1-2. (a) Ko e heigoa ne kitia e Iehova he totou miliona ne fakapotopoto ma e Kaiaga Afiafi he Iki? (Kikite fakatino he kili.) (e) Ko e heigoa ka fakatutala a tautolu he vala tala nei?

MANAMANATU ke he mena ne kitia e Iehova ha kua totou miliona he lalolagi katoa kua fakapotopoto ma e Kaiaga Afiafi he Iki. Nakai ni onoono a ia ke he numera lahi he tau tagata, ka e mailoga e ia e tau tagata takitaha ne fakalataha ai. Tuga anei, kitia e ia a lautolu ne fakamooli he o mai he tau tau takitaha. Ia lautolu ne liga ko e tau tagata takitaha ne o mai pete he fehagai mo e tau favaleaga vevela. Falu ne nakai o mai tumau ke he falu feleveiaaga ka e onoono a lautolu ke he Fakamanatuaga ko e matagahua uho lahi mahaki. Mailoga foki e Iehova a lautolu ne liga o mai fakamua laia ke he Fakamanatuaga ha ko e fia iloa.

² Fiafia mooli a Iehova ke kitia e tokologa lahi ne o mai ke he Fakamanatuaga. (Luka 22:19) Ka e nakai ko e numera he tau tagata ne o mai e matapatu onoonoaga ha Iehova. Kua fiafia lahi a ia ke he kakano ne o mai a lautolu; aoga lahi e fatuakiloto ki a Iehova. He vala tala nei, to fakatutala a tautolu ke he hūhū ne mua atu e aoga: Ko e ha ne nakai ni o mai a tautolu ke he Fakamanatuaga he tau tau takitaha ka e pihia foki mo e tau feleveiaaga he tau faahi tapu takitaha ne taute e Iehova ma lautolu ne fakaalofa ki a ia?

3-4. (a) Ko e ha ne o atu a tautolu ke he tau feleveiaaga? (e) Ko e heigoa ne fakakite hagaao ki a tautolu he fakalataha atu ke he tau feleveiaaga ha tautolu? (i) He mena ne talahau he 1 Korinito 11:23-26, ko e ha ne nakai lata a tautolu ke tonoa e Fakamanatuaga?

³ O atu a tautolu ke he tau feleveiaaga he fakapotopotoaga mua atu ha ko e vala he tapuakiaga ha tautolu anei. O atu foki a tautolu ha kua fakaako e Iehova a tautolu he tau feleveiaaga. Ko e tau  tagata fakatokoluga ne tiaki e manatu kua lata a lautolu ke fakaako. (3 Ioa. 9) Ka kua makai a tautolu ke fakaako e Iehova mo e fakatokatokaaga ne fakaaoga e ia.​—Isaia 30:20; Ioane 6:45.

⁴ Ko e o atu ha tautolu ke he tau feleveiaaga ne fakakite kua fakatokolalo a tautolu he mautali mo e makai ke fakaako. He pō he Fakamanatuaga he matulei ha Iesu, o atu a tautolu ke he Fakamanatuaga aoga nei he nakai logona hifo noa ni e tautolu ko e matagahua ka kua omaoma fakatokolalo foki a tautolu ke he poakiaga ha Iesu: “Kia eke e mutolu e mena nai mo fakamanatuaga kia au.” (Totou 1 Korinito 11:23-26.) Fakamalolō he feleveiaaga ia e amaamanakiaga ha tautolu ma e anoiha ti fakamanatu ki a tautolu e lahi mahaki he fakaalofa ha Iehova ki a tautolu. Ka e iloa e Iehova kua lata a tautolu ke atihake mo e fakamalolō nakai ni lagataha he tau. Kua foaki e ia ki a tautolu e tau feleveiaaga he tau faahi tapu takitaha ti tomatoma ki a tautolu ke o atu ki ai. Fakalagalaga he fakatokolalo a tautolu ke omaoma. Lahi e tulā ne fakaaoga e tautolu he tau faahi tapu takitaha ke tauteute mo e o atu ke he tau feleveiaaga.

5. Ko e ha ne tali atu e tau tagata fakatokolalo ke he uiina ha Iehova?

⁵ He tau tau takitaha, tokologa e tagata fakatokolalo ne talia e uiina ha Iehova ke fakaako e ia. (Isaia 50:4) Fiafia a lautolu he o atu ke he Fakamanatuaga, ti kamata a lautolu ke o atu ke he falu feleveiaaga foki. (Saka. 8:20-23) Fakalataha auloa ai, kua fiafia a tautolu ke fakaako mo e takitaki e Iehova “ko e [ha tautolu] a lagomatai mo e [ha tautolu] a fakamoui.” (Sala. 40:17) Nakai fai mena foki ke mua e fiafia po ke mua e aoga ke he talia e uiina ke fakaako e Iehova mo Iesu ko e Tama ne ofania lahi mahaki e ia.​—Mata. 17:5; 18:20; 28:20.

6. Lagomatai fēfē he fakatokolalo e taha tagata ke fano he Fakamanatuaga?

⁶ He tau tau takitaha, lali a tautolu ke uiina e tokologa ke o atu ke he Fakamanatuaga he matulei ha Iesu. Tokologa e tagata ne fakatokolalo kua aoga he talia e uiina ha tautolu. Manamanatu ke he fakatai. Loga e tau kua mole, ne moua he tagata e laupepa uiina ke he Fakamanatuaga ka e tala age a ia ke he matakainaga taane ne age ai ki a ia to nakai hoko atu a ia. Ka e he pō he Fakamanatuaga, ofo e matakainaga ke kitia e tagata taha ia ne fano ki loto he Fale he Kautu. Nava lahi e tagata nei he feleveia fakamitaki ne moua e ia ti kamata mogoia ke fano ke he tau feleveiaaga ha tautolu he tau faahi tapu takitaha. Tolu ni e feleveiaaga ne tonoa e ia he tau katoa. Ko e heigoa ne lagomatai a ia ke talia fiafia? Loto molū a ia ke hiki e manamanatuaga haana. Ko e matakainaga ne uiina a ia ne pehē he mogo fakamui, “Ko e tagata fakatokolalo a ia.” Futia mooli e Iehova e tagata nei ke tapuaki ki a Ia, ti ko ia mogonei ko e matakainaga taane papatiso.​—2 Samu. 22:28; Ioane 6:44.

7. Lagomatai fēfē a tautolu ke fakatokolalo he tau mena ne fakaako e tautolu he tau feleveiaaga mo e totou he Tohi Tapu?

⁷ Ko e mena ne fakaako e tautolu he tau feleveiaaga mo e tau mena ne totou e tautolu he Tohi Tapu ka lagomatai a tautolu ke fakatokolalo. He tau faahi tapu ato hoko e Fakamanatuaga, fa hagaaki e tau feleveiaaga ha tautolu ke he fakafifitakiaga ha Iesu mo e mahani fakatokolalo ne fakakite e ia he foaki e moui haana mo lukutoto. He tau faahi tapu ato hoko e Fakamanatuaga, tomatoma ki a tautolu ke totou e tau tala he Tohi Tapu hagaao ke he tau mena ne tutupu he matulei mo e liu tu mai a Iesu. Ko e tau mena ne fakaako e tautolu he tau feleveiaaga pihia mo e tau mena ne totou e tautolu he tau tala he Tohi Tapu kua fakahokulo e loto fakaaue ha tautolu ma e poa ne taute e Iesu ma tautolu. Omoomoi a tautolu ke fifitaki e aga fakatokolalo ha Iesu mo e taute e finagalo ha Iehova pete kua uka ma tautolu.​—Luka 22:41, 42.

8. Fakakite fēfē e Iesu e fakamanavalahi?

⁸ Lali foki a tautolu ke fifitaki a Iesu he fakakite e fakamanavalahi. Manamanatu ke he fakamanavalahi ne fakakite e ia he tau aho ato hoko e matulei haana. Mailoga katoatoa e ia to nakai leva ti ekefakakelea, fahi, mo e tamate he tau fī haana a ia. (Mata. 20:17-19) Ka e makai agaia a ia ke mate. He hoko mai e magaaho, tala age a ia ke he tau aposetolo tua fakamooli haana ne fakalataha mo ia i Ketesemane: “Ati matike a, ke o a tautolu; kitiala, kua tata mai tuai a ia ke afo na au.” (Mata. 26:36, 46) He hoko mai e kau ne totō e tau kanavaakau ke tapaki a ia, ne laka atu a ia ki mua ti fakakite a ia, mo e tala age ke he kau ke fakatoka e tau aposetolo haana ke ō. (Ioane 18:3-8) Ko e fakamanavalahi ne mua atu a ia ne fakatātā e Iesu! He vahā nei, ko e tau Kerisiano fakauku mo lautolu ko e tau mamoe kehe ne eketaha ke fifitaki a Iesu he fakakite e fakamanavalahi. Fēfē?

9. (a) Ko e ha ne liga lata a tautolu ke fakamanavalahi ke o atu tumau he tau feleveiaaga? (e) Maeke fēfē e fakafifitakiaga ha tautolu ke lauia e tau matakainaga ha tautolu he fale puipui ha ko e tua ha lautolu?

⁹ Ke o atu tumau ke he tau feleveiaaga, lata a tautolu ke fakatātā e fakamanavalahi he fehagai mo e tau tutūaga uka. Falu he tau matakainaga ha tautolu ne o atu ke he tau feleveiaaga pete e pehia he maanu, loto lolelole, po ke tau lekua malolō tino. Falu ne fakamanavalahi he o atu ke he tau feleveiaaga pete he totoko malolō e tau tagata he magafaoa po ke tau pule fakatufono. Manamanatu la ke he tau fakafifitakiaga ha tautolu kua lauia e tau matakainaga i loto he fale puipui ha ko e ha lautolu a tua. (Hepe. 13:3) Ka logona e lautolu kua tumau e fekafekau ha tautolu ki a Iehova pete e tau kamatamata ha tautolu, kua fakamalolō a lautolu ke fakatumau e tua, loto malolō, mo e mahani fakamooli ha lautolu. Pihia e mena ne tupu ke he aposetolo ko Paulo. He nofo he fale puipui i Roma, fiafia lahi a ia he logona kua fekafekau fakamooli e tau matakainaga haana ke he Atua. (Filipi 1:3-5, 12-14) Nakai leva po ke he mole laia e fakatoka mai ha Paulo, tohia e ia e tohi haana ke he tau tagata Heperu. He tohi ne tomatoma e ia ke he tau Kerisiano fakamooli ke “tumau e feofanaki he tau matakainaga” mo e ua tiaki e fakapotopotoaga.​—Hepe. 10:24, 25; 13:1.

10-11. (a) Ko hai kua lata ke uiina e tautolu ke he Fakamanatuaga? (e) Ko e heigoa e kakano ne foaki he Efeso 1:7 he taute pihia?

¹⁰ Fakakite e tautolu e fakamanavalahi ka uiina e tautolu e tau magafaoa, tau kapitiga gahua, mo e tau katofia ke he Fakamanatuaga. Ko e ha ne uiina e tautolu a lautolu ia? Loto fakaaue lahi a tautolu ke he tau mena ne taute e Iehova mo Iesu ma tautolu ti manako lahi a tautolu ke uiina e falu ke o atu ke he Fakamanatuaga. Manako a tautolu ki a lautolu ke fakaako kua maeke foki a lautolu ke aoga mai he “lahi ue atu he hana fakaalofa noa” puhala he lukutoto.​—Totou Efeso 1:7; Fakakite. 22:17.

¹¹ Ka fakakite e tautolu e fakamanavalahi he feleveia fakalataha, kua fakatātā foki e tautolu e taha mahani uho lahi, ko e mahani ne fakatātā tokoua he Atua mo e Tama haana he tau puhala ne mua ue atu.

12. (a) Fakahokulo fēfē he tau feleveiaaga e fakaalofa ha tautolu ma Iehova mo Iesu? (e) Ko e heigoa ne fakamafana he 2 Korinito 5:14, 15 ki a tautolu ke taute he fifitaki ki a Iesu?

¹² Ko e fakaalofa ha tautolu ma Iehova mo Iesu kua omoomoi a tautolu ke o atu ke he tau feleveiaaga. Ti ko e mena ne fakaako e tautolu he tau feleveiaaga kua fakahokulo e fakaalofa ha tautolu ma Iehova mo e haana Tama. He tau feleveiaaga kua fakamanatu tumau ki a tautolu e tau mena kua taute e laua ma tautolu. (Roma 5:8) Ko e Fakamanatuaga kua tala mai tumau ki a tautolu e hokulo he fakaalofa ha laua, pihia ki a lautolu ne nakaila loto fakaaue ke he lukutoto. He puke ke he fakaaue, lali a tautolu ke fifitaki a Iesu he puhala ne momoui a tautolu he tau aho takitaha. (Totou 2 Korinito 5:14, 15.) Lafi ki ai, fakalagalaga e tau loto ha tautolu ke fakaheke a Iehova he foaki e lukutoto. Taha puhala ka fakaheke a tautolu ki a ia ko e tau tali mafanatia he tau feleveiaaga ha tautolu.

13. Fakakite fēfē e tautolu e hokulo he fakaalofa ma Iehova mo e Tama haana? Fakamaama.

¹³ Fakakite e tautolu e hokulo he fakaalofa ha tautolu ma Iehova mo e Tama haana he makai ke foaki e tau mena oti ma laua. Fa mahani, latatonu a tautolu ke taute e tau foakiaga kehekehe ke o atu ke he tau feleveiaaga. Loga e fakapotopotoaga ne taute taha e feleveiaaga he matahiku he aho gahua ka kua liga mategūgū lahi a tautolu. Ko e taha feleveiaaga ne taute he matahiku he vahā tapu ka kua okioki e falu tagata. Mailoga nakai e Iehova kua o atu a tautolu ke he tau feleveiaaga pete he mategūgū a tautolu? Mailoga mooli e ia! Ko e lahi he taufetului ha tautolu, to lahi e loto fakaaue ha Iehova ke he fakaalofa kua fakakite e tautolu ma haana.​—Mare. 12:41-44.

14. Fakatoka fēfē e Iesu e fakafifitakiaga he fakakite e fakaalofa foaki noa?

¹⁴ Fakatoka e Iesu e fakafifitakiaga ma tautolu he fakakite e fakaalofa foaki noa. Nakai ni mate a ia ma e tau tutaki haana ka kua moui foki he tau aho takitaha ke he puhala ne tuku fakamua e tau manako ha lautolu ke he haana. Tuga anei, feleveia a ia mo e tau tutaki haana pete kua lolelole e tino po ke fakaatukehe e logonaaga. (Luka 22:39-46) Hagaaki a ia ke he mena kua maeke a ia ke foaki ke he falu, ka e nakai ko e mena ka moua e ia mai he falu. (Mata. 20:28) Ka malolō e fakaalofa ha tautolu ki a Iehova mo e tau matakainaga ha tautolu, to taute e tautolu e tau mena oti kua maeke ke o atu ke he Kaiaga Afiafi he Iki ti pihia mo e tau feleveiaaga oti foki.

15. Ko hai kua fiafia pauaki a tautolu ke lagomatai?

 ¹⁵ Ko e tau matakainaga Kerisiano mooli a tautolu, ti fiafia a tautolu ke lahi e magaaho he uiina a lautolu ne foou ke fakalataha mo tautolu. Ka e fiafia pauaki a tautolu ke lagomatai a lautolu ne “faoa [ki a tautolu he] tua” ka kua nakai gahuahua fakaagaaga. (Kala. 6:10) Fakakite e tautolu e fakaalofa he fakamafana ki a lautolu ke o atu ke he tau feleveiaaga, mua atu ke he Fakamanatuaga. Tuga a Iehova mo Iesu, kua fiafia lahi mahaki a tautolu ka liu mai a ia ne nakai gahuahua fakaagaaga ki a Iehova, ko e ha tautolu a Matua mo e Leveki Mamoe fakaalofa.​—Mata. 18:14.

16. (a) Fakamafana fēfē e tautolu e taha mo e taha, ti ko e heigoa ka taute he tau feleveiaaga ke lata mo tautolu? (e) Ko e ha ko e magaaho mitaki he tau anei ke manatu e tau kupu ha Iesu ia Ioane 3:16?

¹⁶ He tau faahi tapu i mua, uiina e tokologa ke o atu ke he Fakamanatuaga he afiafi Faraile, Aperila 19, 2019. (Kikite puha “ To Uiina Nakai e Koe a Lautolu?”) Kia fakatumau a tautolu ke fakamafana e taha mo e taha he o atu tumau ke he tau feleveiaaga oti ne taute e Iehova ma tautolu. He tata mai e moumouaga he fakatokaaga nei, lata e tau feleveiaaga ha tautolu ke lagomatai a tautolu ke fakatumau e fakatokolalo, fakamanavalahi, mo e fakaalofa. (1 Tesa. 5:8-11) Mo e tau loto katoa ha tautolu, kia fakakite e puhala ne logona hifo a tautolu ki a Iehova mo e Tama haana he fakaalofa lahi mahaki a laua ki a tautolu!​—Totou Ioane 3:16.