KUA ha ha he tua e malolō lahi mahaki. Ma e fakatai, pete ne manako a Satani ke moumou e tuaga fakaagaaga ha tautolu, taute he tua a tautolu “ke tamate e tau fana kaka oti hana kua kelea.” (Efeso 6:16) Ka ha ha ia tautolu e tua, maeke a tautolu ke fehagai mo e tau lekua ne tuga e tau mouga. Tala age e Iesu ke he tau tutaki haana: “Kaeke ke lata ha mutolu a tua mo e fua sinapi, ka tala age a mutolu ke he mouga nai, Fano a a koe ke he mena ko; ti fano ai.” (Mata. 17:20) Ha kua maeke e tua ke fakamalolō a tautolu ke he tuaga fakaagaaga, lata a tautolu ke manamanatu ke he tau hūhū nei: Ko e heigoa e tua? Maeke fēfē e tuaga he loto ha tautolu ke lauia e tua ha tautolu? Maeke fēfē ke fakamalolō e tua ha tautolu? Ti kua lata a tautolu ke tua ki a hai?​—Roma 4:3.

Kua nakai ni koenaia ke talitonu po ke iloa e kupu mooli, ha kua “talia foki he tau temoni [na fai Atua] mo e vivivivi a lautolu.” (Iako. 2:19) Ko e heigoa mogoia e tua?

Fakamaama he Tohi Tapu e tua ke he ua e faahi. Fakamua, “ko e tua, ko e falanaki haia ke he tau mena kua amaamanaki ki ai.” (Hepe. 11:1a) Ka ha ha ia koe e tua, ti talitonu mauokafua ai ko e tau mena oti ne talahau e Iehova kua mooli mo e to fakahoko ai. Ma e fakatai, tala age e Iehova ke he tau Isaraela: “Kaeke kua maeke kia mutolu ke fakahui haku a maveheaga ke he aho, mo e haku a maveheaga ke he po, ke nakai tuai fai aho, po ke po ke he hana ni a magaaho; Ti maeke ai ke fakahui haku a maveheaga mo Tavita haku a fekafekau.” (Iere. 33:20, 21) Tupetupe kia a koe to nakai hake mai mo e tō e laā he pulagi, ti nakai aho mo e pouli? Ka nakai fakauaua a koe ke he tau fakatufono he tufugatia ne fakatumau e fua lalolagi ke fano viko mo e takai he laā, lata nakai a koe ke fakauaua kua maeke e Tufuga he tau fakatufono nei ke fakamooli e tau maveheaga haana? Nakai lata ke fakauaua!​—Isaia 55:10, 11; Mata. 5:18.

Uaaki, ko e tua “ko e fakamoli he tau mena nakai kitia atu.” (Hepe. 11:1e) Ke he puhala fe? Ka hūhū e tama ki a koe, ‘Iloa fēfē e koe na fai matagi?’ Pete kua nakai kitia e koe e matagi, liga lagomatai e koe e tama ke manamanatu ke he tau fakamooliaga, tuga e fafagu, tau lauiaaga he matagi, mo e falu foki. Magaaho ka talitonu e tama kua mooli e mena nei, kua talia e ia na maeke ke talitonu ke he taha mena ne nakai kitia. Pihia foki, fakavē e tua ke he fakamooliaga mauokafua.​—Roma 1:20.

Ha kua fakavē e tua ke he tau fakamooliaga, ke moua e tua kua lata e tagata ke kumi fakamua e “maama ke he kupu moli.” (1 Timo. 2:4) Ka e nakai koenaia. Tohi he aposetolo ko Paulo: “Ha ko e loto ke talia ai” ke fakagahua e tua. (Roma 10:10) Nakai ni talitonu e tagata ke he kupu mooli ka e lata foki ke uho ki a ia. Puhala ia ni ka omoomoi a ia ke fakagahua e tua, kakano ke moui fakatatau ke he kupu mooli. (Iako. 2:20) Ko e tagata ne nakai loto fakaaue ma e kupu mooli kua liga fakaheu e tau fakamooliaga ka taofi mau a ia ke he  tau manatu toka tuai po ke fifili ke taute ni e mena ne manako a ia ki ai. (2 Pete. 3:3, 4; Iuta 18) Kakano haia he tau vahā he Tohi Tapu ne nakai tua e tau tagata oti ne kitia e tau mana. (Nume. 14:11; Ioane 12:37) Feaki he agaaga tapu he Atua e tua ke he tau loto he tau tagata ni ne talia e kupu mooli ka e nakai ko e tau pikopiko.​—Kala. 5:22; 2 Tesa. 2:10, 11.

Falu ia lautolu ne malolō e tua ko e Patuiki ko Tavita. (Hepe. 11:32, 33) Ka e nakai moua he tau tagata oti he magafaoa ha Tavita e tua pihia. Ma e fakatai, he taha magaaho ko Eliapo ko e taokete ha Tavita ne nakai lahi e tua he mogo ne vale a ia ki a Tavita he paleko ha Koliato. (1 Samu. 17:26-28) Nakai fai tagata kua fanau mai mo e tua; po ke moua e tua mai he tau matua haana, ti ko e tua ha Tavita ko e fua he fakafetuiaga haana ni mo e Atua.

Ia Salamo 27, fakakite e Tavita e puhala ne moua e ia e tua malolō. (Kupu 1) Manamanatu fakahokulo a Tavita ke he tau mena ne tupu ki a ia fakamua mo e puhala ne fehagai a Iehova mo e tau fī haana. (Kupu 2, 3) Loto fakaaue lahi a ia ke he fakatokaaga ha Iehova ma e tapuakiaga. (Kupu 4) Tapuaki a Tavita ke he Atua fakalataha mo lautolu ne talitonu he faituga. (Kupu 6) Ne kumi atu fakamakamaka a ia ki a Iehova he liogi. (Kupu 7, 8) Manako foki a Tavita ke fakaako ke he puhala he Atua. (Kupu 11) Kua uho lahi e mahani nei ki a Tavita ati pehē a ia: “Aua e tua au . . . po kua mate tuai au.”​—Kupu 13.

Maeke a koe ke moua e tua ke tuga ha Tavita ka fifitaki e koe e tau mahani mo e tau aga ne fakamaama ia Salamo 27. Ha kua fakavē e tua ke he iloilo tonu, ka lahi e fakaako haau ke he Kupu he Atua mo e tau tohi faka-Tohi Tapu, to mukamuka ke feaki e fua nei he agaaga he Atua. (Sala. 1:2, 3) Fakatoka e magaaho ke manamanatu fakahokulo he mogo ka fakaako a koe. Ko e manamanatu fakahokulo ko e kelekele kua tupu ai e loto fakaaue. He hokulo fakahaga e loto fakaaue haau ma Iehova, to manako lahi foki a koe ke fakagahua e tua he tapuaki ki a ia he tau feleveiaaga he fakapotopotoaga mo e fakapuloa e amaamanakiaga haau ke he falu. (Hepe. 10:23-25) Fakakite foki e tautolu e tua ka matutaki a tautolu ke “liogi mau ke lata ai, ka e aua neke fakalolelole.” (Luka 18:1-8) Ko e mena ia, “kia liogi nakai noa” ki a Iehova he falanaki “kua manatu e ia a mutolu.” (1 Tesa. 5:17; 1 Pete. 5:7) Omoomoi he tua a tautolu ke gahua, ti ko e tau gahua ha tautolu kua fakamalolō e tua.​—Iako. 2:22.

He afiafi ato mate a Iesu, ne pehē a ia ke he tau tutaki haana: “Kia tua a mutolu ke he Atua, ati tua mai a foki kia au.” (Ioane 14:1) Ti kua lata a  tautolu ke fakagahua e tua nakai ni ki a Iehova ka e ki a Iesu foki. Maeke fēfē a koe ke fakagahua e tua ki a Iesu? Kia onoono a tautolu ke he tolu e puhala.

Fakamua, onoono ke he lukutoto ko e mena fakaalofa he Atua ma haau. Pehē e aposetolo ko Paulo: “Kua moui ai au ke he tua ke he Tama he Atua, ko ia ne fakaalofa mai kia au, mo e foaki mai e ia a ia ke hukui aki au.” (Kala. 2:20) Ka fakagahua e tua haau ki a Iesu, kua talitonu mauokafua a koe kua aoga e lukutoto ki a koe, ti ko e fakavēaga ke fakamagalo e tau agahala haau, foaki ki a koe e amaamanakiaga he moui tukulagi, ti ko e fakamooliaga mua ue atu he fakaalofa he Atua ma haau. (Roma 8:32, 38, 39; Efeso 1:7) To fakamalolō he mena nei a koe ke tuku kehe e tau logonaaga kelea hagaao ki a koe ni.​—2 Tesa. 2:16, 17.

Uaaki, fakatata atu ki a Iehova puhala he liogi ne fakavē ke he poa ha Iesu. Ha ko e lukutoto, maeke a tautolu ke liogi ki a Iehova mo e atāina ke vagahau ti “fakaalofa mai ai a ia kia tautolu, kia moua foki e fakaalofa noa ke lagomatai mai ai ke he aho kua lata ai.” (Hepe. 4:15, 16; 10:19-22) Fakamalolō he liogi e fifiliaga ha tautolu ke totoko e kamatamata ke agahala.​—Luka 22:40.

Toluaki, omaoma ki a Iesu. Tohi he aposetolo ko Ioane: “Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.” (Ioane 3:36) Mailoga kua fakatatai e Ioane e fakagahua he tua ke he nakai omaoma. Ko e mena ia, fakagahua e koe e tua ki a Iesu he omaoma ki a ia. Omaoma a koe ki a Iesu he muitua ke he “fakatufono a Keriso,” kakano ai ko e tau mena oti ne fakaako mo e poaki e ia. (Kala. 6:2) Omaoma foki a koe ki a Iesu he muitua ke he takitakiaga ne foaki e ia puhala he “fekafekau fakamoli mo e loto matala.” (Mata. 24:45) He omaoma ki a Iesu, to ha ha ia koe e malolō ke fakauka ke he tau lekua ne tuga e afā.​—Luka 6:47, 48.

He taha mogo ne pehē mai e tagata ki a Iesu: “Kua tua ni au; kia lagomatai mai a a koe ke he haku a nakai tua.” (Mare. 9:24) Ne tua e tagata nei, ka e mailoga e ia kua lata a ia ke lahi atu e tua. Ke tuga e tagata nei, igatia a tautolu oti mo e tuaga he moui kua lata ke lahi atu e tua. Ti maeke a tautolu oti ke fakamalolō e tua ha tautolu mogonei. Tuga ne kitia e tautolu, fakamalolō e tautolu e tua he fakaako ke he Kupu he Atua mo e manamanatu fakahokulo ki ai, ti tupu lahi e loto fakaaue ha tautolu ma Iehova. To tupu lahi foki e malolō he tua ha tautolu​—fakalataha mo e tau matakainaga​—ka tapuaki ki a Iehova, tala age ke he falu hagaao ke he amaamanakiaga ha tautolu, mo e fakatumau ke liogi. Mua atu, ka fakamalolō e tua ha tautolu ti moua e tautolu e palepale ne mua atu e mitaki. Omoomoi he Kupu he Atua a tautolu: “Ko e tau fakahelehele na e, kia ati hake e mutolu a mutolu ke he ha mutolu a tua kua tapu ue atu, . . . Kia fakatumau e mutolu a mutolu ke he fakaalofa he Atua.”​—Iuta 20, 21.