Iní̱n se̱ gobiernoj yej onoʼ ajko, yej yawi kipolo̱ti nochi tekiwajmej yej a̱man onokej. Pan Biblia kijtowa: «Dios yej onoʼ ajko yawi kita̱li̱ti se̱ reinoj yej nike̱man yawi poliwiti. Wan iní̱n reinoj ayá̱ yawi pano̱ti pan seuʼ a̱ltepe̱ʼ. Yawi kita̱taksati wan kipolo̱ti nochi ini̱nmej gobiernoj» (Daniel 2:44). Wan iní̱n gobiernoj yawi kichi̱wati yej Dios kineki pan Ta̱jli ijkó̱n ken nepa ajko. Irreinoj Dios, iní̱n se̱ gobiernoj yej nochimej tiknekij, wan yawi kichi̱wati iga nochimej yej cha̱ntitokej pan Ta̱jli maonokan sekan. ¿Melá̱ iga iní̱n se̱ ye̱kti tajto̱l? Tajto̱lti Mateo 6:9, 10 wan 24:14.

Pan nochi gobiernoj o tekiwajyo moneki se̱ tekiwaj, inó̱n iga Jehová kitapejpen Jesucristo, iga mayawi Tekiwaj pan Irreinoj Dios. Tajto̱lti Revelación (Apocalipsis) 11:15.

Jesús te̱chiwiliá yej ye̱kti iga te̱neki wan nochipa kitajto̱lkaki Dios, inó̱n iga yéj, yej ma̱j ye̱kti tekiwaj (Mateo 11:28-30). Wan Jesús welij kipale̱wiá tajta̱gamej wan siwa̱tkej, wan ijkó̱n kichi̱was kua̱ desde ajko magoberna̱ro pan Ta̱jli. Kua̱ Dios kiketsaʼ de ka̱n miktoya, Jesús yajki ajko seuʼ biáj, wan kichaʼ iga Jehová makijli iga mayawi Tekiwaj (Hebreos 10:12, 13). A̱man Dios kita̱lijya ken tekiwaj iga welijya magoberna̱ro. Pan Biblia kijtowa iga Dios kimaʼ, «gobernación wan weychi̱walis wan reinoj» (Daniel 7:13, 14).

Biblia kijtowa iga wan Jesús yawij goberna̱ro̱tij sekin de yej kitajto̱lkakij Dios. Pan Daniel 7:27 moijliá «santos». Yej Dios achto kitapejpen iga maya̱kan santos, yajkij iyapostolmej Jesús. Desde inó̱n biáj wan a̱man, Dios kitapejpentoʼ sekin tajta̱gamej  wan siwa̱tkej yej kitajto̱lkakij iga maya̱kan tekiwajmej ajko. Ijko̱nsan ken Jesús, kua̱ ini̱nmej mikij, Dios kiketsa ken espíritus. Tajto̱lti Juan 14:1-3 wan 1 Corintios 15:42-44.

¿Ke̱ski ya̱tij ajko? Itajto̱l Dios kijtowa iga ayá̱ komatimej ya̱skej ajko. Jesús kijlij idiscipulojwan «ovejas yej ayá̱ ankomatimej» (Lucas 12:32). Yej yawij goberna̱ro̱tij wan Jesús ya̱tij 144.000. Pan Biblia kijtowa: «Nikitaʼ iga Cordero ejkatoʼ pan tepe̱ʼ Sión, wan yéj onokej ciento cuarenta y cuatro mil, wan pan iyi̱xtaj de ini̱nmej ijkuilijtoʼ ito̱ka̱ de yéj wan ito̱ka̱ de Itaj» (Revelación 14:1). Yejeme̱n wan Jesús goberna̱ro̱skej pan Ta̱jli desde ajko.

Jesús tsi̱ntiʼ ken tekiwaj pan 1914, wan yej achto kichij yajki iga kiki̱xtij de ajko Tsitsimiʼ wan iyangelmej wan kimo̱taʼ (o kitajkal) tani pan Ta̱jli. * Tsitsimiʼ pux kuejkuesitiwa̱laj wan kichij komati tejté̱ yej aye̱kti pan ta̱jli (Revelación 12:7-10, 12). Desde inó̱n xiwiʼ wan a̱man moita ma̱j komati tejté̱ yej aye̱kti. Onoʼ tamijmiktilis, ta̱l-oli̱nalis, kokolis wan a̱pismikilis, nochi iní̱n kine̱xtiá iga áchisan poliwi iga Irreinoj Dios yawi kigoberna̱ro̱ti Ta̱jli. Jesús kijtoj: «Kua̱ xikitakan mapano iní̱n tejté̱, xikmatikan iga Irreinoj Dios yáwiya asiti» (Lucas 21:31). Tajto̱lti Lucas 21:7, 10, 11.

Pan nochi ta̱jli nemi momoya̱wa Itajto̱l Dios, wan ijkó̱n Irreinoj Dios nemi kinechkowa komatimej de nochi a̱ltepe̱mej. Millones de tajta̱gamej wan siwa̱tkej yej yo̱lyama̱nimej, nemi kitajto̱lkakij Jesús iga kitaj ken itekiwaj. Nochi ini̱nmej ayá̱ mikiskej kua̱ Irreinoj Dios makipolo pan iní̱n ta̱jli nochi tejté̱ yej aye̱kti. Inó̱n iga si tiknekij mate̱maka tejté̱ yej ye̱kti iní̱n Reinoj, moneki matiktajto̱lkakikan Jesús iga yéj totekiwaj. Tajto̱lti Revelación 7:9, 14, 16, 17.

Pan mil xiwiʼ, iní̱n Reinoj yawi kichi̱wati yej Dios kinekiá matikpiakan desde achto. Nochi Ta̱jli mochi̱was monsajtiʼ. Kua̱ tamis iní̱n mil xiwiʼ, ompa tamis iga goberna̱ro Jesús wan yawi kikuepili̱ti Itaj, iní̱n Reinoj (1 Corintios 15:24-26). ¿Tiknekiskiá xikijli agaj de iní̱n Reinoj? Tajto̱lti Salmo 37:10, 11, 29.