1, 2. (a) Fēfē e logonaaga he falu matua ka manako e tama ke papatiso? (e) Ko e ha ne hūhū ai ki a lautolu ne manako ke papatiso kaeke kua tukulele a lautolu ki a Iehova? (Kikite fakatino he kamataaga.)

KO E tau matua ha Maria ne onoono he tu hake e tama fifine tote ha laua mo e falu ne manako ke papatiso. Ua e hūhū ne hūhū he tagata lauga. Ne tali fakaleolahi ai e Maria. Nakai leva ti papatiso a ia.

² Kua matalahi e tau matua ha Maria ha kua tukulele he tama fifine ha laua e moui ki a Iehova ti papatiso. Ka kua tupetupe fakatote e matua fifine ha Maria ato hoko e mena ia. Manamanatu a ia: ‘Tote lahi kia a Maria ke papatiso? Maama mooli kia e ia e hokulo he tukuleleaga haana ki a Iehova? Lata kia ke leva e fakatali haana ato papatiso?’ Tokologa e matua fakahele ne hūhū hifo ki a lautolu ni e tau hūhū pihia ka tala age e tama ha laua kua manako a ia ke papatiso. (Fakamatalaaga 5:5) Mole ia, ko e fifiliaga aoga lahi ka taute he ha tagata ke  tukulele haana moui ki a Iehova mo e papatiso.​—Kikite puha “ Kua Tukulele Nakai a Koe ki a Iehova?”

3, 4. (a) Puhala fe ne fakaako he aposetolo ko Peteru a tautolu kua aoga lahi e papatiso? (e) Ko e ha ne fakatatai e Peteru e papatiso ke he vaka ne tā e Noa?

³ Fakatatai he aposetolo ko Peteru e papatiso ke he vaka ne tā e Noa. Pehē a Peteru: “Ko e fakatai foki he mena ia ko e papatisoaga, kua fakamoui ai ainei a tautolu.” (Totou 1 Peteru 3:20, 21.) Ko e vaka kua fakakite mooli ke he falu kua manako loto katoa a Noa ke taute e finagalo he Atua. Taute fakamooli e Noa e gahua ne tuku age e Iehova ki a ia ke taute. Ha ko e tua ha Noa, ne fakamoui e Iehova a ia mo e magafaoa haana he Fakapukeaga. Ko e heigoa ne lali a Peteru ke fakaako ki a tautolu?

⁴ Ka kitia he tau tagata e vaka, iloa e lautolu kua tua a Noa ke he Atua. Ka kitia he tau tagata e taha kua papatiso, iloa e lautolu kua tukulele e ia e moui haana ke he Atua ha kua tua a ia ke he liu tu mai a Keriso. Tuga a Noa, ko lautolu ne papatiso kua omaoma ke he Atua mo e taute e gahua ne tuku age ki a lautolu ke taute. Ha kua fakamoui e Iehova a Noa he Fakapukeaga, to fakamoui e ia e tau fekafekau fakamooli haana ne papatiso he magaaho ka moumou e ia e lalolagi mahani kelea nei. (Mareko 13:10; Fakakiteaga 7:9, 10) Maaliali ai, aoga lahi ke tukulele e tau momoui ha tautolu ki a Iehova ti papatiso. Ti ka fai tagata ne fakatolomaki ke nakai papatiso, to galo e ia e amanakiaga ke moui tukulagi.

5. Ko e heigoa ka fakaako e tautolu he vala tala nei?

⁵ Iloa e tautolu mogonei e hokulo lahi he papatisoaga, ti kua lata a tautolu ke iloa e tali ke he tau hūhū tolu nei: Ko e heigoa ne  talahau he Tohi Tapu hagaao ke he papatisoaga? Ko e heigoa kua lata he tagata ke taute ato papatiso a ia? Ko e ha ne lata tumau a tautolu ke manatu e aoga he papatisoaga ka fakaako e tautolu e tau fanau ha tautolu po ke tagata fakaako Tohi Tapu?

6, 7. (a) Ko e heigoa e kakano he papatiso ha Ioane? (e) Ha hai e papatisoaga ne kehe mai he tau tagata oti, ti ko e ha?

⁶ He Tohi Tapu, ko e tagata fakamua ne totou e tautolu ki ai he papatiso e falu, ko Ioane ko e Papatiso. (Mataio 3:1-6) Ko e ha ne o mai e tau tagata ki a ia ke papatiso? Kakano ke fakakite e lautolu kua fakatokihala e tau agahala ha lautolu he nakai omaoma ke he Fakatufono faka-Mose, ti kua momoko lahi mahaki a lautolu. Ka ko e papatiso ne mua e aoga ne taute e Ioane kua kehe mamao e kakano. Moua e Ioane e lilifu lahi ke papatiso a Iesu, ko e Tama mitaki katoatoa he Atua. (Mataio 3:13-17) Nakai agahala a Iesu. Ti nakai lata a ia ke fakatokihala. (1 Peteru 2:22) Ka ko e ha ne papatiso a Iesu? Ke fakakite kua mautali a ia ke fakaaoga e moui haana ke taute e finagalo he Atua.​—Heperu 10:7.

⁷ He mole e kamata ha Iesu ke fakamatala, ne kamata e tau tutaki haana ke papatiso e falu. (Ioane 3:22; 4:1, 2) Papatiso foki e tau tagata ia ha kua fakatokihala a lautolu he tau agahala ha lautolu ke he Fakatufono faka-Mose. Ka e mole e mate ha Iesu ti liu tu mai, ko lautolu ne manako ke eke mo tau tutaki haana kua lata ke papatiso ha ko e taha kakano kehe foki.

8. (a) Ko e heigoa e poakiaga ne tuku age e Iesu he mole e liu tu mai haana? (e) Ko e ha kua lata e tau Kerisiano ke papatiso?

⁸ He tau 33, nakai leva he mole e liu tu mai ha Iesu ne vagahau a ia ke he molea 500 e tagata taane, tau fifine, mo e tau fanau foki. Liga ko e magaaho anei ne pehē a ia: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20; 1 Korinito 15:6) Ne poaki e Iesu ke he tau tutaki haana ke taute tutaki. Ko e ha tagata kua manako ke eke mo tutaki haana, po ke uta e “lakau hahamo” haana, kua lata ke papatiso. (Mataio 11:29, 30) Ke fekafekau ke he Atua he puhala kua fakafiafia ki a Ia, lata e tagata ke talia kua fakaaoga he Atua a Iesu ke fakakatoatoa Haana finagalo. Ti maeke e tagata ia ke papatiso mo e taliaaga he Atua. Talahau he Tohi Tapu loga e fakamooliaga na iloa he tau tutaki fakamua ha Iesu e aoga lahi ke papatiso. Nakai manatu a lautolu kua lata a lautolu ke fakatali to papatiso he mogo fakamui.​—Gahua 2:41; 9:18; 16:14, 15, 32, 33.

9, 10. Ko e heigoa kua fakaako e tautolu hagaao ke he papatisoaga mai he tagata Aitiope mo Saulo?

⁹ Totou Gahua 8:35, 36. Ko e tagata Aitiope ne talia e tua he tau Iutaia ne fano a ia ki kaina he mole e tapuaki he faituga i Ierusalema. Fakafano he agelu ha Iehova a Filipo ke fakamatala ki a ia, ti fakaako e Filipo e “tala mitaki kia Iesu” ke he tagata Aitiope. Fēfē e tali he Aitiope? Maama e ia e aoga ke  talia a Iesu ko e Iki, ti manako a ia ke taute e tau mena ne poaki e Iehova ke he tau Kerisiano. Ati nakai fakamule a ia ke papatiso.

¹⁰ Ko e taha fakataiaga ko e tagata Iutaia ne higoa ko Saulo. Ne tukulele e motu katoa ha Iutaia ke he Atua ka e nakai talia e Iehova e tau Iutaia ha kua nakai omaoma a lautolu ki a Ia. Talitonu a Saulo kua fekafekau agaia e tau Iutaia ke he Atua he puhala hako, ti favale a ia ke he tau Kerisiano. Ka e he taha aho ko Iesu ne fakaliu tu mai, nukua manatu a Saulo kua mate a ia, ne vagahau fakahako ki a Saulo mai he lagi. Tali atu fēfē a Saulo? Talia fiafia e ia e lagomatai mai he tutaki Kerisiano ko Anania. Pehē e Tohi Tapu: “Kua matike a ia mo e papatiso.” (Gahua 9:17, 18; Kalatia 1:14) Ne iloa a ia fakamui ko e aposetolo ko Paulo. Nakai leva he maama e ia kua fakaaoga he Atua a Iesu ke fakakatoatoa e finagalo Haana, ne nakai fakamule a Saulo ke papatiso.​—Totou Gahua 22:12-16.

11. (a) He vahā nei, ko e heigoa ati fifili e tau tagata fakaako Tohi Tapu ke papatiso? (e) Fēfē e logonaaga ha tautolu ka papatiso e taha?

¹¹ He vahā nei, kua pihia foki e tokologa he tau tagata fakaako Tohi Tapu ne ikiiki mo e momotua. Ha kua fiafia mo e falanaki a lautolu ke he mena ne talahau he Tohi Tapu, ne makai a lautolu ke tukulele e tau momoui ki a Iehova ti papatiso. Ko e magaaho pauaki tumau e lauga papatiso he tau toloaga mo e tau fonoaga. Fiafia e Tau Fakamoli a Iehova ka talia he tau tagata fakaako Tohi Tapu e kupu mooli ti fifili ke papatiso. Fiafia lahi e tau matua ka taute pihia foki he tau fanau ha lautolu. He tau he fekafekauaga 2017, molea e 284,000 e tagata foou ne papatiso ke fakakite kua tukulele e tau momoui ha lautolu ki a Iehova. (Gahua 13:48) Maaliali ai, maama e lautolu kua lata ma e tau Kerisiano ke papatiso. Ka ko e heigoa kua lata a lautolu ke taute fakamua ato maeke ke papatiso?

12. Ko e heigoa kua lata e tau tagata fakaako Tohi Tapu ke taute ato maeke a lautolu ke papatiso?

¹² Ato maeke e tau tagata fakaako Tohi Tapu ke papatiso, lata a lautolu ke fakaako e kupu mooli hagaao ke he Atua, haana finagalo ma e tau tagata mo e lalolagi, mo e mena ne taute e ia ke fakahao e tau tagata. (1 Timoteo 2:3-6) Ti lata a lautolu ke feaki e tua ka lagomatai a lautolu ke omaoma e tau matafakatufono he Atua mo e nakai liu ke taute e tau mena ne vihiatia e Ia. (Gahua 3:19) Aoga e mena nei ha kua nakai talia e Iehova e tukuleleaga he tagata kua taute tumau e tau mena ne vihiatia e Ia. (1 Korinito 6:9, 10) Ka e nakai koēnaia. Ko lautolu ne manako ke tukulele e tau momoui ki a Iehova kua lata ke ō he tau feleveiaaga he fakapotopotoaga mo e fakamatala tumau e tala mitaki mo e fakaako e falu. Ko e poakiaga anei ke he ha tagata ne manako ke mui ki a Keriso. (Gahua 1:8) Kua lata e tagata fakaako ke taute fakamua e tau mena oti nei. Maeke mogoia a ia ke tukulele e moui haana ki a Iehova he liogi fakatagata ti papatiso.

13. Ka fakaako e tautolu e falu, ko e ha ke manatu e tautolu kua lata a lautolu ke papatiso ke eke mo tau Kerisiano mooli?

¹³ Ka lagomatai e tautolu e tau fanau ha tautolu mo e falu tagata fakaako Tohi Tapu ke taute e tau mena nei kua lata, kia manatu e tautolu ko lautolu ne manako ke eke mo tau tutaki mooli ha Iesu kua lata ke papatiso. To nakai matakutaku a tautolu ke tala age ki a lautolu he tau magaaho kua latatonu e aoga he tukuleleaga mo e papatisoaga. Manako a tautolu ke he tau fanau ha tautolu mo e falu fakaako Tohi Tapu ke tumau e holo ki mua ti papatiso!

14. Ko e ha kua nakai peehi e tautolu ha tagata ke papatiso?

¹⁴ Mooli, nakai lata he taha ke peehi po ke fakaohooho e tama po ke tagata fakaako Tohi Tapu ke papatiso. Nakai fakaohooho e Iehova a tautolu ke fekafekau ki a ia. (1 Ioane 4:8) Ka fakaako e tautolu e falu, lata a tautolu ke lagomatai a lautolu ke maama e aoga ke feaki e lautolu e fakafetuiaga fakatagata mo Iehova. Ti ka fakaaue lahi e tagata fakaako Tohi Tapu ke iloa e kupu mooli hagaao ke he Atua ti manako mooli ke taute e tau mena oti kua lata he tau Kerisiano mooli, to manako a ia ke papatiso.​—2 Korinito 5:14, 15.

15, 16. (a) Lata kia e tagata ke hokotia ke he tau tau pauaki ke maeke ke papatiso? Fakamaama. (e) Ko e ha kua lata e tagata fakaako Tohi Tapu ke papatiso ko e taha he Tau Fakamoli a Iehova, pete kua fitā a ia he papatiso he taha lotu foki?

¹⁵ Nakai lata e tagata ke hokotia ke he tau tau pauaki he moui ke papatiso. Kehekehe e tau tagata, ti ko e falu tagata fakaako kua mafiti lahi e holo ki mua ke he falu. Tokologa ne papatiso he ikiiki a lautolu, ti  fakatumau e mahani fakamooli ha lautolu ki a Iehova he momotua fakahaga. Falu ne fitā e momotua he mogo ne fakaako e kupu mooli he Tohi Tapu ti papatiso. Falu kua molea 100 e tau tau he moui!

¹⁶ Taha e fifine ne fakaako e Tohi Tapu ne fitā e papatiso he falu lotu foki. Kakano haia ne hūhū a ia ke he faiaoga fakaako Tohi Tapu haana kua lata mooli kia ke liu papatiso. Fakakite age he faiaoga haana falu kupu Tohi Tapu ne tali e hūhū haana. Maama he fifine e poakiaga he Tohi Tapu, ti papatiso a ia pete he teitei 80 e tau tau he moui haana. Ko e heigoa ne fakaako e tautolu mai he fakafifitakiaga nei? To talia hokoia e Iehova e papatisoaga ha tautolu kaeke kua iloa e tautolu e kupu mooli ke he finagalo haana. Pete kaeke kua papatiso a tautolu he falu lotu foki, lata agaia a tautolu ke papatiso ko e taha he Tau Fakamoli a Iehova.​—Totou Gahua 19:3-5.

17. Ko e heigoa kua lata ke manamanatu ki ai e tagata he aho ka papatiso a ia?

¹⁷ Ko e aho ka papatiso e tagata ko e aho fiafia lahi. Ko e magaaho foki ke manamanatu fakahokulo ke he mena ne putoia e tukulele mo e papatiso. Ke taute e tau mena oti kua poaki ke he Kerisiano mooli ko e matagahua mamafa. Lata e tau tutaki ha Iesu ke “nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.”​—2 Korinito 5:15; Mataio 16:24.

18. Ko e heigoa e tau hūhū ka fakatutala a tautolu he vala tala ka mui mai?

¹⁸ Ha kua fakaako e tautolu he vala tala nei, ko e fifiliaga ke eke mo Kerisiano mooli ko e fifiliaga hokulo lahi. Kakano haia ne hūhū hifo he matua fifine ha Maria ki a ia ni e tau hūhū ne totoku he kamataaga he vala tala. Kaeke ko e matua a koe, liga hūhū hifo a koe: ‘Kua mautali mooli kia e tama haaku ke papatiso? Lahi nakai e mena ne iloa he tama haaku ki a Iehova ke tukulele a ia ke he Atua? Lata nakai e tama haaku ke moua e fakaakoaga mo e gahua mitaki ato papatiso? Ka e kua ka taute he tama haaku e agahala kelea lahi he mole e papatiso?’ To fakatutala a tautolu ke he tau hūhū nei he vala tala ka mui mai, mo e to fakaako a tautolu ke he puhala ke moua he tau matua Kerisiano e onoonoaga hako he papatisoaga.