TALITONU a tautolu oti kua takitaki mo e fakamalolō fakaagaaga e Iehova e tau tagata haana he “tau aho fakamui” nei. (2 Timo. 3:1) Ka kua lata a tautolu oti ke omaoma ki a Iehova. Maeke ke fakatatai e tuaga ha tautolu mo e tau Isaraela he tutakale. Lata a lautolu ke omaoma ka ulo e tau pū.

Poaki a Iehova ki a Mose ke talaga ua e pū ario “ke fakapotopoto ai e tau fakapotopotoaga, ke eke foki mo fakamailoga ke o ai e tau heagaapi.” (Nume. 10:2) Ulo he tau ekepoa e tau pū he tau puhala kehekehe ke fakakite ke he tau tagata e mena kua lata ke taute. (Nume. 10:3-8) Mogonei, moua he tau tagata he Atua e tau takitakiaga he tau puhala kehekehe. To fakatutala ke he tolu e puhala ia ne fakamanatu ki a tautolu e tau pū ne ulo i tuai. Uiina e tau tagata he Atua mogonei ke he tau toloaga lalahi, moua he tau leveki ne kotofa e fakamahaniaga, mo e fakafoou po ke hiki e tau takitakiaga ma e tau fakapotopotoaga oti.

Ka manako a Iehova ke he “fakapotopotoaga oti” ke tutuuta he gutuhala he faahi uta he fale uta fano, ne ulo he tau ekepoa e tau pū ne ua. (Nume. 10:3) Ko e tau magafaoa oti ne heapi viko he fale uta fano ke he fā e veveheaga, ne logona e leo pauaki ia. Ko lautolu ne heapi tata ke he gutuhala he fale uta fano ne mafiti ke tali atu. Falu ne mamao ti liga lata ke fai magaaho mo e lahi e gahua ke o atu ai. He tata po ke mamao, manako a Iehova ke fakapotopoto mai oti ke logona e tau takitakiaga haana.

Mogonei, nakai fakapotopoto a tautolu ke he fale uta fano, ka kua uiina a tautolu ke he tau fakalatahaaga he tau tagata he Atua. Putoia he tau mena nei e tau fonoaga he faahimotu mo e falu toloaga pauaki ka moua e tautolu e tau vala tala mo e tau takitakiaga aoga. He tau motu he lalolagi katoa, ne taha ni e fakaholoaga ne moua he tau tagata ha Iehova. Ko lautolu mogoia ne talia e uiina ke o atu kua fiafia he fakalataha auloa ko e matakau. Mamao e tau matakavi he falu ka e tata e falu. Ka ko lautolu oti ne tali atu ke he uiina ne talia kua aoga mooli.

Ka e kua a lautolu he tau matakau ne mamao lahi mai he ha toloaga lalahi? Fakaaue ke he tau matini foou, tokologa ia lautolu kua aoga mai he fakaholoaga taha ia mo e logona hifo kua fai vala he tau toloaga lalahi. Ma e fakatai, he ahiahi atu e hukui he matapatu ofisa, ko e la i Benin ne fakapuloa e fakaholoaga ki Arlit i Niger, ko e taone keli makauho he Tutakale Sahara. Uafulu ma taha e matakainaga taane,  matakainaga fifine, mo lautolu ne fiafia ne fakapotopoto. Pete kua mamao, ne logona hifo e lautolu e kaufakalataha mo e toloaga lahi ne 44,131. Taha e matakainaga taane ne tohi: “Fakaaue lahi mahaki he fakapuloa mai e toloaga nei. Liu fakakite ki a mautolu e fakaalofa lahi ha mutolu ma mautolu.”

Ka ulo he tau ekepoa Isaraela taha e pū, to fakapotopoto atu e “tau iki ko e tau iki he tau takiafe,” ke he fale uta fano. (Nume. 10:4) Moua e lautolu i ai e tau vala tala mo e fakamahaniaga mai ia Mose. To lagomatai he mena ia a lautolu ke leveki e tau matagahua he tau magafaoa ha lautolu. Kaeke ko koe taha he tau iki ia, eketaha nakai a koe ke fina atu ki ai mo e aoga mai ai?

Mogonei, nakai ko e “tau iki” e tau motua he fakapotopotoaga; ti nakai fia pule a lautolu ke he fuifui mamoe he Atua ne leveki e lautolu. (1 Pete. 5:1-3) Ka kua eketaha mooli a lautolu ke leveki e fuifui mamoe. Ti kua makai a lautolu ke talia e uiina ma e falu fakamahaniaga, tuga e Aoga Fekafekau he Kautu. He tau aoga nei, fakaako e tau motua ke lauia mitaki e levekiaga ke he tau gahua he fakapotopotoaga. Ha ko e fakamahaniaga nei, to holo ki mua e tuaga fakaagaaga ha lautolu mo e tau matakainaga oti. Pete kua nakaila fina atu a koe ke he taha he tau aoga ia, liga moua e koe e tau puhala mitaki mai ia lautolu ne kua o atu ai.

He falu magaaho ko e tau ekepoa Isaraela ne ulo mo e leo fakavivivivi e pū. Ko e fakailoaaga anei kua manako a Iehova ke ō e heagaapi katoa. (Nume. 10:5, 6) Ka hiki e heagaapi kua ofoofogia e puhala ne fakatokatoka aki, ka ko e gahua lahi ma e tau tagata oti. He falu magaaho ne fakauaua e tau logonaaga he falu hagaao ke he hiki. Ko e ha?

Liga logona hifo e falu ko e tau fakaholoaga ke hiki ne kua fakailoa tumau mo e fakaofo. “Ti pihia foki, kaeke kua ha i ai e aolagi mai he afiafi ke hoko atu ke he pogipogi.” He falu magaaho “ko e po ua, po ke mahina katoa,” po ke loa atu ato liu ke hiki. (Nume. 9:21, 22) Ti laga fiha e hiki he heagaapi? Ia Numera veveheaga 33 ne totoku kavi ke he 40 e matakavi ne heapi ai e tau Isaraela.

He falu magaaho, moua e lautolu e matakavi ne malu. Liga mitaki he pihia ha ko e tutakale oti “ne lahi mo e matakutakuina.” (Teu. 1:19) Ti liga ko e kamatamata ke manamanatu neke nakai mitaki e matakavi ka hiki a lautolu ki ai.

He kamata e tau magafaoa ke tuku fenoga, liga uka e falu ke fakatali ato hoko e magaaho ha lautolu. Logona oti e lautolu e pū ne ulo mo e leo fakavivivivi, ka e nakai maeke ke tuku fenoga he taha e magaaho. Ko e pū ne ulo mo e leo fakavivivivi ne fakailoa ke he tau magafaoa ne heapi he faahi uta, ko Iuta, Isakara, mo Sepulona, kua lata ke ō. (Nume. 2:3-7; 10:5, 6) He ō a lautolu, ko e tau ekepoa ne liu ulo e pū mo e leo fakavivivivi ke lagauaaki ke fakailoa age ke he tau magafaoa ne tolu ne heapi he faahi toga. Matutaki e tau ekepoa ke taute e mena nei ato oti e heagaapi he ō.

Liga fiofio e tau logonaaga haau hagaao ke he falu hikiaga he fakatokatokaaga. Liga manatu a koe kua loga lahi e tau hikiaga fakaofo. Po ke fiafia a koe ke he falu fakaholoaga ti nakai manako ke hiki ai. Ko e heigoa ni e kakano, liga logona hifo e koe kua kamatamata e fakauka haau, ti fai magaaho ato hiki. Pete ia, ka eketaha a tautolu ke tali he puhala kua lata, liga kitia e tautolu kua fakamonuina he Atua a tautolu.

He vahā ha Mose, ne takitaki e Iehova e tau miliona he tau tagata taane, tau fifine, mo e tau fanau he tutakale. Ka nakai fai levekiaga mo e takitakiaga mai ia Iehova, liga to nakai momoui a lautolu. Mogonei, kua momoui fakaagaaga a tautolu ha ko e takitakiaga ha Iehova. Ti kua mauokafua a tautolu! Ko e mena ia, kia eketaha a tautolu ke omaoma ke he leo pauaki he tau pū ne ulo, tuga ne taute he tau Isaraela tua fakamooli!