Biblia kuajli kiteititia ika toTajtsin kema nemi. Biblia noijki techijlia ika tla tejuamej tiknekij tikneltokaskej toTajtsin, noneki tijkuiskej totlanemilil niman xsan tikneltokaskej tlen miyekej san yokinejnemilijkej (1 Juan 5:20; Romanos 12:1). Biblia kiteneua seki tlemach tlen kiteititia ika toTajtsin kema nemi. San seki matikominteneuakan.

•   Ipan touniverso onka nemilistli niman nochi melak kualtsin onka, ¿xmelak ika yejuin techititia ika nemi yakaj akin okichijchiuj? Biblia kijtoua: “Nochi kajli yakaj tlakatl kichijchiua, pero Dios yejua okichijchiu nochi tlajtlamach tlen onkaj” (Hebreos 3:4). Maski yejuin itlaj tlen tinochimej tikmatij, miyekej ixtlamatkej yokinpaleuij makasikamatikan ika nemi yakaj akin okichijchiuj nochi tlen onka. a

•   Tinochimej tikuelitaskiaj tikmatiskej tleka otinemikoj. Niman maski tikpiyaj tlen ika tonpanotiuej xtiyolpakij. Para uelis tiyolpakis noneki tikixmatiskej toTajtsin niman tikueyichiuaskej. Kema, Biblia kijtoua ika uelis touikaskej iuan toTajtsin (Santiago 2:23; Apocalipsis 4:11). Yejuin xsan techititia ika nemi toTajtsin, noijki techititia ika yejua melak tetlasojtla niman ika kineki matikixmatikan niman matikueyichiuakan (Mateo 4:4).

•   Miyek teotlajtoltin tlen kinteneua Biblia onochiujkej maski yopanokaj melak miyek xiujtin ika yonoijtojkaj. Yejuin kuajli techititia ika yejuin teotlajtoltin ualeuaj itech toTajtsin pampa san yejua kimati tlenon panos ika tlayekapan (2 Pedro 1:21).

•   Akin okijkuilojkej Biblia okiteneujkej seki tlemach itech ciencia tlen miyekej xkimatiyaj. San matikonteneuakan yejuin: yeuejkaui miyekej kinemiliayaj ika tlaltikpaktli onkatka ipan se elefante, se kuapitsotl noso jabalí, se uakax noso okse yolkatl. San ika, Biblia kuajli techijlia ika toTajtsin okitlali “in tlaltikpaktli [...] ipan ajakatl” (Job 26:7). Noijki Biblia kuajli kijtoua ika tlaltikpaktli yeualtik (Isaías 40:22, TNM). Miyekej kinemiliaj ika yejon tlakamej akin okijkuilojkej Biblia kimatiyaj nochi yejuin pampa toTajtsin okimijli.

•   Biblia kinankilia miyek tlen notlajtoltiaj akin xtlaneltokaj itech toTajtsin, ken yejuin: ¿Tleka melak titlajyouiyaj niman tleka panoua tlen xkuajli? ¿Tleka religiones yokichiujkej miyek tlen xkuajli? (Tito 1:16). Tla kitaj kenijki Biblia kinankilia nochi yejuin, uelis tlaneltokaskej itech toTajtsin.