“Kia Kumi ki a Iehova mo e Hana Malolo”

“Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”—2 NOFOAGA HE TAU PATUIKI 16:9.

1. Ko e heigoa e malolo, ti fakaaoga fefe ai he tau tagata?

MALOLO kua maeke ke loga e kakano, tuga ko e taha mena ko e pule, po ke fakaohoohoaga ki luga he falu; ko e lotomatala ke taute po ke fakatupu e lauiaaga; malolo fakatino; po ke malolo ke he manamanatuaga po ke tau mahani. Kua nakai ha ha he tau tagata e fakamauaga mitaki he magaaho ka fakahoko ai e malolo. Ne talahau he tagata he fakamauaga tuai ko e Iki ko Acton, ne vagahau hagaao ke he malolo ne ha ha he tau tagata politika: “Kua hagahaga e malolo ke nakai fakamoli mo e malolo ne mua atu kua mua atu he nakai fakamoli.” Kua puke e fakamauaga he vaha fou nei he tau fakafifitakiaga ne fakakite e laulahi he moli he tau kupu he Iki ko Acton. He magahala he senetenari ke 20 aki, “kua pule ai e taha tagata ke he taha, ke kelea ai e ia ni” ke mua atu ke he vaha i tuai. (Fakamatalaaga 8:9) Ko e tau tagata pule kelea nakai fakamoli kua fakaaoga kelea muitui e malolo ha lautolu ti kua tamate ai e miliona he tau momoui. Ko e malolo ne tokanoa, nakai fai fakaalofa, pulotu, mo e fakafili tonu kua hagahaga kelea.

2. Fakamaama ko e fakalauia fefe he falu fua faka-Atua e puhala ne fakaaoga e Iehova hana malolo?

² Nakai tatai mo e tau tagata tokologa, ne fakaaoga tumau he Atua hana malolo ma e mitaki. “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.” (2 Nofoaga he Tau Patuiki 16:9) Kua fakaaoga e Iehova hana malolo ke he puhala kua lata. Ne fakatuai he mahani fakauka e fakahalaaga he Atua ki a lautolu ne mahani kelea ke fai magaaho a lautolu ke tokihala. Ne omoi he fakaalofa a ia ke fakakikila e la ke he tau tagata oti—kua tututonu mo e nakai tututonu. To omoi he fakafili tonu a ia ke fakahiku ke fakaaoga hana malolo mua ue atu ke fakaoti aki a ia ne toka ai e kautu ke mate ai, ko Satani ko e Tiapolo.—Mataio 5:44, 45; Heperu 2:14; 2 Peteru 3:9.

3. Ko e ha ne kua eke e malolo mua ue atu he Atua mo kakano ke falanaki ki a ia?

³ Ko e malolo ofoofogia lahi he Matua ha tautolu he lagi ko e kakano ke falanaki mo e mauokafua—ke he tau maveheaga hana mo e ke he hana puipuiaga. Kua logona he tama tote e puipui mai he tau tagata kehe he magaaho ka toto e ia e lima he hana matua tane, ha kua iloa e ia to nakai toka he hana matua a ia ke matematekelea. Tuga a ia, ko e Matua ha tautolu he lagi, ko ia ne puke he “malolo ke fakamoui,” ka puipui a tautolu mai he ha matematekelea ka fakatauo a tautolu mo ia. (Isaia 63:1; Mika 6:8) Mo e, ko e Matua mitaki, ne fakamoli tumau e Iehova hana tau maveheaga. Ko e malolo nakai fakakaupa hana kua fakamoli mai ko e hana ‘kupu to monuina foki ia ke he mena ne fakafano atu ai e ia.’—Isaia 55:11; Tito 1:2.

4, 5. (a) Ko e heigoa e fua he magaaho ne falanaki katoatoa e Patuiki ko Asa ki a Iehova? (e) Ko e heigoa ka liga tupu kaeke kumi e tautolu e tau tali mai he tagata ke he tau mena vihi ha tautolu?

⁴ Ko e ha kua aoga lahi ai ki a tautolu ke mataala tumau ke he puipuiaga he Matua ha tautolu he lagi? Ha kua maeke ke lofia ai he tau tutuaga mo e nimo e mena ne toka ai e puipuiaga moli ha tautolu. Kua kitia e mena nei ke he Patuiki ko Asa, ko e tagata tane ne fa falanaki ki a Iehova. He magahala he pule a Asa, ne keli mo e fofo he kau malolo totou miliona ha Aitiope a Iuta. Mailoga ai kua to mitaki e taha fahi he tau fi hana, ne liogi a Asa: “Iehova na e, ko koe ni hoko koe ke lagomatai ke he tau tagata tokologa, po ko lautolu kua nakai fai malolo. Iehova na e, ha mautolu a Atua, kia lagomatai mai a kia mautolu; ha kua falanaki a mautolu kia koe, kua o atu ni a mautolu ke he hau a higoa ke tau mo e motu o tagata tokologa na. Iehova na e, ko koe ni ko e Atua ha mautolu; aua  neke kautu mai e tau tagata kia koe.” (2 Nofoaga he Tau Patuiki 14:11) Ne talia e Iehova e ole ha Asa mo e foaki ki a ia e kautu katoatoa.

⁵ Ka e he mole atu e tau tau loga he fekafekauaga fakamoli, ne lolelole e mauokafua ha Asa ke he malolo fakamoui a Iehova. Ke puipui mai he fakamatakutaku he tau kautau he kautu he fahi tokelau a Isaraela, ne ole lagomatai a ia ki a Suria. (2 Nofoaga he Tau Patuiki 16:1-3) Pete ni, ha ko e mena fakaalofa hana ke he patuiki Suria ko Penihata ati fakaholo atu ai e fakamatakutaku he tau Isaraela ki Iuta, ko e maveheaga a Asa mo Suria kua fakakite e nakai mauokafua ki a Iehova. Ne huhu fakahako age a Hanani ko e perofeta ki a ia: “Nakai kia ko e kau lahi e tau tagata Aitiope mo e tau tagata Lipua, ha ha i ai e tau kariota, mo e kau heke solofanua ko e loga lahi ni? Ka e tuku mai a lautolu ke he tau lima hau, he falanaki a koe ki a Iehova.” (2 Nofoaga he Tau Patuiki 16:7, 8) Pete ni ia, ne fakaheu e Asa e akonakiaga nei. (2 Nofoaga he Tau Patuiki 16:9-12) Ti ka fehagai mo e tau mena vihi, kia nakai kumi e tautolu e tau tali mai he tau tagata. Ka e, kia fakatata e tautolu e mauokafua ke he Atua, ha ko e mena ke falanaki ke he malolo he tau tagata ka fakataki atu ke he fakaloleloleaga.—Salamo 146:3-5.

Kumi e Malolo ne Foaki e Iehova

6. Ko e ha kua lata ia tautolu ke ‘kumi kia Iehova mo e hana malolo’?

⁶ Maeke ia Iehova ke foaki e malolo ke he hana tau fekafekau mo e puipui foki a lautolu. Ne fakamafana he Tohi Tapu a tautolu ke ‘kumi kia Iehova mo e hana malolo.’ (Salamo 105:4) Ko e ha? Kakano ka taute e tautolu e tau mena ha ko e malolo he Atua, to fakaaoga e malolo ha tautolu ma e mitaki, nakai ke fakahagahaga kelea, ke he falu. Nakai fai mena foki ke moua e tautolu e fakafifitakiaga mitaki lahi he mena nei ka ki a Iesu Keriso ni, ne kua taute e tau mana he ‘malolo he Iki.’ (Luka 5:17) Kua maeke ia Iesu ke tukulele ne ia a ia ke maukoloa, mahuiga, po ke eke mo patuiki malolo ue atu. (Luka 4:5-7) Ka kua fakaaoga ni e ia e malolo ne age he Atua ki a ia ke fakamahani mo e fakaako, ke lagomatai mo e ke fakamalolo. (Mareko 7:37; Ioane 7:46) Ko e fakafifitakiaga mitaki ha ia ma tautolu!

7. Ko e heigoa e fua aoga ne feaki e tautolu he magaaho ka taute e tautolu e tau mena ke he malolo he Atua ka e nakai ke he ha tautolu ni?

⁷ Mua atu foki, ka taute e tautolu e tau mena “ke he malolo kua foaki mai he Atua,” to lagomatai he mena nei a tautolu ke tumau ke mahani fakatokolalo. (1 Peteru 4:11) Ko e tau tagata ne kumi malolo ma lautolu ni kua ohooho. Kia fakatai ke he patuiki Asuria ko Esarata, ne fakaikaluga: “Kua malolo au, kua malolo lahi au, ko e toa au, kua lahi mahaki au, kua mua ue atu au.” Ke he taha fahi, ne ‘fifili e Iehova e tau mena lolelole he lalolagi ke fakama ai e tau mena malolo.’ Ha ko e mena nei, ka hula e Kerisiano moli, kua hula a ia ki a Iehova, he iloa e ia ko e mena ne taute e ia kua nakai fakamoli ai ha ko e malolo ni hana. ‘Ke fakatokolalo ai a tautolu ki lalo he lima malolo he Atua’ ka ta mai e fakamatalahi moli.—1 Korinito 1:26-31; 1 Peteru 5:6.

8. Ko e heigoa kua lata ia tautolu ke taute mua ke moua ai e malolo a Iehova?

⁸ Maeke fefe a tautolu ke moua e malolo he Atua? Ke fakamua aki, kua lata ia tautolu ke ole ma e malolo ia he liogi. Ne fakamoli age a Iesu ke he hana tau tutaki to foaki he hana Matua e agaga tapu ki a lautolu ne ole ki ai. (Luka 11:10-13) Kia mailoga e puhala ne fakapuke he mena nei e tau tutaki he Keriso aki e malolo he magaaho ne fifili a lautolu ke omaoma ke he Atua ka e nakai ke he tau takitaki lotu ne poaki ki a lautolu ke fakaoti e fakamatala hagaao ki a Iesu. He magaaho ne liogi a lautolu ma e lagomatai a Iehova, kua tali fakamoli ha lautolu a liogi, mo e foaki he agaga tapu e malolo ki a lautolu ke fakatumau ke fakamatala  e tala mitaki mo e fakamalolo.—Gahua 4:19, 20, 29-31, 33.

9. Fakahigoa e punaaga ke ua aki he malolo mai he Tohi Tapu, mo e talahau taha fakafifitakiaga faka-Tohiaga Tapu ne fakakite hana lauia mitaki.

⁹ Ke ua aki, kua lata ia tautolu ke moua e malolo fakaagaga mai he Tohi Tapu. (Heperu 4:12) Ko e malolo he kupu he Atua kua kitia maali he vaha he Patuiki ko Iosia. Pete ni kua fita he fakamea mai he patuiki Iutaia nei e tau tupua ta he motu, ko e mouaaga he Fakatufono a Iehova i loto he faituga ne omoi a ia ke fakalaulahi ki mua e fakaholoaga fakamea nei. * He mole e totou age e Iosia e Fakatufono ke he tau tagata, ne taute he motu katoa e maveheaga mo Iehova, ati kamata ai e matagahua ne malolo lahi, ke ua aki ke he tapuaki tupua. Ko e lauia mitaki he fakafouaga a Iosia ha kua “nakai o kehe a lautolu he tau aho oti hana he mumui atu a lautolu kia Iehova ko e Atua.”—2 Nofoaga he Tau Patuiki 34:33.

10. Ko e heigoa e puhala ke tolu aki ke moua e malolo mai ia Iehova, mo e ko e ha kua lata ai?

¹⁰ Ke tolu aki, kua moua e tautolu e malolo mai ia Iehova ha ko e feoaki faka-Kerisiano. Ne fakamafana e Paulo e tau Kerisiano ke o tumau ke he tau feleveiaaga ke “fakalagalaga ai e fakaalofa mo e tau gahua mitaki” mo e ke fefakamafanaaki. (Heperu 10:24, 25) He magaaho ne fakatoka fakamana mai a Peteru he fale puipui, ne manako a ia ke fakalataha mo e tau matakainaga hana, ti fina atu hako ke he fale he matua fifine ha Ioane Mareko, ne “fakapotopoto ai e tokologa kua liogi.” (Gahua 12:12) Moli, kua maeke foki ia lautolu ke nonofo ni he tau kaina mo e liogi. Ka kua fifili a lautolu ke fakapotopoto auloa ke liogi mo e fefakamafanaaki he magahala uka ia. Kua teitei oti e fano fenoga loa mo e hagahaga kelea ha Paulo ki Roma, ne feleveia a ia mo e falu matakainaga i Puteoli mo e falu ne fenoga mai ke feleveia mo ia he mogo fakamui. Fefe a ia? “Kua kitia atu e Paulo a lautolu [ne totoku fakamui], ati fakaaue ai ke he Atua, mo e fakamanavalahi a ia.” (Gahua 28:13-15) Kua fakamalolo a ia he liu fakalataha mo e tau katofia Kerisiano. Moua foki e tautolu e malolo mai he feoaki mo e tau katofia Kerisiano. Ha kua tokanoa a tautolu mo e maeke ke feoaki, kia lali a tautolu ke nakai o takitokotaha he hala lautote ke pu atu ke he moui.—Tau Fakatai 18:1; Mataio 7:14.

11. Totoku falu tutuaga ne kua lata lahi mo e ‘malolo lahi ue atu.’

¹¹ He puhala he liogi tumau, kumikumi ke he Kupu he Atua, mo e feoaki mo e tau katofia talitonu, ke “fakamalolo a [tautolu] ke he Iki ke he malolo he hana mana.” (Efeso 6:10) Kua lata moli mo tautolu oti e ‘malolo ke he Iki.’ Falu kua matulituli mai he tau gagao lolelole, falu mai he mahukihuki he momotua po ke mai he galo e hoa mau. (Salamo 41:3) Falu kua fakauka ke he totokoaga he hoa nakai talitonu. Ko e tau matua, mahomo ke he tau matua tokotaha, liga mailoga e lautolu ko e gahua tupe fakalataha mo e feaki hake e magafaoa ko e matagahua mategugu. Kua lata e tau Kerisiano fuata ke moua e malolo ke tutu hake ke he peehiaga he atuhau ha lautolu mo e ke talahau, nakai, ke he tau tulaki mo e mahani faivao. Kia nakai lata ha tagata ke fakauaua ke ole ki a Iehova ma e ‘malolo lahi ue atu’ ke fehagai mo e tau paleko pihia.—2 Korinito 4:7.

‘Foaki e Malolo ki a Lautolu kua Lolelole’

12. Fakamalolo fefe e Iehova a tautolu he fekafekauaga faka-Kerisiano?

¹² Kua foaki foki e Iehova e malolo ke he hana tau fekafekau he magaaho ne taute e lautolu ha lautolu a fekafekauaga. Ne totou e tautolu i loto he perofetaaga a Isaia: “[Kua] foaki atu e ia e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu. . . . Ko lautolu kua tatali kia Iehova, to fakafou ai ha lautolu a malolo; to o hake a lautolu ke he tau tapakau po ke tau aeto; to tafepoi a lautolu ka e nakai mategugu; to o a lautolu, ka e nakai lolelole ai a lautolu.” (Isaia 40:29-31) Ne moua fakatagata he aposetolo ko Paulo e malolo ke taute hana fekafekauaga. Ko e fua, kua lauia mitaki ai hana fekafekauaga. Ke he tau Kerisiano i Tesalonia, ne tohia e ia: “Ko e mena nakai hoko atu ha mautolu a vagahau mitaki kia mutolu, ko e kupu hokoia, ka ko e malolo, mo e Agaga Tapu.” (1 Tesalonia 1:5) Ko e hana fakamatalaaga mo e fakaakoaga kua ha ha ai e malolo ke taute e tau hikihikiaga lalahi he tau momoui ha lautolu ne fanogonogo ki a ia.

13. Ko e heigoa ne fakamalolo a Ieremia ke fakauka pete ni ko e tau totokoaga?

¹³ He magaaho ka fehagai mo e agaga nakai fetataiaki he matakavi ha tautolu—ko e matakavi ne kua liga fa fakamatala mau ai a tautolu ke he tau tau loga ka e tote e taliaaga—liga to loto fakalolelole a tautolu. Kua fakalolelole pihia a Ieremia ha ko e tau totokoaga, tau vā, mo e fakateaga ne  feleveia mo ia. “Nakai talahau e au a ia [Atua], ti nakai vagahau foki e au ke he hana higoa,” he manatu e ia ki a ia ni. Ka kua nakai maeke a ia ke fakanono. Ka ko e hana matafekau kua ‘tuga e afi kaka kua puipui ai ke he hana a tau hui motua.’ (Ieremia 20:9) Ko e heigoa ne foaki ki a ia e malolo fou he fehagai mo e tau matematekelea lalahi? “Ka e ha ha ia au a Iehova; kua tuga ne toa ne matakutakuina,” he talahau e Ieremia. (Ieremia 20:11) Ko e loto fakaaue ha Ieremia ke he aoga lahi he hana matafekau mo e hana kotofaaga foaki he Atua ne fiafia ai a ia ke he fakamafanaaga a Iehova.

Ko e Malolo ke Fakahukia mo e Malolo ke Fakamaulu

14. (a) Kua malolo fefe e kanavaakau ko e alelo? (e) Talahau e tau fakafifitakiaga ke fakakite e moumouaga ne maeke he alelo ke taute.

¹⁴ Nakai fakahako mai he Atua e tau malolo oti ne toka ai ia tautolu. Ne tote lahi e alelo, ke fakatai ki ai, kua ha ha ai e malolo ke fakahukia mo e ke fakamaulu foki. “Ko e mate mo e moui kua toka ai ia ke he pule he alelo,” he hataki e Solomona. (Tau Fakatai 18:21) Ko e tau fua he fakatutalaaga ha Satani mo Eva kua fakakite e matematekela lahi kua maeke ke fakatupu he tau kupu. (Kenese 3:1-5; Iakopo 3:5) Maeke foki ia tautolu ke lahi e matematekela ka taute ha ko e alelo. Ko e tau kupu fakavihia hagaao ke he tino mamafa he tama fifine tote ka fakafolau atu a ia ke gagao fakapipili. Ko e liu fatiaki fakahanoa e taha tala pikopiko ka moumou e kapitiaga he vaha loa. E, kua lata e alelo ke tau taofi.

15. Fakaaoga fefe e tautolu e tau alelo ha tautolu ke ati hake mo e ke fakamaulu?

¹⁵ Pete he pihia, kua maeke he alelo ke ati hake mo e ke fakakelea foki. Ne pehe e fakatai he Tohi Tapu: “Ha ha ai e tagata kua vagahau, ti tuga ne tuina ai e tau tagata he pelu; ka ko e alelo he tagata iloilo ke malolo ai.” (Tau Fakatai 12:18) Kua fakaaoga he tau Kerisiano pulotu e malolo he alelo ke fakamafana a lautolu ne fakaatukehe mo lautolu ne maanu. Maeke he tau kupu fakaalofa ke fakamafana e tau fuata mui ne fa e totoko atu ke he peehiaga kelea he atuhau ha lautolu. Maeke he alelo manamanatu mitaki ke fakamafanatia ke he tau matakainaga momotua kua manako mo e fakaalofa agaia ki a lautolu. Maeke he tau kupu totonu ke fakafiafia e aho ha lautolu ne gagao. Ka ke he tau mena oti, lata ia tautolu ke fakaaoga e tau alelo ha tautolu ke fakamatala e fekau malolo he Kautu ki a lautolu oti ka fanogonogo. Kua ha ha he malolo ha tautolu ke fakapuloa e Kupu he Atua kaeke kua ha ha e tau loto ha tautolu i ai. Ne talahau e Tohi Tapu: “Aua neke lamakai e koe e mena mitaki kia lautolu kua lata ki ai, ka kua maeke kia koe ke eke.”—Tau Fakatai 3:27.

Ko e Fakaaogaaga Mitaki he Malolo

16, 17. He magaaho ka fakagahuahua e pule foaki he Atua ha lautolu, maeke fefe he tau motua, tau matua, tau tane, mo e tau hoana ke fifitaki a Iehova?

¹⁶ Pete ni kua malolo ue atu a ia, kua pule  a Iehova ke he fakapotopotoaga mo e fakaalofa. (1 Ioane 4:8) He fakatatai ki a ia, ne leveki fakaalofa he tau Kerisiano leveki e fuifui he Atua—he fakaaoga, nakai fakakelea, e pule ha lautolu. Moli, kua lata he tau leveki he falu mogo ke ‘fakatonu atu, akonaki atu, tomatoma atu,’ ka kua taute ai mo e “fakauka oti katoa mo e fakaako atu.” (2 Timoteo 4:2) Ti kua fakatumau e tau motua ke manamanatu fakahokulo ke he tau kupu ne tohia he aposetolo ko Peteru ki a lautolu ne fai pule he fakapotopotoaga: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia.”—1 Peteru 5:2, 3; 1 Tesalonia 2:7, 8.

¹⁷ Kua ha ha ai foki he tau matua mo e tau tane e pule ne foaki e Iehova ki a lautolu, ti kua lata ke fakaaoga e malolo nei ke lagomatai, feaki hake, mo e ke ofania. (Efeso 5:22, 28-30; 6:4) Kua fakakite he fakafifitakiaga a Iesu kua maeke e pule ke gahuahua mitaki ke he puhala fakaalofa. Kaeke ke lagotatai mo e fakatumau e akonakiaga, to nakai loto fakalolelole e fanau. (Kolose 3:21) Kua fakamalolo e tau fakamauaga he magaaho ka fakakite he tau tane Kerisiano e ulupule ha lautolu mo e fakalilifu hokulo he tau hoana e tau tane ha lautolu ka e nakai folau e takatakaiaga kotofa Atua ha lautolu he fakaohoohoaga ke pule po ke taute e tau mena ni ne manako—Efeso 5:28, 33; 1 Peteru 3:7.

18. (a) Maeke fefe a tautolu ke fifitaki e fakafifitakiaga a Iehova ke tau taofi ha tautolu a ita? (e) Ko e heigoa kua lata ia lautolu ne fai pule ke lali ke fakatupu ia lautolu i lalo he ha lautolu a levekiaga?

¹⁸ Ko lautolu ne ha ha ai e pule he magafaoa mo e he fakapotopotoaga kua lata ke fakaeneene lahi ke tau taofi e ita ha lautolu, ha kua fakatupu he ita e matakutaku nakai ko e fakaalofa. Ne talahau he perofeta ko Nahuma: “Ko Iehova kua fakatuai hana ita ka e lahi hana malolo.” (Nahuma 1:3; Kolose 3:19) Ke tau taofi e ita ha tautolu ko e fakamailoga a ia he malolo, ka e ka fakatoka e ita ko e fakakiteaga ia he lolelole. (Tau Fakatai 16:32) I loto he magafaoa mo e i loto he fakapotopotoaga, ko e foliaga ke fakakite e fakaalofa—fakaalofa ki a Iehova, fakaalofa ma e taha ke he taha, mo e ofania e tau matapatu fakaakoaga kua tonu. Fakaalofa ko e pipi malolo lahi he kaufakalataha mo e ko e omoiaga malolo lahi ke taute e mena hako.—1 Korinito 13:8, 13; Kolose 3:14.

19. Ko e heigoa e fakamoliaga mafanatia ne foaki mai e Iehova, mo e tali fefe a tautolu?

¹⁹ Ke iloa a Iehova ko e mailoga a ia he hana malolo. He puhala ia Isaia, ne talahau e Iehova: “Nakai kia iloa e koe? Nakai kia logona e koe? Ko e Atua tukulagi, ko Iehova ko ia ne eke e tau motuaga he lalolagi, nakai lolelole a ia, to nakai mategugu foki a ia.” (Isaia 40:28) Kua nakai otioti e malolo a Iehova. Kaeke falanaki a tautolu ki a ia nakai ki a tautolu ni, to nakai tiaki e ia a tautolu. Ne fakamoli mai a ia ki a tautolu: “Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.” (Isaia 41:10) Lata a tautolu ke tali fefe ke he hana leveki fakaalofa? Ke tuga a Iesu, kia fakaaoga hololoa e tautolu e tau malolo ne foaki mai e Iehova ki a tautolu ke lagomatai mo e ke ati hake. Kia tau taofi ai e tau alelo ha tautolu ke fakamaulu nakai ke fakakelea. Mo e kia mataala hololoa a tautolu fakaagaga, ke tumau ke he tua, mo e eke mo tau toa ke he malolo he ha tautolu a Tufuga Homo Ue Atu, ko Iehova ko e Atua.—1 Korinito 16:13.

[Matahui Tala]

Maeke Nakai a Koe ke Fakamaama?

• Fakaaoga fefe e Iehova hana malolo?

• Ko e tau puhala fe kua maeke ia tautolu ke moua e malolo a Iehova?

• Kua lata ke fakaaoga fefe e malolo he alelo?

• Maeke fefe e pule foaki he Atua ke eke mo monuina?

[Tau Huhu he Fakaakoaga]

[Fakatino he lau 29]

Ne fakaaoga e Iesu e malolo a Iehova ke lagomatai e falu

[Tau Fakatino he lau 31]

Ke fakapuloa e Kupu he Atua kua ha ha he malolo ha tautolu kaeke kua ha ha e tau loto ha tautolu i ai