Tla toueyimatij, uelis titechikoitaskej. Yakaj akin noueyimati kinemilia ika nochi kuajli kichiua. Kinemilia ika melak ueyixtika niman ika akin xkichiuaj ken yejua, xuejueyixtokej. Tinochimej ueliskia ijkon titlanemiliskej. Encyclopædia Britannica kijtoua ika miyekej kinemiliaj ika melak uejueyixtokej xijkon ken oksekimej ipampa ken chantij, ken notlakentiaj, tlen kikuaj, tlen kichiuaj, tlen kineltokaj noso okseki tlemach. ¿Tlenon uelis tikchiuaskej tla xtiknekij ijkon titlanemiliskej?

“Ikan yolyemanilistli xmomatikan ika oksekimej más uejueyixtokej xken nemejuamej” (FILIPENSES 2:3).

¿Tlenon kijtosneki? Tla xtiknekij toueyimatiskej noneki tiyolyemankej yeskej. Tla tiyolyemankej, tikitaskej ika oksekimej más kuajli kichiuaj seki tlemach. Matikilnamikikan ika xakaj nemij akin nochi kuajli kichiua.

Matikitakan tlenon ipan onochiuj Stefan. Yejua kinemiliaya ika san ipaís melak ueyixtoya, kuakon kinchikoitaya akin oksekan ualeuayaj. Yejua kijtoua: “Niknemilia ika tla xtikneki titechikoitas,  noneki tiknemilis ika oksekimej más uejueyixtokej. Nejua xnochi nikmati, niman nochipa niueli itlaj itech oksekimej”.

Xtlanemili ijkon ken noneki niman xkilnamiki ika tinochimej topopolouaj. Noijki xkilnamiki ika oksekimej más kuajli kichiuaj itlaj tlen tejuamej xtiuelij. Niman maka xnemili ika nochimej akin nemij ipan se grupo san noijki kichiuaj.

Tla yopeuj tiknemilia tlen xkuajli itech yakaj, xmotlajtolti:

• ¿Yemelak xkuajli tlen kichiua noso sa ijkon niknemilia pampa xnikuelita tlen kichiua?

• ¿Yejua noijki nechitiliskia itlaj tlen xkuelita?

• ¿Tlenon melak kuajli kichiua tlen nejua xmás niueli?

Tla kuajli tiknankilia yejuin niman tikijtoua tlen melauak, xok tikchikoitas niman hasta tikitas tlen kuajli kichiua.