Kua totou fakamitaki nakai e koe e tau fufuta he tau nei he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

Lata ke fehagai fēfē a tautolu ke he tau Kerisiano fakauku?

Loto fakaaue a tautolu ke he tua ha lautolu; ka e nakai molea e manamanatu ha tautolu ki a lautolu. Kalo kehe a tautolu he ‘nava ke he tau tagata.’ (Iuta 16) Nakai hūhū e tautolu e tau hūhū fakatagata hagaao ke he amaamanakiaga ha lautolu.​—w20.01, lau 29.

Ko e heigoa kua talitonu a koe kua mailoga e Iehova a koe?

Fakakite he Tohi Tapu kua mailoga e ia a koe ato fanau mai a koe. Logona e ia e tau liogi haau. Iloa e ia e tau manatu haau mo e tau mena ne toka he loto haau, ti ko e tau gahua haau kua lauia a ia. (1 Nofo. 28:9; Fakatai 27:11) Futia mai e Iehova a koe ki a ia.​—w20.02, lau 12.

Ko e heigoa e tau fakataiaga he magaaho ke vagahau mo e magaaho ke nakai vagahau?

Fiafia a tautolu he tutala hagaao ki a Iehova. Vagahau hake a tautolu ka kitia e tautolu e taha kua fano he puhala hehē. Vagahau e tau motua ke foaki e fakatonu kaeke kua lata. Nakai vagahau a tautolu ke moua (po ke fakakite) e tau vala tala hagaao ke he gahua ha tautolu ne taute he tau motu kua pā. Nakai lata a tautolu ke talahau fakahanoa e tau vala tala.​—w20.03, lau 20-21.

Kehe fēfē e tau hē ia Ioelu veveheaga 2 mai he tau hē ia Fakakiteaga veveheaga 9?

Talahau ia Ioelu 2:20-29 kua uta fakamamao he Atua e tau hē mo e mavehe ke taui atu e tau mena ne moumou e lautolu. Mole ia, kua liligi hifo he Atua e agaaga haana. Fakamooli e tau vala ia he moumou e Papelonia a Isaraela he magaaho fakamui. Fakamaama ia Fakakiteaga 9:1-11 a lautolu ne fakauku ne tuga e tau hē he vahā ha tautolu kua fakailoa e lautolu e tau fakafiliaga he Atua ke he fakatokaaga kelea nei, ti nakai totoka mitaki a lautolu ne lalago ki ai.​—w20.04, lau 3-6.

Ko hai e patuiki he faahi tokelau mogonei?

Ko Rusia mo e tau kau ne lafi ki ai. Totoko e lautolu e tau tagata he Atua he pā malu e gahua fakamatala mo e fakakite e lautolu e vihiatia ke he Tau Fakamoli a Iehova. Kua fetoko e patuiki he faahi tokelau mo e patuiki he faahi toga.​—w20.05, lau 13.

Ko e hiva e aga ne tohi ia Kalatia 5:22, 23, ko e tau vala oti kia he “fua he Agaga”?

Nakai. Lagomatai he agaaga tapu a tautolu ke fakakite e falu aga mitaki, tuga e tututonu. (Efeso 5:8, 9)​—w20.06, lau 17.

Ko e heigoa e taha hagahagakelea he tuku hake e tau vala tala fakatagata he initanete?

Ko e mena ne tuku hake kua liga fakakite kua palau a koe hagaao ki a koe ti kua nakai fakatokolalo a koe.​—w20.07, lau 6-7.

Ko e heigoa ka fakaako he tau fekafekau Kerisiano mai he tau tagata takafaga lotomatala?

Gahua a lautolu he magaaho mo e matakavi kua liga moua e tau ika. Fakamahani a lautolu ke fakaaoga e tau koloa hako. Ti gahua malolō a lautolu he tau tuaga kua hiki. Maeke foki a tautolu ke taute pihia he gahua fakamatala ha tautolu.​—w20.09, lau 5.

Ko e heigoa falu puhala ka lagomatai e tautolu e tau tagata fakaako Tohi Tapu ke fakahokulo e fakaalofa ha lautolu ki a Iehova?

Fakamalolō e tautolu a lautolu ke totou e Tohi Tapu he tau aho takitaha mo e manamanatu fakahokulo ke he tau mena ne totou e lautolu. Ti fakaako e tautolu a lautolu ke liogi.​—w20.11, lau 4.

Ko hai ne putoia he talahauaga: “To pihia foki e fakamomoui mai oti kia Keriso”?​—1 Kori. 15:22.

Nakai talahau he aposetolo ko Paulo to fakaliu tu mai e tau tagata oti. Hagaao a ia ke he tau Kerisiano fakauku ko lautolu “kua fakatapu e Keriso Iesu.” (1 Kori. 1:2; 15:18)​—w20.12, lau 5-6.

Ko e heigoa ka taute e lautolu ne fakauku ka mole e ‘faliu he magaaho ke kemo ai e mata ka fakatagi e pu ke fakaoti ai’?​—1 Kori. 15:51-53.

To fakalataha foki a lautolu mo Keriso ke moumou e tau tagata aki e tokotoko lapatoa. (Fakakite. 2:26, 27)​—w20.12, lau 12-13.