1. Ia Mataio 24:9, ko e ha kua nakai lata a tautolu ke ofo ka vihiatia he lalolagi a tautolu?

KUA tufugatia e Iehova a tautolu ke fakaalofa mo e ke moua e fakaalofa. Ti ka vihiatia he taha tagata a tautolu, logona e tautolu e mamahi mo e liga matakutaku foki. Ma e fakatai, ko e matakainaga fifine ko Georgina ne nofo i Europa, ne pehē: “He 14 e tau haaku he moui, vihiatia he matua fifine haaku au he fekafekau ki a Iehova. Ne momoko lahi au mo e matimati ti kamata ke manamanatu ko e tagata kelea au.” * Ko e matakainaga taane ko Danylo ne tohi: “He mogo ne keli, amuamu, mo e fakamatakutaku he tau kautau au ha ko au ko e taha he Tau Fakamoli a Iehova, ne matakutaku mo e mā au.” Kua mamahi lahi e vihiatia pihia ka e nakai ofo ai a tautolu. Talahau tuai e Iesu to fakavihia a tautolu.​—Totou Mataio 24:9.

2-3. Ko e ha kua vihiatia e tau tutaki ha Iesu?

² Vihiatia he lalolagi e tau tutaki ha Iesu. Ko e ha? He tuga a Iesu, “nakai ko e tau tagata he lalolagi” a tautolu. (Ioane 15:17-19) Ti ko e fua, pete he fakalilifu e tautolu e tau fakatufono he tagata, nakai talia e tautolu ke tapuaki ki a lautolu po ke tau mena fakatai ne hukui aki a lautolu. Ko Iehova ni hokoia ne tapuaki a tautolu ki ai. Lalago e tautolu e tonuhia he Atua ke pule ke he tau tagata ka e totoko e Satani mo e “fanau” haana e tonuhia ia he Atua. (Kene. 3:1-5, 15) Fakamatala e tautolu ko e Kautu he Atua ko e amaamanakiaga hokoia he tau tagata ti nakai leva to fakaotioti he Kautu ia a lautolu kua totoko ki  ai. (Tani. 2:44; Fakakite. 19:19-21) Ko e fekau ia ko e tala mitaki ke he tau tagata mahani molū ka ko e tala kelea ke he tau tagata mahani kelea.​—Sala. 37:10, 11.

³ Vihiatia foki ki a tautolu ha kua momoui fakatatau ke he tau tuaga tututonu he Atua. Ko e tau tuaga nei kua kehe mamao mo e tau mahani fakalialia he lalolagi. Ma e fakatai, tokologa e tagata ne nakai manatu kua hepe ke taute e tau mahani feuaki fakalialia, ko e tau mahani taha ia ne moumou he Atua a Sotoma mo Komora! (Iuta 7) Ha kua omaoma a tautolu ke he tau tuaga he Tohi Tapu hagaao ke he tau mahani pihia, tokologa e tagata ne vaiga mo e pehē kua pāpā maō a tautolu.​—1 Pete. 4:3, 4.

4. Ko e heigoa e tau mahani kua fakamalolō a tautolu ka vihiatia mai he tau tagata?

⁴ Ko e heigoa ka lagomatai a tautolu ke fakauka ka vihiatia mo e amuamu he tau tagata? Lata a tautolu ke malolō e tua to lagomatai e Iehova a tautolu. Tuga e akau punuti, maeke e tua ha tautolu “ke tamate e tau fana kaka oti hana kua kelea.” (Efeso 6:16) Fai mena foki ke lafi ke he tua. Lata a tautolu ke moua e fakaalofa. Ko e ha? Ko e fakaalofa kua “nakai ita vave.” Kua fakamanavalahi mo e fakauka ke he tau mena fakamamahi oti. (1 Kori. 13:4-7, 13) Kia kitekite mogonei ke he puhala ko e fakaalofa ki a Iehova, fakaalofa ke he tau matakainaga, mo e fakaalofa foki ke he tau fī kua lagomatai a tautolu ke fakauka ke he vihiatia.

5. Fakamalolō fēfē he fakaalofa ha Iesu ma e Matua haana a ia?

⁵ He pō ato tamate he tau fī a Iesu, pehē a ia ke he tau tutaki fakamooli haana: “Kua fakaalofa au ke he Matua, tuga e poaki mai foki he Matua kia au, pihia he eke e au.” (Ioane 14:31) Fakamalolō he fakaalofa ha Iesu ki a Iehova a ia ke fehagai mo e tau kamatamata ka hohoko mai. Ko e fakaalofa ki a Iehova ka lagomatai foki a tautolu.

6. Ia Roma 5:3-5, fēfē e logonaaga he tau fekafekau ha Iehova hagaao ke he fakauka ke he vihiatia he lalolagi?

⁶ Ko e fakaalofa ke he Atua kua lagomatai tumau e tau fekafekau ha Iehova ke fakauka ke he favale. Tuga anei, he mogo ne poaki e hopoaga tokoluga Iutaia ke he tau aposetolo ke oti e fakamatala, ko e fakaalofa ke he Atua kua omoomoi a lautolu ke “omaoma ke he Atua [nakai] ke he tau tagata.” (Gahua 5:29; 1 Ioa. 5:3) Ko e fakaalofa mauokafua pihia ne fakamalolō foki e tau matakainaga ha tautolu mogonei, ti tokologa ia lautolu ne tumau e fakamooli pete e vale he tau fakatufono. He nakai loto lolelole, moua e tautolu e lilifu ke fakauka ke he vihiatia he lalolagi.​—Gahua 5:41; totou Roma 5:3-5.

7. Lata a tautolu ke tali atu fēfē ka totoko mai he tau tagata he magafaoa?

⁷ Liga ko e taha he tau kamatamata uka lahi mahaki kua mai he tau tagata he tau magafaoa ni ha tautolu. Ka kamata a tautolu ke fiafia ke he kupu mooli, falu he magafaoa ne manamanatu kua hehē a tautolu. Falu ne manamanatu kua vikoia a tautolu. (Fakatatai Mareko 3:21.) Totoko fakamamahi foki e lautolu a tautolu. Nakai ofo a tautolu ke he totokoaga nei. Talahau e Iesu to “eke foki e tagata mo fi he faoa hana.” (Mata. 10:36) Pete ne onoonoaga mai he tau magafaoa, nakai mafai a tautolu ke eke a lautolu mo tau fī ha tautolu. He tupu e fakaalofa ha tautolu ki a Iehova, ti tupu foki e fakaalofa ha tautolu ke he tau tagata. (Mata. 22:37-39) Ka e nakai fakahui e tau tuaga ha tautolu he tiaki e tau matafakatufono mo e tau matapatu fakaakoaga he Tohi Tapu ke fakafiafia e taha tagata.

8-9. Ko e heigoa ne lagomatai e taha matakainaga fifine ke tumauokafua pete e totokoaga kelea lahi?

 ⁸ Ko Georgina ne totoku fakamua ne maeke ke tumauokafua pete e totoko lahi mahaki e matua fifine haana. Fakamaama e Georgina: “Kamata au mo e matua fifine ke fakaako e Tohi Tapu mo e Tau Fakamoli. Ka e ono e mahina he mole, he manako au ke fano he tau feleveiaaga ne totoko lahi e matua fifine haaku. Iloa e au kua matutaki a ia mo e tau tagata tiaki taofiaga ti fakaaoga e ia e tau totokoaga ha lautolu ka tutala ki a au. Amuamu foki e ia au, futi e ulu, momolo, mo e tolo e tau tohi haaku ke he vao. Papatiso au he mole e 15 e tau he moui. Lali e matua fifine haaku ke taofi au he fekafekau ki a Iehova he tuku au he kaina he tau fuata mui, falu ne kai tulaki mo e taute e tau mahani kolokolovao. Uka lahi mahaki e totokoaga ka hau he taha tagata kua lata ke ofania mo e leveki a koe.”

⁹ Ko e heigoa ne lagomatai a Georgina ke fakauka? Pehē a ia: “Ko e aho ne totoko e matua fifine haaku ki a au, ko e oti laia e totou e au e Tohi Tapu katoa. Talitonu katoatoa au mogonei kua moua e au e kupu mooli ti tata lahi au ki a Iehova. Liogi tumau au ki a Ia ti logona e Ia au. He nofo au he kaina ia, uiina he matakainaga fifine au ke he kaina haana ti fakaako tokoua e maua e Tohi Tapu. Mogoia, kua fakamalolō au ha ko e tau matakainaga he Fale he Kautu. Ne eke e lautolu au ko e taha he tau magafaoa ha lautolu. Maaliali ai, mua atu e malolō ha Iehova ke he tau tagata totoko ha tautolu.”

10. Ko e heigoa kua mauokafua a tautolu ka taute e Iehova ko e Atua?

¹⁰ Tohi he aposetolo ko Paulo kua nakai fai mena “ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.” (Roma 8:38, 39) Pete he fai magaaho kua matematekelea a tautolu, ko Iehova tumau mo tautolu ke fakamafana mo e fakamalolō mai. Tuga he fakakite he tala ha Georgina, lagomatai foki e Iehova a tautolu he foaki mai e magafaoa fakaagaaga uho lahi.

11. Lagomatai fēfē he fakaalofa ha Iesu ia Ioane 15:12, 13 e tau tutaki haana? Talahau e fakatai.

¹¹ He pō ato mate a Iesu, fakamanatu e ia ke he tau tutaki haana ke feofanaki. (Totou Ioane 15:12, 13.) Iloa e ia to lagomatai he fakaalofa foaki noa a lautolu ke tumau e kaufakalataha mo e ke fakauka ke he vihiatia he lalolagi. Manamanatu ke he fakafifitaki he fakapotopotoaga i Tesalonia. Tali mai he fakatū  e fakapotopotoaga, ne favale ai ke he tau matakainaga. Ka kua eke e tau matakainaga i ai mo tau fakafifitakiaga he mahani fakamooli mo e fakaalofa. (1 Tesa. 1:3, 6, 7) Fakamafana e Paulo a lautolu ke matutaki ke “fakamalolo” e fakakite he fakaalofa. (1 Tesa. 4:9, 10) Omoomoi he fakaalofa a lautolu ke fakamafana a lautolu kua manava tote mo e lagomatai a lautolu kua lolelole. (1 Tesa. 5:14) Muitua e lautolu e tau fakatonuaga ha Paulo ti ko e tohi haana ke uaaki ne tohia kavi ke he taha e tau he mole, ne pehē a ia ki a lautolu: “Kua fakalahi foki ha mutolu a feofanaki, ko mutolu oti kana takitokotaha.” (2 Tesa. 1:3-5) Lagomatai he fakaalofa ha lautolu a lautolu ke fakauka ke he tau mena vihi mo e favale.

12. He magahala felakutaki, fakakite fēfē he tau matakainaga he taha motu e feofanaki?

¹² Manamanatu ke he tala ha Danylo ne totoku fakamua, pihia mo e hoana haana. He lauia e taone ha laua he felakutaki, matutaki a laua ke ō ke he tau feleveiaaga, eketaha ke fakamatala, mo e tufatufa e tau mena kai ha laua ke he falu matakainaga. He taha aho, o mai e tau kautau ne totō e tau fana ki a Danylo. “Poaki a lautolu ke tiaki e tua haaku,” ui e Danylo. “He nakai talia e au ne keli e lautolu au mo e fakainaina ke fana au he fakapā e fana he mamole e ulu haaku. Ato o kehe, fakamatakutaku a lautolu ke liliu mai ke fakapilo pulenoa e hoana haaku. Ka e mafiti e tau matakainaga ke fakafano a maua he tuleni ke he taha taone. To nakai nimo e au e fakaalofa he tau matakainaga fakahele ia. He hohoko a maua ke he taone foou, ne foaki mai he tau matakainaga i ai e tau mena kai ti lagomatai au ke kumi e gahua mo e kaina! Ko e fua, maeke a maua ke foaki e mena ke nonofo e falu Fakamoli ne fehola he tau matakavi felakutaki.” Ko e tau tala pihia kua fakakite na maeke e fakaalofa faka-Kerisiano ke lagomatai a tautolu ke fakauka ke he vihiatia.

13. Lagomatai fēfē he agaaga tapu a tautolu ke fakauka he fekafekauaga ki a Iehova pete ka vihiatia mai he tau tagata?

¹³ Tala age a Iesu ke he tau tutaki haana ke fakaalofa ke he tau fī ha lautolu. (Mata. 5:44, 45) Mukamuka nakai e mena ia ke taute? Nakai! Ka e maeke ha ko e lagomatai he agaaga tapu he Atua. Ko e fua he agaaga he Atua kua putoia e fakaalofa ti pihia mo e fakauka, totonu, mahani molū, mo e manako fakalatalata. (Kala. 5:22, 23) Lagomatai he tau mahani nei a tautolu ke fakauka ke he vihiatia. Tokologa e  tagata totoko ne hiki e tau loto ha kua fakakite he taane, hoana, tama, po ke katofia kua tua e tau mahani faka-Atua ia. Tokologa e tagata totoko ne eke mo tau matakainaga fakahelehele ha tautolu. Ti ka uka a koe ke fakaalofa ki a lautolu kua vihiatia a koe ha kua fekafekau a koe ki a Iehova, liogi ma e agaaga tapu. (Luka 11:13) Ti talitonu katoatoa kua hako tumau e puhala he Atua.​—Fakatai 3:5-7.

14-15. Lagomatai fēfē he Roma 12:17-21 a Yasmeen ke fakaalofa ke he taane haana pete e totoko lahi a ia?

¹⁴ Manamanatu ke he fakafifitakiaga ha Yasmeen ne nofo he Middle East. He eke a ia mo taha he Tau Fakamoli a Iehova, manatu e taane ha Yasmeen kua fakahehē a ia ti lali ke taofi a ia he fekafekau ke he Atua. Amuamu he taane haana a ia mo e tala age ke he tau magafaoa mo e akoako mo e taulātua ke fakamatakutaku a ia mo e tukupau kua vehe e ia e magafaoa haana. Vale foki e taane haana ke he tau matakainaga he hoko e feleveiaaga he fakapotopotoaga! Tagi tumau a Yasmeen ha kua ekefakakelea a ia.

¹⁵ He Fale he Kautu, fakamafana mo e fakamalolō he magafaoa fakaagaaga a Yasmeen. Tomatoma e tau motua ki a ia ke fakagahua e tau kupu ia Roma 12:17-21. (Totou.) “Uka lahi,” ui e Yasmeen. “Ka e ole au ki a Iehova ke lagomatai au ti eketaha au ke fakagahua e mena ne talahau he Tohi Tapu. Ti ka tātolo he taane haaku e tau mena kiva he peito, ne fakameā e au. Ka amuamu e ia au, ne tali molū atu au. Ko e mogo ne gagao a ia, ne leveki e au a ia.”

16-17. Ko e heigoa haau ne fakaako mai he fakafifitakiaga ha Yasmeen?

¹⁶ Taui mitaki a Yasmeen he fakakite e fakaalofa ke he taane haana. Pehē a ia: “Kamata e taane haaku ke falanaki lahi ki a au he iloa e ia kua talahau tumau e au e mena mooli. Kamata a ia ke fanogonogo fakalilifu ki a au ka tutala a maua hagaao ke he lotu, ti talia e ia ke taute e mafola i kaina. Pehē a ia ki a au mogonei ke fano ke he tau feleveiaaga he fakapotopotoaga. Holo mitaki e moui magafaoa ha maua ti moua e maua e mafola mooli. Amaamanaki au ke hafagi e loto he taane haaku ke talia e kupu mooli mo e fakalataha mo au ke fekafekau ki a Iehova.”

¹⁷ Fakakite he fakafifitakiaga ha Yasmeen ko e fakaalofa “kua fakauka ke he tau mena oti, . . . kua amaamanaki ke he tau mena oti, kua fakamanavalahi ke he tau mena oti.” (1 Kori. 13:4, 7) Maeke e vihiatia ke malolō mo e fakamamahi lahi ka e mua atu e malolō he fakaalofa. Maeke e fakaalofa ke hiki e tau  loto. Ti maeke ai ke fakafiafia a Iehova. Pete ka matutaki e tau tagata totoko ke vihiatia mai, maeke agaia a tautolu ke fiafia. He puhala fe?

18. Ko e ha kua fiafia a tautolu ka vihiatia?

¹⁸ Pehē a Iesu: “Uhoaki [fiafia] a mutolu ka fakavihia a mutolu he tau tagata.” (Luka 6:22) Nakai fifili a tautolu ke vihiatia he tau tagata. Nakai lali a tautolu ke mamate fakamatulo, po ke ma e lotu. Ti ko e ha kua fiafia a tautolu ka vihiatia? Manamanatu ke he tolu e kakano. Fakamua, ka fakauka a tautolu kua moua e tautolu e taliaaga he Atua. (1 Pete. 4:13, 14) Uaaki, kua uho mo e malolō lahi e tua ha tautolu. (1 Pete. 1:7) Mo e toluaki, to moua e tautolu e palepale mua ue atu ko e moui tukulagi.​—Roma 2:6, 7.

19. Ko e ha ne fiafia e tau aposetolo he mole e fahi?

¹⁹ Nakai leva e liu tu mai ha Iesu, moua he tau aposetolo e fiafia ne tutala ki ai a ia. He mole e fahi mo e poaki ke oti e fakamatala, ne fiafia a lautolu. Ko e ha? “Ha kua eke ni kua aoga a lautolu ke eke fakakelea ha ko e hana [Iesu] higoa.” (Gahua 5:40-42) Mua atu e fakaalofa ha lautolu ke he Iki ke he matakutaku ke he vihiatia he tau fī ha lautolu. Ti fakakite e lautolu e fakaalofa he fakamatala atu e tala mitaki mo e “nakai oki.” Tokologa e tau matakainaga mogonei ne matutaki ke fekafekau fakamooli pete e tau tuaga uka. Iloa e lautolu to nakai nimo e Iehova e gahua mo e fakaalofa ha lautolu ke he higoa haana.​—Hepe. 6:10.

20. Ko e heigoa ka fakatutala a tautolu he vala tala ka mui mai?

²⁰ To vihiatia he lalolagi a tautolu ke hoko ke he fakaotiaga. (Ioane 15:19) Ka e nakai lata a tautolu ke matakutaku. To kitia e tautolu he vala tala ka mui mai, to ‘fakatumau mo e leveki’ e Iehova e tau fekafekau fakamooli haana. (2 Tesa. 3:3) Kia matutaki ke fakaalofa ki a Iehova, fakaalofa ke he tau matakainaga, mo e fakaalofa foki ke he tau fī ha tautolu. Ka mumuitua ke he fakatonuaga nei, to fakatumau a tautolu ke kaufakalataha mo e malolō fakaagaaga, to fakaheke ki a Iehova, mo e to fakakite kua mua atu e malolō he fakaalofa ke he vihiatia.