1, 2. Talahau tuai fēfē he Tohi Tapu e tupuaga he tau tagata ha Iehova?

KE HE lalolagi katoa, ha ha i ai e fakatokatokaaga he tau tagata kua fakaalofa ki a Iehova mo e manako ke fekafekau ki a ia. Ko e tau tagata ia ko e Tau Fakamoli a Iehova. Pete ne tau hehē mo e tau hepehepe ha lautolu, ne takitaki e Iehova e tau tagata haana aki e agaaga tapu. Kia kitekite a tautolu ke he falu puhala kua fakamonuina e ia a lautolu.

² He 1914, tokogahoa e tagata ne tapuaki ki a Iehova. Ka kua fakamonuina e Iehova e gahua fakamatala. Ti ko e fua, tokologa ne fakaako e kupu mooli he Tohi Tapu ti kua eke mo Tau Fakamoli haana. Fakamaama e Iehova e tupuaga ofoofogia nei he pehē a ia: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.” (Isaia 60:22) He vahā nei maeke a tautolu ke kitia maali kua fakamooli e perofetaaga nei. Kua tuga e motu lahi e tau tagata ha Iehova. Kua loga e motu he lalolagi katoa ne tote lahi e puke tagata ke he numera katoa he tau tagata ha Iehova.

3. Fakakite fēfē he tau fekafekau he Atua e fakafeofanaki?

 ³ He tau aho fakamui nei, ne lagomatai e Iehova e tau tagata haana ke fakamalolō e fakafeofanaki ha lautolu. “Ko e Atua ko e fakaalofa a ia,” mo e fifitaki a lautolu ki a ia. (1 Ioane 4:8) Poaki a Iesu ke he tau tutaki haana ke “feofanaki.” Tala age foki a ia ki a lautolu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) He tau magahala foou kua mole, ne fakakite he tau fekafekau ha Iehova e fakafeofanaki nei foki ka ō e tau motu ke felakutaki. Ma e fakatai, he felakutaki uaaki he lalolagi, kavi ke he 55 e miliona tagata ne kelipopo. Ka e nakai tamate he tau tagata ha Iehova ha tagata he felakutaki ia. (Totou Mika 4:1, 3.) Ne lagomatai he mena nei a lautolu ke fakatumau e “mea . . . he toto he tau tagata oti.”​—Gahua 20:26.

4. Ko e ha kua aoga e tupu tokologa he tau tagata ha Iehova?

⁴ Matutaki e tau tagata he Atua ke tupu tokologa pete ne ha ha ia lautolu e fī malolō lahi ko Satani. Ko ia ko e “atua he lalolagi nai.” (2 Korinito 4:4) Ne pule a Satani ke he tau fakatokatokaaga fakapolitika he lalolagi nei, ti pihia mo e tau uta tala, ti fakaaoga e ia e tau mena nei ke lali ke taofi e fakamatala he tala mitaki. Ka e nakai maeke a ia ke taofi e gahua nei. Iloa e Satani kua kū lahi e magaaho haana ne toe, ti lali tumau a ia ke taofi a tautolu mai he tapuaki ki a Iehova.​—Fakakiteaga 12:12.

5. Ko e ha e falu he tau magaaho ne fakamamahi e tau logonaaga ha tautolu? (Kikite fakatino he kamataaga.)

⁵ Fakaako he tau fekafekau he Atua kua aoga lahi ke fakaalofa ke he Atua mo e falu tagata. Pehē a Iesu: “Kia fakaalofa a koe ke he Iki [Iehova] hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.” (Mataio 22:35-39) Ka e fakakite he Tohi Tapu kua fanau e tau tagata oti mo e nakai mitaki katoatoa ha ko e fua he agahala ha Atamu. (Totou Roma 5:12, 19.) He falu mogo fai he fakapotopotoaga ne liga vagahau po ke taute taha mena ne fakamamahi e tau logonaaga ha tautolu. Ka tupu e mena nei, ko e heigoa ha tautolu ka taute? To tumau nakai e malolō he fakaalofa ha tautolu ki a Iehova? To fakamooli nakai a tautolu ki a ia mo e tau tagata haana? Talahau he Tohi Tapu ki a tautolu hagaao ke he falu he tau fekafekau he Atua ne vagahau po ke taute e tau mena ne fakamamahi e falu. Kitekite la tautolu ke he mena ka fakaako e tautolu mai he mena ne tupu ki a lautolu.

6. He tuaga fe ne kaumahala a Eli ke akonaki e tau tama taane haana?

⁶ Ma e fakatai, ko Eli ko e ekepoa ne mua ha Isaraela, ka e nakai omaoma e tau tama taane tokoua haana ke he tau matafakatufono ha Iehova. Pehē e Tohi Tapu: “Ko e tau tama tane a Eli, ko e tau tagata matahavala a laua, nakai iloa e laua a Iehova.” (1 Samuela 2:12) Iloa e Eli na taute he tau tama taane haana e tau mena kelea lahi. Pete ia, ne nakai lahi e akonaki e ia a laua. Nakai leva ti fakahala e Iehova a Eli mo e tau tama taane tokoua haana. Magaaho fakamui, ne nakai liu a ia fakaatā e tau hologa ha Eli ke fekafekau ko e tau ekepoa ne mua. (1 Samuela 3:10-14) Ka moui a koe he magahala ha Eli ti iloa e koe na fakaatā e ia e tau tama  taane haana ke taute e tau mena kelea lahi, to tupetupe nakai a koe? To fakalolelole kia he tuaga nei e tua haau ki a Iehova, mo e fakahiku ai to nakai fekafekau a koe ki a ia?

7. Agahala kelea lahi fēfē a Tavita, ti ko e heigoa ne taute ai he Atua?

⁷ Ha ha ia Tavita e tau mahani mitaki lahi, ti ko e mena ia ne fakaalofa lahi mahaki a Iehova ki a Tavita. (1 Samuela 13:13, 14; Gahua 13:22) Ka e taute foki e Tavita e mena kelea lahi. Ko Uria a ia he tau he mogo ne mahani feuaki a Tavita mo e hoana ha Uria ko Patesepa, ti fatu a ia. Nakai manako a Tavita ke iloa he ha tagata e mena ne tupu. Ti poaki a ia ki a Uria ke hau ke kitia a ia mo e lali ke fekau a ia ke fano ki kaina. Amanaki a Tavita ki a Uria ke momohe mo Patesepa ti manatu ai e tau tagata ko Uria e matua he tama mukemuke. Ka e nakai fano a Uria ki kaina. Ti eketaha a Tavita ke mate a Uria he malētau. Ha ko e tau agahala kelea lahi ha Tavita, ne lahi e matematekelea haana mo e magafaoa. (2 Samuela 12:9-12) Ka e fakaalofa hofihofi mo e fakamagalo e Iehova a ia. Iloa e ia manako a Tavita ke taute e mena hako. (1 Tau Patuiki 9:4) Ka moui a koe he magahala ia, to fēfē e logonaaga haau ke he mena ne taute e Tavita? To oti kia e fekafekau haau ki a Iehova?

8. (a) Kaumahala fēfē e aposetolo ko Peteru ke fakamooli ke he kupu haana? (e) He mole e hehē ha Peteru, ko e ha ne matutaki a Iehova ke fakaaoga a Peteru?

⁸ Taha fakataiaga foki he Tohi Tapu ko e aposetolo ko Peteru. Ne fifili e Iesu a ia ke eke mo aposetolo. Pete ia ne vagahau po ke taute e Peteru e tau mena nakai hako. Ma e fakatai, ne pehē a Peteru to nakai tiaki e ia a Iesu pete ka tiaki he tau tagata oti. (Mareko 14:27-31,  50) Ka ko e mogo ne tapaki a Iesu, ne tiaki he tau aposetolo oti, putoia ai a Peteru a ia. Tolu e magaaho kehekehe ne pehē a Peteru kua nakai iloa e ia a Iesu. (Mareko 14:53, 54, 66-72) Ka e momoko lahi mahaki e logonaaga ha Peteru ke he mena ne taute e ia. Ti fakamagalo e Iehova a ia mo e matutaki ke fakaaoga a ia. Kaeke ko e tutaki a koe he mogoia ti iloa e mena ne taute e Peteru, to matutaki kia a koe ke falanaki ki a Iehova?

9. Ko e ha kua falanaki a koe kua hakohako tumau e Atua?

⁹ Mai he tau fakataiaga nei, kitia e tautolu na taute he falu fekafekau ha Iehova e tau mena kelea ti fakamamahi lahi mahaki e falu. Ka tupu e mena nei he vahā nei, ko e heigoa haau ka taute? To oti kia e fano haau ke he tau feleveiaaga po ke tiaki katoatoa a Iehova mo e tau tagata haana? Po ke to mailoga e koe kua fakaalofa hofihofi a Iehova ti liga fakatali a ia ke he tagata ke fakatokihala? Ka e ha ha i ai he falu mogo e tagata kua kelea e logonaaga ha ko e tau agahala kelea lahi mahaki ti nakai tokihala ke he mena ne taute e ia. To falanaki nakai a koe to iloa e Iehova e mena nei mo e to taute e ia taha mena ki ai he magaaho kua latatonu? To utakehe foki e ia e tagata nā mai he fakapotopotoaga kaeke kua lata. Talitonu nakai a koe to taute tumau e Iehova e mena kua tonu mo e hakohako?

10. Ko e heigoa ne maama e Iesu ke he tau hehē ha Iuta Isakariota mo Peteru?

¹⁰ He Tohi Tapu, totou e tautolu hagaao ke he tokologa ne fakatumau e fakamooli ki a Iehova mo e tau tagata haana pete ni he taute he falu ne takatakai ia lautolu e tau hepehepe kelea lahi mahaki. Ko Iesu e fakafifitakiaga mitaki lahi mahaki. He mole e liogi ke he pō katoa ma e lagomataiaga he Matua haana, ne fifili e ia e tau aposetolo 12. Ka e taha ia lautolu ko Iuta Isakariota ne afokau a ia he mogo fakamui. Pehē foki e aposetolo ko Peteru ne nakai iloa e ia a Iesu. (Luka 6:12-16; 22:2-6, 31, 32) Ne nakai tukupau e Iesu a Iehova po ke tau tutaki haana he magaaho ne fakaita he falu a ia. Ka kua fakatata lahi mahaki a Iesu ke he Matua haana ti matutaki ke fekafekau fakamooli ki a Ia. Ti ko e fua, ne palepale e Iehova a ia he fakaliu tu mai a ia ti eke ai mo Patuiki he Kautu he lagi.​—Mataio 28:7, 18-20.

11. Ko e heigoa ne talahau tuai he Tohi Tapu hagaao ke he tau fekafekau ha Iehova he mogonei?

¹¹ Fakaako he fakafifitakiaga ha Iesu ki a tautolu ke mahani fakamooli ki a Iehova mo e tau tagata haana. Ti ha ha ia tautolu e tau kakano mitaki ke taute pihia. Maeke a tautolu ke kitia kua takitaki e Iehova e tau fekafekau haana he magaaho nei he fakaotiaga. Kua lagomatai e ia a lautolu ke fakamatala e kupu mooli ke he lalolagi katoa, ti ko lautolu ni hane taute e gahua nei. Kua kaufakalataha mo e fiafia mooli foki a lautolu ha kua fakaako e Iehova a lautolu oti. Fakamaama e Iehova e mena nei he pehē a ia: “Kitiala, to kalaga haku a tau fekafekau ha ko e loto fiafia.”​—Isaia 65:14.

12. Lata ke mailoga fēfē e tautolu e tau hehē he falu?

 ¹² Kua fiafia mooli a tautolu ha kua takitaki e Iehova a tautolu mo e lagomatai a tautolu ke taute e tau mena mitaki loga. Kehe mamao mo e tau tagata he lalolagi ha Satani ne nakai fiafia mo e nakai fai amaamanakiaga mooli ma e anoiha. Ko e goagoa mo e nakai tonu mooli ke tiaki a Iehova mo e tau tagata haana ha kua taute po ke vagahau he taha tagata he fakapotopotoaga e mena hepe! Ka e lata ia tautolu ke fakatumau e mahani fakamooli ki a Iehova mo e muitua e takitakiaga haana. Lata foki a tautolu ke fakaako e puhala ke mailoga mo e fehagai ke he tau hehē he falu.

13, 14. (a) Ko e ha kua lata a tautolu ke fefakaukaaki? (e) Ko e heigoa e maveheaga kua manako a tautolu ke manatu?

¹³ Ko e heigoa kua lata a koe ke taute kaeke ke vagahau po ke taute he taha matakainaga haau e mena kua fakamamahi e tau logonaaga haau? Pehē e fakatonuaga he Tohi Tapu: “Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.” (Fakamatalaaga 7:9) Nakai mitaki katoatoa mo e taute e tautolu oti e tau hehē. Ti nakai maeke a tautolu ke amanaki ke he tau matakainaga ha tautolu ke vagahau mo e taute tumau e tau mena hako. Ti nakai mitaki ma tautolu ke manamanatu tumau ke he tau hepehepe ha lautolu. Ka pihia a tautolu, to liga nakai logona e tautolu e fiafia he fa e fekafekau ki a Iehova. Mua atu e kelea, to liga lolelole e tua ha tautolu ki a ia ti liga tiaki e tautolu e fakatokatokaaga ha Iehova. Maeke a tautolu mogoia ke nakai fekafekau ki a Iehova po ke amaamanaki ke momoui he lalolagi foou Haana.

¹⁴ Ti ko e heigoa ka lagomatai a koe ke fakatumau e fiafia he fekafekau ki a Iehova ka taute he falu e mena kua fakamamahi a koe? Manatu tumau e maveheaga mafanatia Haana: “Kitiala, kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17; 2 Peteru 3:13) To foaki atu e Iehova ki a koe e tau monuina nei ka fakatumau a koe ke fakamooli ki a ia.

15. Ko e heigoa e mena ne talahau e Iesu kua lata a tautolu ke taute ka mahani hepehepe e falu?

¹⁵ Mooli, nakaila hohoko atu a tautolu ke he lalolagi foou. Ti ka fai tagata kua fakamamahi e tau logonaaga ha tautolu, lata a tautolu ke manamanatu fakahokulo ke he mena kua manako a Iehova ke taute e tautolu. Ma e fakatai, pehē a Iesu: “Kaeke ke fakamagalo atu e mutolu, ke he tau tagata e tau hala ha lautolu, ti fakamagalo mai foki a mutolu he Matua ha mutolu ha ha he lagi. Kaeke foki kua nakai fakamagalo atu e mutolu ke he tau tagata e tau hala ha lautolu, ti nakai fakamagalo foki ha mutolu a Matua ha mutolu a tau hala.” Ko e mogo foki ne hūhū a Peteru ki a Iesu kua lata nakai a tautolu ke fakamagalo “lagafitu,” ne tali e Iesu: “Nakai tala atu e au kia koe ke lagafitu, ka kia laga fitugofulu kua taki fitu.” Fakaako e Iesu a  tautolu kua lata ke makai tumau a tautolu ke fakamagalo e falu.​—Mataio 6:14, 15; 18:21, 22.

16. Ko e heigoa e fakafifitakiaga mitaki ne fakatoka e Iosefa?

¹⁶ Fakaako he fakafifitakiaga ha Iosefa ki a tautolu e puhala ke tali atu ka fakaita he falu a tautolu. Ko Iosefa mo e tehina tote haana ni e tau fanau ha Iakopo mo Rahela. Hogofulu foki e tama taane ha Iakopo ka e mua atu e ofania haana ki a Iosefa. Mahekeheke lahi mogoia a lautolu ki a Iosefa. Ati vihiatia lahi e lautolu a ia mo e fakafua a ia ke eke mo tupa, ti uta a ia ki Aikupito. He mole e tau tau loga, ne taute he patuiki ha Aikupito a Iosefa ko e pule malolō ke uaaki he motu ha kua nava lahi a ia ke he gahua mitaki ha Iosefa. Fakamui, ne o atu e tau lafu ha Iosefa ki Aikupito ke fakatau mena kai ha kua tō e hoge. He mogo ne kitia e lautolu a Iosefa, ne nakai mailoga e lautolu a ia, ka e iloa e ia a lautolu. Pete he taute fakakelea e lautolu a ia, ne nakai fakahala e ia a lautolu. Ka e kamatamata e Iosefa a lautolu ke iloa kaeke kua hiki mooli a lautolu. He mailoga e Iosefa kua hiki a lautolu, ne tala age a ia ki a lautolu ko ia ko e matakainaga ha lautolu. Fakamui, fakamafana e ia a lautolu ti pehē a ia: “Ua matakutaku a mutolu; to fagai e au ni a mutolu mo e ha mutolu a fanau.”​—Kenese 50:21.

17. Ko e heigoa kua manako a koe ke taute ka hepehepe e falu?

¹⁷ Manatu na fai hehē oti e tau tagata, ti fakaita foki e koe e falu. Ka mailoga e koe kua fakaita e koe e taha tagata, kia muitua e fakatonuaga he Tohi Tapu. Ole ki a ia ke fakamagalo a koe, ti eketaha ke taute e mafola mo ia. (Totou Mataio 5:23, 24.) Fiafia a tautolu ka fakamagalo he falu a tautolu. Ti lata foki a tautolu ke taute pihia ke he falu. Ia Kolose 3:13 ne pehē: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] kia mutolu, kia pihia foki a mutolu.” Ka fakaalofa mooli a tautolu ke he tau matakainaga ha tautolu, to nakai ita tumau a tautolu ke he mena ne taute e lautolu he mogo kua mole. (1 Korinito 13:5) Ka fakamagalo e tautolu e falu, to fakamagalo foki e Iehova a tautolu. Ti ka taute he falu e tau hepehepe, kia fakaalofa hofihofi a tautolu ki a lautolu tuga e ha tautolu a Matua ko Iehova kua fakaalofa hofihofi ki a tautolu.​—Totou Salamo 103:12-14.