Ijkuak Biblia kiteneua yakaj akin kitlajkali ikoneuj, xkijtosneki ijkuak se siuatl san noyejua kitejtemoua kenon kitlajkalis ikoneuj. San ika, kema onka miyek textos tlen techpaleuiya matikasikamatikan kenon kita toTajtsin nemilistli, hasta inemilis se konetl akin xiuajtlakati.

 ToTajtsin otechtlayokoli tonemilis (Génesis 9:6; Salmo 36:9). Yejua melak kipatiojkaita nemilistli niman noijki inemilis se konetl akin ok nemi ijtik inan. Ika yejon, ijkuak yakaj kitlajkali ikoneuj noso yakaj kitetlajkalilia, Biblia kijtoua ika temiktijtok.

 Tlanauatijli tlen toTajtsin okinmakak israelitas kijtouaya: “Tla omemej tlakamej nouijsokij niman kokouaj sen siuatl yejuan koneuaj, niman yejua kitlajkali ikoneu, pero on siuatl xmiki, tla ijkon, yejuan kipiya tlajtlakojli kitlaxtlauas ichkich ken kijtos iueuentsin on siuatl tla on jueces kijtouaj ika kuajli. Pero tla mikis on siuatl, ika onkaj nenkimiktiskej on yejuan otekokoj” (Éxodo 21:22, 23). a

•  ¿Kemanon peua tonemilis?

•  ¿Uelis kitlapopoluis toTajtsin yakaj akin okitlajkal ikoneuj?

•  ¿Uelis se siuatl kitlajkalis ikoneuj tla kijliaj ika yejua noso ikoneuj uelis mikiskej?

 ToTajtsin kijtoua ika inemilis se konetsintli peua ijkuak se siuatl koneuajtia noso piluajti. Ipan Biblia, ijkuak toTajtsin kiteneua se konetsintli akin xiuajtlakati, kiteneua kentla se tlaltikpakchane akin inemi. Matikimitakan seki textos tlen techititiaj kenon toTajtsin san noijki kita se akin nemi ijtik inan niman se akin yotlakat.

•   Tekiuaj David okijli toTajtsin: “Tejua kuajli otikitak ken opeu nochijtiu notlalnakayo” (Salmo 139:16). Kuajli tikitaj ika toTajtsin kitaya David ken se tlaltikpakchane maski xiuajtlakatiya.

•   Matikitakan okse. Achto uajnemiskia Jeremías, toTajtsin yokijtojka tlenon kichiuaskia, yejua okijli: “Ijkuak monanaj xe mitstlakatiliaya, nejua yonimitstlapejpenijka. No ijki, ijkuak xe titlakatiya, nejua yonimitstlalijka para titiotlajtojketl yes ipan on naciones” (Jeremías 1:5).

•   Lucas, se akin okijkuilo Biblia niman tepajtijketl katka, okitekitilti san se tlajtojli ika griego para kiteneuas se konetl tlen xitlakati niman se akin yotlakat (Lucas 1:41; 2:12, 16).

 Kema. ToTajtsin uelis kitlapopoluis yakaj akin okitlajkal ikoneuj. Tla peua kita nemilistli ken toTajtsin kita, xnoneki melak noyolkokos. Biblia kijtoua: “ToTEKO teikneliani niman kuajli iyojlo [...]. Totlajtlakoluan okinmejkuanij totech sanoyej uejka, ijkon ken uejka ikisayan tonaltsintli hasta kampa ikalakiyan” (Salmo 103:8-12). Jehová kintlapopoluis nochimej akin noyolkuepaj itech intlajtlakoluan. b Kuakon, tla noyolkuepa yakaj akin okitlajkal ikoneuj, yejua noijki kitlapopoluiskej (Salmo 86:5).

 Ijkon ken yotikitakej, toTajtsin melak kipatiojkaita inemilis se konetsintli akin xiuajtlakati. Ika yejon, se nantli xuelis kitlajkalis ikonetsin maski tla kijliskiaj ika yejua noso ikonetsin ueliskia mikiskej.

 San ika ¿tlenon panoua tla ijkuak yakaj ikitlakatilis ikonetsin noneki kitlapejpeniskej akinon kimakixtiskej, tla nantli noso tla konetsintli? Maski yejuin xmiyekpa ijkon panoua, tla ijkon panoskia, san ichanejkauan uelis kitlapejpeniskej akinon kimakixtiskej.