkon nesi ijkuak ipan Biblia kijtoua ika toTajtsin xpaki ijkuak se akin xyolkuajli miki, pampa yejua kineki ika se akin xyolkuajli makipatla iojui niman manemi (Ezequiel 33:11, 14-16). *
Itech tlen yokitakej, yeuejkaui, toTajtsin kitaya guerra tlen ika uelis kipopolos tlen xkuajli niman tlajyouilistli. San ika, Jehová kitlapejpeniaya kemanon nochiuaskia guerras niman akinon kichiuaskia, niman xkijtouayaj tlaltikpakchanejkej. Noijki ijkuak okichiuj guerra xok okichiuj ika melak matetlajyouiltikan. Pampa yejua xkuelita manochiua tlen xkuajli (Salmo 11:5). San ika ¿okipatlak itech tlen kinemiliaya itech guerras ijkuak Jesucristo opeuj itekiyo ipan kachtopa siglo?
^ párr. 7 Se neskayotl, ijkuak toTajtsin okimijlika maka makimixnamikikan amalequitas niman cananeos, yejuamej xotetlakamatkej niman okintlankej (Números 14:41-45). Tekiuaj Josías maski toTajtsin xokijli mauiya ipan guerra, yejua oyaj niman ompa okimiktijkej (2 Crónicas 35:20-24).
^ párr. 8 Israelitas xkimijliayaj cana neos ika kinekiyaj imiuan nemiskej ika yolseuilistli ijkuak xkimixnamikiyaj, pampa cananeos yokipixkaj cuatrocientos xiuitl ika kipatlaskiaj ken nemij. Ijkuak oyejkok tonajli ika kichiuaskiaj guerras imiuan, xok ueliskia ika yejuamej makikajkauakan ika kichiuaj tlen xkuajli (Génesis 15:13-16). Ika yejon, nonekiya makinpopolokan. San ika, onenkej cananeos akin kema okipatlakej tlen kichiuayaj niman omakiskej (Josué 6:25; 9:3-27).
Puede que también le interese
BIBLIA ¿TLENON TECHIJLIA?
Israelitas kalakij Canaán
Ijkuak israelitas okalakej Canaán, ¿tleka Jehová okimakixti Rahab niman ichanejkauan ne Jericó?
