1. Ko e heigoa e matakupu aoga lahi ne fakatutala a Iesu he pō fakahiku mo e haana a tau tutaki?

KE HE pō fakahiku ha Iesu mo e tau tutaki haana ato mate a ia, ne totoku e ia e fakaalofa teitei ke laga 30. Tala age a ia ke he tau tutaki haana kua lata a lautolu ke “feofanaki.” (Ioane 15:12, 17) To ofoofogia lahi e fakaalofa ha lautolu mo e mailoga ai he falu ti iloa ko lautolu ko e tau tutaki mooli he Keriso. (Ioane 13:34, 35) Ko e fakaalofa kua hagaao a Iesu ki ai ne nakai ko e logonaaga teao; kua malolō lahi mo e ko e mahani foaki noa. Pehē a Iesu: “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga. Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.”​—Ioane 15:13, 14.

2. (a) Ko e heigoa kua iloa lahi ki ai e tau fekafekau he Atua he vahā nei? (e) Ko e heigoa e tau hūhū ka tali e tautolu he vala tala nei?

² Ko e tau fekafekau ha Iehova he vahā nei kua iloa lahi ha ko e ha lautolu a fakaalofa mooli ne foaki noa mo e kaufakalatahaaga mauokafua. (1 Ioane 3:10, 11) Pete ni e motu po ke magafaoa,  vagahau, mena ne o mai ai, po ke feakiaga ne tupu mai a tautolu. He lalolagi katoa, kua fakaalofa mooli e tau fekafekau ha Iehova ko e taha ke he taha. Ko e ha ne latatonu e fakaalofa he vahā nei? Fakamafana fēfē e Iehova mo Iesu a tautolu ke he fakaalofa? Ti fakakite fēfē e tautolu e fakaalofa nei ke atihake mo e fakamalolō e falu?​—1 Korinito 8:1.

3. Lauia fēfē e tau tagata he “tau aho uka” nei?

³ Nonofo a tautolu he “tau aho uka,” ti puke e moui he “mamahi mo e matematekelea.” (2 Timoteo 3:1-5; Salamo 90:10) Tokologa e tagata ne matematekelea lahi mahaki ti logona hifo e lautolu e nakai aoga he moui. Molea e 800,000 tagata, taha e tagata he tau sekone 40 takitaha ne taupega he tau tau takitaha. Momoko ai, falu he tau matakainaga ha tautolu ne pihia e tau logonaaga ti uta ne lautolu ha lautolu a tau momoui.

4. Ko hai e tau tagata he Tohi Tapu he taha magaaho ne logona hifo kua manako a lautolu ke mamate?

⁴ He tau vahā Tohi Tapu, falu he tau fekafekau fakamooli he Atua ne logona hifo e fuafuakelea lahi ha ko e tau lekua ti manako a lautolu ke mamate. Ma e fakatai, kua mamahi lahi foki a Iopu ti pehē a ia: “Kua fakavihia e au ke he haku a moui, nakai fia moui mau au.” (Iopu 7:16; 14:13) Logona hifo e Iona e hogohogo manava ti pehē a ia: “Ko e hanai foki, Iehova na e, kua ole atu e au kia koe, ke uta kehe e koe haku a moui, ha kua mitaki ke mate au, ka e kelea ke moui.” (Iona 4:3) Logona hifo he perofeta ko Elia e nakai fahia ti pehē a ia: “Iehova na e, tokai; kia uta kehe e koe haku a moui.” (1 Tau Patuiki 19:4) Ka e fakaalofa a Iehova ke he tau fekafekau fakamooli nei ti manako ke momoui a lautolu. Nakai vihiatia e ia e tau logonaaga ha lautolu. Ka e lagomatai e ia a lautolu ke liu moua e manako ke momoui ke maeke a lautolu ke tumau e fekafekau fakamooli ki a ia.

5. Ko e ha ne lata mooli e tau matakainaga ha tautolu mo e fakaalofa ha tautolu mogonei?

⁵ Tokologa e matakainaga ha tautolu he vahā nei hane fehagai mo e tau tuaga tupetupe ti lata ke moua e fakaalofa ha tautolu. Falu kua vaiga po ke favale ki ai. Falu ne fakauka ke he ekefakakelea po ke loma he tau gahuaaga ha lautolu. Po ke mategūgū a lautolu ha kua gahua loa po ke peehi lahi e tau gahua. Falu ne lahi mahaki e tau lekua he magafaoa. Liga ko e hoa mau ha lautolu ne nakai tapuaki ki a Iehova ti tuhituhi tumau ki a lautolu. Ha ko e tau mena nei mo e falu pehiaaga, tokologa ne logona hifo kua nakai fai malolō a lautolu ne toe, ti liga kamata ke fakauaua ke he tuaga he tau momoui ni ha lautolu. Ko hai ka lagomatai a lautolu?

6. Fakamalolō fēfē he fakaalofa ha Iehova e tau fekafekau haana?

⁶ Fakamafana e Iehova e tau fekafekau haana kua fakaalofa a ia ki a lautolu mogonei mo e to fakaalofa ki a lautolu tukulagi. Manamanatu ke he logonaaga he tau Isaraela he mogo ne tala age a Iehova ki a lautolu: “Ha kua fakahelehele e au a koe, kua fakalilifu e au a koe; kua fakaalofa atu foki au kia koe,” mo e “Ua matakutaku a koe, ha ko au kua fakalataha mo koe”! (Isaia 43:4, 5) Iloa e tautolu kua uho lahi a tautolu takitokotaha ki a Iehova. * (Kikite matahui tala.) Mavehe he Tohi Tapu: “Kua malolo a ia; to fakamoui ai e ia; to olioli a ia kia koe mo e fiafia.”​—Sefanaia 3:16, 17.

7. Fakatatai fēfē e fakaalofa ha Iehova ke he matua fifine fakahuhu tama? (Kikite fakatino he kamataaga.)

 ⁷ Mavehe a Iehova ke fakamalolō mo e atihake e tau tagata haana pete ne tau lekua ha lautolu. Pehē a ia: “Ti kai ai e mutolu; to hapini a mutolu ke he hana kahokaho, ti fakafiafia ai a mutolu ke he hana tau tuli hui. Tuga ne tagata ne fakamafana ai he hana matua fifine, to fakamafana pihia e au a mutolu.” (Isaia 66:12, 13) Manamanatu ke he haohao mitaki he tama mukemuke he mogo ne lukuluku he matua fifine haana a ia po ke fefeua mo ia! Hokulo e fakaalofa ha Iehova ki a koe ti manako ki a koe ke logona hifo e haohao mitaki. Uho lahi mooli a koe ki a Iehova.​—Ieremia 31:3.

8, 9. Maeke fēfē he fakaalofa ha Iesu ke fakamalolō a tautolu?

⁸ Hanei taha kakano foki kua iloa e tautolu na fakaalofa a Iehova ki a tautolu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e poa ha Iesu kua fakakite na fakaalofa foki a ia ki a tautolu, ti fakamalolō he fakaalofa nei a tautolu. Pehē e Tohi Tapu nakai ko e ‘matematekelea po ke fakaatukehe’ ka “fakamavehe a tautolu mo e fakaalofa a Keriso.”​—Roma 8:35, 38, 39.

⁹ Ha ha ia tautolu e tau lekua he falu magaaho ti fakalolelole a tautolu fakatino, po ke tau logonaaga, po ke fofō e fiafia ha tautolu he fekafekau ki a Iehova. Ka ko e manatu e fakaalofa lahi mahaki he Keriso ki a tautolu ka foaki ki a tautolu e malolō ke fakauka. (Totou 2 Korinito 5:14, 15.) Kua foaki he fakaalofa ha Iesu ki a tautolu e manako ke tumau e moui mo e fekafekau ki a Iehova. Lagomatai foki he mena ia a tautolu ke nakai mahala, pete ka lauia he tau matematekelea tupu pauaki, favale, fakahogohogo manava, po ke fakaatukehe.

10, 11. Ha hai e matagahua ke fakamafana e tau matakainaga loto lolelole? Fakamaama.

¹⁰ Fakaaoga foki e Iehova e fakapotopotoaga ke fakamafana a tautolu ke he fakaalofa haana. Ka fakaalofa a tautolu ke he tau matakainaga ha tautolu, fakakite ai e fakaalofa ha tautolu ki a Iehova. Taute e tautolu e tau mena oti kana ke maeke ke lagomatai e tau matakainaga ke iloa kua aoga lahi a lautolu ti fakaalofa a Iehova ki a lautolu. (1 Ioane 4:19-21) Tohi e aposetolo ko Paulo: “Kia fetomaaki a mutolu, mo e fefakamafanaki a mutolu, tuga foki he eke e mutolu.” (1 Tesalonia 5:11) Nakai ni ko e tau motua ka taute e mena nei. Igatia a tautolu mo e fifitaki ki a Iehova mo Iesu he atihake e tau matakainaga ha tautolu.​—Totou Roma 15:1, 2.

¹¹ Matematekelea e falu he fakapotopotoaga ha ko e molea e gagao fakaatukehe po ke tupetupe ne liga lata ke moua e lagomatai mo e tau tuluiaga fakaekekafo. (Luka 5:31) Ko e tau motua mo e falu he fakapotopotoaga ne mailoga pete ko lautolu ne nakai ko e tau ekekafo pauaki, ko e lagomatai mo e atihake ka foaki e lautolu kua aoga lahi. Ko lautolu oti he fakapotopotoaga ka “fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.” (1 Tesalonia 5:14) Manako a tautolu ke lali ke maama e logonaaga he tau matakainaga ha tautolu. Lata a tautolu ke fakauka mo e vagahau he puhala ke atihake a lautolu ka loto lolelole a lautolu. Lali nakai a koe ke fakamalolō e falu? Ko e heigoa ka taute e koe ke lahi atu e fakamafana mo e atihake?

12. Talahau e fakatai he taha tagata ne mafanatia ha ko e fakaalofa he fakapotopotoaga haana.

¹² Ko e matakainaga fifine i Europa ne pehē: “Falu mogo ne manamanatu au ke he taupega, ka e ha ha ia au e lalagoaga mitaki. Ko e  fakapotopotoaga ne haia au i ai ne fakahao e moui haaku. Atihake mo e fakaalofa lahi tumau e tau matakainaga. Pete he tokogahoa ne iloa kua matematekelea au he gagao fakaatukehe, kua ha ha i ai tumau e fakapotopotoaga ke lata mo au. Taha e hoa mau ne tuga e tau matua fakaagaaga haaku. Leveki fakamitaki e laua au, ti atāina a laua ke lagomatai au 24 e tulā he aho.” Mooli, nakai maeke e tau tagata oti ke tatai e puhala lagomatai. Ka e maeke oti a tautolu ke lalago fakalahi e tau matakainaga ha tautolu. * (Kikite matahui tala.)

13. Ko e heigoa ka taute e tautolu ke fakamafana e falu?

¹³ Kia eke mo tagata fanogonogo mitaki. (Iakopo 1:19) Fakakite e tautolu e fakaalofa ka fanogonogo mo e logonaaga hofihofi. Hūhū totonu ka lagomatai a koe ke maama e logonaaga he matakainaga haau. To mailoga e ia kua fakaalofa mooli a koe, he kitia foki ke he fofoga haau. He tutala a ia, kia fakauka ti fakaatā a ia ke talahau e tau manatu haana ka e ua fakatauhele a ia. He eke mo tagata fanogonogo mitaki, maeke a koe ke maama mitaki a ia ti lagomatai a ia ke falanaki ki a koe. To mukamuka lahi mogoia a ia ke fanogonogo ke he mena ka talahau e koe he lali a koe ke lagomatai a ia. Ka fakaalofa mooli a koe ke he falu, to eke a koe mo fakamafanaaga lahi ki a lautolu.

14. Ko e ha kua nakai lata a tautolu ke tuhituhi?

¹⁴ Ua aga tuhituhi. Ko e tagata gagao fakaatukehe to holo ni ki mua e kelea he logonaaga ka manamanatu a ia kua tuhituhi e tautolu a ia. To uka lahi mogoia a tautolu ke lagomatai a ia. “Ha ha i ai e tagata kua vagahau, ti tuga ne tuina ai e tau tagata he pelu; ka ko e alelo he tagata iloilo ke malolo ai.” (Tau Fakatai 12:18) Pete kua nakai fakahagahaga kelea pauaki e tautolu e tagata gagao fakaatukehe ha ko e tau kupu ha tautolu, kua fakamamahi lahi agaia a tautolu ka vagahau mo e nakai manamanatu. Ke fakamafana e matakainaga ha tautolu, lata a tautolu ke taute a ia ke logona hifo e talitonu kua lali mooli a tautolu ke maama e tuaga haana.​—Mataio 7:12.

15. Ko e heigoa e foakiaga aoga lahi ka fakaaoga e tautolu ke fakamafana e falu?

¹⁵ Fakaaoga e Kupu he Atua ke fakamafana e falu. (Totou Roma 15:4, 5.) Ko e Tohi Tapu kua foaki mai “he Atua hana e fakauka, mo e fakamafanaaga,” ti nakai ofo ai kua moua e tautolu e fakamafanaaga lahi he tau kupu i loto. Moua foki e tautolu e Watch Tower Publications Index mo e Research Guide for Jehovah’s Witnesses. He fakaaoga e tau foakiaga nei, to moua e tautolu e tau kupu Tohi Tapu mo e tau tohi ka fakaaoga e tautolu ke fakamafana mo e atihake e tau matakainaga ha tautolu.

16. Ko e heigoa e tau mahani ka lagomatai a tautolu ke atihake taha kua gagao fakaatukehe?

¹⁶ Kia fakaalofa hofihofi mo e totonu. Ko Iehova “ko e Matua hana e fakaalofa hofihofi, ko e Atua foki hana e tau fakamafanaaga oti,” ti “fakaalofa hofihofi noa” a ia ke he tau fekafekau haana. (Totou 2 Korinito 1:3-6; Luka 1:78; Roma 15:13) Fakatoka e Paulo e fakafifitakiaga mitaki ke he mena nei ha kua fifitaki e ia a Iehova. Ne tohi e ia: “Kua mahani molu a mautolu he nofo ai a mautolu ia mutolu, tuga ne fifine fakahuhu tama kua leveki fakamitaki hana ni a fanau. Ne hofihofi pihia ha mautolu  a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.” (1 Tesalonia 2:7, 8) Ka fakaalofa hofihofi a tautolu tuga a Iehova, to foaki e tautolu e fakamafanaaga ne fa e liogi e matakainaga ke moua!

17. Ko e heigoa e onoonoaga mooli ke he tau matakainaga ha tautolu ka lagomatai a tautolu ke atihake a lautolu?

¹⁷ Ua amanaki ke he tau matakainaga haau ke mitaki katoatoa. Mooli e kitiaaga. Ka amanaki a koe ke he tau matakainaga haau ke mitaki katoatoa, to fakahogohogo manava ki a koe. (Fakamatalaaga 7:21, 22) Manatu na mooli e mena ne amanaki a Iehova ki a tautolu. Ti lata a tautolu ke fakauka ke he taha mo e taha. (Efeso 4:2, 32) Nakai manako a tautolu ke taute e tau matakainaga ha tautolu ke logona hifo kua nakai lahi e mena ne taute e lautolu po ke fakatatai a lautolu ke he falu. Ka e atihake e tautolu a lautolu ti fakakite age e tau mena mitaki hane taute e lautolu. Lagomatai he mena nei a lautolu ke fiafia he fekafekau ki a Iehova.​—Kalatia 6:4.

18. Ko e ha ne manako a tautolu ke fakamafana e falu ke he fakaalofa?

¹⁸ Ko e tau fekafekau takitaha ha Iehova kua uho lahi ki a ia mo Iesu. (Kalatia 2:20) Fakaalofa lahi mahaki a tautolu ke he tau matakainaga ha tautolu, ti lata ke fehagai totonu ki a lautolu. Kua “kumi fakamakutu e tautolu e tau mena ke tupu ai e mafola, mo e tau mena ke fefakamafanaaki ai.” (Roma 14:19) Amaamanaki lahi a tautolu ke he moui he Parataiso ka nakai fai kakano ha tagata ke loto lolelole! To nakai fai gagao foki mo e to nakai fai felakutaki foki. To nakai liu e tau tagata ke mamate ha ko e agahala ne moua e lautolu, mo e to nakai fai favaleaga foki, tau lekua he magafaoa, po ke fakahogohogo manava he moui. Ke he matahiku he taha e afe tau, to mitaki katoatoa e tau tagata oti kana. Ko lautolu ne tumau e mahani fakamooli he kamatamata fakahiku to hiki e Iehova a lautolu ke eke mo tau fanau haana he lalolagi mo e to moua ai e “tokanoaaga ha ha he monuina he fanau he Atua.” (Roma 8:21) Kia fakakite e tautolu oti e fakaalofa kua fakamafana mo e lagomatai e taha mo e taha ke hao atu ke he lalolagi foou homo ue atu he Atua.