Fanau au he 1983. He tau tau fakamua haaku he moui, ko e tama tino malolō au, ka e hogofulu e tau haaku he moui ti kamata au ke mamahi lahi e tino. Kavi ke he ua e tau he mole, ofo hake au he taha pogipogi ti nakai maeke ke lutu. Pete he lali fakalahi au ke lutu e tau hui, ka e nakai maeke. Tali mai he aho ia, nakai liu au ke fano e tau hui. Ko e gagao ia ati nakai liu e tino haaku ke tupu. Mogonei, tote agaia au tuga e tama tote.

Fai mahina he mole e gagao haaku ti nofo ni i fale, tokoua e Fakamoli a Iehova ne ahiahi mai. He ahiahi mai e tau tagata, ne fa lali au ke fakamumuli, ka ko e aho ia ne tutala au mo e tau fifine. He tutala a laua hagaao ke he Parataiso, ne manatu e au e mena ne logona e au kavi ke he lima e tau haaku he moui. He mogoia, ko e misionare ko Jethro ne nofo i Suriname ne ahiahi mai ke he maaga ha mautolu lagataha he mahina ke fakaako e Tohi Tapu mo e matua taane haaku. Taute fakamitaki e Jethro au. Fiafia lahi au ki a ia. Uta foki he tau matua tupuna haaku au ke he falu he tau feleveiaaga he Tau Fakamoli ne fakahoko he maaga ha mautolu. Mogo ne hūhū mai a Florence ko e taha he tau fifine ne ahiahi mai ki a au he aho ia, kua loto nakai au ke fakaako atu foki, ti talia e au.

Liu mai a Florence mo e taane haana ko Justus ti kamata a laua ke fakaako e Tohi Tapu mo au. He mailoga e laua kua nakai iloa au ke totou ti lagomatai e laua au ke fakaako ke totou. Fai mogo he mole, ti maeke au ke totou. Taha aho ne tala mai e hoa ki a au kua kotofa a laua ke gahua i Suriname. Kua nakai fai tagata i Orealla ke matutaki e fakaako Tohi Tapu haaku. Fiafia ai ha kua manatu tumau e Iehova au.

Nakai leva he mole, ti hoko mai e paionia ko Floyd ki Orealla ti feleveia mo au he fakamatala he taha fale ke he taha fale ne tau aki e tau pola e tuafale. He mogo ne tutala a ia ki a au hagaao ke he fakaako e Tohi Tapu, ne mamali au. “Ko e mamali a koe he ha?” he hūhū e ia. Tala age au kua fitā au he fakaako e porosua What Does God Require of Us? mo e kamata ke fakaako e tohi Knowledge That Leads to Everlasting Life. * Fakamaama e au e kakano ne oti e fakaako. Fakaako e Floyd e vala ne toe he tohi Knowledge mo au ka e kotofa foki a ia mogoia ke gahua he taha matakavi. Ti liu au ai fai faiaoga fakaako Tohi Tapu.

 Ka e he 2004, ko Granville mo Joshua, ko e tau paionia pauaki tokoua ne kotofa ki Orealla. Moua e laua au he fakamatala he taha fale ke he taha fale ne tau aki e tau pola e tuafale. He hūhū a laua ko e manako nakai au ke fakaako, ne mamali au. Ole au ki a laua ke fakaako e tohi Knowledge mai he kamataaga mo au. Manako au ke kitia ko e tatai nakai e tau mena ne fakaako e laua mo au mo e tau mena ne fakaako he tau faiaoga fakamua haaku. Tala mai a Granville ki a au kua taute e tau feleveiaaga he maaga. Pete he nakaila toka e au e kaina haaku ke teitei hogofulu e tau, manako au ke fano. Ti hau a Granville ke he kaina haaku ti tuku au he nofoa fakataveli ti omoi ke he Fale he Kautu.

Fakamui, fakamafana e Granville au ke hū he Aoga Fekafekau Fakateokarasi. Pehē a ia: “Matulituli e tino haau ka e maeke a koe ke tutala. Taha aho to taute e koe e lauga ma e tau tagata. To taute mooli e koe.” Mauokafua au ha ko e tau kupu mafanatia haana.

Kamata au ke fakamatala mo Granville. Ka e loga e puhalatū efu mo e tule he maaga ti nakai momole ke holo ai e nofoa fakataveli. Ti ole au ki a Granville ke tuku au he huilapa mo e toho viko au. Gahua mitaki e fakaholoaga nai. Ia Aperila 2005, ne papatiso au. Nakai leva he mole, fakamahani he tau matakainaga taane au ke leveki e tau tohi he fakapotopotoaga mo e leo fakatagi he Fale he Kautu.

Momoko ai ha kua mate e matua taane haaku he pakia he poti. Ofo e magafaoa ha mautolu. Liogi a Granville mo mautolu ti totou e tau kupu fakamafana he Tohi Tapu. Ua e tau he mole, ofo a mautolu he mate a Granville he pakia foki he poti.

Ti nakai fai motua mo e taha ni e fekafekau lagomatai he fakapotopotoaga tote ha mautolu kua momoko. Uhu lahi mahaki e mate ha Granville; ha ko e kapitiga uho a ia. Lagomatai fakamooli a ia ke leveki e tau manako fakaagaaga mo e fakatino haaku. He feleveiaaga he mole e mate haana, moua e au e kotofaaga ke totou e tau paratafa ma e Fakaakoaga Kolo Toko. Oti e tau paratafa ua fakamua he totou e au, ka e kamata mogoia au ke tagi ti ai nā. Lata au ke fano kehe i mua.

Kamata au ke fiafia he o mai e tau matakainaga he taha fakapotopotoaga ke lagomatai a mautolu i Orealla. Fakafano mai foki he la ofisa a Kojo ko e paionia pauaki. Fiafia foki au ha kua kamata e matua fifine mo e tehina tote haaku ke fakaako ti papatiso. Ia Mati 2015, kotofa au ko e fekafekau lagomatai. Fai mogo he mole ti taute e au e lauga fakamua haaku ke he tau tagata. He aho ia, liu au manatu he mamali mo e tau hihina mata he fiafia ke he mena ne tala mai e Granville ki a au he tau tau kua mole: “Taha aho to taute e koe e lauga ma e tau tagata. To taute mooli e koe.”

He tau fakaholoaga JW Broadcasting^®, fakaako e au hagaao ke he tau matakainaga he tuaga tuga haaku. Pete e tau matulituli ha lautolu, ne fiafia mo e loga e mena mitaki ne taute e lautolu. Maeke agaia foki au ke taute e falu mena. Ko e manako haaku ke foaki e tau mena kua fahia au ki a Iehova ne omoomoi au ke paionia tumau. Ti ofogia au he moua e vala tala ia Sepetema 2019! Iloa e au he mahina ia kua kotofa au ke fekafekau ko e motua he fakapotopotoaga ne kavi ke he 40 e tagata fakailoa.

Fakaaue au ke he tau matakainaga fakahele ne fakaako mo au mo e lagomatai ke taute e gahua fakamatala haaku. Mua atu ai, kua loto fakaaue lahi au ha kua manatu tumau e Iehova au.