Ipan Biblia, onotekitilti tlajtojli alma para notlajtolkuepas tlajtojli ika hebreo néfesch niman tlajtojli ika griego psykjé. Tlajtojli néfesch ika hebreo uelis kijtosnekis “yakaj akin nijyotia”, niman tlajtojli psykjé ika griego kijtosneki “yakaj akin yoltika”. a Kuakon, uelis tikijtoskej ika on alma kijtosneki yakaj akin yoltika, niman xitlaj tlen san toijtik tikpiyaj niman xmiki ijkuak timikij. Matikimitakan seki textos tlen más kuajli techasikamachiltia yejuin.

•   Biblia kijtoua ika ijkuak Jehová okichijchiuj kachtopa tlakatl, Adán, okiyekailpits niman “on tlaltikpaktlakatl opeu kipiya nemilistli” (Génesis 2:7). Yejuin kuajli techititia ika Adán xokiseli se alma, yejua onochiuj se alma, se tlaltikpakchane.

•   Biblia kijtoua ika se alma ueli kimatoka se mijkatsintli, ueli tlakua, ueli tekiti, kileuiya nakatl niman kintlakamati itlanauatiluan tekiuajkej (Levítico 5:2; 7:20; 23:30; Deuteronomio 12:20; Romanos 13:1). Yejuin san ueli kichiua se tlaltikpakchane.

¿Ueli miki se alma?

 Kema. Alma, kema miki. Matikimitakan seki textos tlen techititiaj yejuin.

•   Biblia kijtoua: “Alma yejuan tlajtlakos yejua mikis” (Ezequiel 18:4, 20, La Biblia de las Americas).

•   Ijkuak se israelita kichiuaya se ueyi tlajtlakojli, tlanauatijli kijtouaya “alma noneki mikis” (Éxodo 12:15, 19; 31:14, Reina-Valera, 1909; Levítico 7:20, 21, 27, Biblia de Ferrara). Levítico 19:8, itech versión La Biblia de las familias católicas noijki kijtoua: “On alma mikis”.

•   Ipan seki versículos de seki Biblias para kiteneuaskej se mikatsintli kitlalianij “alma tlen yomik” (Levítico 21:11; Números 6:6). Maski ipan seki Biblias yejon tlajtoltin notlajtolkuepa ken “tlalnakayotl tlen yomik” noso “mijkatl”, ika hebreo notlaliani néfesch tlen kijtosneki “alma”.

Alma niman nemilistli

 Ipan Biblia, alma noijki kijtosneki nemilistli. San matikonteneuakan Job 33:22, ompa notlalia tlajtojli “alma” para noteneuas “nemilistli”. Niman kemantika ijkuak ipan Biblia noteneuaj sekimej akin imikiyaj, Biblia kijtoua ika imikiskia inalma (Éxodo 4:19; Jueces 9:17; Filipenses 2:30).

 Tla tikasikamatij tlen kijtosneki tlajtojli alma, techpaleuis kuajli matikimasikamatikan seki versículos. Ipan seki Biblias, Génesis 35:18 kijtoua ika ialma se siuatl okistiaj, niman ipan Biblia Torres Amat, kijtoua ika siuatl “omiktiaj ialma”. Yejuin tlajtoltin techasikamachiltiaj ika on siuatl imiktoya. Ika yejon, ipan seki Biblias, yejuin versículo ijkin kitlajtolkuepaj: “On siuatl sa ika tlami onijyoti” (La Biblia Latinoamérica, 2011).

¿Tleka opeuj noneltoka ika alma xueli miki?

 Ipan miyek religiones temachtiaj ika tikpiyaj se alma, san ika, yejuin tlaneltokijli xkisa ipan Biblia, yej kisa itech tlen kineltokayaj griegos akin yeuejkaui onenkej. Diccionario enciclopédico del Cristianismo kijtoua ika griegos akin yeuejkaui nemiyaj kinemiliayaj ika tlalnakayotl (sōma) xeliujtika itech alma (psyché). San ika, Biblia xijkon temachtia.

 Totajtsin xkuelita ika miyekej makinelokan tlen yejuamej kinemiliaj, ken ika tikpiyaj se alma tlen xueli miki, ika tlen yejua temachtia. Biblia techijlia: “Xmotakan sano nemejuamej. Maka yakaj xkauilikan mechkajkayaua ika on xkuajli temachtilistli tlen xmelauak. On ken on tlajtlamach temachtilistli, san intemachtil niman incostumbre on tlaltikpaktlakamej” (Colosenses 2:8).