1, 2. He fakatokaaga nei, ko e ha ne ha ha i ai tumau e tau tagata mativa?

KO E fakatokaaga fakatupe mogonei kua kelea lahi mo e nakai lagotatai. Ma e fakatai, uka ma e tokologa he tau fuata ke kumi gahua. Falu ne fakahagahaga kelea e tau momoui ha lautolu he hiki ke he tau motu mautū. Ka e tokologa foki e tau tagata nonofogati he tau motu mautū. He lalolagi katoa, ko lautolu ne monuina kua mua atu e monuina ka ko lautolu ne mativa kua mua atu e mativa. Hagaao ke he tau fuafuaaga foou, ko e 1 e pasene he tau tagata ne mua atu e monuina kua loga atu e tupe ka lafi fakalataha e 99 e pasene he tau tagata ne toe. Maaliali ai, falu tagata ne loga e tupe ti molea ke lata mo e tau momoui katoa ha lautolu, totou piliona e falu ne mua e mativa. Mailoga e Iesu e mena nei he pehē a ia: “Kua nonofo mau e tau tagata nonofogati ia mutolu.” (Mareko 14:7) Ko e ha ne tupu ai e nakai lagotatai pihia?

² Iloa e Iesu ko e Kautu he Atua ni ka hiki e fakatokaaga fakafua koloa he lalolagi. Fakakite he Tohi Tapu ko e “tau tagata fakafua koloa” fakalataha mo e tau fakatokaaga politika mo e fakalotu ko e vala he lalolagi ha Satani. (Fakakiteaga 18:3)  Maeke e tau tagata he Atua ke vevehe kehe katoatoa a lautolu mai he tau mena politika mo e lotu fakavai. Ka e laulahi he tau tagata he Atua ne nakai vevehe kehe katoatoa a lautolu mai he fakatokaaga fakatupe he lalolagi ha Satani.

3. Ko e heigoa e tau hūhū ka fakatutala a tautolu ki ai?

³ Ha ko e tau Kerisiano, kua lata a tautolu ke kumikumi hifo ke he ha tautolu a tau aga ke he fakatokaaga fakafua koloa he lalolagi. Ke taute pihia, maeke a tautolu ke hūhū hifo: ‘Fakaaoga fēfē e au e tau koloa fakatino haaku ke fakakite e mahani fakamooli haaku ke he Atua? Fakatote hifo fēfē e au e putoia ke he fakatokaaga fakafua koloa he lalolagi? Ko e heigoa e tau mena tutupu ne fakakite kua falanaki katoatoa e tau tagata he Atua mogonei ki a Ia?’

4, 5. (a) Ko e heigoa ne tupu ke he fekafekau he tala ha Iesu? (e) Ko e heigoa ne tala age e Iesu ke he tau tutaki haana ke taute?

⁴ Totou Luka 16:1-9. Ko e tala ha Iesu ke he fekafekau hepehepe kua lata a tautolu oti ke tutū mo e manamanatu. Kua tukupau e fekafekau ha kua moumou koloa, ti fifili e iki haana ke fakaoti e gahua he fekafekau. * (Kikite matahui tala.) Ka e fakaaoga he fekafekau e pulotu aoga. Ato toka e ia e gahua haana, ne taute kapitiga a ia mo e tau tagata ka lagomatai a ia he mogo fakamui. Nakai talahau e Iesu e tala nei ha kua manako a ia ke he tau tutaki haana ke mahani hepehepe ke momoui. Pihia e mena ne taute he tau tagata he lalolagi nei. Ka e talahau e Iesu e tala ke fakaako aki e fakatonuaga uho lahi.

⁵ Iloa e Iesu ke tuga e fekafekau ia ne amanaki ti fehagai mo e tuaga uka, laulahi he tau tutaki haana to uka lahi ke leveki e tau momoui he lalolagi nakai fakafili tonu nei. Ti tala age a ia ki a lautolu: “Ko e koloa he mahani hepehepe kia eke ai e mutolu e tau kapitiga ma mutolu.” Ko e ha? Ha ko e mogo ka kaumahala e tau koloa ia, ko e tau kapitiga ko Iehova mo Iesu ka “talia ai . . . a mutolu ke he tau fale tukulagi.” Ko e heigoa ka fakaako e tautolu mai he fakatonuaga ha Iesu?

6. Iloa fēfē e tautolu ne nakai ko e finagalo he Atua e fakatokaaga fakafua koloa he lalolagi mogonei?

⁶ Pete he nakai fakamaama e Iesu e kakano ne fakahigoa e ia e tau koloa fakatino ko e “mahani hepehepe,” fakamaaliali he Tohi Tapu ko e lali ke moua loga e tau tupe mai he tau mena, ne nakai ko e finagalo he Atua. Ma e fakatai, ne lahi atu e mena ne foaki e Iehova ki a Atamu mo Eva mai he tau mena kua lata ma laua he kaina ko Etena. (Kenese 2:15, 16) Fakamui, ne foaki he Atua e agaaga tapu haana ki a lautolu ne fakauku, “kua nakai pehe foki taha ke he taha mena hana ko e hana mena haia, ka kua tuku fakalapalapa ha lautolu a tau mena oti.” (Gahua 4:32) Talahau he perofeta ko Isaia ha ha i ai e magaaho ka fiafia e tau tagata oti ke he tau monuina kehekehe ka fua mai he lalolagi. (Isaia 25:6-9; 65:21, 22) Ka e to hoko mai e magaaho ia, lata he tau tutaki ha Iesu ke fakaaoga e pulotu aoga. Lata a lautolu ke leveki e tau momoui he fakaaoga e tau koloa he mahani hepehepe he lalolagi nei, mo e he magaaho taha, lali ke fakafiafia e Atua.

7. Ko e heigoa e fakatonuaga ne tuku mai e Iesu ia Luka 16:10-13?

⁷ Totou Luka 16:10-13. Ko e fekafekau he tala ha Iesu ne moua e tau kapitiga kua aoga ki a ia. Ka e manako a Iesu ke he tau tutaki haana ke moua e tau kapitiga ke he lagi ma e tau kakano nakai lotokai. Manako a ia ki a tautolu ke maama ko e puhala ne fakaaoga e tautolu e tau koloa he mahani hepehepe ka fakakite kua mahani fakamooli po ke nakai mahani fakamooli a tautolu ke he Atua. Taute fēfē e tautolu e mena ia?

8, 9. Talahau e tau fakataiaga ne kua fakakite he falu e mahani fakamooli ha lautolu he fakaaoga e tau koloa he mahani hepehepe.

⁸ Taha e puhala ke fakakite kua mahani fakamooli a tautolu mo e tau koloa fakatino ha tautolu, ko e tuku he tau mena fakaalofa ke he gahua fakamatala he lalolagi katoa ne talahau tuai e Iesu to tupu. (Mataio 24:14) Ko e tama fifine i Initia ne fakaputu e tupe i loto he puha tote. Nakai liu foki a ia fakatau e tau toi. He mogo ne puke e puha, foaki e ia e tupe ne fakaputu e ia ke fakaaoga ma e gahua fakamatala. Ko e matakainaga taane i Initia ne fai ulu niu. Loga e fua niu ne foaki fakaalofa e ia ke he ofisa fakaliliu ha Malayalam. Ha kua lata e ofisa ke fakatau e tau fua niu, logona hifo e ia ko e mena foaki fakaalofa haana kua mua atu e uho ke he age e ia e tupe. Ko e pulotu aoga a ia. He puhala pihia foki, ko e tau matakainaga i Greece ne foaki tumau e oela olive, siisi, mo e falu mena kai ma e magafaoa Peteli.

⁹ Taha e matakainaga taane ne foaki e vala kaina haana i Sri Lanka ma e tau feleveiaaga mo e tau toloaga mo e nonofoaga he tau fekafekau gahua mau. Ko e mena foaki noa anei he matakainaga, ka kua lagomatai lahi ke he tau tagata fakailoa i ai ne nakai loga e tupe. He motu ne pā e gahua, fakaaoga he tau matakainaga e tau kaina ha lautolu ko e tau Fale he Kautu. Fakaatā he mena ia e tau paionia mo e falu ne nakai loga e tupe ke fai matakavi mo feleveia ai ne nakai totogi tupe.

10. Ko e heigoa falu aoga ka moua e tautolu ka fakamokoi a tautolu?

¹⁰ Ko e tau fakataiaga pihia ne fakakite ko e tau tagata he Atua kua “fakamoli ke he mena tote.” (Luka 16:10) Fakaaoga e lautolu e tau koloa fakatino ke aoga ai e falu. Fēfē e logonaaga he tau kapitiga ha Iehova he taute e tau foakiaga pihia? Fiafia lahi a lautolu he iloa ka fakamokoi a lautolu kua moua e lautolu e tau koloa “moli” he lagi. (Luka 16:11) Taha e matakainaga fifine ne tuku tumau e tau tupe ke lagomatai e tau gahua he Kautu ne pehē na fai mena matakehe ne tupu ki a ia he tau tau kua mole. Fakamaama e ia: “Ko e lahi e fakamokoi haaku ke he tau mena fakatino, kua lahi foki e aga fakamokoi haaku  ke he falu. Kua lahi e fakamokoi haaku he fakamagalo atu, mahani fakauka ke he falu, mo e maeke ke talia e tau fakaita mo e fakatonuaga.” Tokologa ne iloa kua aoga lahi e mahani fakamokoi ki a lautolu.​—Salamo 112:5; Tau Fakatai 22:9.

11. (a) Fakakite fēfē he fakamokoi ha tautolu e pulotu aoga? (e) Ko e heigoa kua tupu ke he tau tagata he Atua mogonei? (Kikite fakatino he kamataaga.)

¹¹ Fakakite foki e tautolu e pulotu aoga ka fakaaoga e tautolu e tau koloa fakatino ke lalago e falu he fekafekauaga. Ti pete he nakai fekafekau mau a tautolu po ke hiki ke he matakavi ne manako lagomatai, to aoga agaia a tautolu ke he falu. (Tau Fakatai 19:17) Ma e fakatai, ko e tau mena foaki fakaalofa ha tautolu kua lagomatai ke moua e tau tohi mo e lalago e gahua fakamatala he tau matakavi mativa lahi ne tokologa kua o mai ke he kupu mooli. He tau motu tuga a Congo, Madagascar, mo Rwanda ne tauuka lahi e tau Tohi Tapu. Falu mogo ko e taha e Tohi Tapu kua tatai mo e totogi he taha e faahi tapu po ke taha e mahina. He tau tau loga, ne lata e tau matakainaga ha tautolu ke fifili ke fakatau e tau mena kai ma e tau magafaoa ha lautolu po ke fakatau e Tohi Tapu. Mogonei, ko e tau mena fakaalofa he falu mo e tau tupe kua “fakatatai,” ne fakaliliu mo e tufatufa he fakatokatokaaga ha Iehova e tau Tohi Tapu nakai fai totogi ke he tau tagata takitaha he magafaoa ti pihia mo e tau tagata fakaako Tohi Tapu. (Totou 2 Korinito 8:13-15.) Ti ko lautolu ne foaki mo lautolu kua moua kua eke mo tau kapitiga ha Iehova.

12. Fakakite fēfē e Aperahamo kua falanaki a ia ke he Atua?

¹² Eke foki a tautolu mo tau kapitiga ha Iehova ka tote e putoia ke he fakatokaaga fakafua koloa he lalolagi mo e kumi e tau koloa “moli.” Taute pihia he tagata fakamooli ko Aperahamo. Omaoma a ia ki a Iehova ti toka e maaga monuina lahi ko Uro ke nonofo he tau fale ie ha kua manako a ia ke eke mo kapitiga ha Iehova. (Heperu 11:8-10) Falanaki tumau a ia ke he Atua ka e nakai ke he tau koloa fakatino. (Kenese 14:22, 23) Fakamalolō e Iesu e falu ke fifitaki e tua pihia. Tala age a ia taha mogo ke he fuata taane: “Kaeke ke manako a koe kia katoatoa hau a mahani mitaki, kia fano a koe mo e fakafua atu hau a tau mena, ti age ke he tau nonofogati, ati moua ai e koe e tau koloa loga ke he lagi; ati hau a, mo e mui mai kia au.” (Mataio 19:21) Ko e fuata taane ia ne nakai tua tuga a Aperahamo. Ka e fai tagata foki ne falanaki ke he Atua.

13. (a) Ko e heigoa e fakatonuaga ne tala age e Paulo ki a Timoteo? (e) Fakagahua fēfē e tautolu e fakatonuaga ha Paulo mogonei?

¹³ Ko Timoteo ko e tagata ne tua. Fakahigoa e Paulo a Timoteo ko e “tagata tau mitaki a Iesu Keriso,” ti tala age ki a ia: “Nakai fakai ha tagata tau kua tau mo e fakalavelave e ia a ia ke he tau mena he mouiaga nai, kia fakafiafia e ia a ia ne fifili a ia ke eke mo tagata tau.” (2 Timoteo 2:3, 4) Ko e tau tutaki ha Iesu mogonei, putoia molea e taha e miliona he tau fekafekau gahua mau ne eketaha ke fakagahua e fakatonuaga ha Paulo. Kalo  kehe a lautolu he tau fakainaina kamatamata he lalolagi lotokai nei. Manatu e lautolu e matapatu fakaakoaga: “Ko ia foki ne ogo mena kua eke a ia mo fekafekau kia ia ne ta age hana tau mena kia ia.” (Tau Fakatai 22:7) Manako a Satani ki a tautolu ke fakaaoga oti e tau magaaho mo e tau malolō ha tautolu ke gahua ma e haana fakatokaaga fakafua koloa he lalolagi. Falu ne lahi mahaki e kaitalofa ke totogi e kaina, motokā, fakaakoaga, po ke mauhoana. Ka nakai fakaeneene a tautolu, liga moui kaitalofa a tautolu ke he loga e tau tau. Fakakite e tautolu e pulotu aoga ka fakamukamuka e tautolu e tau momoui, kalo kehe he kaitalofa, mo e fatifati e fakaaoga he tupe. He puhala ia to atāina a tautolu ke fekafekau ke he Atua ka e nakai fakatupa ke he fakatokaaga fakafua koloa he lalolagi mogonei.​—1 Timoteo 6:10.

14. Ko e heigoa kua lata a tautolu ke eketaha ke taute? Talahau e tau fakataiaga.

¹⁴ Ke tumau e fakamukamuka e tau momoui ha tautolu, lata a tautolu ke tuku fakamua e Kautu he Atua. Taha e taane mo e hoana ne fai pisinisi monuina lahi. Ka e manako a laua ke liliu ke he fekafekauaga mau. Ti sela he hoa e pisinisi, posi, mo e falu koloa fakatino ha laua. Ne foaki noa e laua ke lagomatai e talaga he matapatu ofisa i Warwick, i New York. Uho lahi e mena nei ki a laua ha kua fekafekau a laua he Peteli mo e tama fifine ha laua mo e taane haana. Ne fai faahi tapu foki ne gahua mo e tau matua he taane he matagahua talaga i Warwick. Ko e matakainaga fifine paionia i Colorado, i U.S.A., ne moua e gahua vala magaaho he fale tanaki tupe. Fiafia lahi e tau takitaki ke he gahua haana ti foaki ki a ia e gahua tumau ne fakalahi tolu e totogi haana. Ha kua nakai fakaatā he gahua a ia ke hagaaki ke he fekafekauaga haana, ne nakai talia e ia e foakiaga lahi nei. Ko e falu fakataiaga ni anei he tau foakiaga loga ne taute he tau fekafekau a Iehova. Ka eketaha a tautolu ke tuku fakamua e tau mena he Kautu, to fakakite ai kua uho lahi ha tautolu a fakafetuiaga mo e Atua mo e tau koloa mooli ke he tau koloa fakatino.

15. Ko e tau koloa fe ka tamai e fiafia lahi mahaki?

¹⁵ Ko e mautū ke he tau koloa fakatino kua nakai kakano mooli kua moua e tautolu e taliaaga he Atua. Fakamonuina e Iehova a lautolu kua “maukoloa . . . ke he tau gahua mitaki.” (Totou 1 Timoteo 6:17-19.) Ma e fakatai, ko e matakainaga fifine ne higoa ko Lucia ne iloa kua lata ke fai tagata fakamatala i Albania. * (Kikite matahui tala.) Ne hiki atu a ia mai i Italy he 1993. Nakai fai gahua a ia ka e falanaki a ia ki a Iehova ke moua e levekiaga. Fakaako e ia e vagahau Albania ti lagomatai ke molea 60 e tagata ke taute e tukuleleaga. Liga nakai pihia e tau fua ka moua e tautolu he fakamatala he tau fonua ha tautolu. Ka ko e tau mena oti ne taute e tautolu ke lagomatai e falu ke iloa a Iehova mo e eke mo kapitiga Haana ko e mena ka tokiofa tumau e tautolu.​—Mataio 6:20.

16. (a) Ko e heigoa ka tupu ke he fakatokaaga fakafua koloa he lalolagi mogonei? (e) Lata fēfē e mena ia ke lauia e onoonoaga ha tautolu ke he tau koloa fakatino?

¹⁶ Ne fakamaaliali e Iesu to fakaotioti e fakatokaaga fakafua koloa he lalolagi nei. Pehē a ia: ‘Magaaho ka kaumahala e tau koloa fakatino pihia,’ nakai ‘liga to  kaumahala.’ (Luka 16:9) He tau aho fakamui nei, falu fale tanaki tupe ne tomo ti lekua lahi e falu motu ha ko e tau tuaga fakatupe. Ka e he magaaho kū i mua, to holo ki mua e kelea. To kaumahala e tau fakatokaaga fakapolitika, fakalotu, mo e fakatupe ha Satani. Talahau tuai he perofeta ko Esekielu mo Sefanaia ko e auro mo e ario ne aoga tumau ke he fakatokaaga fakafua koloa to nakai fai aoga. (Esekielu 7:19; Sefanaia 1:18) To fēfē e logonaaga ha tautolu ka hokotia ke he fakaotiaga he tau momoui ha tautolu he lalolagi nei ti mailoga kua moumou noa e tautolu e tau koloa mooli ke lata mo e tau koloa he mahani hepehepe he lalolagi? To liga logona hifo e tautolu tuga e tagata ne gahua he moui katoa ke loga e tupe ka e hoko ke he mogo fakamui ti mailoga kua fakavaia e tupe. (Tau Fakatai 18:11) Ko e tau koloa fakatino he lalolagi nei to kaumahala. Ti ua fakatō noa e magaaho ke fakaaoga e tau koloa fakatino haau ke moua e tau kapitiga he lagi. Ko e tau mena ne taute e tautolu ma Iehova mo e Kautu haana to fakafiafia mooli a tautolu.

17, 18. Ko e heigoa kua amanaki e tau kapitiga he Atua ki ai?

¹⁷ Ka hoko mai e Kautu he Atua, to nakai fai tagata ke totogi fale po ke ole tupe. To loga mo e moua noa e tau mena kai, mo e to nakai lata ke totogi e tau ekekafo po ke tau vai fakaekekafo. To moua he tau kapitiga ha Iehova e tau fua mitaki lahi mai he lalolagi. Ko e auro, ario, mo e tau maka uho to fakaaoga ha kua manaia, ka e nakai taute e taha tagata ke monuina. Ko e tau akau, maka, mo e lapatoa mitaki lahi to moua noa ke talaga aki e tau kaina fulufuluola. To lagomatai mai e tau kapitiga ha tautolu he fiafia, nakai ha kua totogi e tautolu a lautolu. To feutaaki e tau mena oti ha tautolu ne moua mai he lalolagi.

¹⁸ Ko e vala ni anei he palepale lahi mahaki ma lautolu ne moua e tau kapitiga he lagi. Ko e tau tagata tapuaki ha Iehova he lalolagi to kalaga fiafia ka logona e tau kupu ha Iesu: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.”​—Mataio 25:34.