Kema. Maski Biblia xse libro tlen tlajtoua itech ciencia, kema iuan notlajtolnamiki. Matikitakan seki tlen Biblia temachtia. Nochi tlen tikteneuaskej mitspaleuis xkita ika Biblia yokiteneujka miyek tlemach tlen yeuejkaui miyekej nion xkimatiyaj.

•   Universo kipiya kemanon okichijchiujkej (Génesis 1:1). San ika, desde yeuejkaui miyekej kijtouaj ika nochi tlen onka onochijchiuj ika itlaj tlen ionkatka, niman ika xakaj okichijchiuj. Yeuejkaui, babilonios kineltokayaj ika omemej intajtsitsinuan akin okiskej ijtik mar yejuamej akin okichijchiujkej nochi tlen onka. Niman oksekimej kijtouaj ika universo onochijchiuj ijtik se ueyi totoltetl.

•   Universo kipiya tlen kiyekana (Job 38:33; Jeremías 33:25). San ika, miyekej kinemiliaj ika nemij tajtsitsintin akin uelis itlaj kichiuiliskej tlaltikpaktli niman ika xakaj uelis kimanauis.

•   Tlaltikpaktli xtlaj ipan pilkatika (Job 26:7). Yeuejkaui, miyekej kineltokayaj ika tlaltikpaktli san tepatlaktik katka niman ika onkatka ipan se yolkatl melak ueyi ken búfalo noso se ayotsin.

•   Atentin niman ameyaltin onokej pampa kiyaui, xini nieve niman tesiui. Ijkon panoua pampa on atl tlen onka ipan mar pokisa niman ipotokyo yauj ika tlakpak niman nochijchiua moxtli (Job 36:27, 28; Eclesiastés 1:7; Isaías 55:10; Amós 9:6). Yeuejkaui, akin chantiyaj Grecia kinemiliayaj ika atl tlen onka ipan atentin ualeuaya ipan mar. Miyekej ijkon kineltokayaj hasta ipan ipeujyan xiuitl 1700 ijkuak onoitak ika xijkon katka.

•   Seki tepemej ika yolik uajnestiuej niman okseki popoliujtiuej. Tepemej tlen aman tikimitaj yeuejkaui onkatkaj ijtik mar (Salmo 104:6, 8). San ika, miyekej kineltokayaj ika tepemej tlen aman tikimitaj ijkon ionkatkaj desde yeuejkaui pampa ijkon okinchijchiujkej tajtsitsintin.

•   Ijkuak yakaj kuajli tlachipaua, tepaleuiya maka maonia kokolistli. Tlanauatijli tlen okimakakej Moisés kijtouaya ika tla se israelita kikitskiaya se mijkatsintli, nonekiya kuajli nomapajpakas niman, tla yakaj kipiayaj se kokolistli tlen notepanoltiliaya, nonekiya kixeloskej. Niman noijki kuajli kimijliaya tlenon nonekiya kichiuaskej ijkuak onnoxixaskiaj niman ijkon maka kualoskej (Levítico 11:28; 13:1-5; Deuteronomio 23:13). San ika, yeuejkaui, egipcios kikuiyaj inkuitl niman ijkon kichijchiuaskej se pajtli tlen kinotlaliliayaj kampa nokokouayaj.

 Sekimej kijtouaj ika ciencia kiteititia ika Biblia nopopoloua. San ika, ijkuak se melak kuajli nomachtia Biblia, kasikamati ika yejon xmelauak. Matikitakan seki tlen ciencia yokijtouili Biblia:

 Tlen noijtoua: Biblia kijtoua ika universo okichijchiujkej san ipan chikuasen tonaltin niman ika cada se tonajli ouejkauj veinticuatro horas.

 Tlen melauak: Biblia kijtoua ika toTajtsin melak yeuejkaui okichijchiuj nochi tlen onka (Génesis 1:1). San ika, xkijtoua kech tiempo ouejkauj cada se tonajli itech yejon chikuasen tonaltin tlen noteneuaj ipan Génesis capítulo 1. Niman ipan Génesis 2:4 itech Traducción del Nuevo Mundo noijtoua ika nochi on tiempo tlen toTajtsin ouejkauj ika kichijchiua universo yeskia ken se “tonajli”.

 Tlen noijtoua: Biblia kijtoua ika xiujtli okichijchiujkej achto kichijchiuaskiaj tonajli, san ika, tla xtlaj tonajli xuelis itsmolinis nion noskaltis se xiujtli (Génesis 1:11, 16).

 Tlen melauak: Biblia kijtoua ika toTajtsin kachtopa okichijchiuj nochi tlen onka iluikak, kijtosneki ika kachtopa okinchijchiuj sitlalimej niman tonaltsintli, niman sakin okichijchiuj xiujtli (Génesis 1:1). Ipan kachtopa “tonajli” xmás tlauilpan katka maski ionkatka tonaltsintli. Sakin, ipan ika yeyi “tonajli”, más kuajli otlachipauj niman tonaltsintli opeuj más kuajli nesi, yejon okichiuj ika maitsmolini xiujtli ipan tlaltikpaktli (Génesis 1:3-5, 12, 13). Niman sakin ouel kuajli noita tonaltsintli desde ipan tlaltikpaktli (Génesis 1:​16).

 Tlen noijtoua: Biblia kijtoua ika tonaltsintli noyeualoua iyeualiyan tlaltikpaktli.

 Tlen melauak: Eclesiastés 1:5 kijtoua: “On tonaltsintli kisa, on tonaltsintli kalaki, niman kemaj nimantsin oksejpa yau kampa ompeua para oksepa kisa”. Yejuin tlaxelojli san kiteititia kenon tikitaj tonaltsintli desde nikan ipan tlaltikpaktli. Kema, tejuamej tikitaj kentla tonaltsintli yejua akin noyeualojtoskia iyeualiujyan tlaltikpaktli. Nochimej kijtouaj ika kisa tonaltsintli noso ika kalaki tonaltsintli, maski tikmatij ika tlaltikpaktli yejua akin noyeualoua iyeualiyan tonaltsintli.

 Tlen noijtoua: Biblia kijtoua ika tlaltikpaktli patlaktik.

 Tlen melauak: Ijkuak Biblia kiteneua hasta kampa ontlami yejuin tlaltikpaktli, xkijtosneki tla tlaltikpaktli patlaktik niman ika kipiya kanon ontlami (Hechos 1:8). Ipan Isaías 40:22 Biblia kuajli kijtoua ika tlaltikpaktli yeualtik.