Ijkuak se noapolaktia ken iteixpantijkauj Jehová niman sakin kikajkaua tenojnotsa niman xok touan nosentlalia, xtijkauaj tiknotsaj. Tochikauaj tikpaleuiskej machikaui itlaneltokil niman oksejpa touan manosentlali.

 Ijkuak se iteixpantijkauj Jehová akin yonoapolakti kichiua se ueyi tlajtlakojli, uelis kikixtiskej itech tlanechikojli. San ika, xnimantsin kikixtiaj. Tla akin yotlajtlako xkikajkaua ika ijkon kichiua niman xkitlakamati tlen kijtoua iTlajtol toTajtsin nion xnoyolkuepa, kuakon kema kikixtiaj itech tlanechikojli, niman iteixpantijkauan Jehová xok kinotsaj. Biblia techmelajkaijlia ijkuak kijtoua: “Xkixtikan nemotsajlan on tlajtlakolejketl” (1 Corintios 5:13).

 ¿Tlenon panoua ijkuak kikixtiaj se tlakatl, san ika isiuauj niman ikoneuan noijki iteixpantijkauan Jehová? Maski xok san sekan kiueyichiuaskej toTajtsin ken familia, xnoxeloua intech ichanejkauan. Xnopatla intlasojtlalis, ken nonotsaj iuan ixnamik, inkoneuan niman nochimej ichanejkauan.

 Akinomej yokinkixtijkej, uelis yaskej kampa tosentlaliaj, niman tla yejuamej kinekij, tlayekankej ipan tlanechikojli uelis kinpaleuiskej oksejpa manonisiuikan itech toTajtsin. Yejuin kinpaleuiya makichiuakan tlen kuelita toTajtsin niman oksejpa manochiuakan iteixpantijkauan Jehová. Ijkuak akin yokinkixtijkej itech tlanechikojli kikauaj kichiuaj tlen xkuajli niman teititiaj ika yemelak kinekij nemiskej ijkon ken Biblia kijtoua, oksejpa uelis nonotsaskej niman kiueyichiuaskej toTajtsin imiuan iteixpantijkauan Jehová.