Akin kuelita tekitis kuajli kichiua itekiyo niman maski itekiyo xueyi kijtosneki, kinektika kichiuas pampa kimatstika ika ijkon uelis kinokouilis tlen kipoloua niman kinpaleuis oksekimej.

Pampa nochipa onias tlen noneki tikchiuaskej. Noijki, tla tikuelita titekitis, melak mitspaleuis pampa aman miyekej xkuelitaj tekitiskej (Eclesiastés 3:13).

“Ijkuak chikauak nitekiti, kuajli ninomachilia niman niyolpaki, ika yejon, más nikuelita nitekitis. Tla chikauak titekiti, oksekimej kuajli tlajtoskej motech” (Reyon).

TLEN BIBLIA KIJTOUA: “Tla tichikajkatekiti tikpiyas tlajtlamach on tlen tikneki” (Proverbios 14:23).

Tikuelitas titekitis tla tikchiua yejuin tlen amantsin tikteneuaskej.

Xmomachti kenon más kuajli tikchiuas motekiyo. Ijkuak tikchijchiujtika motarea, titlachipaujtika mochan noso tikchiujtika okse tekitl, kuajli xtlanemili itech tlen tikchiujtika. Niman tla itlaj kuajli yotiuel, xkita kenon uelis más kuajli tikchiuas noso kenon nimantsin titlamis. Pampa tla más kuajli tikchiua motekiyo, más tiyolpakis.

TLEN BIBLIA KIJTOUA: “San akinon yejuan kuajli kichiua itekiu, uelis ajsis ontekitis itech sen rey. Yejua ximintech tekitis on yejuan xuejueyixtokej” (Proverbios 22:29).

Xtlanemili intech oksekimej. Miyekpa, ijkuak tejua tikchiua se tekitl tlen omitsmakakej, tikinpaleuijtika oksekimej. Xnemili yejuin, uelis tikinpaleuis mochanejkauan maka más masiauikan tla tejua tikchiua tekitl tlen mitsmakaj ipan mochan.

TLEN BIBLIA KIJTOUA: “Más paki yejuan kitemaka xken on yejuan kiselia” (Hechos 20:35).

Xkita kenon más uelis titekitis. Maka san xchiua tlen oksekimej mitstlajtlaniliaj, noijki xchiua itlaj okse. Ijkon, tejua tiktlapejpenis tlen tikchiuas. Kanaj nonekis más titekitis, san ika, tikchiuas pampa tejua tikneki, niman xpampa oksekimej mitschiualtiaj (Mateo 5:41).

TLEN BIBLIA KIJTOUA: “Nejua xnikneki tikchiuas on favor san afuerza, yej nikneki ma kisa ipan kuajli moyojlo” (Filemón 14).

Xtekiti ken kinamiki. Chikauak titekitis xkijtosneki ika san yejuin nochipa tikchiuas. Noneki titekitis san ken kinamiki niman ijkon uelis tiyolpakis ijkuak titekitis niman noijki ijkuak timoseuis.

TLEN BIBLIA KIJTOUA: “Más kuajli titekitis ken kitokaroua, niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli. Yejua in no sen tlaixkajkayaualistli ken tla se kinekiskia kajsis ikan ima on ajakatl” (Eclesiastés 4:6).