¿Iteixpantijkauan Jehová kinchiualtiaj tlaltikpakchanejkej makipatlakan intlaneltokil?

REPRODUCIR EN

Ka, xakaj tikchiualtiaj. Ipan revista Amatl Tekakistilijketl tlen miyekan tikxelouaj, okijto: “Tikinchiualtis tlaltikpakchanejkej makipatlakan intlaneltokil, xkuajli”. a Niman xijkon tikchiuaj ipampa yejuin:

Jesús xkeman okinchiualti tlaltikpakchanejkej makiselikan tlen temachtiaya. Yejua kimatstoya ika san achijtsitsintin kikakiskiaj (Mateo 7:13, 14). Se tonajli ijkuak sekimej inomachtijkauan okikaujteujkej pampa xokiselijkej se tlamachtijli tlen okimijli, yejua okinkauili mauiyan, xokinchiualti manokauakan (Juan 6:60-62, 66-68).
Jesús okimijli inomachtijkauan ika xkipiya kinchiualtiskej tlaltikpakchanejkej makipatlakan tlen kineltokaj. Tlen kema kichiuaskiaj, nonekiya nochikauaskej kintejtemoskej akin ika inyojlo kinekiskej kinkakiskej (Mateo 10:7, 11-14).
Xtlaj ika tepaleui tla se kipatla tlen kineltoka pampa san kichiualtiaj. ToTajtsin kineki ika tlaltikpakchanejkej makiueyichiuakan ika inyojlo, xsan pampa okinchiualtijkej (Deuteronomio 6:4, 5; Mateo 22:37, 38).

¿Iteixpantijkauan Jehová kinekij kinchiualtiskej oksekimej makiselikan tlen temachtiaj?

Yemelak ika titenojnotsaj iTlajtol toTajtsin ipan “nochiuiyan ipan in tlaltikpaktli” niman tikchiuaj “kampa tojlan teixpan niman ipan techajchan” ijkon ken technauatia iTlajtol toTajtsin (Hechos 1:8; 10:42; 20:20). Ken akin kachtopa opeuj kichiuaj ken Cristo, kemantika techixkoijliaj ika titechiualtiaj makineltokakan tlen tejuamej tikneltokaj (Hechos 18:12, 13). San ika, yejuin tlen techteneuiliaj xmelauak. Tiktlakaitaj tlen nochimej uelis kitlapejpeniskej kineltokaskej. Tejuamej san tiknekij ika tlaltikpakchanejkej makixmatikan tlen kijtoua Biblia niman ijkon uelis kitlapejpeniskej ipan tlen tlaneltokijli nemiskej.

Xtikinchiualtiaj oksekimej makineltokakan tlen tejuamej tikneltokaj, noijki, xtiktekitiltiaj tlaneltokijli para titlapaleuiskej ipan política, nion xtitetekiuiltiaj tomin noso itlaj okse tlapaleuijli para manokalaktikan ipan toreligión. Xtikchiuaj ken akin kijtouaj ika kichiuaj ken Cristo, san ika, kichiuaj tlen xotemachti Cristo. b

¿Uelis se kipatlas itlaneltokil tla kineki?

Teotlajtoketl Abrahán xokitokak tlen kineltokayaj itajuan

Kema, ipan Biblia tlajtoua itech miyekej tlaltikpakchanejkej akin okitlapejpenijkej kitekichiuiliskej toTajtsin akin melauak niman xokitokakej tlen intajuan kineltokayaj. Ijkon okichiujkej Abrahán, Rut, sekimej tlaltikpakchanejkej ipan Atenas niman Pablo, se itlatitlankauj Cristo (Josué 24:2; Rut 1:14-16; Hechos 17:22, 30-34; Gálatas 1:14, 23). Noijki, Biblia kuajli kijtoua ika noneki toseselti tiktlapejpeniskej tla xtikseliskej noso tijkauaskej tlaneltokijli tlen kiselia toTajtsin (1 Juan 2:19).

Ipan Declaración Universal de Derechos Humanos, tlen ONU kijtoua ika “kinpiya tlanauatiltin tlen notlakamatij itech tlaltikpakchanejkej ipan nochi tlaltikpaktli”, kimelajkaijtoua ika tinochimej uelis “tiktlapejpeniskej tla tikpatlaskej totlaneltokil noso tlen tikneltokaj”. Noijki kijtoua ika nochimej tlaltikpakchanejkej uelis kitejtemoskej, kiseliskej niman kiteijliskej tlen kimatstokej niman tlen kinemiliaj. Nikan noijki kalaki itech tlen noneltoka. c San ika, tla tejuamej tikmatstokej ika uelis tikchiuaskej yejuin, kijtosneki ika noijki tikinkauiliskej oksekimej matlajtokan ipampa tlen kineltokaj niman maka makiselikan tlen tejuamej tikneltokaj.

¿Xkintlakaita ichanejkauan tla se kipatla itlaneltokil?

Ka, xijkon. Biblia techyoleua matikintlakaitakan nochimej tlaltikpakchanejkej, maski makipiyakan okse tlaneltokijli (1 Pedro 2:17). Noijki, iteixpantijkauan Jehová kitlakamatij tlen Biblia kijtoua ika kipiya kintlakaitaskej intajuan, maski makipiyakan okse tlaneltokijli (Efesios 6:2, 3).

San ika, xnochimej kiseliaj tlen Biblia kijtoua. Matikteneuakan se neskayotl, se siuatl akin onoskalti ipan Zambia kijtoua: “Kampa niualeua, tikpatlas motlaneltokil kijtosneki [...] tikimixnamikis mochanejkauan niman mokalpan”. Maski ijkon, ijkuak ichpochkonetl katka opeuj nomachtia Biblia iuan iteixpantijkauan Jehová niman okinemili kipatlas itlaneltokil. Yejua kijtoua: “Notajuan miyekpa onechijlikej ika melak onikinyolkoko pampa xnikintlakamatstoya. Yejon melak ouijtika onikitak pampa niknekiya yejuamej manechselikan. [...] Niyolmelaujkanemis itechkopa toTajtsin niman maka itech tlemach tlen noneltoka, xkijtosneki ika xniyolmelaujkanentika itechkopa nochanejkauan.” d

a Xkita Amatl Tekakistilijketl del 1 de enero de 2002, página 12, párrafo 15.

b Se neskayotl, nisiuj itech xiuitl 785, tekiuaj Carlomagno okitlali se tlanauatijli tlen kijtouaya ika makinmiktikan nochimej tlaltikpakchanejkej akin chantiyaj ipan Sajonia tla xkinekiyaj noapolaktiskej ken católicos. Okse neskayotl, la Paz de Augsburgo, tlajtolkaualistli tlen okichijchiujkej ipan 1555 akin noixnamiktoyaj ipan se guerra tlen opanok ipan Sacro Imperio Romano. Ipan yejon tlajtolkaualistli onotlali ika nochimej tekiuajkej san kitlapejpeniskiaj yejuin ome: yes católico noso luterano. Niman akin kinyekantoyaj noijki kineltokaskiaj tlen intekiuaj kitlapejpeniskia. Tla xkinekiyaj kichiuaskej, kipiaya ika kisaskej ipan yejon kalpan.

c Ken yejuin derechos onotlalijkej ipan Carta Africana de Derechos Humanos y de los Pueblos, Declaración Americana de los Derechos y Deberes del Hombre, Carta Árabe de Derechos Humanos de 2004, Declaración de Derechos Humanos de la Asociación de Naciones del Sudeste Asiático, Convenio Europeo de Derechos Humanos niman Pacto Internacional de Derechos Civiles y Políticos. San ika, xnochimej países kitlakamatij kichiuaskej ijkon ken kijtouaj yejuin tlanauatiltin.

d Biblia kijtoua ika toTajtsin akin melauak itoka Jehová.