Muitua he tau Kerisiano e tau matapatu fakaakoaga he Tohi Tapu ka fifili e puhala ke puipui mo e papale e lautolu a lautolu. Ko e tau matapatu fakaakoaga nei kua fakakite na hepe ke fakaaoga he tau Kerisiano e tau kanavaakau tuga e fana kū, fana loa, mo e falu vahega fana ke puipui a lautolu mai he falu tagata. Manamanatu ke he tau manatu nā i lalo:

Kua tapu e moui he tagata ki a Iehova. Tohi he salamo ko Tavita hagaao ki a Iehova: “Ha ko e mena ha ha ia koe e puna he moui.” (Salamo 36:9) Ko e mena ia, ka fifili he Kerisiano ke papale a ia po ke tau koloa haana, to taute e ia e tau mena oti kua maeke ke kalo he fakamaligi toto, kakano kua fakalago ai ke he mate he taha tagata.​—Teutaronome 22:8; Salamo 51:14.

Mooli ai, ko e ha koloa he tagata ne fakaaoga ke papale aki a ia kua lauia ke he fakamaligi toto. Ka ko e tau fana ne mukamuka lahi ke tamate e tagata ha ko e pakia po ke taute pauaki. * (Kikite matahui tala.) Ko e tagata matahavala ne liga fitā e hopoate, ti ka kitia e ia e fana kua liga hagahaga kelea lahi e tuaga mo e liga fai tagata ka mate.

He tala age a Iesu ke he tau tutaki haana ke uta e pelu he pō to mate a ia, nakai kakano e mena nei ke fakaaoga ai ke puipui aki a lautolu. (Luka 22:36, 38) Ka e manako a Iesu ke fakaako e fakatonuaga ki a lautolu: Nakai lata e tau tutaki haana ke latau pete foki ka fehagai a lautolu mo e tau tagata ne fai kanavaakau. (Luka 22:52) Mole e fakaaoga e Peteru e pelu haana ke tā aki e fekafekau he ekepoa ne mua, ne poaki a Iesu ki a Peteru: “Ati liuaki a hau a pelu ke he hana tokaaga.” Ti talahau e Iesu e matapatu fakaakoaga kua takitaki foki e tau Kerisiano he mogonei: “Ko lautolu oti kana ke toto e pelu, to mamate a lautolu he pelu.”​—Mataio 26:51, 52.

He talahau tuai ia Mika 4:3, ko e tau tagata he Atua to “tukituki e lautolu e tau pelu ha lautolu ke eke mo tau koho, ko e tau tao foki ha lautolu ke eke mo tau titipi ke taute aki e tau vine.” Ko e tau Kerisiano mooli kua iloa he mahani mafola. Muitua e lautolu e tau poakiaga he Atua ne puhala he aposetolo ko Paulo ke “aua neke taui atu e kelea ke he kelea he taha” mo e “kia nonofo fakamitaki mo e tau tagata oti kana.” (Roma 12:17, 18) Pete he fehagai a Paulo mo e tau tuaga uka, putoia e “hao fetamaki . . . ke he tau fofo mena,” nakai totoko e ia e tau matapatu fakaakoaga he Tohi Tapu ke puipui aki a ia. (2 Korinito 11:26) Ka e falanaki a ia ke he Atua he iloa ko e fakatonuaga pulotu he Tohi Tapu “kua mua he mitaki e iloilo ke he tau kanavaakau ke tau ai.”​—Fakamatalaaga 9:18.

Ke he tau Kerisiano, mua atu e uho he moui ke he tau koloa fakatino. Iloa e tautolu kua “nakai moui taha he loga hana tau mena ha i ai.” (Luka 12:15) Ti ka tutala he puhala molū ke he tagata kaihā ne fai fana ka e nakai fanogonogo a ia, muitua e tautolu e fakatonuaga ha Iesu: “Aua neke taui atu e mutolu e kelea.” Liga kakano e mena nei kua fakaatā e tautolu a ia ke uta ha mena ne manako a ia ki ai. (Mataio 5:39, 40; Luka 6:29) * (Kikite matahui tala.) Mooli, kua mitaki ke kalo he eke mo matafī he tau tagata kolokolovao. Liga to nakai totoko e lautolu a tautolu ka  muitua e tautolu e fakatonuaga he Tohi Tapu mo e kalo he “tau mena he mouiaga nai ke hula ki ai.” (1 Ioane 2:16) To eke foki mo puipuiaga ma tautolu ka iloa he tau katofia ha tautolu a tautolu ko e Tau Fakamoli a Iehova ne mahani mafola.​—Tau Fakatai 18:10.

Fakalilifu he tau Kerisiano e loto manamanatu he falu. (Roma 14:21) Falu matakainaga ne ofo po ke fakatupetupe foki, ka iloa e lautolu taha he tau matakainaga Kerisiano ha lautolu ne fai fana ke puipui aki a ia mai he falu tagata. Liga moua e tautolu e tonuhia fakamatafakatufono ke fai fana, ka ko e fakaalofa ha tautolu ke he tau matakainaga to nakai taute e tautolu ha mena ne iloa e tautolu ka fakatupetupe a lautolu.​—1 Korinito 10:32, 33; 13:4, 5.

Manako e tau Kerisiano ke eke mo tau fakafifitakiaga mitaki ke he falu. (2 Korinito 4:2; 1 Peteru 5:2, 3) Ka fai fana e Kerisiano ke puipui a ia mai he falu tagata to foaki he tau motua e fakatonuaga ki a ia mai he Tohi Tapu. Ka fifili a ia ke fai fana, to nakai eke a ia mo fakafifitakiaga mitaki. Ko e fua, to nakai maeke a ia ke moua e tau matagahua po ke tau kotofaaga pauaki he fakapotopotoaga. Pihia foki ke he Kerisiano ne matutaki ke fai fana ha ko e vala he gahua tupe haana. Kua mitaki ke lali a ia ke kumi foki taha gahua. *​—Kikite matahui tala.

Lata e Kerisiano ke taute ni e ia e tau fifiliaga haana hagaao ke he tau puhala ke puipui a ia, magafaoa haana, mo e tau koloa haana, pihia foki mo e matakavi ne gahua a ia. Ka taute e ia e tau fifiliaga pihia, lata a ia ke fakavē ai ke he tau matapatu fakaakoaga he Tohi Tapu. Tuku mai he Atua pulotu e tau matapatu fakaakoaga nei ki a tautolu ha kua fakaalofa a ia ki a tautolu. Kakano haia he tau Kerisiano ne malolō e fakafetuiaga mo Iehova kua fifili ke nakai fai fana ke puipui a lautolu mai he falu tagata. Iloa e lautolu ka falanaki a lautolu ke he Atua mo e muitua e tau matapatu fakaakoaga he Tohi Tapu he tau momoui ha lautolu, to moua e lautolu e haohao mitaki tukulagi.​—Salamo 97:10; Tau Fakatai 1:33; 2:6, 7.