Seki itech Traducción del Nuevo Mundo onochijchiuj ipan 1950. Ipan yejon tonaltin, sekimej tlaltikpakchanejkej tlajtouaj itech kenon onotlajtolkuep niman ika xijki ken okseki biblias, niman notlajtoltiaj tla yemelak kuajli onotlajtolkuep. Matikitakan tleka Traducción del Nuevo Mundo a tlamantik noso sejneka itech okseki biblias.

•   Onotlajtolkuep itech tlajkuiloltin tlen uelis tikneltokaskej. Ijkuak onochijchiuj Traducción del Nuevo Mundo ika inglés, onotekitiltijkej tlajkuiloltin tlen melak yeuejkaui onoijkuilojkej tlen aman tikinpiyaj niman uelis itech titlaneltokaskej. San ika, miyekej tlajkuiloltin tlen onotekitiltijkej ijkuak onochijchiuj King James Versión (Versión del Rey Jacobo) ipan 1611 xmiyek xiuitl kipiayaj ika yonochijchiujkaj niman xnochi kuajli onoijkuilojkaj, xijkon ken nochi tlajkuiloltin tlen yeuejkaui onochijchiujkej niman onotekitiltijkej ipan Traducción del Nuevo Mundo.

•   Xokipatlak tlen yeuejkaui uajnestiaya. Akin okitlajtolkuepkej Traducción del Nuevo Mundo onochikaujkej kitlaliskej nochi tlen toTajtsin okimijli akin okijkuilojkej (2 Timoteo 3:​16). Miyekej akin yokitlajtolkuepkej Biblia okinemilijkej ika ueyi kijtosneki kitlaliskej tlen kuajneltokatiuej tlaltikpakchanejkej niman maka tlen kijtoua toTajtsin. Matikteneuakan yejuin, yokipatlakej itokayo akin otexchijchiuj, Jehová, niman san kitokayotiaj toTajtsin niman toTeko.

•   Okitlali ken yemelak kijtouaya. Miyekej biblias tlen yonotlajtolkuepkej xkitlaliaj ijkon ken yemelak kijtouaya, kijtosneki ika ijkuak okitlajtolkuepkej okinemilijkej ika xnonekiya nochi kitlaliskej tlen ipan tlajkuiloltin tlen kachtopa onochijchiujkej kijtouaya, noso okitlalijkej okseki tlemach tlen okinemilijkej. Traducción del Nuevo Mundo xijkon ken okseki biblias, ompa okitlali tlen yemelak kijtouaya niman ika tlajtoltin tlen kuajli nasikamatiskiaj.

 Amoxtin tlen xonotlalijkej. Biblias tlen intlatki Iglesia Católica niman Ortodoxa kintlaliaj amoxtin apócrifos noso tlen xualeuaj itech toTajtsin. Yejuin amoxtin xkeman onotlalijkej ipan Tlajkuiloltin Hebreas tlen judíos kintekitiltiayaj. Ipan Biblia techijlia ika judíos yejuamej akin “Dios okinmakak para kejeuaskej iYektlajkuilol” (Romanos 3:​1, 2). Ika yejon Traducción del Nuevo Mundo niman okseki biblias tlen aman yonochijchiujkej, kuajli kichiuaj pampa xkintlaliaj amoxtin apócrifos.

 Tlaxeloltin pitentsitsintin tlen xonotlalijkej. Seki biblias kitlaliliaj tlaxeloltin pitentsitsintin niman tlajtoltin tlen ipan tlajkuiloltin tlen yeuejkaui onochijchiujkej xuajlayaj, yejon sa kemach okintlalijkej ipan Biblia. Traducción del Nuevo Mundo xijkon kichiua. Ipan yejuin tonajli, miyek biblias noijki xkitlaliliaj okseki tlaxeloltin pitentsitsintin niman tla kitlaliliaj kijtouaj ika xonokixtijkej ipan amatlajkuiloltin tlen uelis tikneltokaskej. b

 Kenon onotlajtolkuep. Kemantika, ijkuak notlajtolkuepa ika sesentetl tlajtojli xnasikamati tlenon noijtosneki. Tlen okijto Jesús ipan Mateo 5:3 notlajtolkuepa ipan seki biblias ken “tlateochiujtin akin pobres itech inespíritu” (Biblia de Jerusalén, Nácar-Colunga, Reina-Valera niman Torres Amat). Miyekej xkasikamatij ijkuak kijtoua “akin pobres itech inespíritu” pampa onotlajtolkuep ika sesentetl tlajtoltin ijkon ken yeuejkaui onoijkuilo. Sekimej kinemiliaj ika Jesús tlajtotoya ika noneki se nochiuas yolyemanki noso xtlaj kipiyas. San ika, yejua kijtosnekiya ika pakilistli noselia ijkuak tikmatstokej ika noneki matechyekana toTajtsin. Traducción del Nuevo Mundo kuajli kitlajtolkuepa tlen okijto Jesús ijkuak kitlalia ken “yolpakij akin kimatstokej ika kipiyaj ika kitejtemoskej tlen ualeua itech toTajtsin” (Mateo 5:3). c

•   Se tlajtolkuepketl niman ixtlamatki itech Biblia akin itoka Edgar J. Goodspeed, ipan metstli diciembre 8, 1950 okijkuilo yejuin itech Traducción del Nuevo Mundo de las Escrituras Griegas Cristianas: “Nikuelita nemotekiyo itech nemotenojnotsalis tlen nenkichiujtokej ipan nochi tlaltikpaktli, niman nechyolpaktia kenon onenkitlajtolkuepkej Biblia: xtlaj nenkiyanaj, kuajli nasikamati niman melak tepaleuij. Ompa onka melak miyek kuajli tlaixmatilistli, tlen nejua uelis nikijtos ika kuajli yonenkichiujkej”.

•   Tlamachtijketl Allen Wikgren, ipan Universidad de Chicago, okijto ika Traducción del Nuevo Mundo se kuajli neskayotl tlen onotlajtolkuep ken aman titlajtouaj niman ika kipiya miyek tlemach tlen xokikixtijkej itech okseki biblias, “melak kuajli tlen okichiujkej” (The Interpreter’s Bible, volumen I, página 99).

•   Itech Traducción del Nuevo Mundo de las Escrituras Griegas Cristianas, se británico akin kixmati tla se Biblia kuajli notlajtolkuepa itoka Alexander Thomson okijkuilo: “Kuajli nesi ika yejuin Biblia okitlajtolkuepkej akin melak kixmatij niman uelij, akin yonochikaujkej kitlaliskej ika inglés nochi tlen yemelak kijtoua tlajkuilojli griego” (The Differentiator, abril de 1952, página 52)

•   Ijkuak yokiteneujka naui tlemach tlen Biblia kijtoua ika opanok niman tlen yejua kinemilia ika xmiyekpa ijkon notlajtolkuepa, se akin nomachtia itech toTajtsin Charles Francis Potter okijto: “Uelis nikijtos ika grupo akin okitlajtolkuep yejuin Biblia, akin xnoteneuaj intokayo, kuajli okitlajtolkuepkej nochi tlajkuiloltin ika griego niman ika hebreo ika ueyi tlamachilistli” (The Faiths Men Live By, página 300).

•   Itech tlen okijkuilo itechkopa Traducción del Nuevo Mundo, Robert M. McCoy okijto ika maski kinemiliaya ika yejuin Biblia kipiaya itlaj tlen okseki ka, noijki kipiaya tlen kuajli. Ijkuak otlamito okijto yejuin tlajtoltin: “Traducción del Nuevo Testamento [tlen intlatki iteixpantijkauan Jehová] teititia ika itech yejuamej nemij ixtlamatkej akin kuajli kimatstokej kenon kiyektlaliskej ika tlamachilistli tlemach tlen noixnamiki ijkuak notlajtolkuepa Biblia” (Andover Newton Quarterly, enero 1963, página 31).

•   Tlamachtijketl Samuel MacLean Gilmour maski xokuelitak kenon onotlajtolkuep ipan Traducción del Nuevo Mundo seki tlemach, okijto ika akin okitlajtolkuepkej yejuin Biblia “melak kuajli kixmatiyaj tlajtojli griego” (Andover Newton Quarterly, Septiembre 1966, página 26).

•   Ijkuak otlajto itech Traducción del Nuevo Mundo tlen uajlaya ipan versión interlineal de las Escrituras Griegas Cristianas (Kingdom Interlinear Translation of the Greek Scriptures), tlamachtijketl Thomas N. Winter okijkuilo: “Ijkuak otlajtolkuepkej yejuin akin xnoteneuaj intoka melak kuajli yokasikamatkaj tlen kitlajtolkuepaskiaj, kuajli notlajtolnamiki niman kuajli onotlajtolkuep” (The Classical Journal, abril-mayo 1974, página 376).

•   Ipan 1989, Benjamin Kedar-Kopfstein, se tlamachtijketl akin kuajli kixmatstika tlajtojli hebreo niman ualeua Israel, yejuin okijto: “Ijkuak ninomachtia tlajtoltin itech Biblia ika hebreo niman kenon yonotlajtolkuepkej seki biblias, miyekpa niktekitiltia tlen kijtoua ika inglés ipan yejon tlen itoka Traducción del Nuevo Mundo. Nochipa ijkuak ijkon nikchiua, nikita kenon melak onochikaujkej kasikamatiskej tlen onoijkuilo”.

•   Jason David BeDuhn, akin temachtia itech tlaneltokiltin, kuajli okimitak kenon onotlajtolkuepkej chiknaui biblias tlen melak noixmatij ika inglés niman okijto: “Itech nochi biblias tlen yonikimitak san Traducción del Nuevo Mundo tlen melak kuajli onotlajtolkuep”. Niman maski miyekej tlaltikpakchanejkej niman oksekimej akin kixmatij Biblia kijtouaj ika ipan Traducción del Nuevo Mundo okitlalijkej san tlen kineltokaj akin okitlajtolkuepkej, yejuin tlakatl BeDuhn okijto: “Miyekej ijkon kijtouaj pampa yejuin Biblia kuajli nasikamati, xkipopoloua niman kitlalia tlajtoltin tlen yeuejkaui okijtokej akin okijkuilojkej Nuevo Testamento” (Truth in Translation, páginas 163 y 165).