“Fakamoui Ai e Koe a Koe, Katoa mo Lautolu kua Fanogonogo kia Koe”
“Fakamoui Ai e Koe a Koe, Katoa mo Lautolu kua Fanogonogo kia Koe”
“A koe kia koe ni, katoa mo e hau a fakaako atu, . . . ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.”—1 TIMOTEO 4:16.
1, 2. Kua omoi he heigoa e tau Kerisiano moli ke fakatumau ke he gahua fakamoui ha lautolu?
I LOTO he maaga mamao he fahi tokelau i Tailani, ne fakataitai he hoa mau ko e Tau Fakamoli a Iehova e vagahau fou ha laua ki a lautolu he magafaoa i luga he matiketike. Ke maeke ke fakamatala e tala mitaki he Kautu he Atua ke he tau tagata he maaga, ne fakaako he hoa e vagahau Lahu.
2 “Kua uka ke talahau e fiafia mo e makona ne moua e maua, he gahua mo e tau tagata fulufuluola nei,” he fakamaama he tane. “Ne logona moli e maua e putoia ke he fakamoliaga he Fakakiteaga 14:6, 7, ke fakamatala ke he ‘tau motu kehe oti, mo e tau magafaoa, mo e tau vagahau.’ Kua gahoa ni e fonua ne nakaila hokotia e tala mitaki ki ai, ti ko e hanei taha. Kua teitei ni ke nakai fahia a maua ke he tau fakaako Tohi Tapu loga ha maua.” Nakai taumaleku, ko e hoa nei kua nakai ni amanaki ke fakamoui a laua ni ka e fakamoui foki a lautolu ne fanogonogo ki a laua. Ko e tau Kerisiano, nakai kia amanaki a tautolu oti ke taute pihia foki?
“A Koe kia Koe Ni”
3. Ke fakamoui falu, ko e heigoa kua lata ke taute fakamua e tautolu?
3 Ne fakatonu he aposetolo ko Paulo a Timoteo, “A koe kia koe ni, katoa mo e hau a fakaako atu,” kua hagaao e mena nei ke he tau Kerisiano oti. (1 Timoteo 4:16) Haia, ke lagomatai falu ke moua e fakamouiaga, kua lata ia tautolu ke kikite fakamua hifo ki a tautolu ni. Maeke fefe a tautolu ke taute e mena nei? Taha mena, kua lata ia tautolu ke mataala ke he tau magaaho ne nonofo ai a tautolu. Ne foaki e Iesu e fakamailoga valavala ke iloa he tau tutaki hana e magaaho ka hoko mai e “fakaotiaga he lalolagi.” Ka kua talahau foki a Iesu to nakai iloa tonu e tautolu e magaaho ka hoko mai e fakaotiaga. (Mataio 24:3, 36) Kua lata ke fefe e aga ha tautolu ke he mena ia?
4. (a) Ko e heigoa e aga kua lata ia tautolu ke moua he hagaao atu ke he magaaho ne toe he fakatokaaga nei? (e) Ko e heigoa e aga kua lata ia tautolu ke kalo kehe mai ai?
4 Liga igatia a tautolu ke huhu hifo, ‘Kua fakaaoga nakai e au e tau magaaho ne toe he fakatokaaga nei ke fakamoui aki ni au katoa mo lautolu ne fanogonogo ki a au? Po kua manamanatu au, “Ha kua nakai iloa tonu e tautolu e magaaho ka hoko mai e fakaotiaga, to nakai kapeletu au ke he fahi ia”?’ Kua hagahaga kelea lahi e manatu fakamui. Ha kua keheina ai ke he tomatomaaga ha Iesu: “Kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.” (Mataio 24:44) Moli nakai ko e magaaho anei ke fakato e fiafia ha tautolu ke he fekafekauaga ha Iehova po ke kumi puipuiaga po ke fakamakonaaga ke he lalolagi.—Luka 21:34-36.
5. Ko e heigoa e tau fakafifitakiaga ne fakatoka he tau fakamoli ha Iehova he vaha fakamua to Kerisiano?
5 Taha puhala kua maeke foki ia tautolu ke fakakite kua kikite hifo a tautolu ki a tautolu ni he fakauka fakamoli ko e tau Kerisiano. Ne fakatumau e tau fekafekau he Atua he vaha kua mole ke fakauka, pete kua amanaki a lautolu ke he laveakiaga mafiti po ke nakai. He mole e talahau e tau fakafifitakiaga he tau tagata fakamoli he vaha fakamua to Kerisiano tuga a Apelu, Enoka, Noa, Aperahamo, mo Sara, ne tohi e Paulo: “Kua nakai moua e tau mena ne talahaua mai, ka kua iloa ai ka e mamao, ne tua foki ki ai, ti talia mo e fiafia e lautolu, mo e talahau mai ko e tau tagata kehe a lautolu mo e tau tagata o fano ke he lalolagi.” Kua nakai mahala a lautolu ke he ha manako he moui matukutuku hifo, nakai mahala foki a lautolu ke he tau peehiaga he mahani feuaki ne takai ia lautolu, ka kua onoono fakalahi atu a lautolu ke he “tau mena ne talahaua mai.”—Heperu 11:13; 12:1.
6. Lauia fefe e puhala moui he tau Kerisiano he senetanari fakamua ha ko e ha lautolu a onoonoaga ke he fakamouiaga?
6 Ne iloa foki he tau Kerisiano he senetenari fakamua ko lautolu ko e “tau tagata paea” he lalolagi nei. (1 Peteru 2:11) Pihia foki he mole e fakamouiaga mai he fakatulakiaga ha Ierusalema he 70 V.N., ne nakai fakagata e fakamatala he tau Kerisiano moli po ke liliu ke he puhala moui he lalolagi. Ne iloa e lautolu hane fakatali e fakamouiaga ne mua ki a lautolu ne fakatumau ke tua fakamoli. Ka e moli, ke mule tuga e 98 V.N., ne tohia he aposetolo ko Ioane: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17, 28.
7. Kua fakakite fefe he Tau Fakamoli a Iehova e fakauka he tau vaha fou nei?
7 He tau vaha fou nei kua fakauka foki e Tau Fakamoli a Iehova ke he gahua Kerisiano, pete ni kua hohoko a lautolu ke he favale mania. Ka kua teao kia e fakauka ha lautolu? Nakai pihia, ha kua fakamoli mai a Iesu ki a tautolu: “Ka ko ia ke tumau ato hoko ke he fakaotiaga, to fakamoui na ia,” pete ni kua hokotia ai he fakaotiaga he fakatokaaga tuai, po ke he fakaotiaga he moui he tagata. He liu tu mai, to manatu e Iehova mo e palepale e tau fekafekau tua fakamoli hana ne kua mamate.—Mataio 24:13; Heperu 6:10.
8. Maeke fefe a tautolu ke fakakite e loto fakaaue ha tautolu ke he fakauka he tau Kerisiano he vaha kua mole?
8 Mua atu, kua fiafia a tautolu ha kua nakai kapaletu e tau Kerisiano tua fakamoli he vaha kua mole ke he fakamouiaga ni ha lautolu. Moli ko tautolu ne fakaako hagaao ke he Kautu he Atua he puhala he tau gahua ha lautolu, kua loto fakaaue he kua fakauka a lautolu ke taute e poakiaga a Iesu: “Kia o atu a a mutolu ke eke e tau motu oti kana mo tutaki, . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) He fai magaaho agaia ne hafagi ki a tautolu, kua lata ia tautolu ke fakatata e loto fakaaue ha tautolu he fakamatala ke he falu ne nakaila logona e tala mitaki. Ka ko e fakamatalaaga ko e lakaaga fakapa ni a ia he taute tutaki.
‘A Koe ke he Hau a Fakaako Atu’
9. Maeke fefe he onoonoaga mitaki ke lagomatai a tautolu ke kamata e tau fakaakoaga Tohi Tapu?
9 Ko e kotofaaga ha tautolu kua nakai ni putoia e fakamatalaaga ka e pihia foki e fakaako atu. Ne fekau e Iesu a tautolu ke fakaako e tau tagata ke omaoma ke he tau mena oti ne poaki e ia. Moli, he falu matakavi, kua gahoa ni ne manako ke fakaako hagaao ki a Iehova. Ka e ka fakateaga e onoonoaga ke he matakavi, ka fakaalaia e tau laliaga ha tautolu ke kamata e tau fakaako Tohi Tapu. Ko Yvette, ko e paionia he matakavi ne talahau he falu ke mateafu ne kitia e tau matakainaga aahi mai ke he fahi ia, ne nakai fakateaga e tau onoonoaga, kua kamata e tau fakaako Tohi Tapu. He ati hake e ia e onoonoaga mitaki, ne moua foki e Yvette e tau tagata ne manako ke fakaako Tohi Tapu.
10. Ko e heigoa e matapatu gahua ha tautolu ko e tau faiaoga he Tohi Tapu?
10 Kua fakauaua falu Kerisiano ke foaki e fakaako Tohi Tapu mo lautolu ne fakakite e fiafia he manatu kua nakai maeke ia lautolu ke takitaki e fakaakoaga. Moli, kua kehekehe e tau fafatiaga he lotomatala ha tautolu. Ka kua nakai lata a tautolu ke makaka lahi ke eke mo tau faiaoga he Kupu he Atua. Ko e fekau mea he Tohi Tapu kua malolo lahi, ti talahau e Iesu to iloa e lautolu ne tuga e tau mamoe e leo he Leveki Mamoe moli he magaho ka logona ai. Ko e gahua ha tautolu mogoia, ke fakamatala fakamaaliali e fekau he Leveki Mamoe Mitaki, ko Iesu, ke he mena kua fahia ai a tautolu.—Ioane 10:4, 14.
11. Maeke fefe a koe ke lagomatai fakamitaki e tagata fakaako Tohi Tapu?
11 Maeke fefe a koe ke fakahoko fakamitaki e fekau ha Iesu? Ke kamata aki, fakamahani atu ke he tau mena ne talahau he Tohi Tapu hagaao ke he matapatu tala ne manamanatu ki ai. Kua lata ke maama e koe e matapatu tala fakamua to fakaako ke he falu. Mo e lali foki ke ha ha ai e takatakaiaga lilifu ka e fiafia he magahala he fakaakoaga. Ko e tau tagata fakaako, mo lautolu ne ikiiki lalahi, kua fakaako mitaki ka logona e milino mo e ka fakakite he faiaoga e lilifu mo e totonu ki a lautolu.—Tau Fakatai 16:21.
12. Maeke fefe a koe ke iloa moli kua maama he tagata fakaako e tau mena ne fakaako e koe ki a ia?
12 Ko e faiaoga, kua nakai manako a koe ke fakaako noa e tau mena kua lata ke he tagata fakaako ke liu tali manatu. Lagomatai a ia ke maama e mena ne fakaako e ia. Ko e fakaakoaga, puhala moui, mo e mahani hana ke he Tohi Tapu ka taute e tagata fakaako ke maama e mena hau ne talahau. Ti ko e mena ia, ka liga huhu hifo a koe, ‘Maama nakai e ia e kakano he tau kupu Tohi Tapu i loto he tohi fakaako?’ Maeke ia koe ke futia mai a ia he puhala he tau huhu ne nakai mukamuka e tali tuga e moli po ke nakai, ka ko e tau tali ne kua lata ni ke fakamaama. (Luka 9:18-20) Ke he taha fahi, kua fakauaua falu tagata fakaako ke huhu ke he faiaoga. Ati, liga fakaako noa a lautolu ka e nakai maama e mena ne fakaako. Fakamafana e tagata fakaako ke fai huhu mo e ke tala atu ki a koe ka nakai maama mitaki e falu manatu.—Mareko 4:10; 9:32, 33.
13. Maeke fefe a koe ke lagomatai e tagata fakaako ke eke mo faiaoga?
13 Ko e kakano aoga lahi he takitaki e fakaako Tohi Tapu ke lagomatai e tagata fakaako ke eke mo faiaoga. (Kalatia 6:6) Ke he mena ia, he liu fakamanatu e fakaakoaga ha mua, liga tala age ki a ia ke fakamaama e tali ke he tau kupu mukamuka, tuga kua fakamaama age e ia ke he taha tagata ne logona laia ke he magaaho fakapa. He magaaho fakamui, ka lata a ia ke fakalataha ke he fekafekauaga, lata ia koe ke uiina a ia ke fakatauo mo koe ke he fonua. Liga ni to mafana a ia ke gahua mo koe, mo e to lagomatai he puhala ia a ia ke tupu ke he mauokafua ato mautali a ia ke fano tokotaha he fekafekauaga.
Lagomatai e Tagata Fakaako ke Kapitiga mo Iehova
14. Ko e heigoa e foliaga ne mua hau ko e faiaoga, mo e heigoa ka lafi ki ai ke maeke ke kautu?
14 Ko e foliaga ne mua he tau faiaoga Kerisiano, ke lagomatai e tagata fakaako ke moua e kapitiga a Iehova. To nakai ni fakakatoatoa he tau kupu hau e mena nei ka e pihia foki he fakafifitakiaga hau. Ke fakaako ha ko e fakafifitakiaga, kua lauia lahi ke he tau loto he tau tagata fakaako. Kua lauia mitaki e tau gahua ke he tau kupu, mua atu ka fakaako e tau mahani mitaki mo e omoi e makutu ke he tagata fakaako. Kaeke kitia e ia kua tupu mai he fakafetuiaga mitaki mo Iehova e tau kupu mo e tau gahua hau, liga omoi lahi a ia ke feaki e fakafetuiaga pihia foki.
15. (a) Ko e ha kua aoga ai ke feaki he tagata fakaako e manatu hako ke fekafekau ki a Iehova? (e) Maeke fefe a koe ke lagomatai e tagata fakaako ke fakatumau ke holo ki mua fakaagaga?
15 Kua manako a koe ke fekafekau e tagata fakaako ki a Iehova nakai he kua nakai manako a ia ke mate i Amaketo ka ko e he fakaalofa hana ki a ia. He lagomatai a ia ke feaki e manatu mea pihia, to ati hake e koe e tau koloa nakai vela ka hao mai he tau kamatamata he hana tua. (1 Korinito 3:10-15) Ko e manatu hehe, tuga e manako velevele ke fifitaki ki a koe po ke ha tagata ni, ka nakai fakamalolo a ia ke totoko ke he tau fakaohoohoaga nakai faka-Kerisiano po ke fakamalolo ke taute e mena kua hako. Manatu, to nakai faiaoga tukulagi a koe ki a ia. He kua fai magaaho a koe, kia fakamalolo a ia ke fakatata lahi atu ki a Iehova he totou e Kupu he Atua he tau aho oti mo e manamanatu ki ai. Ko e puhala nei to fakatumau a ia ke ‘fakafifitaki e tau kupu tonu’ mai he Tohi Tapu mo e he tau tohi fakave ke he Tohi Tapu, ka leva e mole he fakaako a koe mo ia.—2 Timoteo 1:13.
16. Maeke fefe a koe ke fakaako e tagata fakaako ke liogi mai he loto?
16 Kua maeke foki ia koe ke lagomatai e tagata fakaako ke fakatata lahi atu ki a Iehova he fakaako a ia ke liogi mai he loto. Maeke fefe a koe ke taute e mena nei? Liga fakakite age e koe e liogi mahuiga a Iesu, pihia foki ke he tau liogi loto katoatoa ne fakamau he Tohi Tapu, tuga ia i loto he tau salamo. (Salamo 17, 86, 143; Mataio 6:9, 10) Lafi foki, he magaaho ka logona he tagata fakaako a koe ne liogi ke hafagi mo e ke fakaoti e fakaakoaga, to fioia e ia e logonaaga hau ki a Iehova. Ko e mena ia, kua lata ke fakakite tumau he tau liogi hau e loto fakamoli mo e fatuakiloto, pihia foki e lagotatai fakaagaga mo e he manamanatuaga.
Gahua ke Fakamoui e Fanau Hau
17. Maeke fefe he tau matua ke lagomatai e fanau ha lautolu ke nonofo mau he puhala he fakamouiaga?
17 Ia lautolu ne manako a tautolu ke fakamoui, ko lautolu he magafaoa ha tautolu. Ne tokologa lahi e fanau he tau matua Kerisiano kua fakamoli mo e ‘mauokafua ke he tua.’ Ka ko e falu, kua liga nakai hokulo e kupu moli he tau loto ha lautolu. (1 Peteru 5:9; Efeso 3:17; Kolose 2:7) Tokologa he tau fuata nei ne tiaki e puhala Kerisiano he magaaho ne motua hake a lautolu. Kaeke ko e matua a koe, ko e heigoa hau ka taute ke nakai pihia e mena ka tupu? Fakamua, kua lata ia koe ke fakatupu e takatakaiaga mitaki he magafaoa. Kua fakatoka he moui fakamagafaoa mitaki e fakaveaga ke omaoma fakalatalata ke he pule malolo, mailoga e tau puhala mitaki, mo e moua e fakafetuiaga fiafia mo e falu. (Heperu 12:9) Ti kua eke e pipi fakamagafaoa ke tuga e mena ka fakatupu aki e kapitiaga he tama mo Iehova. (Salamo 22:10) Kua taute mena auloa e tau magafaoa malolo—pete ni ka fakaaoga he tau matua taha magaaho ke moua aki e tau koloa fakatagata. He puhala nei kua maeke he fakafifitakiaga hau ke fakaako hau fanau ke taute e tau fifiliaga hako he moui. Ma tau matua, ko e mena ne manako lahi e fanau mai ia koe, nakai ko e tau koloa loga, ka ko koe ni—hau a magaaho, malolo, mo e fakaalofa. Kua foaki nakai e koe e tau mena nei ke he fanau hau?
18. Ko e heigoa e tau faga huhu ne kua lata he tau matua ke lagomatai e fanau ha lautolu ke tali?
18 Kua nakai lata he tau matua Kerisiano ke manatu ha to amanaki ni e fanau ha laua ti eke mo tau Kerisiano foki. Kua mailoga e Daniel, ko e motua mo e matua tane he tokolima: “Kua lata he tau matua ke fakatoka taha magaaho ke lagomatai ke fakatotoka e tau fakauaua ne moua he fanau ha lautolu he aoga po ke he falu a mena ni. Kua lata ia lautolu ke fakamanava lahi ke lagomatai e fanau ha lautolu ke moua e tali ke he tau huhu pehenei: ‘Kua nonofo moli kia a tautolu he vaha he fakaotiaga? Taha maka ni kia e lotu moli? Ko e ha kua nakai mitaki ai ke lafi mo e kapitiga aoga totonu? Ko e mena hepe tumau kia ke taute e mahani fakatane mo e fifine fakamua to mau?’ ” Ma tau matua, kua lata ia mutolu ke falanaki ki a Iehova ke fakamonuina e tau gahua ha mutolu, ha kua tokaga foki a ia ke he levekiaga he fanau hau.
19. Ko e ha kua mitaki lahi ni ke fakaako he tau matua e fanau ha lautolu?
19 Liga fakauaua falu matua he magaaho ka hoko e mogo ke fakaako ha lautolu ni a fanau. Pete he pihia, kua nakai lata a koe ke fakauaua, ha kua nakai fai tagata foki ne kua latatonu ke fakaako e fanau hau ka koe ni. (Efeso 6:4) Ke fakaako mo e fanau ni hau ka maeke ia koe ke iloa mua ko e heigoa i loto he tau loto mo e he tau manamanatuaga ha lautolu. Kua mai kia he loto e tau tali ha lautolu po kua tali teao? Talitonu moli nakai ke he tau mena ne fa e fakaako e lautolu? Kua moli nakai a Iehova ki a lautolu? To moua e koe e tau tali ke he tau huhu nei mo e falu a huhu aoga foki ka fakaako ni a koe mo e fanau hau.—2 Timoteo 1:5.
20. Maeke fefe he tau matua ke taute e fakaakoaga fakamagafaoa ke fiafia mo e aoga?
20 Maeke fefe a koe ke fakatumau e polokalama he fakaakoaga fakamagafaoa hau he tali mai he mogo ne kamata ai? Ne talahau e Joseph, ko e motua mo e matua tane he tama tane mo e tama fifine tote: “Ke tuga ni e tau fakaakoaga Tohi Tapu oti, kua lata e fakaakoaga fakamagafaoa ke fiafia, ko e taha mena ke amaamanaki e fanau ki ai. Ke taute pihia he magafaoa ha mautolu, kua nakai kakana lahi a mautolu ke he matahola. Kua mahani ke taha e matahola he fakaakoaga ha mautolu, ka e he falu a magaaho ko e hogofulu ni e minuti, ka e fakaako agaia na mautolu. Taha e mena ne mua he fakaakoaga he fahi tapu ha mautolu ma e fanau ko e taute tala a mautolu hagaao ke he My Book of Bible Stories. * Ko e lauiaaga mo e maamaaga hokulo ne fua mai kua mahomo atu e aoga ke he tau paratafa loga ne totou e mautolu.”
21. Magaaho fe ka fakaako he tau matua e fanau ha lautolu?
21 Moli, kua nakai fakakaupa e fakaako hau he fanau ke he tau magaaho fakaako pauaki ni. (Teutaronome 6:5-7) Ne talahau he Fakamoli i Tailani ne totoku mai he kamataaga: “Manatu mitaki agaia e au e magaaho ne uta e Papa au he gahua fakamatala, he tau pasikala taholi ha maua, ke he tau fahi mamao he matakavi he fakapotopotoaga ha mautolu. Moli lahi ni, ko e fakafifitakiaga mo e tau fakaakoaga he tau matua ha mautolu ke he tau magaaho kehekehe ne lagomatai a mautolu ke fifili ke huhu atu ke he fekafekauaga mau. Ti liga hufia agaia e tau fakaakoaga ia. Ko e gahua agaia au he tau fahi mamao he fonua!”
22. Ko e heigoa ka fua mai he kikite hifo “a koe kia koe ni, katoa mo e hau a fakaako atu”?
22 He taha aho nakai leva, he magaaho tonu ni, to hau a Iesu ke fakahoko e fakafiliaga he Atua ke he fakatokaaga nei. To eke ni e mailogaaga ne mua ia mo mena he fakamauaga tuai he lalolagi mo e lagi katoatoa, ka e to fakatumau ni e tau fekafekau tua fakamoli ha Iehova ke fekafekau ki a ia mo e fakamouiaga tukulagi i mua. Ti amanaki nakai a koe ke fakalataha mo lautolu, katoa mo e hau fanau mo e tau tagata fakaako Tohi Tapu? Ti manatu: “A koe kia koe ni, katoa mo e hau a fakaako atu, kia tumau ki ai; ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.”—1 Timoteo 4:16.
[Matahui Tala]
^ para. 20 Lomi fakailoa he Watchtower Bible and Tract Society of New York, Inc.
Maeke Nakai a Koe ke Fakamaama?
• Kua lata ke fefe e aga ha tautolu, ha kua nakai iloa tonu e tautolu e magaaho he fakafiliaga he Atua?
• Ko e tau puhala fe kua lata ia tautolu ke kikite hifo ‘kia tautolu ni, katoa mo e ha tautolu a fakaako atu’?
• Maeke fefe a koe ke lagomatai e tagata fakaako ke kapitiga mo Iehova?
• Ko e ha kua aoga ai ke fakamanava lahi e tau matua ke fakaako e fanau ha lautolu?
[Tau Huhu he Fakaakoaga]
[Fakatino he lau 25]
Kua fakatolomaki e fakaakoaga ha ko e takatakaiaga lilifu mo e kapitiga
[Fakatino he lau 26]
He taute e tau tala he Tohi Tapu, tuga ki a Solomona ne fakafili e tau fifine fakataka tokoua, ka fakafiafia e tau fakaakoaga fakamagafaoa