1, 2. (a) Ko e heigoa e palepale kua amanaki atu e tau fekafekau he Atua ki ai? (e) Ko e heigoa kua lagomatai a tautolu ke hagaaki tumau e onoonoaga ha tautolu ke he palepale? (Kikite fakatino he kamataaga.)

KO E tau Kerisiano fakauku ne moua e amaamanakiaga uho. Amanaki atu a lautolu ke momoui he lagi. Fakahigoa he aposetolo ko Paulo e amaamanakiaga nei ko e “palepale ne ui mai ai e Atua mai luga.” (Filipi 3:14) He lagi, to pule a lautolu fakalataha mo Iesu Keriso ke he Kautu haana mo e gahua mo ia ke lagomatai e tau tagata ke hokotia ke he mitaki katoatoa. (Fakakiteaga 20:6) Ko e amaamanakiaga homo ue atu mooli anei! Ko e tau mamoe kehe kua amanaki atu a lautolu ke he taha palepale foki. Amaamanaki a lautolu ke momoui tukulagi he Parataiso he lalolagi, ti fakafiafia mooli he amaamanakiaga nei a lautolu!​—2 Peteru 3:13.

² Manako a Paulo ke lagomatai e haana a tau matakainaga Kerisiano fakauku ke tumau e mahani fakamooli ti moua e palepale. Tala age a ia ki a lautolu: “Kua loto a mutolu ke he tau mena ha i luga.” (Kolose 3:2) Lata a lautolu ke hagaaki ke he  amaamanakiaga uho lahi ha lautolu ke he lagi. (Kolose 1:4, 5) He manamanatu ke he tau monuina ha Iehova kua lagomatai e tau fekafekau oti he Atua ke hagaaki tumau e onoonoaga ha lautolu ke he palepale. Mooli e mena nei kaeke kua amaamanaki a lautolu ke momoui he lagi po ke he lalolagi.​—1 Korinito 9:24.

3. Ko e heigoa ne hataki e Paulo ke he tau Kerisiano?

³ Hataki foki e Paulo e tau Kerisiano ke he tau hagahaga kelea ka fakavai a lautolu ke uta e palepale. Ma e fakatai, tohi e ia ke he tau tagata Kolose hagaao ke he tau Kerisiano fakavai ne lali ke fakafiafia e Atua he mumui ke he Fakatufono ha Mose ka e nakai tua ke he Keriso. (Kolose 2:16-18) Fakatutala foki a Paulo ke he tau hagahaga kelea ne tutupu agaia he vahā nei ka taofi a tautolu neke moua e palepale. Fakamaama e ia e puhala ke totoko e tau manako feuaki mo e mena ka taute ai ka fai lekua he magafaoa ha tautolu po ke mo e tau matakainaga ha tautolu he fakapotopotoaga. Ko e fakatonuaga aoga lahi ha Paulo ka lagomatai a tautolu mogonei. Kia kumikumi a tautolu ke he falu he tau hatakiaga totonu kua moua e tautolu he tohi haana ke he tau tagata Kolose.

4. Ko e ha ne taofi he tau manako feuaki a tautolu mai he moua e palepale?

⁴ Mole e fakamanatu age e Paulo ke he tau matakainaga haana hagaao ke he amaamanakiaga mua ue atu ha lautolu, tohi e ia: “Hanai, kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke.” (Kolose 3:5) Ko e tau manako feuaki kua maeke ke malolō lahi ti maeke ke taute a tautolu ke galo e fakafetuiaga mo Iehova mo e amaamanakiaga ma e vahā anoiha. Taha e matakainaga taane ne mahala ke he tau manako feuaki haana ti liu mai he mogo fakamui ke he fakapotopotoaga ne pehē kua malolō lahi e tau manako nei ti “nakai liu tua ato tōmui lahi.”

5. Puipui fēfē e tautolu a tautolu he tau tuaga hagahaga kelea?

⁵ Kua lata a tautolu ke fakaeneene pauaki kaeke ko tautolu he tuaga ka takitaki atu ke nakai omaoma ke he tau mahani ha Iehova. Ma e fakatai, kua mitaki ma e hoa ne fakatū kapitiga loto fakavihi ke fakakaupā he kamataaga e tau mena tuga e tau aamo, taufigita, mo e ko laua ni hoko laua. (Tau Fakatai 22:3) Falu tuaga hagahaga kelea ka tupu he mogo ka ō a tautolu he tau fenoga fakapisinisi po ke gahua a tautolu mo e taha tagata taane po ke fifine. (Tau Fakatai 2:10-12, 16) Ko e heigoa ka taute e koe ke puipui aki a koe? Tala age ko koe taha he Tau Fakamoli a Iehova. Lata ke lilifu e mahani, ti nakai nimo ko e kalahī ka takitaki atu ke he matematekelea. Lata foki a tautolu ke fakaeneene kaeke kua momoko po ke matimati a tautolu. Liga manako a tautolu ke he taha tagata ke fakaalofa mai ki a tautolu. Liga malolō lahi e logonaaga ha tautolu ti talia noa ni ha tagata ne mamata mai ki a tautolu. Hagahaga kelea lahi e mena nei. Ka logona hifo pihia a koe, ua taute ha mena ke taofi mai a koe he moua e palepale. Ono ki a Iehova mo e tau matakainaga haau ke moua e lagomatai.​—Totou Salamo 34:18; Tau Fakatai 13:20.

6. Ko e heigoa kua lata a tautolu ke manatu ka fifili e tau fakafiafiaaga?

⁶ Ke tamate e tau manako feuaki, lata a tautolu ke tiaki e tau fakafiafiaaga mahani feuaki. Lahi he tau fakafiafiaaga mogonei ne fakamanatu ki a tautolu e tau mena ne tutupu  i Sotoma mo Komora. (Iuta 7) Ko lautolu ne fakatokatoka e tau fakafiafiaaga ne taute ai ke tuga kua mitaki e mahani feuaki ti nakai hagahaga kelea. Kua lata tumau a tautolu ke mataala. Nakai talia noa ni e tautolu ha fakafiafiaaga mai he lalolagi. Ka e lata a tautolu ke fifili e tau fakafiafiaaga kua nakai taofi mai a tautolu he moua e palepale he moui.​—Tau Fakatai 4:23.

7. Ko e heigoa e tau lekua ka tutupu i loto he fakapotopotoaga Kerisiano?

⁷ Kua fiafia a tautolu ke fakalataha ke he fakapotopotoaga Kerisiano. Fakaako e tautolu e Kupu he Atua he tau feleveiaaga, ti lalago fakaalofa e tautolu e taha mo e taha. Lagomatai he mena nei a tautolu ke hagaaki e onoonoaga ha tautolu ke he palepale. Ka e falu magaaho ne ha ha i ai e tau fekehekeheaki ne kua fakatupu e tau lekua ke he tau vahāloto he tau matakainaga ha tautolu. Ka nakai fakamafola e tautolu e tau lekua nei, to mukamuka lahi ai ke takitaki atu ke he fakaita.​—Totou 1 Peteru 3:8, 9.

8, 9. (a) Ko e heigoa e tau mahani ka lagomatai a tautolu ke moua e palepale? (e) Ko e heigoa ka lagomatai a tautolu ke tumau e mafola ka fakahogohogo manava he matakainaga Kerisiano a tautolu?

⁸ Kia nakai fakaatā e tautolu e fakaita ke taofi a tautolu mai he moua e palepale. Fakamaama e Paulo e mena kua lata he tau Kerisiano ke taute: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania; Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] kia mutolu, kia pihia foki a mutolu. Ka e ha i luga he tau mena oti ia e fakaalofa ko e pipi haia ke fakamaopoopo ai.”​—Kolose 3:12-14.

⁹ Ko e fakaalofa mo e mahani totonu ka lagomatai a tautolu ke fakamagalo e falu. Ka logona e tautolu e hukia he mena ne talahau po ke taute he taha tagata, maeke a tautolu ke manamanatu ke he tau magaaho ne talahau po ke taute e tautolu e taha mena ne nakai totonu ke he falu ti fakamagalo e lautolu a tautolu. Loto fakaaue mooli a tautolu ke he fakaalofa mo e mahani totonu ha lautolu! (Totou Fakamatalaaga 7:21, 22.) Loto fakaaue a tautolu ha kua totonu e Keriso he tamai fakalataha e tau tagata tapuaki mooli. (Kolose 3:15) Fakaalofa a tautolu ke he taha e Atua, fakamatala ke he taha e fekau, mo e tatai e tau lekua ne lauia ai. Ka mahani totonu mo e fakaalofa ti fakamagalo e tautolu e taha mo e taha, to lahi e kaufakalataha he fakapotopotoaga mo e maeke a tautolu ke hagaaki tumau ke he palepale.

10, 11. (a) Ko e ha kua hagahaga kelea e mahekeheke? (e) Eketaha fēfē a tautolu ke nakai taofi he mahekeheke a tautolu mai he moua e palepale?

¹⁰ Maeke he mahani mahekeheke ke taofi mai a tautolu he moua e palepale. Fakakite he tau fakafifitakiaga he Tohi Tapu e hagahaga kelea he mahekeheke. Ma e fakatai, ne mahekeheke a Kaino ki a Apelu ti kelipopo a ia. Ko Koru, Tatano, mo Apiramo ne mahekeheke ki a Mose ti totoko a ia. Ne mahekeheke e Patuiki ko Saulo ki a Tavita ti tatao a ia ke kelipopo. Mooli lahi e talahauaga he Kupu he Atua: “Ha ko e mena ha i ai e mahekeheke mo e taufetoko, ha i ai e fakaagitau mo e tau mena kelea oti kana.”​—Iakopo 3:16.

¹¹ Kaeke ke gahua fakamalolō a tautolu ke fakaalofa mo e mahani totonu mooli, to nakai mukamuka a tautolu ke mahekeheke.  Pehē e Kupu he Atua: “Kua fakauka e fakaalofa, to totonu, nakai mahekeheke e fakaalofa.” (1 Korinito 13:4) He eketaha ke nakai ko e vala he mahani ha tautolu e mahekeheke, lata a tautolu ke lali fakalahi ke kitia e tuaga mai he puhala ha Iehova. Lata a tautolu ke onoono ke he tau matakainaga ha tautolu ko e tau vala he tino taha, ko e fakapotopotoaga. Pehē e Tohi Tapu: “Ka nava ke he taha fahi tino, ti fiafia fakalataha ai e tau fahi tino oti.” (1 Korinito 12:16-18, 26) Ka fai mena mitaki ne tupu ke he taha matakainaga ha tautolu, to fiafia a tautolu ke he mena ne tupu, ka e nakai mahekeheke ki a ia. Manamanatu ke he fakafifitakiaga mitaki ha Ionatana ko e tama he Patuiki ko Saulo. Nakai mahekeheke a Ionatana ha kua fifili a Tavita ke eke mo patuiki ka e nakai ko ia. Ne fakamafana mo e lalago foki e ia a Tavita. (1 Samuela 23:16-18) Maeke nakai a tautolu ke mahani totonu mo e fakaalofa tuga a Ionatana?

12. Ko e heigoa e fakatonuaga mai he Tohi Tapu ka lagomatai e magafaoa ha tautolu ke moua e palepale?

¹² Ka fakagahua he tau tagata takitaha he magafaoa ha tautolu e tau matapatu fakaakoaga he Tohi Tapu, to mafola mo e fiafia mo e to moua he magafaoa ha tautolu e palepale. Tala age e Paulo e fakatonuaga pulotu nei ke he tau magafaoa: “Ko mutolu, e tau fifine, kia omaoma a mutolu ke he ha mutolu a tau tane, tuga ne mena kua lata ha ha he Iki. Ko mutolu e tau tane, kia fakaalofa ke he tau hoana ha mutolu, ti ua fakahogohogo kia lautolu. Ko mutolu e tau fanau, kia fanogonogo a mutolu ke he tau matua ha mutolu ke he tau mena oti; ha ko e mena mitaki ia ha ha he Iki. Ko mutolu e tau matua tane, aua neke fakalagalaga e tau fanau ha mutolu, neke fakalolelole e tau loto ha lautolu.” (Kolose 3:18-21) Maeke nakai a koe ke kitia e puhala ka lagomatai he fakatonuaga nei e magafaoa haau?

13. Maeke fēfē he matakainaga fifine Kerisiano ke lagomatai e taane nakai tua haana ke manako ke fekafekau ki a Iehova?

 ¹³ Liga ko e matakainaga fifine a koe ne nakai fekafekau e taane ki a Iehova. Ko e heigoa haau ka taute kaeke kua logona hifo e koe kua nakai taute fakamitaki e ia a koe he puhala kua lata? Liga ita mo e taufetoko a koe mo ia, ka e to mitaki nakai e tuaga? Pete kua mua a koe he taufetoko, to taute nakai e koe a ia ke manako ke fekafekau ki a Iehova? Liga nakai. Kaeke ke fakalilifu e koe e matagahua haana ko e ulu he magafaoa, to maeke a koe ke lagomatai e magafaoa ke lahi e mafola mo e to fakaheke e koe a Iehova. Liga taute he fakafifitakiaga mitaki haau e taane haau ke manako ke fekafekau ki a Iehova, ti maeke tokoua a mua ke moua e palepale.​—Totou 1 Peteru 3:1, 2.

14. Ko e heigoa kua lata he taane Kerisiano ke taute ka nakai fakalilifu he hoana nakai tua haana a ia?

¹⁴ Liga ko e matakainaga taane a koe ne nakai fekafekau e hoana ki a Iehova. Ko e heigoa haau ka taute ka logona hifo e koe kua nakai fakalilifu e ia a koe? Ka lali a koe ke fakakite ki a ia ko hai e pule he vale ki a ia, to fakalilifu nakai e ia a koe? Nakai pihia! Amanaki e Atua ki a koe ke eke mo taane fakaalofa ne fifitaki a Iesu. (Efeso 5:23) Ko Iesu e ulu he fakapotopotoaga ti fakauka mo e fakaalofa tumau a ia. (Luka 9:46-48) Ka fifitaki a koe ki a Iesu, to fai magaaho ti liga manako e hoana haau ke fekafekau foki ki a Iehova.

15. Fakakite fēfē he tagata taane Kerisiano kua ofania e ia e hoana haana?

¹⁵ Fakatonu e Iehova e tau taane: “Kia fakaalofa ke he tau hoana ha mutolu, ti ua fakahogohogo kia lautolu.” (Kolose 3:19) Fakakite he taane fakaalofa e lilifu ke he hoana haana. Fēfē? Fanogonogo e taane ke he tau manatu he hoana haana ti tala age ki a ia kua aoga e mena ne talahau e ia. (1 Peteru 3:7) Pete he nakai maeke he taane  ke taute tumau e mena ne ole he hoana, ko e fanogonogo ki a ia ka lagomatai e taane ke taute e tau fifiliaga mitaki. (Tau Fakatai 15:22) Ko e taane fakaalofa ne nakai poaki malolō ke he hoana ke fakalilifu a ia. Ka e lali e taane ke moua e fakalilifuaga he hoana haana. Ka ofania he taane e hoana mo e fanau haana, liga to fiafia a lautolu he fekafekau ki a Iehova mo e moua e palepale he moui.

16, 17. Ha ko e fuata, kalo kehe fēfē a koe he molea e hogohogo manava ke he tau matua haau?

¹⁶ Liga ko e fuata mui a koe ti logona hifo kua nakai maama he tau matua haau a koe po ke kua pāpā maō lahi a laua. Liga fakahogohogo manava lahi he mena nei a koe ti manamanatu na manako mooli nakai a koe ke fekafekau ki a Iehova. Kaeke ke toka e koe a Iehova, to mailoga e koe kua nakai fai tagata he lalolagi ne fakaalofa mooli ki a koe tuga e tau matua Kerisiano haau mo e tau kapitiga haau he fakapotopotoaga.

¹⁷ Manamanatu ke he mena nei: Ka nakai fakatonu he tau matua haau a koe, to iloa fēfē e koe kua leveki mooli e laua a koe? (Heperu 12:8) Mooli, nakai mitaki katoatoa a laua ti ko e puhala kua akonaki e laua a koe kua liga fakahogohogo manava ki a koe. Ka e ua hagaaki ke he mena ia. Lali ke maama e tau kakano ne taute mo e talahau ai e laua. Kia fakatotoka, ti lali ke nakai mafiti ke ita. Ko e Kupu he Atua ne pehē: “Ko ia kua fai iloilo, kua taofi ai e ia hana tau kupu; ko ia kua totonu foki, ko e tagata pulotu a ia.” (Tau Fakatai 17:27) Taute mo foliaga haau ke eke mo tagata fakaagaaga ne talia e fakatonuaga mo e fakaako mai ai pete ne puhala ne tala atu ki a koe. (Tau Fakatai 1:8) Ua nimo ko e moua e tau matua ne fakaalofa ki a Iehova ko e mena fakaalofa uho. Manako a laua ke lagomatai a koe ke moui tukulagi.

18. Ko e ha kua eketaha a koe ke hagaaki tumau ke he palepale?

¹⁸ He amaamanaki a tautolu ke momoui tukulagi ke he lagi po ke parataiso he lalolagi, igatia a tautolu mo e amanaki atu ke he vahā homo ue atu anoiha. Kua mooli e amaamanakiaga ha tautolu. Fakavē ai ke he maveheaga he Tufuga he lagi mo e lalolagi katoatoa, ne pehē: “To puke e lalolagi ke he maama kia Iehova.” (Isaia 11:9) Nakai leva ko e tau tagata oti kana he lalolagi to fakaako he Atua. Ko e palepale haia ne uho lahi ke gahua fakalahi ki ai. Kia manatu tumau e mena ne mavehe e Iehova ki a koe, ti ua fakaatā ha mena ke taofi mai a koe he moua e palepale!