Ko e ha ne nakai fakaatā ha tagata ke tuku e tau tohi he Tau Fakamoli a Iehova ke he falu faahi kupega hila po ke social media?

Manamanatu falu tagata ha kua foaki e tautolu e tau tohi ha tautolu ka e nakai totogi, maeke a lautolu ke lagaki (copy) po ke tuku ai he falu faahi kupega hila po ke social media. Ka e lahi mahaki e lekua ne tupu mai he mena nei ti nakai muitua foki ke he Tau Kupu Fakaaoga * (kikite matahui tala) ma e tau faahi kupega hila ha tautolu. Talahau fakamaali mai he Tau Kupu nei kua nakai fakaatā ha tagata “ke tuku e tau fakatino, tau tohi, tau fakamailoga, tau musika, tau ata, tau vitiō, po ke tau vala tala mai he kupega hila nei ke he Initanete (ha faahi kupega hila, faahi ke tufatufa e tau faila, faahi ke tufatufa e tau vitiō, po ke social network).” Ko e ha kua latatonu e tau poakiaga nei?

Ko e tau mena oti he tau faahi kupega hila ha tautolu kua fakamau fakavē, kakano kua puipui matafakatufono ai. Aoga e mena nei ha kua lagomatai ke puipui ai neke fakaaoga fakahehē. Ko e tau tagata tiaki taofiaga mo e falu tagata ne manako ke fakakelea e gahua ha tautolu, ti tuku e tau tohi ha tautolu he falu magaaho ke he tau faahi kupega hila ha lautolu ke futiaki e onoonoaga he Tau Fakamoli a Iehova mo e falu. Ka ko e tau faahi ia ne tuku foki e lautolu e tau mena ne fakatupu e fakauaua ke he tau loto he tau tagata. (Salamo 26:4; Tau Fakatai 22:5) Falu ne fakaaoga e tau vala tala ha tautolu po ke fakamailoga (logo) ha tautolu he jw.org ke fakatātā, he tau mobile app, mo e tau koloa ne sela e lautolu. Ha kua puipui matafakatufono ha tautolu a tau vala tala mo e fakamailoga, maeke a tautolu ke uta ke he fakafiliaga ke taofi a lautolu he taute pihia. (Tau Fakatai 27:12) Ka e nakai lalago he tau fakafiliaga a tautolu kaeke kua fakaatā e tautolu falu tagata, pihia mo e tau matakainaga ha tautolu ke tuku e tau tohi ha tautolu ke he falu faahi kupega hila po ke fakaaoga e fakamailoga he jw.org ke sela aki e tau koloa.

Ka moua mai e tau tohi ha tautolu he ha mena kehe ka e nakai he jw.org, liga to hagahaga kelea ai. Tuku mai e Iehova e tau mena kai fakaagaaga ki a tautolu puhala hokoia ni he “fekafekau fakamoli mo e loto matala.” (Mataio 24:45) Fakaaoga hokoia ni he “fekafekau” e tau faahi kupega hila pauaki ke foaki e tau mena kai fakaagaaga​—ko e www.dan124.com, tv.dan124.com, mo e wol.dan124.com. Ti tolu ni e app pauaki ha tautolu ma e tau matini utafano​—ko e JW Language^®, JW Library^®, mo e JW Library Sign Language^®. To nakai moua e tautolu he tau faahi nei mo e tau app nei ha fakatātāaga po ke ha mena taha mai he lalolagi ha Satani. Kaeke ke moua e tau tohi ha tautolu mai he falu faahi kupega hila po ke app, ha ha i ai e hagahaga kelea ha kua liga fai mena kua hiki.​—Salamo 18:26; 19:8.

Lafi ki ai, ka tuku e tautolu e tau vala tala he tau faahi kupega hila ha tautolu ke maeke e tau tagata ke tohi e tau manatu, fakaatā he mena nei e tau tagata tiaki taofiaga mo e falu ke ekefakakelea e fakatokatokaaga ha Iehova. Taufetoko mogoia e falu matakainaga mo e tau tagata nei, ti kua nakai fakalilifu he mena ia a Iehova. Ko e tau fakatutalaaga pihia he Initanete ne nakai ko e puhala hako ke fakatonu e manamanatuaga he taha tagata mo e lagomatai a ia ke maama e kupu mooli. (1 Timoteo 6:3-5; 2 Timoteo 2:23-25) Falu tagata foki ne fakatū e tau faahi kupega hila mo e hafagiaga ke he social media ne tuga kua mai he fakatokatokaaga po ke mai he tau matakainaga he Kau Fakatufono. Ka kua nakai mooli e tau mena nei. Ko e tau matakainaga takitaha he Kau Fakatufono ne nakai fai lau pauaki he Kupega Hila po ke hafagiaga ke he ha faahi social media.

Ka takitaki e tautolu e tau tagata ke he jw.org, kua lalago e tautolu e fakamatala he “tala mitaki.” (Mataio 24:14) Ko e tau faahi kupega hila mo e tau app ha tautolu kua holo ki mua e mitaki. Manako a tautolu ke he tau tagata oti ke aoga mai ai. Ti kua fakaatā a tautolu ke meli hila ke he falu e lagaki he tau tohi ha tautolu po ke fakafano ki a lautolu e matutakiaga ke he faahi kupega hila ha tautolu. He puhala nei kua takitaki e tautolu e tau tagata ke he punaaga hokoia ne puhala mai e Iehova e tau mena kai fakaagaaga, ko e “fekafekau fakamoli mo e loto matala.”