ToTajtsin nochi ueli kita niman kikui ikojtilis kampa yejua kineki (Proverbios 15:3; Hebreos 4:13). San ika, Biblia xkijtoua tla nochiuiyan nemi. Yej kijtoua ika yejua se espíritu niman ika kipiya kampa chanti.

•   Kenon toTajtsin: Yejua se espíritu (Juan 4:24). Ika yejon, xakaj ueli kita (Juan 1:18). Ipan tlatlachalistin tlen kinteneua Biblia nochipa nesi ika toTajtsin san sekan nemi. Niman xkeman noijtoua tla nochiuiyan nemi (Isaías 6:1, 2; Apocalipsis 4:2, 3, 8).

•   ¿Kanon chanti?: ToTajtsin chanti ne iluikak, ompa xijkon ken yejuin tlaltikpaktli. Niman ne iluikak kipiya kampa yejua nemi (1 Reyes 8:30). Biblia kijtoua ika sejpatipan, ángeles onosentlalijkej ixpan Jehová, a yejuin techititia ika toTajtsin kipiya kampa nemi (Job 1:6).

Tla toTajtsin xnochiuiyan nemi, ¿kijtosneki ika xuelis nechtlajpiyas?

 Ka, xyejon kijtosneki. Maski yejua chanti ne iluikak, yejua kintlasojtla akin chantij ipan tlaltikpaktli. Niman kita akinomej nokojtiliaj kitlakamatiskej niman kinpaleuiya (1 Reyes 8:39; 2 Crónicas 16:9). ¿Kenon techpaleuiya niman techtlajpiya?

•   Ijkuak tikchiuaj oración: Jehová techkaki ijkuak tiknotsaj (2 Crónicas 18:31).

•   Ijkuak melak tajmanaj: “ToTEKO nemi nisiu para kinyoltlalia on yejuan sanoyej noyolkokouaj, niman kinmakixtia on yejuan xok kipiyaj tlamachalistli” (Salmo 34:18).

•   Ijkuak tiknekij matechpaleuikan: Ipan Biblia Jehová techijlia tlenon noneki tikchiuaskej niman tlenon noneki tiktlapejpeniskej para kuajli tonkisaskej (Salmo 32:8).

¿Tleka sekimej kineltokaj ika toTajtsin nochiuiyan nemi?

 Tlen noijtoua: Tlen kijtoua Salmo 139:8 kiteititia ika toTajtsin nochiuiyan nemi pampa kijtoua: “Tla nitlejkoskia iluikak, tejua ompa tinemi, niman tla nitemoskia uejkatlan ijtik in tlaltikpaktli, no ompa tinemi”.

 Tlen melauak: Yejuin xkijtosneki ika toTajtsin nochiuiyan nemi, yej kiteititia ika maski san kanon tinemiskej yejua uelis techpaleuis.