Titetlapopoluis kijtosneki tikilkauas tlen opanok niman xtikualantinemis ipampa tlen omitschiuilijkej. San ika, yejuin xkijtosneki ika xnoneki nentlajtoskej itech tlen yopanok.

TLEN BIBLIA KIJTOUA: “Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia” (Colosenses 3:13).

“Ijkuak tiktlasojtla yakaj, xsan tikita kenon nopopoloua, tikita kenon nokojtilia kichiuas tlen kuajli” (Aaron).

Tla xtikilkaua tlen opanok, uelis kijtlakos ken iuan timouika moixnamik, noijki peuas tikualos niman xkuajli timomachilis.

“Se tonajli, noueuentsin onechtlajtlanili maniktlapopolui itech itlaj tlen onexchiuili tlen melak onechyolkokojka. Maski ouijtika onikitak, oniktlapopolui, san ika, nikuelitaskia más nimantsin niktlapopoluiskia niman ijkon xnopatlaskia ken iuan ninouikaya noueuentsin” (Julia).

XMOTLAJTOLTI YEJUIN

Xnemili yejuin ijkuak moixnamik kichiua itlaj tlen mitsyolkokoua:

• ¿Tejua nimantsin timoyolkokoua?

• ¿Noneki mamitsijli ika onopopolo noso nimantsin tikilkaua tlen omitschiuili?

SAN SEKAN XMOTLAJTOLTIKAN YEJUIN:

• ¿Tiuejkauij noso nimantsin totlapopoluiyaj?

• ¿Tlenon uelis tikchiuaskej niman ijkon nimantsin totlapopoluiskej?

TLEN UELIS TIKCHIUAS

• Ijkuak moixnamik mitsyolkokoua, maka xnemili ika san okinek ijkon kichiuas.

• Xkasikamati moixnamik niman xkilnamiki ika “tinochimej tikchiuaj miyek tlajtlamach tlen xkuajli [noso topopolouaj]” (Santiago 3:2).

“Xouijtika tikitaj totlapopoluiskej ijkuak tiomemej topopolouaj, san ika, ouijtika se tetlapopoluis ijkuak san se nopopoloua. Noneki tiyolyemankej yeskej para tikijtoskej ika otopopolojkej niman totlapopoluiskej” (Kimberly).

TLEN BIBLIA KIJTOUA: “Más kuajli [...] iuan xmoyoltlali” (Mateo 5:25).