“Kia Mataala”
“Kia Mataala”
“Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu.”—MATAIO 24:42.
1. Fefe e logonaaga he tau fekafekau kua leva ha Iehova hagaao ke he tau tau loga ha lautolu he fekafekauaga tukulele? Talahau e fakataiaga.
TOKOLOGA e tau fekafekau ha Iehova kua leva ne ako e kupu moli he magaaho ne ko e tau fuata tane mo e fuata fifine a lautolu. Tuga e tagata fakafua koloa ne moua e penina fakafua lahi mo e fakafua e tau mena oti hana ke moua mai aki, ti foaki he tau tagata fakaako Tohi Tapu makutu ia a lautolu ni mo e tukulele ha lautolu a tau momoui ki a Iehova. (Mataio 13:45, 46; Mareko 8:34) Fefe e logonaaga ha lautolu ne kua leva lahi e tatali ha lautolu ke maeke ke kitia e tau finagalo he Atua ka fakamoli ke he lalolagi? Nakai tokihala a lautolu! Kua talia a lautolu mo e Matakainaga A. H. Macmillan, he teitei molea e 60 e tau he fekafekau tukulele ke he Atua, ne pehe: “Ne fifili tuai e au ke fakatumau e tua haku. Kua taute ke aoga lahi e kakano he moui ki a au. Kua lagomatai agaia au ke fehagai mo e vaha anoiha mo e nakai matakutaku.”
2. (a) Ko e heigoa e fakatonuaga magaaho tonu ne foaki e Iesu ke he tau tutaki hana? (e) Ko e heigoa e tau huhu ka manamanatu a tautolu ki ai he vala tala nei?
2 Ai kua a koe? Pete ni e fiha e tau hau, manamanatu ke he tau kupu a Iesu: “Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu.” (Mataio 24:42) Ko e talahauaga mukamuka ia kua moua e kupu moli hokulo. Nakai iloa e tautolu e aho he Iki ka hau ke fakahoko e fakafiliaga ke he fakatokaaga kelea nei, ti nakai lata ia tautolu ke iloa. Ka kua lata ia tautolu ke momoui ke he puhala kaeke ke hau a ia, to nakai tokihala a tautolu. Hagaao ke he mena nei, ko e heigoa e tau fakafifitakiaga kua moua e tautolu he Tohi Tapu ka lagomatai a tautolu ke fakatumau e mataala? Fakatata fefe e Iesu e lataaga nei? Ti ko e heigoa e fakamoliaga kua ha ha ia tautolu he vaha nei kua fakamoli aki ko tautolu kua nonofo ke he tau aho fakahiku he lalolagi nakai mahani Atua nei?
Ko e Fakafifitakiaga Hataki
3. Tatai fefe e tau tagata tokologa he vaha nei ki a lautolu he vaha ha Noa?
3 He tau tutuaga loga, ko e tau tagata he vaha nei kua tuga e tau tagata tane mo e tau fifine ne nonofo he vaha ha Noa. He magahala ia ne puke e lalolagi ke he favale, mo e hagahaga he tau loto he tagata ti kua “kelea hokoia ni ke he tau aho oti kana.” (Kenese 6:5) Tokologa kua hufia ke he tau gahua he moui ke he tau aho takitaha. Ato ta mai e ia e Fakapukeaga lahi, ne age e Iehova ke he tau tagata e magaaho ke tokihala ai. Ne poaki e ia ki a Noa ke fakamatala, ti omaoma a Noa—he eke mo “ogo he tututonu” liga ke 40 po ke 50 e tau po ke molea atu. (2 Peteru 2:5) Pete ia, ne fakaheu he tau tagata e ogo he fekau a Noa. Nakai mataala a lautolu. Fakahikuaga, he mena ia, ko Noa ni mo e magafaoa hana ne hao mai he fakahoko e fakafiliaga ha Iehova.—Mataio 24:37-39.
4. Ke he puhala fe ne kua talahau ai e fekafekauaga a Noa ke kautu, ti tatai fefe e talahauaga taha ia ke he gahua fakamatala hau?
4 Kautu kia e fekafekauaga ha Noa? Ua fakatatai ke he numera tote ne talia. Ne fakamoli ni he fakamatalaaga ha Noa e matagahua ia pete ne nakai talia. Ko e ha? Ha kua foaki ke he tau tagata e magaaho lahi ke fifili ko e to fekafekau a lautolu ki a Iehova po ke nakai. Ka e kua e matakavi fakamatala hau? Pete ni e tote e taliaaga mitaki, kua lahi e kautuaga hau. Ko e ha? Ha ko e fakamatala, kua talahau e koe e ogo he Atua, ti kua fakamoli e koe e poakiaga ne foaki e Iesu ke he tau tutaki hana.—Mataio 24:14; 28:19, 20.
Fakaheu e Tau Perofeta he Atua
5. (a) Ko e heigoa e tau tutuaga ne tupu lahi i Iutaia he vaha a Hapakuka, ti tali fefe atu e tau tagata ke he fekau fakaperofeta hana? (e) Fakatata fefe he tau tagata i Iutaia e favale ke he tau perofeta a Iehova?
5 He tau senetenari he mole e Fakapukeaga, ko e kautu ha Iutaia ne fehagai mo e tuaga matematekelea lahi he tau gahua. Ko e tapuaki tupua, nakai fakafili tonu, favale, mo e pihia foki e kelipopo kua kitia mau. Ne fakatu e Iehova a Hapakuka ke ogo e tau tagata kaeke ke nakai fakatokihala a lautolu, to hoko mai e malaia lahi ki a lautolu ke he tau lima he tau tagata Kaletaia po ke tau Papelonia. (Hapakuka 1:5-7) Ka e fakaheu e tau tagata ke fanogonogo. Liga manatu a lautolu, ‘Kua molea tuai e tau teau tau i tuai, ne talahau he perofeta ko Isaia e ogo taha ia, ka e nakai la fai mena kua tutupu!’ (Isaia 39:6, 7) Tokologa e tau takitaki ha Iutaia ne nakai ni omaoma ke he ogo ka e favale atu foki ke he tau tagata uta fekau. He taha magaaho, ne lali a lautolu ke tamate e perofeta ko Ieremia, ti kautu a lautolu kakano ha ko e fakalavelave mai ha Aikamo. He ita foki ke he taha ogo fakaperofeta, ne kelipopo he Patuiki ko Iehoakima e perofeta ko Uria.—Ieremia 26:21-24.
6. Fakamalolo fefe e Iehova a Hapakuka?
6 Ko e ogo ha Hapakuka ne tatai e malolo mo e kua nakai talahaua foki ni pihia tuga ha Ieremia, ne kua omoomoi he agaga faka-Atua ke talahau tuai e 70 tau he moumouaga ha Iutaia. (Ieremia 25:8-11) Ko e mena ia, kua maama e tautolu e tupetupe ha Hapakuka he tagi atu a ia: “Iehova na e, ke ui atu au kia koe ato a fe, ka e nakai fanogonogo mai a koe? Kua tagi atu ai au kia koe ha ko e favale, ka e nakai fakamoui mai e koe.” (Hapakuka 1:2) Ne tali fakaalofa e Iehova a Hapakuka aki e tau kupu ati hake nei ke he tua: “Ha kua tuku mai e fakakiteaga mo e hana tau aho ne kotofa, kua alumaki foki a ia ke hoko ke he fakahikuaga, to nakai pikopiko a ia; pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.” (Hapakuka 2:3) Ha ha ia Iehova e “tau aho ne kotofa” ke fakahiku e nakai fakafili tonu mo e vale. Ka e he tuga e mule mai, ne nakai fakalolelole a Hapakuka, po ke fakamanou hifo a ia. Ka kua “tatali atu ki ai” a ia, he moui ai ke he tau aho takitaha mo e manamanatuaga he fakamafiti. Nakai mule mai e aho ha Iehova!
7. Ko e ha ne fakatoka ai foki taha moumouaga ki Ierusalema he senetenari fakamua V.N.?
7 Kavi ke he 20 e tau he mole e vagahau a Iehova ki a Hapakuka, ko e maaga lahi a Iutaia, ko Ierusalema, ne moumou ai. Nakai leva ti liu atihake, ti fakahakohako ai e tau hepehepe loga ne kua fakatupetupe aki a Hapakuka. He senetenari fakamua V.N., ne liu foki e maaga hokotia ke he moumouaga ha ko e nakai mahani tua fakamoli he tau tagata i ai. Fakaalofa hofihofi ai, ne fakatokatoka e Iehova ma lautolu ne loto hako e fakahaoaga. He magaaho nei, ne fakaaoga e ia e perofeta ne mua atu ko Iesu Keriso ke talahau e fekau. He 33 V.N., ne tala age a Iesu ke he tau tutaki hana: “Ka kitia e mutolu kua pātakai a Ierusalema he tau kau, ti iloa ai e mutolu ke he vaha ia kua tata hana moumouaga. Ko e vaha ia, kia fehola a lautolu ha i Iutaia ke he tau mouga.”—Luka 21:20, 21
8. (a) Ko e heigoa ka hoko ke he falu Kerisiano he magaaho ne mole e mate ha Iesu? (e) Ne fakamoli fefe e tau kupu fakaperofeta a Iesu hagaao ki Ierusalema?
8 He mole ai e tau tau, ne manamanatu falu Kerisiano i Ierusalema ke he magaaho ka fakamoli e perofetaaga ha Iesu. Mole ia, manamanatu la ke he tau poa ne taute moli he falu ia lautolu. Liga ne nakai talia e lautolu e gahua futia lahi ha ko e fifiliaga ke fakatumau e mataala. He mole atu fakahaga e magaaho ia, kua lolelole kia a lautolu? Kua fakaoti kia e lautolu na moumou magaaho a lautolu, manatu ai ko e tau kupu a Iesu ne hagaao ni ke he atuhau anoiha, nakai ki a lautolu? He 66 V.N., ne kamata e perofetaaga a Iesu ke fakamoli he magaaho ne patakai he kau Roma a Ierusalema. Ko lautolu ne fakatumau ke mataala ne mailoga e fakakiteaga, ne fehola kehe mai he maaga, ti hao mai he moumouaga ha Ierusalema.
Fakatata e Lata ke Mataala
9, 10. (a) To fakakatoatoa fefe e koe e fakataiaga a Iesu ke he tau tupa ne tatali ke he iki ha lautolu ka liu mai he fakamauaga hana? (e) Liga kua uka he ha e tau tupa ke fakatali ke he iki ha lautolu? (i) Ko e aoga he ha ma e tau tupa ke fakauka?
9 He peehi e lata ke mataala, ne fakatatai e Iesu hana tau tutaki ke he tau tupa ne leo ke he iki ha lautolu ke liu mai he fakamauaga hana. Ne iloa e lautolu to liu mai a ia he po pauaki—ka e he matahola fiha? Kau ke he leoleoaga fakamua he po? Ke he ua aki? Ke he tolu aki? Ne nakai iloa e lautolu. Ne talahau e Iesu: “Kaeke ke hau [e iki] ke he leoleoaga ne ua he po, po ke hau ke he leoleoaga ne tolu he po, ka moua a lautolu ka kua [mataala] uhoaki e tau fekafekau ia.” (Luka 12:35-38) Manamanatu la ke he amaamanakiaga he tau tupa nei. Ko e tau leo oti, ko e ha mamalu ka fakatokoluga moli aki e tatali ha lautolu: ‘Ko e iki kia ha mautolu anei?’
10 Ka e kua ka hau e iki ke he leoleoaga ne ua he po, ne kua toho loa atu ke he matahola hiva atu ke he tuloto po? To mautali oti kia e tau tupa, fakalataha mo lautolu ne gahua fakamalolo tali mai he magaaho pogipogi ke feleveia mo ia, po ke momohe agaia falu? Ai kua ka liu mai e iki he leoleoaga ne tolu he po—ko e magahala he tuloto po ke he matahola tolu he magaaho pogipogi? To fakalolelole kia falu tupa, ti hogohogo manava foki ke he iki ha lautolu ha kua tuga e mule? * Ko lautolu ni ne moua hane mataala ka hau e iki ka talahaua ke fiafia. Ki a lautolu, ko e tau kupu he Tau Fakatai 13:12 kua aoga moli: “Kua mule e amaamanaki ti mamahi ai e loto; ka ko e manako kua hoko, ko e akau he moui haia.”
11. Maeke fefe e liogi ke lagomatai a tautolu ke fakatumau ke mataala?
11 He magahala kua tuga e mule, ko e heigoa ka lagomatai e tau tutaki a Iesu ke mataala? He ha ha he katene ko Ketesemane nakai leva ato hoko hana tapaki, ne tala age a Iesu ke he tau aposetolo tokotolu hana: “Kia mataala a mutolu mo e liogi, neke hoko mai e kamatamata kia mutolu.” (Mataio 26:41) He tau hake, ne ha ha i ai a Peteru he fakalatahaaga ia, ne foaki e tomatomaaga pihia ke he tau matakainaga Kerisiano. Ne tohi e ia: “Kua tata mai tuai e fakatulakiaga he tau mena oti; hanai, kia nonofo fakalatalata a mutolu mo e mautali mo e liogi.” (1 Peteru 4:7) Maaliali ai, ko e liogi nakai noa kua lata mo vala he fakaholoaga tumau Kerisiano ha tautolu. Moli, kua lata ia tautolu ke ole mau ki a Iehova ke lagomatai a tautolu ke fakatumau ke mataala.—Roma 12:12; 1 Tesalonia 5:17.
12. Ko e heigoa e kehekehe he tuaha noa mo e mataala?
12 Mailoga na pehe foki a Peteru: “Kua tata mai tuai e fakatulakiaga he tau mena oti.” Tata fefe? Nakai fai puhala ma e tau tagata ke talahau fakatonu e aho mo e magaaho. (Mataio 24:36) Ka e ha ha i ai e kehekehe he hufia ke he tuaha noa, ne kua nakai fakamalolo he Tohi Tapu, mo e fakatumau ke tatali atu ke he fakaotiaga, ne kua fakamalolo mai ai. (Fakatatai 2 Timoteo 4:3, 4; Tito 3:9.) Ko e heigoa taha puhala ke fakatumau a tautolu ke tatali atu ke he fakaotiaga? Ko e onoono fakatata atu ke he fakamoliaga kua tata mai e fakaotiaga. Ko e mena ia kua lata ia tautolu ke liu fakamanatu e tau fakamoliaga ono ke fakamoli aki ko tautolu kua nonofo ke he tau aho fakahiku he lalolagi nakai mahani Atua nei.
Ono e Talahauaga Fakalagalaga he Fakamoliaga
13. Fakamoli fefe he perofetaaga ha Paulo ne fakamau ia 2 Timoteo veveheaga 3 ki a koe kua nonofo a tautolu he “tau aho fakamui”?
13 Fakamua, kua kitia maaliali e tautolu e fakamoliaga he perofetaaga he aposetolo ko Paulo hagaao ke he “tau aho fakamui.” Ne tohi e Paulo: “Ko e tau aho fakamui to hohoko mai ai e tau aho uka. Ha ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, to nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, to afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua; to ha i ai ia lautolu e gati he mahani Atua, ka kua tiaki e lautolu e malolo ne toka ai; kia kalo kehe a koe mo e tau tagata pihia. Ka ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.” (2 Timoteo 3:1-5, 13) Nakai kia kitia e tautolu e perofetaaga nei kua fakamoli he vaha ha tautolu? Ko lautolu ni ne fakaheu e tau fakamoliaga ka fakatikai ai! *
14. Fakamoli fefe he vaha nei e tau kupu he Fakakiteaga 12:9 hagaao ke he Tiapolo, ti ko e heigoa ka nakai leva ti tupu ki a ia?
14 Ua aki, kua kitia e tautolu e tau lauiaaga he liti hifo a Satani mo e hana tau temoni mai he lagi, he fakamoliaga he Fakakiteaga 12:9. Ne totou e tautolu i ai: “Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.” Fakahiku ai, kua malaia lahi e lalolagi. Moli, ha ha i ai lahi e malaia ma e tau tagata, mua atu ke he 1914. Ka kua lafi he perofetaaga he Fakakiteaga he magaaho ne liti hifo e Tiapolo ke he lalolagi, kua iloa e ia “kua tote hana vaha.” (Fakakiteaga 12:12) Ke he magahala nei, kua felatauaki a Satani mo e tau tutaki fakauku he Keriso. (Fakakiteaga 12:17) Kua kitia moli e tautolu e tau lauiaaga he hana favale he vaha ha tautolu. * Tata mai, mogoia, to fakamau a Satani ke he pahua ke “nakai tuai fakahehe e ia e tau motu.”—Fakakiteaga 20:1-3.
15. Foaki fefe he Fakakiteaga 17:9-11 e fakamoliaga kua nonofo a tautolu ke he vaha he fakaotiaga?
15 Ke tolu aki, kua nonofo a tautolu he vaha he “patuiki” ke valu mo e fakahiku aki ne talahau he perofetaaga ne fakamau he Fakakiteaga 17:9-11. Kua tutala e aposetolo ko Ioane he mena nei ke he tau patuiki tokofitu, kua hukui e tau malolo ne fitu he lalolagi ko—Aikupito, Asuria, Papelonia, Metai-Peresia, Heleni, Roma, mo Igilani-Amerika ko e malolo fakapiki ua he lalolagi. Kua kitia foki e ia e ‘patuiki ke tokovalu’ mai “he tokofitu.” Ko e patuiki nei ke valu aki—ko e fakahiku aki ne kitia e Ioane—kua hukui mogonei e Tau Motu Kaufakalataha. Kua pehe a Ioane ko e patuiki nei ke valu aki ‘kua fina atu foki ke he malaia,’ ka mole atu ti nakai fai patuiki foki he lalolagi ka hukui. *
16. Fakakite fefe he tau fakamoliaga he tupua he miti a Nepukanesa kua nonofo a tautolu he tau aho fakamui?
16 Ke fa aki, kua nonofo a tautolu ke he magahala ne fakamailoga he tau tauuluhui he tupua he miti ha Nepukanesa. Ne fakahokohoko he perofeta ko Tanielu e miti ofoofogia nei he tupua lahi mahaki kua tuga e tagata. (Tanielu 2:36-43) Ko e fa e vala lapatoa he tupua nei kua hukui e tau malolo kehekehe he lalolagi, kamata mai he ulu (ko e Pule he Lalolagi a Papelonia) ti hoko hifo ke he tau tauuluhui mo e tau matahui (ko e tau fakatufono hane pule he vaha nei). Ko e tau pule oti he lalolagi ne hukui he tupua ia kua fita he kitia ai a lautolu. Kua nonofo a tautolu he magahala ne fakamailoga he tau tauuluhui he tupua. Nakai talahau mai falu malolo ka hohoko mai. *
17. Foaki fefe he gahua fakamatala he Kautu ha tautolu e falu fakamoliaga kua nonofo a tautolu ke he tau aho he fakaotiaga?
17 Lima aki, kitia e tautolu e gahua fakamatala he lalolagi katoa kua fakamoli, ne kua talahau e Iesu to fakahoko ato fakaoti e fakatokaaga nei. Ne talahau e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) He vaha nei, ko e perofetaaga ia kua puhala he fakamoliaga ke he fuafuaaga lahi mahaki. Moli, kua ha ha agaia e tau matakavi ne nakai la gahua ia, ti liga ke he magaaho ni a Iehova, to hafagi e gutuhala lahi mahaki ke he matagahua mahaki. (1 Korinito 16:9) Moha ia, kua nakai fakakite mai he Tohi Tapu to fakatali a Iehova ke moua he tau tagata takitokotaha he lalolagi e fakamatalaaga fakatagata. Ka ko e gahua fakamatala kua lata ke fakamatala ke he manako ha Iehova. Ati hoko mai ai e fakaotiaga.—Fakatatai Mataio 10:23.
18. Maaliali ai, ko e heigoa ka moli ke he falu ia lautolu kua fakauku ka kamata e matematekelea kua lahi ti liga fifili fefe e mena nei?
18 Ono aki, ko e numera he tau tutaki fakauku moli he Keriso kua to hifo, ka to fai agaia ni ka ha ha ke he lalolagi ka kamata e matematekelea lahi. Laulahi a lautolu ne toe kua momotua lahi, ti ke he tau tau loga ko e numera ha lautolu kua fakauku moli kua tote fakahaga. Ka e, he hagaao ke he matematekelea lahi, ne talahau e Iesu: “Aua he fakaku e vaha ia, po kua nakai fakamoui taha; ka e fakaku e vaha ia ha ko lautolu kua fifili.” (Mataio 24:21, 22) Moli ai, ko e falu ia “lautolu kua fifili” ha Keriso kua ha ha agaia ke he lalolagi ka kamata e matematekelea lahi. *
Ko e Heigoa kua Fakatoka Mai Anoiha?
19, 20. Ko e ha kua fakamafiti lahi ma tautolu mogonei ke matakite tumau mo e fakatumau ke mataala?
19 Ko e heigoa kua fakatoka mai he vaha anoiha ma tautolu? Ko e tau magaaho fiafia kua nakai la hohoko mai ia. Kua hataki e Paulo “ko e aho he Iki, to hoko mai ia ke tuga e kaiha ke he po.” Hagaao ke he tau tagata kua kitia ai ke pulotu fakalalolagi, ne talahau a ia: “Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava.” Ti, fakamafana e Paulo hana tau tagata totou: “Aua neke momohe a tautolu tuga ne falu, ka kia mataala a tautolu mo e nonofo fakalatalata.” (1 Tesalonia 5:2, 3, 6) Moli, ko lautolu kua ono ke he tau fakatuaga he tagata ke ta mai e mafola mo e nakai haofia kua fakaheu e mouiaga moli. Kua pulumohea e tau tagata pihia!
20 Ko e moumouaga he fakatokaaga nei ka hoko mai fakalutukia. Ko e mena ia, fakatumau e tatali ke he aho a Iehova. Kua tala age ni he Atua ki a Hapakuka: “Nakai mule mai!” Moli, nakai la pihia ia ha mena ke fakamafiti lahi a tautolu ke fakatumau e mataala.
[Tau Matahui Tala]
^ para. 10 Kua nakai fai maveheaga e iki ke he hana tau tupa. Ti nakai lata ia ia ke fakamaama hana hau mo e fano, po ke lata ia ia ke tala age ke he tau tupa hana e kakano he tuga ke mule.
^ para. 13 Ma e fakatutalaaga fakamatafeiga he perofetaaga nei, kikite e veveheaga 11 he tohi Iloilo ne Takitaki Atu ke he Moui Tukulagi, ne lomi fakailoa he Watchtower Bible and Tract Society of New York, Inc.
^ para. 14 Ma e falu vala tala, kikite e tau lau tohi 180-6 he tohi Revelation—Its Grand Climax At Hand!, lomi fakailoa he Watchtower Bible and Tract Society of New York, Inc.
^ para. 15 Kikite Revelation—Its Grand Climax At Hand!, tau lau tohi 251-4.
^ para. 16 Kikite e veveheaga 4 he tohi Pay Attention to Daniel’s Prophecy!, lomi fakailoa he Watchtower Bible and Tract Society of New York, Inc.
^ para. 18 He fakataiaga he tau mamoe mo e tau koti, ko e Tama he tagata ka hau ke he lilifu hana he magahala he matematekelea lahi mo e fakahoko e fakafiliaga. Kua fakafili e ia e tau tagata ko e mena foaki nakai e lautolu e lagomataiaga ke he tau matakainaga fakauku he Keriso. Ko e tuaga nei ma e fakafiliaga kua nakai aoga kaeke ke he magaaho ia he fakafiliaga, kua tigahau e toka he tau matakainaga oti he Keriso e takaiaga he lalolagi.—Mataio 25:31-46.
Manatu Nakai e Koe?
• Ko e heigoa e tau fakataiaga faka-Tohiaga Tapu ka lagomatai a tautolu ke fakatumau ke mataala?
• Fakatata fefe e Iesu e lata ma e mataala?
• Ko e heigoa e tau talahauaga ono he fakamoliaga kua fakakite kua nonofo a tautolu he tau aho fakamui?
[Tau Huhu he Fakaakoaga]
[Tau Fakatino he lau 5]
Ko A. H. Macmillan ne fekafekau tua fakamoli ki a Iehova ke teitei ono e hogofulu tau
[Fakatino he lau 6]
Ne fakatatai e Iesu hana tau tutaki ke he tau tupa kua fakatumau ke mataala