Ko e Hiki Fakahaga he Foliga “Faka-Kerisiano”​—Talia Nakai he Atua?

FAKALATA la, kua fekau e koe e tagata atisi ke vali e ata hau. He magaaho ne oti ai, kua fiafia lahi a koe; kua tatai lahi ni mo koe. Manamanatu ai a koe mogoia ke he fanau hau, tau mokopuna, mo e tau mokopuna ha lautolu ne onoono ke he fakatino mo e fiafia.

Ka e he mole falu atuhau, ne manatu taha hologa hau kua nakai fulufuluola e tama kila he ulu hau he fakatino, ti lafi e ia falu lau ulu. Taha ne nakai loto ke he ihu, ti hiki mogoia e ia. Kua taute fakahaga he tau atuhau ne mui mai e “tau fakafulufuluola” pihia, ati fakahiku kua nakai kitia lahi a koe he fakatino. Kaeke iloa e koe to pihia e mena nei, to fefe la e logonaaga hau? Nakai fakauaua, to ita lahi.

Momoko ai, ha ko e tala he fakatino nei, ko e tala pauaki ke he tau lotu ne ui ko e lotu Kerisiano. Ne fakakite mai he fakamauaga tala tuai he nakai la leva e mamate he tau aposetolo he Keriso, ne kamata agataha e foliga pauaki he “faka-Kerisiano” ke hiki, tuga ne talahau tuai he Tohi Tapu.—Mataio 13:24-30, 37-43; Gahua 20:30. *

Moli, kua mitaki lahi ke fakahagaao e tau matapatu fakaakoaga he Tohi Tapu ke he tau aga fakamotu mo e tau vaha. Ko e mena kehe lahi ke hiki e tau fakaakoaga he Tohi Tapu ke lata mo e tau manamanatu mahuiga. Ti ko e mena tonu ia ni ne tupu. Kikite la, ke fakatai ki ai, ke he tau hikihikiaga ne kua taute ke he falu mena aoga.

Kua Fevihiaki e Lotu mo e Fakatufono

Ne fakaako e Iesu ko e mena mai he lagi hana pule, po ke Kautu, ka fakamahakava he magaaho kotofa e tau pule oti he tagata ti pule ai ke he lalolagi katoa. (Tanielu 2:44; Mataio 6:9, 10) Ka e to nakai pule he puhala he tau fakatokaaga fakapolitika. “Nakai ko e kautu he lalolagi nai haku a kautu,” he talahau e Iesu. (Ioane 17:16; 18:36) Ko e mena ia, ko e tau tutaki ha Iesu, pete kua omaoma ke he matafakatufono, kua nakai putoia ke he politika.

Ka e, he vaha he Pule Atu Motu Roma ko Constantine he senetenari ke fa aki, tokologa ne talahau ko e tau Kerisiano kua manava hogohogo he fakatali ke he liu mai he Keriso mo e ke he fakamoliaga he Kautu he Atua. Ati hiki fakahaga ai e onoonoaga ha lautolu ke he tau politika. “Fakamua to Constantine,” he talahau he tohi Europe—A History, “ne nakai kumi e tau Kerisiano ke moua e malolo [fakapolitika] ke fakaholofa aki e taofiaga ha lautolu. He mole a Constantine, ne kau fakalataha e faka-Kerisiano mo e tau politika.” Ko e faka-Kerisiano fakafou kua eke mo lotu he “lalolagi katoa,” po ke “katolika,” he Pule Atu Motu Roma.

 Ne tohi he enesaikolopetia Great Ages of Man ha ko e kaufakalataha nei he Lotu mo e Fakatufono, “he 385 T.I., ko e 80 ni e tau he mole e favale lahi ke he tau Kerisiano, ne kamata e Lotu ke kelipopo a lautolu ne totoko ki ai, mo e kua malolo e pule he tau akoako ke teitei tatai ke he tau pule atu motu.” Ati kamata ai e vaha ne eke e pelu mo puhala ke fakaohooho aki e tau tagata ke liliuina, ti hukui he tau akoako matahigoa tokoluga mo e fofo pule e tau tagata fakamatala loto fakatokolalo he senetenari fakamua. (Mataio 23:9, 10; 28:19, 20) Ne tohia he tagata fakamauaga tala tuai ko H. G. Wells hagaao ke he “hokulo he tau kehekeheaga he vahaloto” he faka-Kerisiano he senetenari ke fa aki “mo e tau fakaakoaga ha Iesu ko e Nasareta.” Ko e “hokulo he tau kehekeheaga” nei kua hufia foki e tau matapatu fakaakoaga hagaao ke he Atua mo Keriso.

Fakafouaga he Atua

Ne fakaako e Keriso mo e hana tau tutaki ko e ‘taha ni e Atua ko e Matua,’ ne kua kitia ai he hana higoa fakaperesona, ko Iehova, ti tohia ke laga 7,000 i loto he tau fakamauaga tuai he Tohi Tapu. (1 Korinito 8:6; Salamo 83:18) Ne tufuga he Atua a Iesu; ko ia ko e “uluaki he tau mena momoui oti,” he talahau he Catholic Douay Version he Tohi Tapu ia Kolose 1:15. Ko e mena moui ne tufuga, ne fakamoli mai a Iesu: “Ko e mena kua mua haku a Matua ia au.”—Ioane 14:28.

Ka ko e senetenari ke tolu aki, ne kamata agataha falu akoako mahifi, ne futiaki he fakaakoaga ke he tolu taha he tau tagata pulotu Heleni ko Plato, ke fakafou e Atua ke lata mo e tau fakaako he Tolu Taha. He tau senetenari ne mui mai, ne fakatatai he taofiaga nei ne nakai mai he Tohi Tapu a Iesu ki a Iehova mo e taute e agaga tapu, po ke malolo gahuahua he Atua, mo tagata.

Hagaao ke he manatu pouliuli he Tolu Taha ne hiki he lotu, ne talahau he New Catholic Encyclopedia: “Ko e tauteaga he ‘taha e Atua i loto he tolu e Tagata’ kua nakaila mauoka ia, kua nakai ni putoia katoatoa foki ke he moui Kerisiano mo e fakamoliga hana ke he tua, fakamua to fakahiku e senetenari ke 4 aki. Ka ko e tauteaga tonu nei ne mahalo fakamua ke he mataulu ko e taofiaga he Tolu Taha. He tau Matua Aposetolo, kua nakai fakai ke fai mena ke fakatata ke he lotomatala po ke manatu pihia.”

Kua talahau pihia foki he The Encyclopedia Americana: “Kua nakai fakatata tonu he Taofiaga Tolu Taha e fakaakoaga Kerisiano mai fakamua ne hagaao ke he foliga he Atua; ka ko e fuluhi kehe mai he fakaakoaga nei.” Ne ui he The Oxford Companion to the Bible e Tolu Taha ko e taha mai he “tau feakiaga he tau poaki fakalotu fakamui.” Ka e nakai ko e Tolu Taha ni hokoia e manatu pouliuli ne putoia ki loto he lotu.

Fakafouaga he Solu

Kua talitonu lahi he vaha nei kua ha ha he tau tagata e solu nakai maeke ke mate ne hao mai ka mate e tino. Ka e iloa nakai e koe kua lafi mai foki e fakaakoaga lotu nei he magaaho fakamui? Ne fakamaama e Iesu e kupu moli he Tohi Tapu kua “nakai iloa e lautolu [ne mamate] ha mena,” ti kua tuga ne momohe a lautolu. (Fakamatalaaga 9:5; Ioane 11:11-13) Ti to liu moui ni he kakano he liu tu mai—‘ko e liu matike hake’ mai he mohe he mate. (Ioane 5:28, 29) Ko e solu nakai maeke ke mate, kaeke kua moli, to nakai lata ke fakaliu tu mai, ha ko e mena nakai maeke ke mate.

Ne fakakite foki e Iesu e fakaakoaga faka-Tohi Tapu ke he liu tu mai he fakatu hake e tau tagata mai he mate. Kia mailoga e fakataiaga ki a Lasaro, ne mate ke fa e aho. He magaaho ne liu fakatu mai e Iesu a ia, ne hau a Lasaro ki fafo he tukuaga, ko e tagata moui mo e fafagu. Kua nakai hifo mai ha solu nakai maeke ke mate he lagi fiafia ke he tino hana he magaaho ne ala hake a Lasaro he mate. Kaeke pihia e mena ne tupu, kua nakai fakakite e Iesu e fakaalofa hohofi he liu fakatu mai a ia!—Ioane 11:39, 43, 44.

Ko e heigoa, mogoia, e punaaga he tala ke he solu nakai maeke ke mate? Ne talahau he The Westminster Dictionary of Christian Theology ko e taofiaga ia “kua tupu mai ni he pulotu faka-Heleni nakai mai he Tohi Tapu.” Ne fakamaama he The Jewish Encyclopedia: “Ko e talitonuaga kua moui atu e solu he mole e mate he tino ko e manatu teao ne fakave ke he tau pulotu po ke puhala fioloti nakai ke he tua moli, mo e kua nakai fakaako i loto he Tohiaga Tapu.”

 Ti kua fa mahani, ke takitaki atu fakahaga e fakavaia, ti kua moli ai hagaao ke he fakaakoaga he solu nakai maeke ke mate. Kua hafagi ai e hala ke he manatu pouliuli he fakakikiveka tukumalagi he afi i helo. * Ka kua tohi fakalapalapa mai he Tohi Tapu ko e “mate ko e palepale ia he hala”—nakai ko e fakakikiveka tukumalagi. (Roma 6:23) Ti, ke fakamaama e liu tu mai, ne tohi he King James Version: “Ne ta atu he tahi a lautolu ne mamate i ai; mo e laveaki he mate mo e helo a lautolu ne mamate i ai.” Ne talahau foki he Tohi Tapu Douay “ko e tahi . . . mo e mate mo e helo kua ta atu a lautolu ne mamate.” Haia, ke talahau fakalapalapa, ko lautolu i helo kua mamate, ‘momohe,’ tuga ne talahau e Iesu.—Fakakiteaga 20:13.

Talitonu moli kia a koe ko e fakaakoaga ke he fakahala tukulagi i helo to futiaki e tau tagata ke he Atua? Nakai fakai. He tau loto manamanatu he tau tagata tututonu mo e fakaalofa, ko e manatu fakalialia a ia! Ko e Tohi Tapu, he taha fahi, kua fakaako “ko e Atua ko e fakaalofa a ia” ti ko e ekefakakelea, pihia foki ke he tau manu, ko e mena vihiatia a ia ki a ia.—1 Ioane 4:8; Tau Fakatai 12:10; Ieremia 7:31; Iona 4:11.

Fakamaheu e “Fakatino” he Vaha Fou Nei

Kua fakatumau ke fakamaheu e Atua mo e faka-Kerisiano he vaha nei. Nakai la leva ia ne fakamaama he porofesa he lotu e taufetului i loto he lotu Porotesano hana, ko e taufetului “ke he pule he Tohiaga Tapu mo e tau fakatufono ke totoko ke he pule he kehekeheaga mo e tau manatu he tagata, he vahaloto he fakamoliaga he lotu ke he pule he Keriso ke totoko ke he fakafeiloaga mo e hikiaga he faka-Kerisiano ke he agaga he vaha. Ka ko e matakupu moli hanei: Ko hai ne taute e fakatokatokaaga ma e lotu . . . ko e Tohiaga Tapu po ke tau manatu hane holofa he mogonei?”

Momoko ni, ha kua kautu agaia “e tau manatu hane holofa he mogonei.” Kua nakai fufu, ke tuga anei, nukua loga e lotu ne hiki e tau tutuaga ha lautolu ke he tau matakupu kehekehe ke onoono ki ai kua tuga e tupu fakahaga mo e manatu lagotatai a lautolu. Mua atu hagaao ke he tau mahani, kua ataina lahi e tau lotu, tuga ne totoku he vala tala fakamua. Ka kua fakamaaliali mai he Tohi Tapu ko e tau agahala kelea muikau e mahani feuaki, faivao, mo e fakasotoma ke he fofoga he Atua ti ko lautolu ne putoia ke he tau agahala pihia to ‘nakai moua e kautu he Atua.’—1 Korinito 6:9, 10; Mataio 5:27-32; Roma 1:26, 27.

He magaaho ne tohia he aposetolo ko Paulo e tau kupu ne totoku i luga, ko e lalolagi Heleni-Roma ne takai ia ia kua holopi ke he tau puhala kehekehe oti he mahani kelea. Kua maeke ia Paulo ke manamanatu: ‘E, na tugi he Atua a Sotoma mo Komora ke he efuefu ha ko e tau agahala kelea muikau he mahani fakatane mo e fifine, ka kua 2,000 e tau tau he mole e mena ia! Moli ni kua ai hagaao ke he vaha maama nei.’ Ka kua nakai manatu fakatepetepe a ia; ne nakai manako a ia ke holitu e kupu moli he Tohi Tapu.—Kalatia 5:19-23.

Kikite ke he “Fakatino” Fakamua

He vagahau ke he tau takitaki lotu Iutaia he vaha hana, ne talahau e Iesu ko e tapuaki ha lautolu kua ‘noa he fakaako e lautolu e tau poaki he tau tagata.’ (Mataio 15:9) Kua tatai foki e mena ne taute he tau akoako ia ke he Fakatufono a Iehova he puhala ia Mose ke he mena ne taute he tau akoako ha Kerisitenitome, ti taute agaia ni, ke he fakaakoaga he Keriso—ne pipi e lautolu e kupu moli faka-Atua aki e “vali” he tau fakaakoaga mahani toka tuai. Ka kua uta kehe e Iesu e tau fakavaia loga ke aoga ai e tau tagata loto fakamoli. (Mareko 7:7-13) Ne talahau ni e Iesu e kupu moli, pete kua talahaua po ke nakai. Kua eke tumau e Kupu he Atua mo pule hana.—Ioane 17:17.

Ko e keheina ha ia e mena ne talahau e Iesu mai he laulahi ia lautolu ne talahau ko e tau Kerisiano! Moli, ne talahau tuai he Tohi Tapu: “To fiafia lahi e tau tagata ke he tau mena fou mo e tau mena moua . . . tau faiaoga ke lata ai ni a lautolu; ti, he nakai fanogonogo ke he kupu  moli, to fuluhi na lautolu ke he tau tala tuai.” (2 Timoteo 4:3, 4, The Jerusalem Bible) Ko e “tau tala tuai” nei, ne kua mailoga e tautolu e falu, kua moumou fakaagaga, ka ko e kupu moli he Kupu he Atua kua ati hake, mo e kua takitaki atu ke he moui tukulagi. Ko e kupu moli anei ne fakamalolo he Tau Fakamoli a Iehova a koe ke kumikumi ki ai.—Ioane 4:24; 8:32; 17:3.

[Tau Matahui Tala]

[Puha/Fakatino he lau 7]

Ko e Tupu Maiaga he Matahigoa Kerisiano

He hogofulu e tau tau he mole e matulei ha Iesu, kua talahaua e tau tutaki hana ke fakalataha ”ke he puhala.” (Gahua 9:2; 19:9, 23; 22:4) Ko e ha? Ha kua matapatu e puhala moui ha lautolu ke he tua ki a Iesu Keriso, ko ia ”ko e puhala, mo e kupu moli, mo e moui.” (Ioane 14:6) Ti, he fai magaaho he mole e 44 V.N., i Suria Anetioka, ko e tau tutaki ha Iesu kua ”fakahigoa fakamua...ko e tau Kerisiano.” (Gahua 11:26) Kua mafiti agataha e matahigoa nei ke talahaua, pihia foki ke he tau tagata fakatufono. (Gahua 26:28) Kua nakai huhui he matahigoa fou e puhala moui faka-Kerisiano, ne fakatumau ke fifitaki ke he puhala he Keriso.—1 Peteru 2:21.

[Tau Fakatino he lau 7]

He puhala he fekafekauaga ha lautolu, ne takitaki he Tau Fakamoli a Iehova e tau tagata ke he Kupu he Atua, ko e Tohi Tapu

[Fakatino Credit Line he lau 4]

Ke tolu aki mai he fahi hema: United Nations/Photo by Saw Lwin