Ipan Mateo 28:19, 20 itech Traducción del Nuevo Mundo Jesús okijto tlenon uelis tikchiuaskej tla tiknekij tochiuaskej iteixpantijkauan Jehová. Yejuin textos techititiaj ika tla tiknekij tiyeskej inomachtijkauan Jesús, noneki tikimijliskej oksekimej tlen yotiuelkej itech Jehová.

 1: Noneki tomachtiskej tlen temachtia Biblia. Jesús okintitlan inomachtijkauan makinmachtitij oksekimej tlen yejua yokinnauatijka niman ijkon noijki manochiuakan inomachtijkauan (Mateo 28:19, 20, TNM). Ipan Biblia, niman más kampa kiteneua tlen Jesús otemachti, tiknextis tlen mitspaleuis xyolpaki ipan monemilis (2 Timoteo 3:16, 17). Melak tikuelitaskiaj timitsititiskej tlenon temachtia Biblia niman xtlaj tiktlaxtlauas (Mateo 10:7, 8; 1 Tesalonicenses 2:13).

 2: Noneki tikchiuaskej tlen tiueltiuej. Jesús okijto ika inomachtijkauan xsan noneki ueliskej tlen yejua okinmachti, noijki noneki kichiuaskej tlen okinmachti (Mateo 28:20, TNM). Yejuin kijtosneki ika xnoneki tomachtiskej Biblia san pampa tiknekij melak titlamachilisejkej yeskej. Kanaj nonekis tikpatlas ken titlanemilia niman ken tikchiua (Hechos 10:42; Efesios 4:22-29; Hebreos 10:24, 25). Akin kitlakamatij tlen Jesús otemachti kinektokej kichiuaskej ken yejua okichiuj, ika yejon, yejuamej nosentemakaj itech Jehová (Mateo 16:24).

 3: Noneki timoapolaktis (Mateo 28:19, TNM). Ipan Biblia noijtoua ika ijkuak yakaj noapolaktia kentla mikiskia (noijki xkita Romanos 6:2-4, TNM). ¿Tleka kijtoua ika kentla mikiskia? Pampa ijkuak toapolaktiaj tijkauaj tlen xkuajli tikchiuayaj niman peua tikchiuaj tlen Jehová kineki. Kuakon, ijkuak timoapolaktis tikimititis oksekimej ika yotikchiuj yejon ome tlemach tlen Jesús okiteneuj niman ika tiktlajtlanilia toTajtsin mamitspaleui machipaujto motlamachilis (Hebreos 9:14; 1 Pedro 3:21).

 Xkimijli tlayekankej akin nemij ipan motlanechikol ika tikneki timoapolaktis. Yejuamej mouan tlajtoskej niman ijkon kitaskej tla kuajli tikasikamati tlenon temachtia Biblia, tla yopeuj tikchiua tlen tiueltiuj niman tla ika moyojlo yotimosentemakak itech toTajtsin (Hechos 20:28; 1 Pedro 5:1-3).

 Kema. Tejuamej kuajli tikinmachtiaj tokoneuan tlen kijtoua Biblia niman ijkon makimatikan tlen Jehová kuelita (Efesios 6:4). San ika, ijkuak noskaltiaj yejuamej noneki kitlapejpeniskej tla kinekij nomachtiskej niman kitlakamatiskej tlen temachtia Biblia para uelis noapolaktiskej (Romanos 12:2). Kema, toseselti noneki tiktlapejpeniskej tla tikueyichiuaskej Jehová noso ka (Romanos 14:12; Gálatas 6:5).