1-2. Ia 1 Timoteo 6:20, ko e heigoa ne age ki a Timoteo?

KUA fa foaki e tautolu e tau mena ne uho lahi ki a tautolu ke leveki he falu. Tuga anei, liga fakahū e tautolu e tupe he pege. Ka taute pihia e tautolu, amanaki a tautolu to mau tumau e tupe ha tautolu ti nakai galo po ke kaihā. Maama mogoia e tautolu e kakano ke tuku age ke he taha tagata e mena ne uho lahi ki a tautolu.

² Totou 1 Timoteo 6:20. Fakamanatu he aposetolo ko Paulo ki a Timoteo kua moua e ia e mena uho ko e iloilo tonu he finagalo he Atua ke he tau tagata. Kua tuku age foki ki a Timoteo e lilifu ke ‘fakamatala atu e kupu’ mo e “eke e gahua he tagata fakamatala vagahau mitaki.” (2 Timo. 4:2, 5) Tomatoma e Paulo ki a Timoteo ke leveki e mena ne tuku age ki a ia. Tuga a Timoteo, kua tuku mai ki a tautolu e tau mena uho lahi. Ko e heigoa e tau mena ia? Ti ko e ha kua lata a tautolu ke puipui e koloa ne tuku mai e Iehova ki a tautolu?

3-4. Ko e heigoa falu kakano kua uho e tau kupu mooli he Tohi Tapu?

³ Foaki mai e Iehova ki a tautolu e iloilo tonu he tau kupu mooli he Tohi Tapu. Uho lahi e tau kupu mooli nei ha kua fakaako ki a tautolu e puhala ke moua e fakafetuiaga mitaki mo Iehova mo e fakamaama ai e tau mena kua tamai e fiafia mooli he moui. Ka talia e tautolu e tau kupu mooli ia mo e momoui fakatatau ki ai, kua tokanoa a tautolu mai he fakatupa ke he tau fakaakoaga fakavai mo e tau mahani kelea.​—1 Kori. 6:9-11.

⁴ Taha kakano kua uho e tau kupu mooli he Tohi Tapu ha kua fakakite ni e Iehova ki a lautolu kua mahani fakatokolalo ne lata “ke he moui tukulagi.” (Gahua 13:48) Ko lautolu kua talia e puhala  nai kua fakaaoga e Ia ke fakatoka mai e tau kupu mooli mogonei. (Mata. 11:25; 24:45) Nakai maeke a tautolu ke fakaako e tau kupu mooli nei hoko tautolu ni, ti nakai fai mena ne mua atu e uho ke maama ai.​—Fakatai 3:13, 15.

5. Ko e heigoa foki kua tuku mai e Iehova ki a tautolu?

⁵ Kua tuku, po ke foaki mai foki e Iehova ki a tautolu e matagahua ke fakaako e falu ke he kupu mooli hagaao ki a Ia mo e finagalo haana. (Mata. 24:14) Ko e fekau kua fakamatala e tautolu kua uho lahi ha kua lagomatai ai e tau tagata ke fai vala ke fakalataha ke he magafaoa ha Iehova mo e foaki ki a lautolu e magaaho ke moua e moui tukulagi. (1 Timo. 4:16) He lahi po ke tote e vala ne taute e tautolu he gahua fakamatala, kua lalago e tautolu e gahua aoga lahi hane taute he magaaho nei. (1 Timo. 2:3, 4) Ko e lilifu mooli ke eke mo tau ekegahua he Atua!​—1 Kori. 3:9.

6. Ko e heigoa ne tupu ke he falu ne kaumahala ke mataala tumau?

⁶ Falu he tau tagata gahua he magahala ha Timoteo ne kaumahala ke loto fakaaue ke he lilifu he eke mo tau ekegahua he Atua. Ha kua fiafia a Tima ke he tau mena he lalolagi nei ti tiaki e ia e matagahua haana ke fekafekau mo Paulo. (2 Timo. 4:10) Ko Fugelu mo Hemokene kua tiaki e fekafekauaga ha laua ha kua matakutaku neke matematekelea he favale tuga ne hoko ki a Paulo. (2 Timo. 1:15) Ko Humenaio, Alesana, mo Fileto ne mokulu oti ke he tiaki taofiaga ti ō kehe he kupu mooli. (1 Timo. 1:19, 20; 2 Timo. 2:16-18) Ko lautolu oti nei ne malolō fakaagaaga he taha magahala, ka e galo ia lautolu e logonaaga he mena ne uho mooli.

7. Ko e heigoa e tau lagatau ne fakaaoga e Satani ke totoko ki a tautolu?

⁷ Lali fēfē a Satani ke tiaki e tautolu e tau koloa ne tuku mai e Iehova ki a tautolu? Mailoga e falu lagatau ha Satani. Fakaaoga e ia e fakafiafiaaga mo e puhala uta tala ke fakaholo ki mua e tau mena ne aoga, manamanatuaga, mo e aga kua amanaki a ia to fakatupu a tautolu ke maueue e totō mau ha tautolu ke he kupu mooli. Lali a ia ke fakamatakutaku a tautolu ha ko e peehiaga he falu po ke favale ke maeke a tautolu ke oti e gahua fakamatala. Ti lali a ia ke fakataki a tautolu ke fanogonogo ke he “tau mena kua fakahigoa pikopiko ai ko e iloilo” he tau tagata tiaki taofiaga ke maeke a tautolu ke tiaki e kupu mooli.​—1 Timo. 6:20, 21.

8. Ko e heigoa kua fakaako e koe mai he mena ne tupu ke he matakainaga ko Daniel?

⁸ Ka nakai fakaeneene a tautolu, to tiaki fakahaga e tautolu e kupu mooli. Manamanatu ke he tala ki a Daniel, * ne fiafia ke pelē vitiō.  Fakamaama e ia: “Kamata au ke pelē vitiō he kavi ke he hogofulu e tau he moui. Ke kamata aki, ne mitaki e tau vitiō ne pelē e au. Ka e fano fakahaga ti kamata au ke pelē e tau vitiō kua favale mo e fakatemoni.” Fakahiku, ne pelē vitiō a ia kavi ke he 15 e tulā he tau aho takitaha. “Logona hifo e au ko e tau vitiō ne fa e pelē e au mo e lahi he magaaho ne fakaaoga ke pelē ai kua fakamamao he tau mena ia au mai ia Iehova. Ka kua maō e loto haaku ke talia kua nakai hagaao e tau matapatu fakaakoaga he Tohi Tapu ki a au,” he ui e Daniel. Ko e fakaohooho galo he fakafiafiaaga kua mukamuka lahi ke fakatupu a tautolu ke maueue fakahaga e totō mau atu ha tautolu ke he kupu mooli. Ka tupu e mena ia, to liga fakahiku a tautolu ke galo e tau mena uho lahi ne foaki mai e Iehova ki a tautolu.

9. Ia 1 Timoteo 1:18, 19, ko hai ne fakatatai e Paulo a Timoteo ki ai?

⁹ Totou 1 Timoteo 1:18, 19. Fakatatai e Paulo a Timoteo ke he kautau ti tomatoma ki a ia ke ‘tau ai ke he tau mitaki.’ Ko e tau ia ne nakai ko e tau fakatino ka ko e tau fakaagaaga. Ke he tau puhala fe kua tatai e tau Kerisiano ke he tau kautau ne ō he tau? Ko e heigoa e tau mahani kua lata a tautolu ke feaki ko e tau kautau he Keriso? Kia fakatutala a tautolu ke he lima e fakaakoaga ka ako e tautolu mai he fakatai ha Paulo. Ko e tau fakaakoaga nei ka lagomatai a tautolu ke totō mau ke he kupu mooli.

10. Ko e heigoa e mahani Atua, ti ko e ha kua lata ke moua ai e tautolu?

¹⁰ Feaki e mahani Atua. Fakamooli e kautau mitaki. To tau fakamalolō a ia ke puipui e tagata ne fakaalofa a ia ki ai po ke taha mena ne tokiofa e ia. Fakamalolō e Paulo a Timoteo ke feaki e mahani Atua, kakano ko e pipiki fakamooli ke he Atua. (1 Timo. 4:7) Ko e hokulo he fakaalofa mo e fakamooli ha tautolu ma e Atua, to manako lahi a tautolu ke totō mau ke he kupu mooli.​—1 Timo. 4:8-10; 6:6.

11. Ko e ha kua lata a tautolu ke akonaki ne tautolu a tautolu?

¹¹ Feaki e aga ke akonaki e koe a koe. Lata e kautau ke akonaki e ia a ia ke fakatumau ke malolō ma e matagahua. Fakatumau a Timoteo ke malolō fakaagaaga he muitua e fakatonuaga omoomoi ha Paulo ke hola kehe mai he tau manako kelea, ka e tutuli e tau mahani Atua mo e lafi mo e tau matakainaga fakaagaaga. (2 Timo. 2:22) Ti lata ke moua e akonaki fakatagata. Lata a tautolu ke moua e aga akonaki ni he tagata a ia ke totoko e tau mahani agahala he tau tino ha tautolu. (Roma 7:21-25) Lafi ki ai, lata a tautolu ke akonaki ne tautolu a tautolu he eketaha tumau ke hiki e aga tuai ka e tapulu ke he aga foou. (Efeso 4:22, 24) Ka lolelole a tautolu he matahiku he aho loa, lata a tautolu ke fakamakamaka ke o atu he feleveiaaga.​—Hepe. 10:24, 25.

12. Ko e tau puhala fe ka fakaholo ki mua e tautolu e fakaaoga he Tohi Tapu?

¹² Lata e kautau ke fakamahani ke fakaaoga e tau kanavaakau haana. Ke iloa mitaki ke fakaaoga, lata a ia ke fakamahani tumau. Pihia foki kua lata a tautolu ke lotomatala he fakaaoga e Kupu he Atua. (2 Timo. 2:15) Fakaako e tautolu falu he tau puhala nei he tau feleveiaaga. Kaeke ke lagomatai e tautolu e falu ke talitonu ke he tau kupu mooli nei he Tohi Tapu, lata a tautolu ke fakaako fakatagata tumau e Tohi Tapu. Lata a tautolu ke fakaaoga e Kupu he Atua ke fakamalolō e tua ha tautolu. Nakai ko e totou hokoia ni he Tohi Tapu. Lata foki ke manamanatu fakahokulo ke he tau mena kua totou e tautolu mo e kumikumi e tau tohi ha tautolu ke maeke ke maama mooli ti fakagahua e tau Tohiaga Tapu. (1 Timo. 4:13-15) Maeke mogoia a tautolu ke fakaaoga e Kupu he Atua ke fakaako e  falu. Nakai ni ko e totou hokoia anei he tau kupu Tohi Tapu. Manako a tautolu ke lagomatai e tau tagata fanogonogo ha tautolu ke maama e tau kupu tohi mo e iloa e puhala ke fakagahua ai. He pipiki mau ke he fakaholoaga fakaako fakatagata he Tohi Tapu, to holo ki mua e maamaaga ha tautolu ke fakaaoga e Kupu he Atua ke fakaako e falu.​—2 Timo. 3:16, 17.

13. He manatu ia Heperu 5:14, ko e ha kua lata a tautolu ke fakailoilo?

¹³ Kia fakailoilo. Lata e kautau ke iloa ke mailoga e hagahaga kelea ti kalo kehe ai. Lata foki a tautolu ke fakaako ke mailoga e tau tuaga ka fakahagahaga kelea a tautolu ti fakamafiti ke kalo kehe he hagahaga kelea. (Fakatai 22:3; totou Heperu 5:14.) Tuga anei, lata a tautolu ke fifili fakailoilo e tau mena fakafiafia mo e tau fakafiafiaaga. Ko e tau tala mo e tau kifaga he TV kua fa fakakite e tau mahani feuaki. Ko e tau mahani pihia kua nakai fakafiafia e Atua mo e to fakahiku ke fakahagahaga kelea. Lata foki ke kalo kehe a tautolu he tau fakafiafiaaga ka fakalolelole fakahaga e fakaalofa ha tautolu ke he Atua.​—Efeso 5:5, 6.

14. Lagomatai fēfē he fakailoilo a Daniel?

¹⁴ Ko Daniel ne totoku fakamua, ne kamata ke mailoga ko e pelē he tau vitiō vale mo e fakatemoni ko e lekua. Kumikumi a ia ke he Watchtower Library ma e tau vala tala ke lagomatai a ia ke fehagai mo e lekua haana. Lauia fēfē a ia he mena nei? Nakai liu a ia pelē e tau vitiō kelea muitui. Fakaoti e ia e matutakiaga haana ke he tau pelē he initanete ti tiaki e ia e lafiaga mo e falu tagata pelē. Pehē a Daniel, “He nakai pelē vitiō, kamata au ke fai magaaho he taute e tau mena i fafo po ke fio mo e tau kapitiga haaku he fakapotopotoaga.” Kua eke a Daniel mogonei mo paionia mo e motua.

15. Ko e ha kua hagahaga kelea e tau tala fakavai?

¹⁵ Tuga a Timoteo, lata foki a tautolu ke mailoga e hagahaga kelea he tau vala tala fakavai ne fakaholofa he tau tagata tiaki taofiaga. (1 Timo. 4:1, 7; 2 Timo. 2:16) Ma e fakatai, liga lali a lautolu ke fakaholofa e tau tala fakavai hagaao ke he tau matakainaga ha tautolu po ke fakatupu e tau tuahā hagaao ke he fakatokatokaaga ha Iehova. Ko e tau vala tala fakavai pihia ka fakalolelole e tua ha tautolu. Lata a tautolu ke ua talitonu ke he tau fakaakoaga nei. Ko e ha? Ha ko e tau tala pihia ne fakaholofa “he tau tagata loto kelea, ko lautolu kua uta kehe ia lautolu e kupu moli.” Ko e foliaga ha lautolu ke  kamata e “taufetoko mo e tau vagahau kelea.” (1 Timo. 6:4, 5) Manako a lautolu ke talitonu e tautolu e pikopiko ia mo e fakatupu e tau tuahā kelea hagaao ke he tau matakainaga ha tautolu.

16. Ko e heigoa e tau fakatauhele kua lata ke kalo kehe a tautolu?

¹⁶ Kalo kehe he fakatauhele. Tuga e “tagata tau mitaki a Iesu Keriso,” hagaaki tumau a Timoteo ke he fekafekauaga ka e nakai fakatauhele a ia he tau foliaga po ke tau koloa fakatino. (2 Timo. 2:3, 4) Tuga a Timoteo, nakai lata a tautolu ke fakaatā ke fakatauhele he manako ke loga e tau koloa. Ko e “fakavai he koloa” ka fakaapitia ha tautolu a fakaalofa ki a Iehova, loto fakaaue ke he Kupu he Atua, mo e manako ha tautolu ke fakailoa ke he falu. (Mata. 13:22) Lata a tautolu ke fakamukamuka tumau e tau momoui mo e fakaaoga e magaaho mo e malolō ke tumau e “kumikumi fakamua . . . ke he kautu he Atua.”​—Mata. 6:22-25, 33.

17-18. Ko e heigoa ka taute e tautolu ke kalo kehe he hagahaga kelea fakaagaaga?

¹⁷ Kia mautauteute ke fakamafiti. Lata e kautau ke fitā he fai fakatokaaga ke he puhala ke puipui a ia. Kaeke ke puipui e tautolu e tau mena kua tuku mai e Iehova ki a tautolu, lata a tautolu ke fakamafiti ka kitia e tautolu e hagahaga kelea. Ko e heigoa ka lagomatai a tautolu ke tali fakamafiti? Lata a tautolu ke fitā he fai fakatokaaga ke he puhala ke fehagai mo e fakamatakutaku.

¹⁸ Ke fakatai, ka o atu ke he taha toloaga, fa tala age ke he tau tagata ke kumi e gutuhala ki fafo ato kamata e fakaholoaga. Ko e ha? Ke maeke a lautolu ke toka fakamafiti kaeke kua tupu taha mena fakaofo. He puhala taha, fakaako tuai e tautolu e puhala ki fafo ka fakaofo mai e tau fakatino he mahani feuaki, favale, po ke tau vala tala he tau tagata tiaki taofiaga he fakaaoga e Initanete po ke kitekite he kifaga po ke TV. Ka mautauteute a tautolu ke lata mo e mena ka tupu, to mafiti a tautolu ke puipui mai he hagahaga kelea fakaagaaga mo e fakatumau e meā ki mua ha Iehova.​—Sala. 101:3; 1 Timo. 4:12.

19. Ko e heigoa e tau monuina ka moua e tautolu he puipui e tau mena uho ne tuku mai e Iehova ki a tautolu?

¹⁹ Lata a tautolu ke puipui e tau mena uho lahi ne foaki mai e Iehova, ko e tau kupu mooli he Tohi Tapu mo e matagahua ke fakaako ai ke he falu. Ka taute pihia, to moua e tautolu e loto manamanatu meā, moui fai kakano mooli, mo e fiafia he lagomatai e falu ke iloa a Iehova. Ha ko e lagomatai Haana, to maeke a tautolu ke puipui e mena ne tuku mai ki a tautolu.​—1 Timo. 6:12, 19.