KE HE molea e 3,000 tau kua mole, ne mailoga he tupuna ko Iopu e tau manu lele he lagi ne lahi e mena ne tala mai ki a tautolu hagaao ke he gahua lima he Atua. Ka ko e tau aga ha lautolu kua moua foki e tau fakaakoaga mitaki ma e tau fakataiaga. I loto he Tohi Tapu, ne lagaloga e hagaao ke he tau manu lele he lagi ne fakakite ki a tautolu e tau fakaakoaga aoga ke he moui mo e fakafetuiaga ha tautolu mo e Atua. To onoono a tautolu ke he falu fakataiaga.

Ne mahani e tau tagata ne nonofo i Ierusalema mo e tau pekapeka ne fa talaga e tau fata he tau matapoko i luga he fale. Ko e falu ne talaga e tau fata he faituga ha Solomona. Ti liga talaga he tau pekapeka e tau fata i loto he faituga he tau tau takitaha, ha ko e matakavi haohao mitaki ke feaki e tau punua ha lautolu mo e nakai fakatauhele.

Ko ia ne tohia e Salamo 84​—ko e taha he tau tama taane ha Koru, ne fekafekau he faituga he taha e faahi tapu he tau mahina ono oti​—kua kitia e tau fata ia he lotopā he faituga. Ne manako lahi a ia ke tuga e pekapeka ne fai kaina tumau i loto he fale ha Iehova, ti talahau e ia: “Iehova Sapaota na e, kua homo e mitaki he hāu a tau haeleaga. Kua manako lahi haku agaga mo e mate au he fia fina atu ke he tau lotopā a Iehova; . . . Ko e moli, kua moua he manu lele e fale, ko e pekapeka foki kua fai fata ke tuku ai hana tau punua, ko e hāu a tau fatapoa haia Iehova Sapaota na e, ko e haku a Patuiki mo e haku Atua.” (Salamo 84:1-3) Fakakite nakai e tautolu mo e tau fanau ha tautolu e manako mo e loto fakaaue pihia ke fakalataha tumau ke he fakapotopotoaga he tau tagata he Atua?​—Salamo 26:8, 12.

“Kua iloa ni he kasita he pulagi hana ni a vaha,” he tohia he perofeta ko Ieremia. Nakai noa kua mahani a ia ke he tau kasita ne felele ke he Motu he Maveheaga. He vahā mafana, molea 300,000 he tau kasita tea ne felele mai i Aferika ke o atu ki Europa Tokelau ke he hala he Pahua ko Ioritana. Ne tufuga pauaki a lautolu ke iloa e magaaho ke liliu ke he tau matakavi ha lautolu ke fanafanau he vahā mafana. Ke tuga e falu manu lele foki, “kua taofi e lautolu e vaha ke o mai ai a lautolu.”​—Ieremia 8:7.

“Kua ofoofogia mooli e puhala ne felele ai ha ko e iloilo pauaki,” talahau he Collins Atlas of Bird Migration. Foaki e Iehova ko e Atua ke he tau manu lele e iloilo pauaki ke iloa e tau vahā, ka e foaki e ia ke he tagata e pulotu ke iloa e tau vahā mo e tau magaaho. (Luka 12:54-56) Nakai tuga e iloilo he kasita, ko e lotomatala ke he Atua ko e matapatu ke iloa he tagata e uho lahi he tau mena tutupu he magahala kua nonofo ai a tautolu. Ko e tau Isaraela he vahā a Ieremia ne nakai mataala ke he tau fakamailoga pihia. Ne fakamaama he Atua e punaaga he lekua, he pehē:  “Kua tiaki e lautolu e kupu a Iehova; ti heigoa kia e iloilo ha ha ia lautolu?”​—Ieremia 8:9.

He vahā nei, kua loga e tau fakamooliaga kua nonofo a tautolu he vahā ne fakahigoa he Tohi Tapu “ko e tau aho fakamui.” (2 Timoteo 3:1-5) To fifitaki nakai a koe ke he kasita mo e mailoga ‘e vahā’?

Ko e aeto ne lagaloga e totoku he Tohi Tapu, ti kua ofogia e foliga he tino haana ne kitia tumau ke he Motu he Maveheaga. Ne lele mai e aeto he fata he mena tokoluga, ke “takahao atu a ia mai he mena ia ke he tau mena kai, kua kitia mamao atu ni he tau mata hana.” (Iopu 39:27-29) Ne maama lahi e tau mata he aeto ti maeke ke kitia e lāpiti ne taha e kilomita he mamao.

Tuga e aeto ne maeke ke “kitia mamao atu,” kua maeke a Iehova ke kitia mamao atu ke he vahā anoiha. Ati pehē a Iehova ko e Atua: “Kua talahau ai tali mai he kamataaga e tau mena fakamui; tali mai ne aho mua foki e tau mena nakaila eke.” (Isaia 46:10) He omaoma ke he fakatonuaga ha Iehova, to aoga a tautolu mai he haana a iloilo mua ue atu mo e kitia tuai.​—Isaia 48:17, 18.

Kua fakatatai foki he Tohi Tapu a lautolu ne falanaki ke he Atua ke he tau aeto: “Ko lautolu kua tatali kia Iehova, to fakafou ai ha lautolu a malolo; to o hake a lautolu ke he tau tapakau po ke tau aeto.” (Isaia 40:31) Ko e aeto ne fakapaagi he fakaaoga e tau matagi mafana. Ka moua he aeto e matagi mafana, ne fofola e ia haana a tau tapakau ti fakapaagi viko he matagi ia mo e hake fakahaga ki luga. Ne nakai falanaki e aeto ke he haana a malolō ke fakapaagi he fina atu ke he tau mena mamao. Pihia foki, ko lautolu kua falanaki ki a Iehova to kumi atu ki a ia ha kua mavehe a ia ki a lautolu ke foaki e “lahi ue atu he malolo.”​—2 Korinito 4:7, 8.

Nakai leva ato mate a Iesu, ne tū a ia ke onoono ke he maaga lahi ha Iutaia. “Ierusalema na e, Ierusalema na e, ko koe ne kelipopo e tau perofeta, mo e taulitimaka a lautolu ne fakafano atu kia koe,” he ui e ia. “Kua lagaloga he manako au ke fakapotopoto hau a tau fanau, tuga ne moa kua fakapulupulu hana tau punua ki lalo hifo he hana tau tapakau; ka e nakai mafai a mutolu!”​—Mataio 23:37.

Taha he tau logonaaga malolō lahi mahaki he tau manu lele ko e manako ke puipui e tau punua ha lautolu. Ko e tau manu lele ne fata i kelekele tuga e tau moa fifine, kua lata ke mataala tumau ke he tau hagahaga kelea. Ka kitia he moa e aeto ne lele i luga ne kaka a ia ke hataki, ti tafepoi fakamafiti e tau punua ke huhū he tau tapakau haana ke hao. Kua malu foki e tau punua i loto he tau tapakau haana mai he laātititi mo e uha lahi. Ne manako foki a Iesu ke foaki ke he tau tagata ne nonofo i Ierusalema e maluaga mo e puipuiaga fakaagaaga. He vahā nei, kua uiina e Iesu a tautolu ke omai ki a ia ke okioki ai mo e puipui mai he tau kavega mo e tau tupetupe he tau momoui ha tautolu he tau aho takitaha.​—Mataio 11:28, 29.

Mooli ai, kua loga lahi e tau mena ha tautolu ka fakaako mai he tau manu lele nei. He kitekite a koe ke he tau aga ha lautolu, lali ke manatu e tau fakatai he Tohi Tapu hagaao ki a lautolu. Kia lagomatai he pekapeka a koe ke loto fakaaue ke he fale ha Iehova ma e tapuakiaga. Kia onoono ke he Atua ma e amaamanakiaga ka taute a koe he fakapaagi tuga e aeto. Kia hau a koe ki a Iesu ke moua e kupu mooli fakaagaaga ke puipui a koe, tuga e moa fifine ne puipui haana tau punua. Mo e, kia fakamanatu he kasita ki a koe ke mataala tumau ke he aoga he tau mena tutupu he lalolagi ne fakamailoga aki e magahala ha tautolu.