1. Fēfē e logonaaga ha Iehova ka taha he tau mamoe haana kua liu fekafekau ki a ia?

TUGA ne fakatutala e tautolu he vala tala kua mole, fakatatai e Iehova a ia ke he leveki mamoe mitaki ne leveki fakaalofa e tau mamoe takitaha haana. Ti kumi e ia e tau tagata ne tafea kehe. Tala age e Iehova ke he tau Isaraela ne o kehe mai ia ia: “Kia liliu mai a a mutolu kia au, ti liu atu ai au kia mutolu.” Iloa e tautolu kua pihia agaia e logonaaga haana ha kua pehē a ia: “Nakai ni hiki e au haku mahani.” (Mala. 3:6, 7) Pehē a Iesu kua fiafia lahi a Iehova mo e tau agelu ha kua taha he tau fekafekau Haana ne tafea kehe kua liu mai ki a Ia.​—Luka 15:10, 32.

2. Ko e heigoa ka fakatutala a tautolu ki ai he vala tala nei?

² Kia manamanatu a tautolu ke he tolu e fakatai ha Iesu ne hagaaki ke lagomatai a lautolu kua tafea kehe mai ia Iehova. To fakatutala a tautolu ke he falu aga pauaki kua lata ke lagomatai e tau mamoe ne galo ke liliu mai ki a ia. Mo e to kitia e tautolu e kakano kua uho lahi ke lalago a lautolu kua lolelole fakaagaaga.

3-4. Ko e ha e fifine ne totoku ia Luka 15:8-10 ne kumi fakamakutu e tupe haana ne galo?

³ Lata a tautolu ke eketaha ke kumi a lautolu ne manako ke liliu mai ki a Iehova. He fakatai ne fakamau he Evagelia ha Luka, fakamaama e Iesu e puhala ne kumi he fifine e taha koloa uho ne galo​—ko e tupe. Ko e vala aoga lahi he fakatai nei ko e puhala ne kumi he fifine e tupe.​—Totou Luka 15:8-10.

⁴ Fakamaama e Iesu e logonaaga he fifine he magaaho ne moua ai e tupe ne galo. He vahā ha Iesu, ne fa age he matua fifine Isaraela ke he tama fifine hogofulu e tupe he aho mau haana. Liga ko e taha he tau tupe ia ne galo. Manatu e fifine kua tō e tupe ke he foloa. Ati tugi e ia e lamepa mo e kumi viko, ka e  nakai kitia e ia ha mena. Liga nakai maama lahi e lamepa haana ke maeke ke kitia e tupe ario tote. Fakahiku ai, ne tafitafi fakamakutu e ia e fale katoa. Haia he tau efu ne tafitafi e ia ko e tupe uho kua kikila he maama he lamepa haana. Ko e fakaaue ha ia! Kua fakapotopoto e ia e tau kapitiga mo e tau katofia haana ke tala age ki ai e tala mitaki.

5. Ko e ha kua liga uka ke kumi a lautolu kua lolelole fakaagaaga?

⁵ Kitia e tautolu mai he fakatai ha Iesu, na lahi e gahua ke kumi e mena ne galo. Pihia foki, liga lata a tautolu ke gahua malolō ke kumi a lautolu kua lolelole fakaagaaga. Liga kua loga e tau he nakai fakalataha a lautolu mo tautolu. Liga hiki foki a lautolu ke he matakavi ne nakai iloa he tau matakainaga i ai a lautolu. Ka e he magaaho tonu nei, kua manako mooli e falu kua lolelole fakaagaaga ke liliu mai ki a Iehova. Manako a lautolu ke fekafekau ki a Iehova mo e magafaoa he tau tagata tapuaki mooli, ka e lata a lautolu ke he lagomatai ha tautolu.

6. Maeke fēfē e tau matakainaga oti he fakapotopotoaga ke fai vala he kumi a lautolu kua lolelole fakaagaaga?

⁶ Ko hai kua maeke ke lagomatai ke kumi a lautolu kua lolelole fakaagaaga? Ko tautolu oti​—tau motua, tau paionia, tau tagata he magafaoa, mo e tau tagata fakailoa he fakapotopotoaga​—ka maeke ke lagomatai. Fai kapitiga nakai a koe po ke tagata he magafaoa kua lolelole fakaagaaga? Kua feleveia nakai a koe mo e taha kua lolelole fakaagaaga he gahua fakamatala he taha fale ke he taha fale po ke he toloaga tagata? Fakamaama ke he tagata ka manako a ia ke ahiahi mai taha, to fiafia a koe ke age e tau vala tala haana ke he tau motua he fakapotopotoaga.

7. Ko e heigoa kua fakaako e koe mai he tau talahauaga he motua ko Thomas?

⁷ Ko e heigoa e tau lakaaga aoga ka taute he tau motua ke kumi a lautolu kua manako ke liliu mai ki a Iehova? Mailoga e tau mena ne talahau he motua ko Thomas * ne nofo i Spain. Lagomatai e ia molea 40 e Tau Fakamoli ke liliu mai ke he fakapotopotoaga. Pehē a Thomas: “Fakamua, hūhū au ke he tau matakainaga kehekehe kaeke kua iloa e lautolu e nonofoaga he tau matakainaga ne lolelole fakaagaaga mogonei. Po ke hūhū au ke he tau matakainaga kaeke kua manatu e lautolu e falu ne nakai o mai he tau feleveiaaga. Laulahi he fakapotopotoaga ne fiafia lahi ke lagomatai ha kua logona hifo kua fai vala a lautolu he kumiaga nei. He mogo ka ahiahi au ke he tau matakainaga kua lolelole fakaagaaga, hūhū au hagaao ke he tau fanau mo e falu magafaoa ha lautolu. Falu ia lautolu nei ne mahani ke tamai e tau fanau ha lautolu ke he tau feleveiaaga, ti liga ko e tau fanau nei ko e tagata fakailoa he taha magaaho. Maeke foki ke lagomatai a lautolu nei ke liliu mai ki a Iehova.”

8. He fakatai ke he tama taane ne galo ia Luka 15:17-24, taute fēfē he matua taane e tama taane haana kua fakatokihala?

⁸ Ko e heigoa e tau aga kua lata ia tautolu ke moua ke lagomatai a lautolu kua manako ke liliu mai ki a Iehova? Mailoga e falu fakaakoaga ka moua e tautolu he fakatai ha Iesu ke he tama taane mahani uka ne toka e kaina. (Totou Luka 15:17-24.) Fakamaama e Iesu ne matala e loto he tama taane ti fifili ke liu ki kaina. Ne poi atu e matua taane ke feleveia mo e tama taane haana ti peka mafanatia ki a ia he fakakite e fakaalofa haana ke he tama. Momoko e loto he tama taane ti logona hifo kua nakai tuai aoga a ia ke ui ko e tama. Ne fakaalofa e matua taane ke he haana tama taane ne kua liligi age e tau logonaaga haana. Ti taute he matua taane e tau lakaaga pauaki ke fakakite kua fiafia he liu mai e tama ki kaina, nakai ko e fekafekau  ka ko e tama taane fakahele he magafaoa. Ke fakakite na mooli e matua taane, ne fakatoka e ia e galue mo e age e tau tapulu uho ke he tama taane haana kua fakatokihala.

9. Ko e heigoa e tau aga kua lata ke moua e tautolu ke lagomatai a lautolu kua lolelole fakaagaaga ke liliu mai ki a Iehova? (Kikite puha “ Puhala ke Lagomatai a Lautolu ne Manako ke Liliu Mai.”)

⁹ Ko Iehova kua tuga e matua taane he fakatai ia. Fakaalofa a ia ke he tau matakainaga ha tautolu kua lolelole fakaagaaga ti manako ke liliu mai a lautolu ki a ia. He fifitaki a Iehova, maeke a tautolu ke lagomatai a lautolu ke liliu mai. Ke taute e mena ia, lata a tautolu ke fakauka, ofania, mo e fakaalofa. Ko e ha kua lata a tautolu ke fakakite e tau aga pauaki ia, ti taute fēfē ai e tautolu?

10. Ko e ha kua lata a tautolu ke fakauka he lagomatai e taha ke malolō fakaagaaga?

¹⁰ Lata a tautolu ke fakauka ha kua fai magaaho ato malolō fakaagaaga e tagata. Tokologa ne lolelole fakaagaaga he mogo fakamua ne talahau na lagaloga e ahiahi age he tau motua mo e falu he fakapotopotoaga ato kamata a lautolu ke liliu mai. Ko e matakainaga fifine ko Nancy, mai i Asia ne tohi: “Ko e kapitiga tata he fakapotopotoaga ne lahi e lagomatai ki a au. Fakaalofa a ia ki a au tuga ko e taokete haaku. Fakamanatu mai e ia e tau magaaho mitaki ha maua kua mole. Fanogonogo fakatekiteki a ia he fakakite e au haaku tau logonaaga, ti atāina a ia ke fakatonu au. Ko e kapitiga mooli a ia ne mautali ke lagomatai he ha magaaho.”

11. Ko e ha kua lata a tautolu ke fakaalofa hofihofi ke lagomatai e tagata ne mamahi e logonaaga?

¹¹ Ko e fakaalofa hofihofi kua tuga e vai lakau malolō; kua maeke ke fakamaulu e tau logonaaga mamahi. Falu kua lolelole fakaagaaga ne  taufetului ke he loga e tau tau ha ko e tau logonaaga mamahi ke he taha he fakapotopotoaga. Kua taofi he tau logonaaga nei e manako ke liliu mai ki a Iehova. Liga manatu e falu kua nakai hako e puhala ne fehagai ki a lautolu. Liga lata a lautolu ma e taha ka fanogonogo mo e maama e tau logonaaga ha lautolu. (Iako. 1:19) Ko María, ne lolelole fakaagaaga he taha magaaho ne pehē, “Manako au ke he taha ne fanogonogo, fakamafana mai, mo e foaki e lagomatai ke takitaki au.”

12. Talahau e puhala kua futia he fakaalofa ha Iehova a lautolu kua lolelole fakaagaaga ke liliu mai ke he tau tagata haana.

¹² Fakamaama he Tohi Tapu e fakaalofa ha Iehova ma e tau tagata haana kua tuga e afo, po ke toua. Puhala fe kua tuga e toua e fakaalofa he Atua? Manamanatu ke he fakatai nei: Liga kua tomo a koe he loka e tahi ti liti atu he taha tagata e mena ke totō ke hili a koe. To loto fakaaue a koe ha kua lagomatai he mena nei a koe ke ua tomo. Ka e lata ke fai lagomatai foki ke moui. Makalili e vai, ti lata e tau tagata ke liti atu e toua ke toho mai a koe ke he posi. Talahau e Iehova hagaao ke he tau Isaraela ne tafea kehe: “Ne toho e au a lautolu ke he . . . tau afo fakaalofa.” (Hosea 11:4) Pihia e logonaaga he Atua mogonei ki a lautolu kua nakai fekafekau ki a ia ti hane tomo he tau lekua mo e fakaatukehe. Manako a ia ke iloa e lautolu kua fakaalofa a ia ki a lautolu, ti manako ke futia mai a lautolu ki a ia. Maeke foki a Iehova ke fakaaoga a koe ke fakakite e fakaalofa haana ki a lautolu.

13. Talahau e mena ne tupu ne fakakite e malolō he fakaalofa fakamatakainaga.

¹³ Aoga ke fakamafana ki a lautolu kua lolelole fakaagaaga na fakaalofa a Iehova mo tautolu ki a lautolu. Ko Pablo ne totoku he vala  tala kua mole ne lolelole fakaagaaga ke he molea 30 e tau. Pehē a ia: “Taha pogipogi he toka e au e kaina haaku, taha e matakainaga fifine motua ne feleveia mo au ti tutala ki a au he puhala fakaalofa hofihofi. Kamata au ke tagi tuga e tama tote. Tala age au kua tuga na fakafano mai e Iehova a ia ke tutala ki a au. Ko e magaaho tonu ia ne fifili au ke liu mai ki a Iehova.”

14. Hagaao ke he fakatai ia Luka 15:4, 5, ko e heigoa ne taute he leveki mamoe he mogo ne moua e ia e mamoe ne galo?

¹⁴ Lata a tautolu ke lagomatai tumau a lautolu kua lolelole fakaagaaga. Tuga e tama taane ne galo he fakatai ha Iesu, liga lahi mahaki e mamahi ha lautolu. Ti liga kua lolelole fakaagaaga ha ko e tau mena ne tupu ki a lautolu he lalolagi ha Satani. Lata a tautolu ke lagomatai a lautolu ke fakamalolō e tua ha lautolu ki a Iehova. He fakatai ke he mamoe ne galo, fakamaama e Iesu e puhala ne fua he leveki mamoe he tau tukeua haana e mamoe ti liuaki mai ke he fuifui. Fitā e leveki mamoe he fakaaoga e magaaho mo e malolō ke kumi e mamoe ne galo. Ka e mailoga e ia kua lata ni ke fua e mamoe ha kua nakai malolō ai ke liu ke he fuifui.​—Totou Luka 15:4, 5.

15. Maeke fēfē a tautolu ke lalago a lautolu kua lolelole ke liliu mai ki a Iehova? (Kikite puha “ Ko e Koloa Uho Lahi.”)

¹⁵ Liga lata a tautolu ke foaki e magaaho mo e malolō ke lagomatai e falu kua lolelole fakaagaaga ke fahia mai he tau lekua ha lautolu. Ka ko e agaaga ha Iehova, haana Kupu, mo e tau tohi ne moua mai he fakapotopotoaga, kua maeke a tautolu ke lagomatai a lautolu ke liu malolō fakaagaaga. (Roma 15:1)  Maeke fēfē a tautolu ke taute e mena nei? Taha e motua kua leva ne pehē, “Laulahi ia lautolu kua lolelole fakaagaaga kua lata ke fakaako e Tohi Tapu ka mole e fifili kua manako mooli a lautolu ke liliu mai ki a Iehova.” * Ti ka ole ki a koe ke fakaako mo e taha kua lolelole fakaagaaga, he ha ke talia fiafia e kotofaaga ia? Pehē foki e motua, “Ko e matakainaga ne taute e fakaakoaga kua lata ke eke mo kapitiga mitaki mo e atāina e tagata kua lolelole fakaagaaga ke tutala ki ai.”

16. Iloa fēfē e tautolu na maeke ke falanaki ke he tau agelu ke lagomatai a tautolu?

¹⁶ Loga e tau mena tutupu ne fakakite kua gahua fakalataha e tau agelu mo tautolu ke kumi a lautolu kua lolelole fakaagaaga ne manako ke liliu mai ki a Iehova. (Fakakite. 14:6) Ma e fakatai, ko Silvio mai i Ecuador, ne liogi fakamakamaka ke moua e lagomatai ke liu mai ke he fakapotopotoaga. He liogi a ia ne tagi e logo he gutuhala haana. Tokoua e motua ne tutū he gutuhala haana. He ahiahi ia, fiafia a laua ke foaki e lagomatai kua lata mo ia.

17. Ko e heigoa e palepale ka moua e tautolu he lagomatai a lautolu kua lolelole fakaagaaga?

¹⁷ To fiafia lahi a tautolu he lagomatai a lautolu kua lolelole fakaagaaga ke liliu mai ki a Iehova. Mailoga e talahauaga ha Salvador, ko e paionia ne eketaha pauaki ke lagomatai a lautolu kua lolelole fakaagaaga: “Falu mogo, ne uka au ke taofi e tau hihina mata he fiafia. Ti fiafia lahi au he manamanatu kua laveaki e Iehova taha he tau mamoe fakahele haana mai he lalolagi ha Satani mo e ko e lilifu ke gahua fakalataha mo Ia he matagahua nei.”​—Gahua 20:35.

18. Ka lolelole fakaagaaga a koe, ko e heigoa kua mauokafua a koe ki ai?

¹⁸ Kaeke kua nakai fakalataha a koe mo e tau tagata ha Iehova, mauokafua kua fakaalofa agaia a Ia ki a koe. Manako a Iehova ke liu mai a koe ki a ia. Ti lata a koe ke taute e tau lakaaga ke liu mai. Ka e tuga e matua taane he fakatai ha Iesu, kua tatali a Iehova ke liu mai a koe mo e to fiafia lahi a ia ke fakafeleveia mai a koe ki kaina.