Naciones Unidas kinyolchikaua nochimej tlaltikpakchanejkej san no yejuamej manopaleuikan, manotlakaitakan niman makitlajpiyakan tlaltikpaktli. ¿Tleka? Pampa, ijkon ken okijto Maher Nasser ipan revista Crónica ONU, nochiuiyan nochiujtika tlen xkuajli, kijtlakojtokej tlaltikpaktli, kintlajyouiltiaj oksekimej, miyekej kinkixtiaj itech inchan niman nochiuiyan onka kokolistli.

Sekimej hasta yokijtokej ika noneki onias san se tekiuajyotl. Ijkon okijtokaj omemej ixtlamatkej, se italiano akin itoka katka Dante niman Albert Einstein. Dante kinemiliaya ika xuelis tinemiskej ika toyojlo tla tixeliujtokej ipampa política. Niman okiteneuj tlen okijto Jesús, ika tla se tekiuajyotl “notlajkoxeloua, xoxotoni” (Lucas 11:17).

Sakin ika yopanoka ika okpa Guerra ipan nochi tlaltikpaktli, kampa onotoponijkej ome bombas atómicas, Albert Einstein okontlajkuilouili Asamblea General de las Naciones Unidas. Yejon carta tlen miyekan okis kijtouaya: “Naciones Unidas noneki nimantsin itlaj kichiuaskej niman ijkon manotlali se tekiuajyotl tlen matlayekana ipan nochi tlaltikpaktli niman makichiua matinemikan ika toyojlo”.

San ika ¿kenon tikmatij ika políticos itech yejon tekiuajyotl xok kichiuaskej tlen xkuajli, xok tetlachtekiliskej niman xok tetlajyouiltiskej? ¿Noso kenon tikmatij ika xkichiuaskej ken akin xkuajli tlayekanaj? Nochi yejuin techilnamiktia tlen lord Acton, se ixtlamatki británico, okijto: “Akin kipiya tlanauatijkayotl ijtlakaui, niman akin kipiya ueyi tlanauatijkayotl kuajli ijtlakaui”.

Tlaltikpakchanejkej xkipiya ika xexeliujtoskej tla kinekij nemiskej ika yolseuilistli. San ika ¿kenon nochiuas yejuin? ¿Uelis nochiuas? Biblia kijtoua ika kema. ¿Kenon? Xkichiuas se tekiuajyotl kampa nemij políticos, yejuin san kichiuas toTajtsin itechkopa se tekiuajyotl tlen yokitlali. Yejuin tekiuajyotl kuajli kiteititis ika san toTajtsin kinamiki matlayekana ipan nochi tlen yokichijchiuj. Biblia kijtoua ika yejuin tekiuajyotl itoka: “Itekiuajyo toTajtsin” (Lucas 4:43, TNM).

Jesús tlanemilijtoya itech iTekiuajyo toTajtsin ijkuak okijto yejuin ipan se teoyotl: “Mauajla motekiuajyo. Manochiua nikan ipan tlaltikpaktli tlen tejua tikneki” (Mateo 6:9, 10, TNM). Kema, iTekiuajyo toTajtsin xkichiuas tlen kinekij tlaltikpakchanejkej akin tsotsokamej niman san kinekij uejueyixtoskej. Yejuin Tekiuajyotl kichiuas tlen kineki toTajtsin.

ITekiuajyo toTajtsin noijki noixmati ken “Tekiuajyotl tlen onka iluikak” (Mateo 5:3, TNM). ¿Tleka? Pampa maski yejuin Tekiuajyotl kiyekanas tlaltikpaktli, onias ne iluikak. Xnemili kenon melak kualtsin yes. Yejuin Tekiuajyotl xkitlajtlanis makipaleuikan ika tomin. ¡Melak kuajli nomachiliskej akin ompa nemiskej!

Ipan se tekiuajyotl noneki nemis se tekiuaj, niman toTajtsin yokitlali Jesucristo matlanauati ipan iTekiuajyo. Biblia kijtoua yejuin itech Jesús:

• “Kipiyas nochi poder para tlamandaros. [...] Tlayekanas ken rey nochiuiyan, on yolseuilistli xkaman tlamis” (Isaías 9:6, 7).

•   “Niman yejua okimakakej tlanauatijkayotl, ueyilistli niman tekiuajyotl, niman ijkon tlaltikpakchanejkej, kalpamej, tlajtoltin nochimej makitekichiuilikan. Itlanauatijkayo se tlanauatijkayotl tlen xkeman tlamis” (Daniel 7:14).

• “Nochi tekiuajyotl yejuan onkaj ipan in tlaltikpaktli, yokinoyaxkatij toTEKO Dios niman iCristo” (Apocalipsis [Revelación] 11:15).

ITekiuajyo toTajtsin kichiuas nochi tlen kijtoua teoyotl padrenuestro, ¡ijkuakon kema nochiuas tlen kineki toTajtsin ipan nochi tlaltikpaktli! Ijkuak ijkon panos, tlaltikpaktli melak kualtsin yes pampa tlaltikpakchanejkej kimatiskej kenon kitlajpiyaskej yejuin tlaltikpaktli.

ITekiuajyo toTajtsin noijki kinmachtis tlaltikpakchanejkej kenon nemiskej. Nochimej kimatstoskej tlenon kuajli niman tlenon xkuajli. Noijki, xnotlauelitaskej niman xtlaj kinxelos. Isaías 11:9 kijtoua: “Xakaj uelis kichiuas tlen xkuajli, pampa ijkon ken on atl kitemiltia on mar, no ijki kixmatiskej toTEKO nochiuiyan ipan in tlaltikpaktli”.

ITekiuajyo toTajtsin kichiuas ika tlaltikpakchanejkej manemikan san sekan niman ika inyojlo, itlaj tlen Naciones Unidas xuelij kichiuaj. Salmo 37:11 kijtoua: “Sanoyej pakanemiskej ikan yolseuilistli pampa xitlaj kimpajsolos”. Ijkuakon, xok yakaj kiteneuas mayantli, guerra, tla kijtlakojtokej tlaltikpaktli noso tla nochiujtika tlen xkuajli. San ika ¿kemanon nochiuas yejuin? ¿Kemanon peuas iTekiuajyo toTajtsin kiyekanas tlaltikpaktli? ¿Kenon tlayekanas? ¿Kenon uelis mitspaleuis iTekiuajyo toTajtsin? Matikitakan.