Tiiteixpantijkauan Jehová tikintekitiltiaj miyekej biblias tlen ika tomachtiaj. San ika, ipan miyekej tlajtoltin kampa yonotlajtolkuep Traducción del Nuevo Mundo de las Santas Escrituras melak tiktlasojkaitaj, pampa kuajkui itokayo toTajtsin, kuajli onotlajtolkuep niman kuajli nasikamati.

•   Kitekitiltia itokayo toTajtsin. Sekimej akin kichijchiuaj Biblia xkitlakaitaj akin yemelak okichijchiuj. Matikteneuakan seki, se Biblia kintokayotia ipantsin 70 tlaltikpakchanejkej akin otlapaleuijkej manochijchiua. San ika, yejuin Biblia xkitlalilia nion sejpa itokayo akin yemelak okichijchiuj, toTajtsin Jehová.

   Traducción del Nuevo Mundo xijkon kichiua, yejuin Biblia kitlalilia itokayo toTajtsin ipan miyekan kampa uajnestiaya ipan amamej tlen kachtopa onoijkuilojkej, niman nochimej akin okichijchiujkej yejuin Biblia xnoteneuaj intokayo.

•   Kuajli yonotlajtolkuep. Xnochi biblias tlen yonotlajtolkuepkej kijtouaj tlen yemelak kijtouayaj amamej tlen kachtopa onoijkuilojkej. Se Biblia, ipan Mateo 7:​13 niman 14 yejuin kijtoua: “Onkaj se ojtli yejuan teuika ne miktlan kampa tetlajyouiltiloyan”. San ika, ipan amamej tlen yeuejkaui onoijkuilojkej kitekitiltiaya tlajtojli “tlapopolouilistli” xkijtouaya “miktlan kampa tetlajyouiltiloyan”. Akin okitlajtolkuepkej kanaj ijkon okitlalijkej “miktlan kampa tetlajyouiltiloyan” pampa kineltokayaj ika akin xkuakualtin kintlajyouiltiskiaj ika tlitl nochipa. San ika, Biblia xijkon kijtoua. Ika yejon, Traducción del Nuevo Mundo yejuin kijtoua: “Xkalakikan ipan puerta pitstik; pampa tlen patlauak niman koyauak ojtli teuika ipan tlapopolouilistli, niman miyekej ompa kalakij”.

•   Kuajli noasikamati. Se Biblia xsan notlajtolkuepa kuajli, noijki noneki kuajli nasikamatis. Ipan seki biblias, Mateo 5:3 kitlajtolkuepaj ijkon ken yeuejkaui onoijkuilo maski xkuajli noasikamati. San ika, ipan Traducción del Nuevo Mundo kitlajtolkuepa ken aman tlaltikpakchanejkej tlajtouaj niman kuajli noasikamati.

Noijki Traducción del Nuevo Mundo xsan kitekitiltia itokayo toTajtsin, kuajli kitlajtolkuepa niman kuajli noasikamati, yejuin Biblia xnonemaka. Ika yejon miyekej tlaltikpakchanejkej ueli kipouaj Biblia ika intlajtol, maski tla xkipiyaj tomin tlen ika kikouaskej se.