Tlajtlakojli kijtosneki xtiktlakamatis toTajtsin ika tlen tikchiua tikmachilia noso tiknemilia (1 Juan 3:4; 5:​17). Biblia kijtoua ika titlajtlakos kijtosneki tikchiuas itlaj tlen toTajtsin xkuelita noso xtikchiuas tlen noneki (Santiago 4:​17).

 Ika tlajtoltin tlen okijkuilojkej Biblia, tlajtojli “tlajtlakojli” kijtosneki xtikajxilis kampa noneki noso xtikchiuas ken noneki. Biblia tlajtoua itech sekimej soldados israelitas akin “sajnoye ueliyaj tlamotlayaj ikan tematlatl” niman nochipa kajxiliayaj kampa nonekiya. Tla notlajtolkuepaskia ijkon ken ijkuiliujtika, tikijtoskiaj “xtlajtlakouayaj” (Jueces 20:16). Kuakon, titlajtlakos kijtosneki xtikajxilis noso xtikchiuas ken noneki tlen toTajtsin technauatia.

 Pampa toTajtsin otexchijchiuj, san yejua kimelaua technauatis tlenon noneki tikchiuaskej (Apocalipsis 4:​11). Niman tejuamej noneki titlanankiliskej ipampa tlen tikchiuaj (Romanos 14:12).

¿Ueliskia yakaj xkeman tlajtlakos?

 Ka. Pampa Biblia kijtoua: “Nochi tlakatl ouets ipan tlajtlakojli, yejua ika okipolojkej on yolchipaualistli niman ueyilistli yejuan Dios kinekiya ma kipiyakan” (Romanos 3:​23; 1 Reyes 8:​46; Eclesiastés 7:​20; 1 Juan 1:8). ¿Tleka ijkon panoua?

 Kachtopa, Adan niman Eva xtlajtlakolejkej katka, pampa toTajtsin okinchijchiuj ken yejua (Génesis 1:​27). San ika, sakin, otlajtlakojkej ijkuak xok okitlakamatkej toTajtsin (Génesis 3:​5, 6, 17-​19). Ijkuak okinpixkej inkoneuan, okinpanoltilijkej on tlajtlakojli (Romanos 5:​12). Ken okijto tekiuaj David: “Ijkuak onitlakat, ye nikpiyaya tlajtlakojli” (Salmo 51:5).

¿Onka seki tlajtlakoltin tlen más uejueyimej?

 Kema. Biblia kijtoua ika akin chantiyaj Sodoma “sanoyej tlajtlakouayaj” niman kipiayaj “miyek imintlajtlakol” (Génesis 13:13; 18:20). Matikitakan yeyi tlen kiteititia tla se tlajtlakojli sanoyej ueyi.

1.   Kech ueyi. Biblia kijtoua ika onka seki tlajtlakoltin tlen sanoyej uejueyimej tlen xnoneki tikchiuaskej, ken tiauilnemis, tikinueyichiuas ídolos, titlachtekis, titlauanis, titlaixtlapachos, titemiktis niman titenaualuis (1 Corintios 6:​9-​11; Revelación 21:8). Biblia kijtoua ika yejuin tlajtlakoltin sejnekamej intech tlajtlakoltin tlen tikchiuaj achto tiknemiliskej, ken ijkuak tikijtouaj noso tikchiuaj itlaj tlen kiyolkokoua yakaj (Proverbios 12:18; Efesios 4:​31, 32). San ika, maski ijkon Biblia kijtoua ika noneki totlajpiyaskej maka tikchiuaskej tlajtlakoltin tlen xmás uejueyimej, pampa yejon uelis kichiuas matikchiuakan tlajtlakoltin tlen más uejueyimej (Mateo 5:​27, 28).

2.   Tleka titlajtlakos. Miyekej tlajtlakouaj pampa xkixmatij itlanauatiluan toTajtsin (Hechos 17:30; 1 Timoteo 1:​13). Biblia kijtoua ika xkuajli tla se tlajtlakoua maski tla xkinekiya ijkon kichiuas, san ika, noijki kijtoua ika más xkuajli ijkuak se tlajtlakoua pampa yemelak ijkon kinekiya kichiuas (Números 15:30, 31). Biblia kijtoua ika akin tlajtlakoua san pampa ijkon kineki, xkuajli kipiya iyojlo (Jeremías 16:12).

3.   Kechpa titlajtlakos. Biblia kijtoua ika xsan noijki san sejpa titlajtlakos niman miyekpa titlajtlakos (1 Juan 3:​4-8). ToTajtsin xkuelita ijkuak se tlajtlakoua maski yokasikamat tlen melauak (Hebreos 10:26, 27).

 Akin yokichiujkej se ueyi tlajtlakojli kanaj melak noyolajmanaj, uelis nomachiliskej ken tekiuaj David akin okijkuilo: “Notlajtlakoluan sanoyej nopan yoyetiyake. In sen tlamamajli yejuan xok niueli nikeua” (Salmo 38:4). San ika, Biblia techmaka se tlamachialistli: “Akin melak xkuajli makikaua iojui, niman yejon tlakatl akin teijtlakoua makipatla itlanemililuan; niman mauajnokuepa itech Jehová, akin yejua kiknelis, niman itech toTajtsin, pampa yejua melak tetlapopoluis” (Isaías 55:7, Traducción del Nuevo Mundo).