Kua Galo Fakahaga Kia e Kakano he Kupu “Kerisiano”?

KO E heigoa e kakano ke eke mo Kerisiano? To tali fefe e koe? Ne foaki ke he ha tagata ne fifili mai he tau motu kehekehe e huhu ia ni, mo e hanei e tau tali ha lautolu:

“Ke muitua ki a Iesu mo e fifitaki ki a ia.”

“Ke eke mo tagata mitaki mo e lagomatai ke he falu.”

“Ke talia e Keriso ko e Iki mo e Fakamoui.”

“Ke o he Mese, talahau e Rosary, mo e moua e Holy Communion.”

“Nakai talitonu au kua lata he tagata ke fano he tapu ke eke mo Kerisiano.”

Kua foaki foki he tau tohi fakamaama kupu e tau kakano kehekehe. Taha e tohi, ne kua hogofulu e kakano i kelekele he kupu “Kerisiano,” ti kua kamata mai he “talitonu ke he, po ke fakalataha ke he lotu ha Iesu Keriso” ke he “tagata lilifu po ke fulumokoi.” Kua nakai ofo ai he kua uka he tokologa ke fakamaama ko e heigoa e kakano ke eke mo Kerisiano.

Ko e Puhala Ataina

He vaha nei, ia lautolu ne talahau ko e tau Kerisiano—pihia foki a lautolu ne o ke he tapu taha—kua kitia he tagata e tau manatu kehekehe ke he tau matakupu tuga e omoi faka-Atua he Tohi Tapu, ko e tala ke he tupu mai noa, putoiaaga he lotu ke he tau politika, mo e talatala atu e tua he taha ke he falu. Ko e tau matakupu ke he tau mahani, tuga e fakatotama, fakasotoma, mo e tau hoa ne nonofo tokoua ka e nakai mau, kua eke mo matakupu ke taufetoko ki ai. Ko e puhala nukua kitia maaliali ko e ataina.

He taha hopo fakafili he lotu Porotesano, kua vili fou ke talitua e tonu he lotu “ke fifili e motua mahani fakasotoma ke taha he kau fakatufono i ai,” he hokotaki he senolo Christian Century. Kua foaki foki he falu tagata fioloti e manatu kua nakai aoga e tua ki a Iesu ma e fakamouiaga. Kua talitonu a lautolu ko e tau Iutaia, tau Musilimi, mo e falu foki “kua ligaliga ni ke o hake ke he lagi [tuga e tau Kerisiano],” he talahau he hokotaki he The New York Times.

Manamanatu la, kua fakahakehake he tagata ha Marx e fakatufono fakatupe po kua fakatokoluga he tagata temokarasi e matakau pule okooko po kua lagomatai he tagata leveki takatakaiaga e moumouaga he vaouhi. “Liga nakai ko e tagata ha Marx po ke tagata temokarasi po ke tagata leveki takatakaiaga moli a ia,” he talahau e koe—ti kua hako a koe. Ti pihia foki ka manamanatu a koe ke he loga he tau manatu ha lautolu ne talahau ko e tau Kerisiano, mailoga e koe e tau taofiaga ne kua kehekeheina ti kua uhukehe ai e tau mena ne fakaako he Fakatu Lotu Kerisiano, ko Iesu Keriso. Ko e heigoa mogoia kua fakakite he ha lautolu a fakamailoga he faka-Kerisiano?—1 Korinito 1:10.

Ko e manako ke hiki e tau fakaakoaga Kerisiano ke fakalata atu ke he agaga he vaha kua leva mai i tuai, tuga ka kitia e tautolu. Fefe la e logonaaga he Atua mo Iesu Keriso hagaao ke he tau hikihiki ia? Kua tonu kia e tau lotu ne papale e tau fakaakoaga ne nakai mai he Keriso, ke fakahigoa e lautolu a lautolu ko e tau Kerisiano? To kikite ke he tau huhu nei he vala tala ka mui mai.