“Kua Hoko Mai e Magapo!”

“Kua hoko mai hana vaha kia tokai e ia e lalolagi nai, ka e fano ke he Matua.”—IOANE 13:1.

1. Kua hoko mai fai e Paseka he 33 V.N., ko e heigoa e tau talatala tuaha ne go ai a Ierusalema, mo e ko e ha?

HE HANA papatisoaga he 29 V.N., ne hokotia atu a Iesu ke he gahua ka takitaki atu a ia ke he “vaha” he mate, liu fakatu mai, mo e fakalilifu hana. Mogonei ko e vaha tupu he 33 V.N. Ko e gahoa laia e fahitapu he mole he pulega e fakafiliaga tokoluga faka-Iutaia, ko e Saneheturini, ke kelipopo a Iesu. He kua iloa e pulega ha lautolu, liga mai ia Nikotemo, ko e taha he Saneheturini ne fakakapitiga ki a ia, ne fano kehe a Iesu i Ierusalema mo e finatu he hala fahi tua ke he taha fahi he Vailele ko Ioritana. He tata mai e Galue he Paseka, tokologa e tau tagata ne o mai he tau fahi tua ki Ierusalema, ti kua go lahi e maaga he talatala tuaha hagaao ki a Iesu. “Kua manatu a mutolu ke ha?” he fehuhuaki e tau tagata. “Nakai kia hau a ia ke he galue?” Ne fakaauatu he tau ekepoa ne mua mo e tau Farasaio e go, he poaki age kaeke kua iloa he taha e mena ha i ai a Iesu kia fakailoa ki a lautolu.—Ioane 11:47-57.

2. Ko e heigoa ne taute e Maria ati tupu e fetotokoaki, mo e tali ha Iesu ke lago a ia kua fakakite e heigoa hagaao ke he mataala hana ke he “hana vaha”?

 ² He Nisana 8, toe ono e aho to eke e Paseka, kua ha ha ai foki a Iesu he katofia a Ierusalema. Ne hau a ia ki Petania—ko e taone he tau kapitiga fakahelehele hana ko Mareta, Maria, mo Lasalo—ne kavi ke 3 e kilomita i fafo a Ierusalema. Ko e afiafi Faraile, ti nofo a Iesu he Sapati i ai. He afiafi hake he fekafekau a Maria ki a ia he fakaaoga e lolo na to fakafua uka, ne nakai fiafia e tau tutaki. Ti pehe age a Iesu: “Tokai a ia; kua toka e ia e mena nai ke leo aki e aho he tauteuteaga he haku a tanuaga. Ha ko e mena nonofo mau a mutolu mo e tau nonofogati, ka ko au, nakai nofo mau au ia mutolu.” (Ioane 12:1-8; Mataio 26:6-13) Iloa e Iesu “kua hoko mai hana vaha kia tokai e ia e lalolagi nai, ka e fano ke he Matua.” (Ioane 13:1) Toe lima e aho ti “foaki [e ia] hana moui, ko e lukutoto ke hukui aki e tau tagata tokologa.” (Mareko 10:45) Mai he mogonei, kua lauia mafiti e tau mena oti ne taute mo e fakaako e Iesu. Ko e fakafifitakiaga mitaki ha anei ne foaki ma tautolu he fakatalitali a tautolu ke he fakaotiaga he fakatokaaga nei! Kikite la e mena ne tupu ki a Iesu he aho hake.

Ko e Aho ne Fakaheke a Iesu

3. (a) Hu atu fefe a Iesu ki Ierusalema he Aho Tapu, Nisana 9, mo e tali fefe e tokologa he tau tagata ki a ia? (e) Ko e heigoa e tali ne age e Iesu ke he tau Farasaio ne gugu hagaao ke he moto tagata?

³ He Aho Tapu, Nisana 9, ne fakaheke ai a Iesu he finatu ki Ierusalema. He hu atu a ia ke he maaga—kua heke he punua asini ke fakamoli aki e Sakaria 9:9—ne tokologa e tau tagata ne fakapotopoto mai ki a ia ne faliki ha lautolu a tau tapulu ke he puhala, ko e falu kua halahala e lautolu e tau la akau mo e faliki ke he puhala. “Kia monuina e Patuiki, kua haele mai ke he higoa he Iki!” he tauhea e lautolu. Kua manako falu Farasaio ne ha ha mo e moto tagata ke akonaki e Iesu e tau tutaki hana. Ka e tala age a Iesu: “Ke tala atu e au ki a mutolu, ka fakamamate a lautolu nai, ti ui mai ni e tau maka.”—Luka 19:38-40; Mataio 21:6-9.

4. Ko e ha ne miha a Ierusalema he magaaho ne hu atu a Iesu ke he maaga?

⁴ He gahoa e tau fahi tapu he mole, ne tokologa he moto tagata ne kitia a Iesu ne liu fakatu mai a Lasalo. Ati talatala atu a lautolu nei ke he falu hagaao ke he mana ia. Ti he hu atu a Iesu ki Ierusalema, kua miha e maaga katoa. “Ko hai kia hanai?” he huhu he tau tagata. Mo e tumau e moto tagata ke talahau: “Ko Iesu hanai, ko e perofeta mai Nasareta i Kalilaia.” Mailoga e mena ne tupu, ne togi e tau Farasaio: “Kua mumui atu kia ia e lalolagi.”—Mataio 21:10, 11; Ioane 12:17-19.

5. Ko e heigoa ne tupu he finatu a Iesu ke he faituga?

⁵ Ko e aga fa mahani hana he magaaho ka aahi atu ki Ierusalema, ko Iesu, ko e Faiaoga ne Mua, ne finatu ke he faituga ke fakaako. Ati o mai e tau matapouli mo e tau kulikuli ki a ia, mo e fakamalolo e ia a lautolu. He kitia ai he tau ekepoa ne mua mo e tau tohikupu e mena nei mo e logona e lautolu e tau tama tane he faituga ne tauhea, “Hosana ke he tama a Tavita!” ne ita a lautolu. “Kua logona nakai e koe e tau kupu ha lautolu?” he talahau e lautolu. “E,” he tali age e Iesu. “Nakai kia totou e mutolu, Ne taute e koe e fakahekeaga mai he tau gutu he tau tama mukemuke mo e tau tama kai huhu?” He fakaholo atu a Iesu ke fakaako, ne kikite fano a ia ke he tau mena oti he faituga.—Mataio 21:15, 16; Mareko 11:11.

6. Kua kehe fefe e aga a Iesu he mogonei ke he mogo fakamua, mo e ko e ha?

⁶ Kua kehe lahi e puhala ha Iesu he mogonei mai he ono mahina fakamua! Ne hau a ia mogoia ki Ierusalema ma e Galue he Tau Fale Api “nakai fakakite, ka e tuga ne hake fufu.” (Ioane 7:10) Mo e fakaeneene tumau a ia ke hola mo e nakai haofia he magaaho ne hagahaga kelea e moui hana. Ne hu atu, nakai fufu, a ia mogonei ke he maaga ne kua taute e poakiaga ke tapaki a ia! Nakai ko e aga fa mahani foki ha Iesu a ia ke fakapuloa ko ia e Mesia. (Isaia 42:2; Mareko 1:40-44) Kua nakai manako a ia ke talahau he taha gutu ke he taha gutu e fakapuloaaga hoha po ke tau hokotaki keukeu hagaao ki a ia. Ne fakapuloa he moto tagata a ia mogonei ko e Patuiki mo e Fakamoui—ko e  Mesia—mo e fakaheu e ia e manako he tau takitaki lotu ke fakamamate a lautolu! Ko e ha ne hiki ai? Ha kua “hoko mai e vaha ke hoko ai e Tama he tagata ke he hana lilifu,” tuga ne fakailoa e Iesu he aho hake.—Ioane 12:23.

Gahua Malolo—Ti ko e Tau Fakaakoaga Fakamoui

7, 8. Kua fakakite fefe he tau mena ne taute e Iesu he Nisana 10, 33 V.N., e mena ne taute e ia he faituga he magahala he Paseka he 30 V.N.?

⁷ He hoko mai ke he faituga he Aho Gofua, Nisana 10, ne fakamakutu a Iesu ke he mena ne kitia e ia he afiafi fakamua. Ne “kamata ai e ia ke vega ki fafo e tau tagata ne fefakafuaaki he faituga, ne tulei e tau lapa he tau tagata ne fakafua tupe, mo e tau nofoa he tau tagata fakafua lupe. Nakai maeke foki e ia ke fina age taha ke he faituga mo e kavega.” He fakahala e tau tagata taute hehe, ne fakapuloa e ia: “Nakai kia tohi, To talahaua haku a fale, ko e fale liogi he atu motu oti kana? ka kua eke e mutolu mo ana he tau tagata fofo mena.”—Mareko 11:15-17.

⁸ Kua fakakite he makutu ha Iesu e mena ne taute e ia he tolu tau fakamua he magaaho ne aahi atu a ia ke he faituga he magahala he Paseka he 33 V.N. Ka ko e fakatikaiaga, kua mania lahi he magaaho nei. Ko e tau tagata fakafua he faituga kua hagaao ki ai mogonei ko e “tau tagata fofo mena.” (Luka 19:45, 46; Ioane 2:13-16) Kua ui pihia a lautolu kakano he mamafa e tau totogi ne manako e lautolu mai he tau tagata ne manako ke fakatau e tau manu ke poa. Ko e tau ekepoa ne mua, tau tohikupu, mo e tau iki he motu ne logona e mena ne fa e taute e Iesu, ne kumi e lautolu po ke eke fefe ke tamate a ia. Ka kua nakai iloa e lautolu e puhala ke tamate aki a Iesu, ha ko e tau tagata oti, ne ofo ke he tau kupu hana, kua tapiki mau ki a ia ke fanogonogo.—Mareko 11:18; Luka 19:47, 48.

9. Ko e heigoa e fakaakoaga ne fakaako e Iesu, mo e ko e heigoa e uiina ne tuku age e ia ke he tau tagata fanogonogo hana he faituga?

⁹ He fakaako mau a Iesu ke he faituga, ne talahau e ia: “Kua hoko mai e vaha ke hoko ai e Tama he tagata ke he hana lilifu.” E, iloa e ia kua gahoa e tau aho ne toe he moui tagata hana. He mole e talahau kua lata e fua saito ke mate ke fua mai e tau fua—fakatatai ke he hana mate ke maeke ke foaki e moui tukulagi ke he falu—ne tuku age e Iesu e uiina ke he tau tagata fanogonogo hana, he talahau: “Ka fia fekafekau mai taha kia au, kia mui mai a ia kia au; ko e mena ke nofo ai au, ha ha i ai foki haku a fekafekau; ka fekafekau mai foki taha  kia au, ti fakalilifu ai e Matua a ia.”—Ioane 12:23-26.

10. Fefe e logonaaga a Iesu ke he mate mamahi ne tatali ki a ia?

¹⁰ Manamanatu hagaao ke he mate mamahi hana ne fa ni e aho ne toe, ne talahau foki e Iesu: “Ha ne fakaatukehe nai hoku loto; to talahau e au ha ha? Ma Matua na e, fakamoui au mai he magala nai.” Ka ko e mena ne tatali ki a Iesu kua nakai maeke ke uta kehe. “Ka,” he talahau e ia, “ko e mena ia ne hoko mai ai au ke he magala nai.” Haia, kua fakamoli a Iesu ke he fakaholoaga katoa he Atua. Kua taute e ia e fifiliaga ke toka e finagalo faka-Atua ke takitaki hana moui ke hoko ke he mate poa hana. (Ioane 12:27) Ko e fakafifitakiaga ha ia ne fakatoka e ia ma tautolu—he omaoma katoatoa ke he finagalo faka-Atua!

11. Ko e heigoa e tau fakaakoaga ne tuku age e Iesu ke he moto tagata ne logona e leo mai he lagi?

¹¹ Kua hokulo e kapeletu hagaao ke he puhala ka lauia ai e talahaua he hana Matua, ha ko e mate hana, ne liogi a Iesu: “Ma Matua na e, fakaheke a ke he hau a higoa.” Ke he ofomate he moto tagata ne fakapotopoto ke he faituga, ne hau ai e leo mai he lagi, kua fakapuloa: “Kua fakaheke au ki ai, ato liu foki fakaheke au ki ai.” Ne fakaaoga he Faiaoga ne Mua e magaaho nei ke tala age ke he moto tagata ko e ha ne logona ai e leo, ko e heigoa ka tupu he mate hana, mo e ko e ha ne kua lata ia lautolu ke tua. (Ioane 12:28-36) Kua eke moli e tau aho fakamui ua ia mo tau aho lavelave lahi ma Iesu. Ka e nakaila hoko mai e aho lahi.

Ko e Aho ma e Tau Fakatikai

12. He Aho Ua, Nisana 11, ne lali fefe e tau takitaki lotu ke hele a Iesu, mo e ko e heigoa e fua?

¹² He Aho Ua, Nisana 11, ne liu foki a Iesu ke he faituga ke fakaako. Kua leo e toloaga favale. Hagaaki ke he gahua a Iesu he aho fakamua, ne huhu e tau ekepoa ne mua mo e tau farasaio ki a ia: “Ko e heigoa e pule kua eke ai e koe e tau mena na? ti age e hai kia koe e pule nai?” Ne fakatikai he Iki Faiaoga a lautolu he tau tali hana, mo e talahau e ia tolu e fakataiaga malolo—ua ne hagaao ke he uluvine mo e taha hagaao ke he taonaga—kua fakatapakupaku he naia e kelea muikau he tau tagata totoko ki a ia. Kua ita ke he mena ne logona e lautolu, ne manako e tau takitaki lotu ke tapaki a ia. Ka e matakutaku a lautolu he moto tagata, ha ko e taofi ha lautolu ko e perofeta a Iesu. Ti lali a lautolu ke hele a ia ke talahau taha mena ke maeke ia lautolu ke tapaki a ia. Ko e tau tali ne age e Iesu kua nakai feia ha lea ia lautolu.—Mataio 21:23–22:46.

13. Ko e heigoa e tomatomaaga ne age e Iesu ke he tau tagata fanogonogo hana hagaao ke he tau tohikupu mo e tau Farasaio?

¹³ Ha kua talahau teao e tau tohikupu mo e tau Farasaio ke fakaako e Fakatufono he Atua, ne fakamafana age a Iesu ke he tau tagata fanogonogo hana: “Ko e tau mena oti ke tala atu ai a lautolu kia mutolu ke omaoma ki ai, kia omaoma a mutolu ki ai mo e eke ai e mutolu; ka e aua neke fifitaki a mutolu ke he ha lautolu a tau mahani; ha kua talahau e lautolu, ka e nakai ni eke e lautolu.” (Mataio 23:1-3) Ko e fakatikai malolo lahi ha ia ki mua he toloaga tagata! Ka kua nakala oti he naia a Iesu mo lautolu. Ko e aho fakamui anei hana he faituga, mo e talahau fakaatuatu e ia e tau fakatapakupakuaga—he mole atu taha mo e taha ke tuga e hololoa he pakulagi.

14, 15. Ko e heigoa e tau fakatikai kelea muikau ne talahau e Iesu ke he tau tohikupu mo e tau Farasaio?

¹⁴ “Oi fakaalofa kia mutolu e tau tohikupu, mo e tau farasaio, ko e tau tagata fakavai!” he talahau laga ono e Iesu. Kua pihia a lautolu, he fakamaama e ia, ha ko e mena pa e lautolu e Kautu he lagi ke he tau tagata, ha kua nakai huhu a lautolu ki ai, ti nakai toka foki e lautolu ke huhu ki ai a lautolu ha ne huhu ki loto. Ne takai he tau tagata fakavai nei e tahi mo e fonua, ke mafoki mai ai taha tagata, ke fakamahaikava tukulagi ni a ia. He tiaki e “tau mena he fakatufono ne mua, ko e  mahani tututonu, mo e fakaalofa, mo e fakamoli,” ne fakatonutonu lahi atu a lautolu ke totogi e tau mena ne hogofulu aki. Kua tuga fakamea e lautolu e “tua he kapiniu mo e kumete, ka ko loto kua puke namo ke he fofo mena mo e mahani kelea” ha ko e popo mo e keukeu i loto ha lautolu kua fufu i tua he mahani fakamoli. Lafi ki ai, kua fakamakai a lautolu ke ati e tau tukuaga he tau perofeta mo e fakamanaia ai ke fakahakehake aki ni e tau gahua fakaalofa noa ha lautolu, pete ni ko lautolu “ko e fanau . . . ha lautolu ne kelipopo e tau perofeta.”—Mataio 23:13-15, 23-31.

¹⁵ Kua fakahala ai he nakai uho e tau mena fakaagaga ke he tau tagata totoko hana, ne pehe a Iesu: “Oi fakaalofa kia mutolu ko e tau takitaki matapouli.” Kua aga matapouli a lautolu ha kua peehi lahi a lautolu ke he auro he faituga ka e nakai ke he aoga fakaagaga he fale tapuaki. Kua fakaholo atu, ne talahau e Iesu e tau kupu malolo lahi hana he fakatikai. “Ko e tau gata, ko e tau fanau he tau gata gagau!” he talahau e ia, “to fehola fefe a mutolu he fakahala i Kehena?” Haia, kua tala age e Iesu ki a lautolu he fakatumau ke he puhala kelea ha lautolu, to matematekelea a lautolu ke he fakaotiaga tukulagi. (Mataio 23:16-22, 33) Kia fakakite foki e tautolu e malolo he fakapuloa e ogo he Kautu, pihia foki he magaaho ka fakatapakupaku e lotu fakavai.

16. He nofo he Mouga ko Olive, ko e heigoa e perofetaaga aoga lahi ne foaki e Iesu ke he tau tutaki hana?

¹⁶ Kua fano kehe a Iesu he faituga he mogonei. He to la he afiafi, ne o hake a ia mo e tau aposetolo hana ke he Mouga ko Olive. He nofo ai a ia, ne foaki e Iesu e perofetaaga hagaao ke he moumouaga he faituga mo e fakamailoga he ha ha hinei hana mo e he fakaotiaga he fakatokaaga nei. Ko e kakano he tau kupu fakaperofeta nei kua hoko mai ke he vaha ha tautolu. He afiafi ia, ne tala age foki e Iesu ke he tau tutaki hana: “Kua iloa e mutolu ka mole ua e aho, ti eke ai e paseka, kua tuku atu foki e Tama he tagata kia fakasatauro.”—Mataio 24:1-14; 26:1, 2.

‘Fakaalofa a Iesu ke he Hana Ni ke he Fakaotiaga’

17. (a) He magahala he Paseka he Nisana 14, ko e heigoa e fakaakoaga ne fakaako e Iesu ke he toko 12? (e) Ko e heigoa e fakamanatuaga ne fakatu e Iesu he mole e fekau a Iuta Isakariota ke fano?

¹⁷ He tau aho ua ne toe—Nisana 12 mo e 13—ne nakai fakakite fakahanoa a Iesu ke he faituga. Hane kumi e tau takitaki lotu ke kelipopo a ia, mo e nakai manako a ia ke fai mena ke fakalavelave aki e kai Paseka mo e tau aposetolo hana. Ko e to la he Aho Tuloto kua kamata ia Nisana 14—ko e aho fakamui he moui a Iesu he lalolagi ko e tagata. He afiafi ia, ne fakalataha a Iesu mo e tau aposetolo hana ke he fale i Ierusalema ne tauteute ai ma lautolu ke kai e Paseka. He kai a lautolu he Paseka, ne fakaako e ia ke he 12 e fakaakoaga fulufuluola he mahani fakatokolalo he holoholo e tau hui ha lautolu. He fekau a Iuta Isakariota ke fano, ne talia ke afo hana Iki ma e 30 e tupe ario—ko e totogi he tupa hagaao ke he Fakatufono faka-Mose—ne kamata e Iesu e Fakamanatuaga he matulei hana.—Esoto 21:32; Mataio 26:14, 15, 26-29; Ioane 13:2-30.

18. Ko e heigoa foki falu a fakaakoaga ne tuku age e Iesu ke he tau aposetolo 11 tua fakamoli hana, mo e tauteute fefe e ia a lautolu ma e fano kehe hana ne tata mai?

¹⁸ He mole e fakatu e Fakamanatuaga, ne putoia e tau aposetolo ke he taufetoko po ko hai ne mua ia lautolu. He nakai vale ki a lautolu, ne fakaako fakaeneene e Iesu a lautolu hagaao ke he aoga he fekafekau atu ke he falu. Fakaaue ai ha kua tumau a lautolu ki a ia he magahala he tau kamatamata, ne taute e ia e maveheaga fakatagata mo lautolu ma e kautu. (Luka 22:24-30) Ne poaki foki e Iesu ki a lautolu ke feofanaki a lautolu tuga ne fakaalofa a ia ki a lautolu. (Ioane 13:34) He fakatuai a ia i loto he poko, ne tauteute e Iesu a lautolu ma e fano kehe hana ne tata mai. Ne fakamafana e ia a lautolu ko e tau kapitiga hana, fakamalolo a lautolu ke fakagahuahua e tua, mo e mavehe ki a lautolu e lagomatai he agaga tapu. (Ioane 14:1-17; 15:15) Fakamua to o kehe  mai he fale, ne ole a Iesu ke he Matua hana: “Kua hoko mai e aho. Tuku mai a e fakahekeaga ke he hau a Tama, kia tuku atu foki he hau a Tama e fakahekeaga kia koe.” Haia, kua tauteute e Iesu e tau aposetolo ma e fano kehe hana, ti moli ni kua ‘fakaalofa a ia ke he hana ni ke he fakaotiaga.’—Ioane 13:1; 17:1.

19. Ko e ha ne matematekelea ai a Iesu he katene ko Ketesemane?

¹⁹ Liga kua molea lahi e tuloto po he magaaho ne hohoko atu a Iesu mo e tau aposetolo 11 tua fakamoli hana ke he katene ko Ketesemane. Na fano tumau a ia ki ai mo e tau aposetolo hana. (Ioane 18:1, 2) He tau matahola ia ni, to mate a Iesu tuga ko e tagata kolokolovao fakateteki. Ko e matematekelea he fakatalitali ke hoko e mena nei mo e puhala ka ekefakakelea e Matua hana kua faguna lahi ti he magaaho ne liogi a Iesu, kua kavakava a ia tuga he tau fatufatuoka toto kua to hifo ke he kelekele. (Luka 22:41-44) “Kua hoko mai e magapo” he talahau e Iesu ke he tau aposetolo. “Kitiala, kua tata mai tuai a ia ke afo au.” He tala agaia a ia, ne hau a Iuta Isakariota, fakafaihoani he moto tagata tokologa ne toto e tau hulu mo e tau lamepa mo e tau kanavaakau. Kua o mai a lautolu ke tapaki a Iesu. Ne nakai totoko a ia. Ne fakamaama e ia: “Ti fakamoli ai fefe e tau Tohi kaeke ke pihia, kia hoko ni e tau mena ia ke lata ai?”—Mareko 14:41-43; Mataio 26:48-54.

Kua Fakaheke e Tama he Tagata!

20. (a) Ko e heigoa e mena kelea lahi ne hoko ki a Iesu he mole e tapaki hana? (e) He mogoia ni to matulei ai, ko e ha ne ui fakalahi a Iesu: “Kua fakaoti tuai”?

²⁰ He magahala ne tapaki a ia, ne tukupau he tau tagata fatipiko a Iesu, fakahala he tau iki fakafili nakai fakamoli, fakafili e Ponotio Pilato, va he tau ekepoa mo e fuhi tagata, mo e fakafiufiu mo e fakakikiveka he tau kautau. (Mareko 14:53-65; 15:1, 15; Ioane 19:1-3) He tupou la he Aho Faraile, kua pao fao a Iesu ke he akau fakakikiveka ti kua tagitofu e mamahi he mahe fakahaga e mena ne pao fao ai e tau lima mo e tau hui hana ha ko e mamafa he hana tino. (Ioane 19:17, 18) He kavi matahola tolu he mole tupou la, ne ui fakalahi a Iesu: “Kua fakaoti tuai.” E, kua fakakatoatoa tuai e ia e tau mena ne hau a ia ke he lalolagi ke taute. He tuku atu hana agaga ke he Atua, ne fakatalofe hana fufuga ti matulei ai. (Ioane 19:28, 30; Mataio 27:45, 46; Luka 23:46) He aho ke tolu aki he mole, ne liu fakatu mai e Iehova e Tama hana. (Mareko 16:1-6) He fagofulu e aho he mole e liu tu mai hana, ne haele hake a Iesu ke he lagi ti kua fakaheke a ia.—Ioane 17:5; Gahua 1:3, 9-12; Filipi 2:8-11.

21. Maeke fefe a tautolu ke fifitaki a Iesu?

²¹ Maeke fefe a tautolu ke ‘mumui fakatata ke he tau tuagahui a Iesu’? (1 Peteru 2:21) Ke tuga a ia, kia eketaha a tautolu ke he gahua fakamatala he Kautu mo e taute tutaki mo e fakamalolo ke vagavagahau e kupu he Atua. (Mataio 24:14; 28:19, 20; Gahua 4:29-31; Filipi 1:14) Kia nakai galo ia tautolu e mena ne ha ha ai a tautolu he magaaho nei po ke kaumahala ke fakalagalaga ko e taha ke he taha ke fakaalofa mo e tau gahua mitaki. (Mareko 13:28-33; Heperu 10:24, 25) Kia toka e tautolu e moui katoa ha tautolu ke takitaki he finagalo a Iehova ko e Atua mo e he mataala kua nonofo a tautolu he “vaha ke fakahiku.”—Tanielu 12:4.

To Tali Fefe e Koe?

• He iloa e Iesu kua teitei mate a ia, kua lauia fefe e fekafekauaga fakahiku hana he faituga i Ierusalema?

• Fakakite he heigoa kua fakakite e Iesu e ‘fakaalofa ke he hana ni ke he fakaotiaga’?

• Ko e heigoa ne fakakite he tau mena tutupu he tau matahola gahoa ne toe he moui ha Iesu hagaao ki a ia?

• Maeke fefe mogoia a tautolu ke fifitaki a Keriso Iesu ke he fekafekauaga ha tautolu?

[Tau Huhu he Fakaakoaga]

[Fakatino he lau 14]

“Kua fakaalofa ni a [Iesu] kia lautolu kua hoko ke he fakaotiaga”