1-2. Ko e heigoa ne tala age he agelu ke he tau fifine he tukuaga ha Iesu, ti ko e heigoa e poakiaga ne tala age e Iesu ki a lautolu?

KO E matafatafa aho he Nisana 16, 33 V.N. Kua momoko lahi e tau loto he tau fifine matakutaku Atua ne o atu ke he tukuaga ne kua molea e 36 e tulā he tuku ai e tino he Iki ko Iesu Keriso. He hohoko atu a lautolu ke he tukuaga mo e amanaki ke tākai e tino aki e tau mena manogi mo e tau lolo, ne ofo a lautolu he kitia kua gatigati e tukuaga! Tala age e agelu ke he tau tutaki kua liu tu mai a Iesu he mate, ti lafi: “To mua atu a ia kia mutolu ki Kalilaia; to kitia ai e mutolu a ia ke he mena ia.”​—Mata. 28:1-7; Luka 23:56; 24:10.

² Magaaho ne toka he tau fifine e tukuaga, fina atu a Iesu ki a lautolu ti tala age e poakiaga nei: “Ati o a, ke talahau atu e [mutolu] ke he haku a tau matakainaga kia o atu a lautolu ki Kalilaia, kia kitia ai e lautolu au.” (Mata. 28:10) Liga ha ha ia Iesu e tau hatakiaga aoga lahi ke tala age ke he tau tutaki haana, ti ko e feleveiaaga nei ko e mena fakamua ne fakatoka e ia he mole e liu tu mai haana!

3-4. Ko e ha kua talahau e tautolu ko e poakiaga ia Mataio 28:19, 20 kua nakai ni tala age ke he tau aposetolo? (Kikite fakatino he kili.)

³ Totou Mataio 28:16-20. He feleveiaaga ne fakatoka e Iesu, talahau e ia e gahua uho ka taute he tau tutaki haana he senetenari fakamua, ko e gahua taha ia kua taute e tautolu he vahā nei. Pehē a Iesu: “Hanei, kia o atu a . . . ke eke e tau motu oti kana mo tutaki, . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”

⁴ Manako a Iesu ke he tau tutaki oti haana ke fakamatala.  Nakai fakakaupā e ia e tau poakiaga nei ke he tau aposetolo haana ne toko 11. Iloa tonu fēfē e tautolu e mena ia? Ko e tau aposetolo hokoia ni kia ne haia he mouga ko Kalilaia he mogo ne tala age e poakiaga ke taute tutaki? Manatu na tala age e agelu ke he tau fifine: “To kitia ai e mutolu a ia ke he mena ia [i Kalilaia].” Ti liga haia foki e tau fifine fakamooli i ai. Ka e nakai koenaia. Fakakite he aposetolo ko Paulo ko Iesu kua “kitia ai . . . he tau matakainaga kua fakalataha ne tokolima e teau mo e tuma.” (1 Kori. 15:6) I fe?

5. Ko e heigoa kua fakaako e tautolu mai he 1 Korinito 15:6?

⁵ Ha ha ia tautolu e tau kakano mitaki ke talitonu kua manatu e Paulo e feleveiaaga i Kalilaia ne fakamaama ia Mataio veveheaga 28. Ko e heigoa e tau kakano? Fakamua, laulahi he tau tutaki ha Iesu ko e tau tagata Kalilaia. Ti ko e mouga i Kalilaia e matakavi mitaki ke fakapotopoto ai e tau tagata tokologa, ka e nakai he taha kaina i Ierusalema. Uaaki, ko Iesu ne liu tu mai kua fitā he feleveia mo e tau aposetolo toko 11 haana he kaina he tagata i Ierusalema. Ane mai manako a Iesu ke fakaako ni e tau aposetolo ke fakamatala mo e taute tutaki, to fakahoko e ia i Ierusalema ka e nakai tala age ki a lautolu mo e tau fifine mo e falu ke feleveia mo ia i Kalilaia.​—Luka 24:33, 36.

6. Fakakite fēfē he Mataio 28:20 ko e poakiaga ke taute tutaki kua aoga agaia he vahā nei, ti omaoma fēfē e tau tagata ke he poakiaga nei?

⁶ Mailoga e kakano aoga ke toluaki. Ko e poakiaga ha Iesu ke taute tutaki kua nakai fakakaupā ni ke he tau Kerisiano ne nonofo he senetenari fakamua. Iloa fēfē e tautolu? Fakahiku e Iesu e fakaako haana ke he tau tutaki aki e tau kupu nei: “To fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mata. 28:20) Tuga ni he talahau e Iesu, kua holo ki mua e gahua taute tutaki he vahā nei. Manamanatu la ki ai! Teitei 300,000 tagata he tau tau takitaha ne papatiso ko e Tau Fakamoli a Iehova ti eke mo tau tutaki ha Iesu Keriso!

7. Ko e heigoa ha tautolu mogonei ka fakatutala, ti ko e ha?

⁷ Tokologa ne fakaako e Tohi Tapu kua holo ki mua ti papatiso. Ka e falu ne fakaako tumau e Tohi Tapu mo tautolu ne tuga kua fakauaua ke eke mo tau tutaki. Fiafia a lautolu ke fakaako ka e nakai holo ki mua ke papatiso. Ka taute e koe e fakaako Tohi Tapu, iloa e mautolu kua manako a koe ke lagomatai e tagata fakaako haau ke fakagahua e tau mena ne iloa e ia mo e ke eke mo tutaki he Keriso. To fakatutala e vala tala nei ke he puhala ka hokotia a tautolu ke he loto he tagata fakaako mo e puhala ke lagomatai e tautolu a ia ke tupu fakaagaaga. Ko e ha kua lata a tautolu ke fakatutala ke he matakupu nei? Ha ko e taha magaaho kua liga lata a tautolu ke fifili ke matutaki po ke nakai matutaki e fakaakoaga.

8. Ko e ha kua paleko ke hokotia ke he loto?

⁸ Manako a Iehova ke he tau tagata ke fekafekau ki a Ia ha ko e ha lautolu a fakaalofa ki a Ia. Ti ko e foliaga ha tautolu ke lagomatai e tau tagata fakaako ke maama kua hokulo e manamanatu ha Iehova ki a lautolu ko e tau tagata takitokotaha ti fakaalofa lahi ki a lautolu. Manako a tautolu ke lagomatai a lautolu ke kitia ko Iehova “ko e matua a ia kia lautolu kua nakai fai matua, ko e fakafili foki a ia ke he tau fifine takape.” (Sala. 68:5) He loto fakaaue e tau tagata fakaako haau ke he fakaalofa he Atua ki a lautolu, to liga aamotia e tau loto ha lautolu mo e to tupu e fakaalofa ha lautolu ki a Ia. Falu he tau tagata fakaako kua liga uka ke onoono ki a Iehova ko e Matua fakaalofa ha ko e tau matua taane ha lautolu kua nakai fakakite ki a lautolu e fakaalofa mo e  hofihofi noa. (2 Timo. 3:1, 3) Ti ka taute e koe e fakaakoaga, fakamaama e tau mahani mitaki ha Iehova. Lagomatai e tau tagata fakaako haau ke maama ko e ha tautolu a Atua fakaalofa kua manako ki a lautolu ke moua e moui tukulagi, ti mautali a Ia ke lagomatai a lautolu ke moua e foliaga ia. Ko e heigoa foki ka taute e tautolu?

9-10. Ko e heigoa e tau tohi kua lata ke fakaaoga e tautolu ka taute e tau fakaako Tohi Tapu, ti ko e ha kua fakaako e tau tohi ia?

⁹ Fakaaoga e tau tohi “Ko e Heigoa ka Fakaako Mai he Tohi Tapu?” mo e ‘Kia Fakatumau a Mutolu ke he Fakaalofa he Atua.’ Kua tohia pauaki e tau tohi ia ke lagomatai a tautolu ke hokotia ke he tau loto he tau tagata fakaako. Ma e fakatai, he veveheaga 1 he tohi Fakaako kua tali e tau hūhū: Leveki nakai he Atua a tautolu po ke vale a ia?, Fēfē e logonaaga he Atua ka matematekelea e tau tagata?, mo e Maeke nakai a koe ke eke mo kapitiga ha Iehova? Ka e kua e tohi ‘Fakaalofa he Atua’? To lagomatai he tohi ia e tagata fakaako ke maama e puhala ke fakagahua e tau matapatu fakaakoaga he  Tohi Tapu ka fakaholo ki mua e moui haana mo e fakatata lahi ki a Iehova. Pete foki ka fitā a koe he fakaako e tau tohi nei mo e falu, tauteute fakamitaki ma e tau fakaakoaga takitaha, ti tokaloto tumau e tau manako pauaki he tagata fakaako.

¹⁰ Ka e manamanatu la, kua fiafia e tagata fakaako ke he matakupu kua fakatutala i loto he tohi ne nakai haia he Puha Koloa Fakaako. Liga fakamafana age a koe ke totou e tohi ia he magaaho ni haana ke maeke a koe ke matutaki ke taute e fakaako mo e taha he tau tohi lagomatai he Tohi Tapu i loto he Puha Koloa Fakaako.

11. Magaaho fe kua lata ke kamata e fakaakoaga he hafagi mo e pā aki e liogi, mo e liga fakamaama fēfē e koe e mena nei?

¹¹ Kamata e magaaho fakaako aki e liogi. Fa mitaki lahi ke hafagi mo e pā aki e liogi e fakaakoaga Tohi Tapu he nakaila leva e kamata e fakaako tumau. Lata a tautolu ke lagomatai e tagata fakaako ke mailoga kua maama ni e tautolu e Kupu he Atua ha ko e lagomatai he agaaga he Atua. Falu faiaoga Tohi Tapu ne fakamaama e kakano he liogi he totou e Iakopo 1:5, ne pehē: “Kaeke ha ha ia mutolu taha kua nakai fai iloilo, kia ole atu a ia ke he Atua.” Ti hūhū mogoia e faiaoga ke he tagata fakaako, “Maeke fēfē a tautolu ke ole ke he Atua ma e iloilo?” To liga talia he tagata fakaako kua lata ke liogi ke he Atua.

12. To fakaaoga fēfē e koe e Salamo 139:2-4 ke lagomatai e tagata fakaako ke holo ki mua e tuaga he tau liogi haana?

¹² Fakaako e tagata fakaako haau ke liogi. Fakamafana ki a ia kua manako a Iehova ke logona e tau liogi fakamooli haana. Fakamaama ko e tau liogi fakatagata ha tautolu kua maeke ke hafagi e tau loto ki a Iehova he fakakite e tau logonaaga kua liga fakauaua a tautolu ke tala age ke he ha tagata. Manatu kua fitā he iloa e Iehova e tau fatuakiloto ha tautolu. (Totou Salamo 139:2-4.) Fakamalolō foki ke he tagata fakaako ha tautolu ke ole ke he lagomatai he Atua ke hiki e tau manatu hehē mo e kautū ke he tau aga kelea. Tuga ma e fakatai, ko e taha tagata kua fai magaaho he fakaako ka e fiafia ke he aho okioki pauaki ne puna mai he tau fakamanatuaga pouliuli. Iloa e ia kua hepe, ka e fiafia a ia ke he falu vala i ai. Fakamalolō ki a ia ke tala age fakatonu ki a Iehova e tau logonaaga haana mo e olelalo ma e lagomatai ke fiafia ni ke he tau mena ne fiafia e Atua.​—Sala. 97:10.

13. (a) Ko e ha kua lata a tautolu ke uiina e tau tagata fakaako Tohi Tapu ha tautolu ke o mai he tau feleveiaaga? (e) Taute fēfē e tautolu e tagata fakaako ke fakatotoka he Fale he Kautu?

¹³ Uiina e tagata fakaako Tohi Tapu haau ke hau he tau feleveiaaga. Ko e mena ne logona mo e mailoga he tagata fakaako haau he tau feleveiaaga Kerisiano ka aamotia e loto haana ti lagomatai a ia ke holo ki mua. Fakakite e vitiō Ko e Heigoa ne Tupu he Fale he Kautu? mo e uiina mafanatia a ia ke hau mo koe. Foaki ke fina atu ke tamai a ia ka maeke. Kua mitaki ke uiina e tau tagata fakailoa kehekehe ke o atu mo koe ke he fakaakoaga. He puhala ia, to mahani e tagata fakaako haau mo e falu he fakapotopotoaga, mo e to liga fakatotoka a ia ka hau he tau feleveiaaga.

14. Ko e heigoa ka omoomoi e tagata fakaako ke tupu fakaagaaga?

¹⁴ Ko e foliaga ha tautolu ke lagomatai e tagata fakaako Tohi Tapu ke tupu fakaagaaga. (Efeso 4:13) Ka talia he taha tagata ke fakaako e Tohi Tapu, liga fiafia pauaki a ia ke he puhala kua aoga mai he fakaako fakatagata. He tupu e fakaalofa haana ki a Iehova, to liga kamata a ia ke manamanatu ke he puhala ka lagomatai e ia  e falu, putoia a lautolu kua haia he fakapotopotoaga. (Mata. 22:37-39) Ka hako e magaaho, ua fakauaua ke tala age kua lata ke lalago fakatupe e gahua he Kautu.

15. Lagomatai fēfē e tautolu e tagata fakaako Tohi Tapu ke hako e mena ka taute ka tutupu e tau lekua?

¹⁵ Fakaako e tagata fakaako Tohi Tapu haau ke he tau mena ke taute ka tutupu e tau lekua. Tuga ma e fakatai, ko e tagata fakaako Tohi Tapu haau ko e tagata fakailoa nakaila papatiso ne tala atu ki a koe kua fai tagata he fakapotopotoaga ne fakaita a ia. He nakai kau hahai, he ha he fakamaama e mena ne talahau he Tohi Tapu ke taute? Maeke a ia ke fakamagalo e matakainaga, po ke ka nakai maeke a ia ke nimo e mena ne tupu, tutala totonu mo e fakaalofa ke he tagata mo e foliaga ke ‘moua e matakainaga.’ (Fakatatai Mataio 18:15.) Lagomatai e tagata fakaako haau ke tauteute e mena ka talahau e ia. Fakakite ki a ia e puhala ke fakaaoga e JW Library^® app, Research Guide for Jehovah’s Witnesses, mo e jw.org^® ke iloa e tau puhala aoga ke fehagai mo e tuaga. Ko e lahi e fakamahani kua moua e ia ato papatiso a ia, to femataaki mitaki a ia mo e falu he fakapotopotoaga he magaaho fakamui.

16. Ko e heigoa e tau tuaga kua kitia e koe he uiina e taha tagata fakailoa ke ō mo koe he fakaakoaga?

¹⁶ Uiina e falu he fakapotopotoaga, mo e leveki takaiaga ka ahiahi mai a ia ke he fakapotopotoaga, ke ō mo koe ke he fakaakoaga. Ko e ha? Lafi ke he tau kakano ne totoku fakamua, maeke e falu tagata fakailoa ke foaki e lagomatai ke he tagata fakaako haau ne nakai maeke ia koe ke taute. Tuga ma e fakatai, lali e tagata fakaako ke oti e ula ka e lagaloga e kaumahala. Uiina e matakainaga Fakamoli ne kautū mai he aga ia ne liga lagaloga e lali ka e kaumahala, ke ō mo koe he fakaakoaga. Ko e matakainaga Fakamoli haau ne maeke ke foaki e fakatonuaga aoga ne lata e tagata fakaako ke logona. Ka fuafua kelea a koe ke taute e fakaakoaga he haia e matakainaga taane lotomatala, uiina a ia ke taute e fakaakoaga he mogoia. He ha magaaho, fakaaoga e iloaaga he falu. Manatu ko e foliaga ha tautolu ke lagomatai e tagata fakaako ke tupu fakaagaaga.

17-18. Ko e heigoa kua lata a koe ke manamanatu kaeke ke fifili a koe kua lata ke fakaoti e fakaakoaga?

¹⁷ Ka nakai holo ki mua e tagata fakaako Tohi Tapu haau, to hoko e magaaho ti hūhū hifo a koe, ‘Lata nakai au ke fakaoti e fakaako Tohi Tapu?’ He manamanatu fakahokulo ke he tuaga, lata a koe ke mailoga e lotomatala he tagata. Leva e fakaako he falu tagata to holo ki mua. Hūhū hifo ki a koe: ‘Holo ki mua tumau nakai e fakaako Tohi Tapu haaku?’ ‘Kua kamata nakai a ia ke “omaoma,” po ke fakagahua e tau mena kua fakaako e ia?’ (Mata. 28:20) Liga holo ki mua fakatekiteki e tagata fakaako, ka e lata a ia ke tumau e holo ki mua.

 ¹⁸ Ka e kua ka fai magaaho tuai e tagata he fakaako ka e tote po ke nakai kitia e loto fakaaue haana ke he fakaakoaga? Manamanatu ke he mena nei ne tupu: Kua oti e tohi Fakaako ti liga kamata foki e tohi ‘Fakaalofa he Atua’ he fakaako e ia ka e nakaila fano he ha feleveiaaga, pihia mo e Fakamanatuaga! Ti nakai fa fakahoko e fakaakoaga haana ha ko e tau kakano nakai aoga. He tuaga ia, lata a koe ke tutala fakamooli mo e tagata fakaako. *

19. Ko e heigoa ka talahau e koe ke he taha tagata ne liga nakai loto fakaaue ke he fakaako Tohi Tapu haana, ti ko e heigoa ka lata a koe ke manamanatu ki ai?

¹⁹ Liga kamata a koe he hūhū ki a ia, ‘Ko e heigoa e paleko lahi mahaki haau he eke mo taha he Tau Fakamoli a Iehova?’ Liga tali e tagata fakaako, ‘Fiafia au he fakaako e Tohi Tapu, ka e to nakai eke au mo taha he Tau Fakamoli a Iehova!’ Kaeke ko e aga haana a ia he mole e fai magaaho he fakaako, fai kakano nakai ke matutaki e fakaakoaga? He taha faahi, liga tala atu laia he tagata fakaako haau e mena ne taofi a ia. Ma e fakatai, liga logona hifo a ia to nakai fakamatala a ia he taha fale ke he taha fale. He iloa mogonei e logonaaga haana, ko koe he tuaga mitaki ke lagomatai a ia.

20. Lagomatai fēfē he maama e tautolu e Gahua 13:48 (NW) ke iloa kua lata ke matutaki po ke nakai matutaki e fakaako?

²⁰ Momoko ai, ko e falu tagata fakaako kua tuga e tau Isaraela he vahā ha Esekielu. Hagaao ki a lautolu, tala age a Iehova ki a Esekielu: “Kitiala, kua eke a koe kia lautolu ke tuga e lologo fulufuluola he tagata ne leo mitaki, mo e ta fakamitaki e akau fakatagi; ka kua logona e lautolu hāu a tau kupu ka e nakai omaoma a lautolu ki ai.” (Eseki. 33:32) Liga uka ia tautolu ke tala age ke he tagata to fakaoti e fakaako mo ia. Ka “kua gahoa e tau aho kua toe.” (1 Kori. 7:29) He ua fakaaoga e magaaho lahi ke taute e fakaakoaga nakai holo ki mua, lata ke kumi e tagata ne fakakite kua ‘manako e loto ke talia ma e moui tukulagi.’​—Totou Gahua 13:48. *

21. Ko e heigoa ha tautolu a lauga he tau ma e 2020, ti ko e ha ne kua latatonu ai?

²¹ Ko e lauga he tau ma e 2020 ka lagomatai a tautolu ke tumau e holo ki mua he gahua taute tutaki. Putoia falu he tau kupu ha Iesu ne vagahau he magaaho uho lahi he feleveiaaga he mouga i Kalilaia: “Hanei, kia o atu a . . . ke eke e tau motu oti kana mo tutaki, ti papatiso atu a lautolu.”​—Mata. 28:19.