Aua Neke Fakalolelole ke he Mahani Mitaki
Aua Neke Fakalolelole ke he Mahani Mitaki
“Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”—KALATIA 6:9.
1, 2. (a) Kua lata he ha ke moua e fakauka ke fekafekau ke he Atua? (e) Fakakite fefe e Aperahamo e fakauka, mo e heigoa ne lagomatai a ia ke taute pihia?
KO E Tau Fakamoli a Iehova, kua fiafia lahi tuai a tautolu ke taute e finagalo he Atua. Mo e moua foki e tautolu e okiokiaga he hahamo e “lakau hahamo” he eke tutaki. (Mataio 11:29) Pete ni ia, nakai ko e mena mukamuka tumau ke fekafekau ki a Iehova mo Keriso. Ne talahau fakalapalapa he aposetolo ko Paulo e mena nei he fakamafana age a ia ke he tau katofia Kerisiano: “Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua.” (Heperu 10:36) Kua lata ke moua ai e fakauka ha ko e mena paleko ke fekafekau ke he Atua.
2 Ne fakamoli ni he moui a Aperahamo e matakupu ia. Kua loga e magaaho ne fehagai a ia mo e tau fifiliaga uka mo e tau tutuaga hagahaga kelea. He poaki ke toka e moui hagahaga mitaki i Uro ko e kamataaga ni a ia. Nakai leva ne fehagai a ia mo e hoge, favale mai he tau tuuta kaina, teitei galo e hoana hana, fakavihia mai he falu magafaoa, mo e matematekelea he felakutaki. Ko e tau kamatamata lalahi kua nakai la hohoko mai ia. Ka e nakai fakai a Aperahamo ke fakalolelole ke he mahani mitaki. Ko e mena mua atu anei ha kua nakai moua katoatoa e ia e Kupu he Atua, tuga ne mua e tautolu he vaha nei. Pete ni ia, kua iloa moli e ia e perofetaaga fakamua, ne fakapuloa he Atua: “Mo e to tuku e au e faitaua ke he vahaloto hau mo e fifine, mo e vahaloto he hau a tega mo e hana tega.” (Kenese 3:15) Ha ko ia ka hau ai e Tega, to eke pauaki ni a Aperamo mo fi tonu ha Satani. Ti he mailoga e mena nei ne lagomatai moli aki a Aperahamo ke fakauka fakamitaki ke he tau kamatamata hana.
3. (a) Ko e ha ne talifaki e tau tagata ha Iehova he vaha nei ke he matematekelea? (e) Ko e heigoa e fakamafanaaga ne foaki he Kalatia 6:9 ki a tautolu?
3 Kua lata foki he tau tagata ha Iehova he vaha nei ke talifaki ke he tau matematekelea. (1 Peteru 1:6, 7) Ha ko e mena kua fita he hataki mai ia Fakakiteaga 2:17 ki a tautolu hane ‘tau’ a Satani ki a lautolu kua toe ne fakauku. Ha ko e fetataaki ha lautolu mo e tau tagata fakauku, kua eke foki e “mamoe kehe” mo piu he ita ha Satani. (Ioane 10:16) Pete ko e tau totokoaga ne liga fehagai e tau Kerisiano ki ai he fekafekauaga ha lautolu, liga to moua foki e lautolu e tau tuaga kamatamata he tau momoui ha lautolu. Ne tomatoma e Paulo ki a tautolu: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.” (Kalatia 6:9) E, pete kua manako a Satani ke moumou e tua ha tautolu, kua lata ia tautolu ke totoko ki a ia, he fakamalolo ke he tua. (1 Peteru 5:8, 9) Ko e heigoa ka tupu mai he puhala fakamoli a tautolu? Ne fakamaama he Iakopo 1:2, 3: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe. He iloa e mutolu ko e kamatamata he tua ha mutolu, kua tupu mai ai e fakauka.”
Tau Mai Fakahako
4. Kua tau fakahako mai fefe a Satani he lali ke moumou e loto fakamoli he tau tagata he Atua?
4 Kua fakakite moli he moui ha Aperahamo e “tau kamatamata kehekehe” ne liga fehagai mo e Kerisiano he vaha nei. Ke fakatai ki ai, kua lata ia ia ke fai tali ke he tau fakaofo mai he tau tagata fofo mai Sinara. (Kenese 14:11-16) Nakai ke ofo ai mogoia, he fakatumau a Satani ke tau fakahako mai he puhala he favaleaga. Tali mai he fakaotiaga he Felakutaki II he Lalolagi, ne pa he tau motu loga e gahua fakaako faka-Kerisiano he Tau Fakamoli a Iehova. Ne tala e 2001 Yearbook of Jehovah’s Witnesses hagaao ke he holifono mai he tau fi ne fakauka ki ai e tau Kerisiano i Angola. He falanaki ki a Iehova, ko e tau matakainaga ha tautolu he tau motu pihia kua malolo lahi ke nakai tiaki e tua ha lautolu! Ne tali age ai a lautolu, nakai he holifono po ke totoko, ka e he fakamoli tumau ke he gahua fakamatala.—Mataio 24:14.
5. Liga eke fefe e tau Kerisiano fuata mo piu he favaleaga he aoga?
5 Pete he pihia, kua nakai putoia tumau e favaleaga ke ekefakakelea. He magaaho fakahiku ni ti fakamonuina a Aperahamo aki ua e tama tane—ko Isamaeli mo Isaako. Ne talamai ki a tautolu he Kenese 21:8-12, ne taha e mogo ne “fefeua” a Isamaeli ki a Isaako. He tohi hana ke he tau Kalataia, ne fakakite e Paulo nakai ko e fefeua fakatama anei, ha kua talahau e ia a Isamaeli ke favale ki a Isaako! (Kalatia 4:29) Ti ko e vaiga he tau tama aoga mo e amuamu he tau tagata totoko kua tonu lahi ni ke ui ko e favaleaga. Ne manatu he Kerisiano fuata ne higoa ko Ryan e mamahi ne matematekelea a ia ki ai mai he tau tama he vahega: “Ko e 15 e minuti ne heke he pasi ke he aoga mo e mai he aoga kua tuga e loga e tau matahola he amuamu mai ki a au. Ne tugi aki e lautolu e tau matapine ne lagilagi aki e afi tugi tapaka a au.” Ko e kakano he fakamamahi nei? “Ko e fakaako fakateokarasi haku ne taute au ke kehe mai he falu tama he aoga.” Pete ni ia, fakalataha mo e lagomatai he tau matua hana, ne maeke a Ryan ke fakauka fakamoli. Ma tau tama, kua taute kia he va he tau atutau hau a koe ke fakalolelole? Pete he pihia, kia nakai fakalolelole! He fakauka fakamoli, to moua e koe e fakamoliaga he tau kupu a Iesu: “Uhoaki a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au.”—Mataio 5:11.
Tau Fakaatukehe he Tau Aho Oti
6. Ko e tau mena fefe ka fetohoaki e tau fakafetuiaga he tau katofia Kerisiano he vaha nei?
6 Laulahi he tau kamatamata ne fehagai mo tautolu he vaha nei, kua tupu mai he tau fakaatukehe fa mahani he tau aho oti. Ne fahia na Aperahamo ke he tau taufetoko he vahaloto he tau leveki manu hana mo e he nefiu hana ko Lota. (Kenese 13:5-7) Ke he puhala ia ni he vaha nei, kua maeke he tau aga fakatagata kehekehe mo e mahekeheke ke fetohoaki e tau fakafetuiaga mo e faguna e mafola he fakapotopotoaga. “Ko e mena ha i ai e mahekeheke mo e taufetoko, ha i ai e fakaagitau mo e tau mena kelea oti.” (Iakopo 3:16) Ko e aoga ha ia ma tautolu ke aua neke fakalolelole ka e tuku e mafola i mua he fakaikaluga, tuga ne taute e Aperahamo, mo e kumi e fiafia he falu! —1 Korinito 13:5; Iakopo 3:17.
7. (a) Ko e heigoa kua lata he tagata ke taute kaeke fakamamahi he taha katofia Kerisiano a ia? (e) Fakatoka fefe e Aperahamo e fakafifitakiaga mitaki he fakatumau e tau fakafetuiaga mo e falu?
7 Kua eke ke paleko e mahani mafola he magaaho ka logona e tautolu kua nakai tonu e mena ne taute he taha katofia talitonu ki a tautolu. Ne talahau he Tau Fakatai 12:18: “Ha ha i ai e tagata kua vagahau, ti tuga ne tuina ai e tau tagata he pelu.” Ko e tau kupu talahau nakai manamanatu, pete ni ko e vagahau mitaki, ka fakamamahi lahi. Kua au atu e mamahi kaeke logona e tautolu kua talatala fakavai po kua uta tala kelea hagaao ki a tautolu. (Salamo 6:6, 7) Ka e nakai lata e Kerisiano ke fakaata e tau logonaaga hukia ke fakalolelole aki a ia! Kaeke ko koe he tuaga ia, kia fakalotomatala ke fakahako e lekua he vagahau fakamitaki ki a ia ne taute e hehe. (Mataio 5:23, 24; Efeso 4:26) Kia amanaki ke fakamagalo e tagata ia. (Kolose 3:13) He fakatoka kehe e ita, kua maeke ia tautolu ke fakamaulu na ha tautolu ni a tau loto manamanatu mo e ha tautolu a fakafetuiaga mo e matakainaga ha tautolu. Ne nakai kuku mau e Aperahamo ha ita ne liga logona hifo e ia ki a Lota. Ha ko e mena fakamafitifiti a Aperahamo ke lagomatai a Lota mo e magafaoa hana!—Kenese 14:12-16.
Tau Kamatamata Fakatupu ne Tautolu
8. (a) Hoka fefe he Kerisiano a ia ke he tau mena matematekelea loga? (e) Ko e ha ne maeke ia Aperahamo ke moua e onoono lautatai ke he tau koloa tino?
8 Moli, kua fakatupu ne tautolu e falu kamatamata. Ke fakatai ki ai, ne poaki e Iesu e tau tutaki hana: “Aua neke tanaki e mutolu e tau koloa ma mutolu ke he lalolagi, ha ha i ai e moko mo e pala ke fakaoti ai, ha ha i ai foki e tau tagata kaiha ke keli atu mo e kaiha ai.” (Mataio 6:19) Ka ko e falu matakainaga kua “hoka e lautolu a lautolu ti ati ni ke he tau mena matematekelea loga” he tuku e tau mena tino ki mua he tau mena he Kautu. (1 Timoteo 6:9, 10) Ne fakamakai a Aperahamo ke poa e tau koloa tino ke fakafiafia e Atua. “Ko e tua ne nofo paea ai a ia ke he motu ne talahaua, tuga ne nofo ke he motu kehe, kua nofo ke he tau fale ie, katoa mo Isaako mo Iakopo, ko laua ne ohi fakalataha mo ia he talahauaga taha. Ha kua tatali atu a ia ke he māga kua fai fakaveaga, ko ia ne eke mo e tufugatia ai ko e Atua haia.” (Heperu 11:9, 10) Ko e tua a Aperahamo ke he “maga” anoiha, po ke fakatufono faka-Atua, ne lagomatai a ia ke nakai falanaki ke he tau muhukoloa. Ti nakai kia pulotu a tautolu ke taute pihia foki?
9, 10. (a) Fakatupu fefe he manako ke mahuiga e kamatamata? (e) Maeke fefe e matakainaga he vaha nei ke eke ke “tote ue atu”?
9 Kikite ke he taha puhala. Ne foaki he Tohi Tapu e hataki malolo nei: “Ko e mena kaeke kua manatu e taha, ko ia ko e tagata ha ha i ai e mena, ka kua noa maka ni, kua fakavai e ia a ia ke he hana manatu.” (Kalatia 6:3) Mua atu, kua fakamafana ki a tautolu ke “aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo.” (Filipi 2:3) Ne ta mai he falu e tau kamatamata ki a lautolu ni he mahala ke fakagahuahua e hatakiaga nei. He fakaohooho he manako ke mahuiga ka e nakai he manako ke taute e “gahua mitaki,” ne eke a lautolu ke fakalolelole mo e gugu he magaaho ka nakai moua e lautolu e tau kotofaaga he fakapotopotoaga.—1 Timoteo 3:1.
10 Ne fakatoka e Aperahamo e fakafifitakiaga mitaki he ‘nakai homo e manatu ki a ia ni ke he mena kua lata.’ He magaaho ne fehagai a ia mo Mekisateko, ne nakai taute a Aperahamo ke tuga ko e fakafetui mitaki hana mo e Atua ne tokoluga ai a ia. Ka ke he taha fahi, ne mailoga e ia e tuaga tokoluga ha Mekisateko ko e ekepoa he totogi ki a ia e tau mena hogofulu aki. (Heperu 7:4-7) Kua lata he tau Kerisiano he vaha nei ke fakamakai ke eke a lautolu ke “tote ue atu” mo e nakai manako ke he maama he lalolagi. (Luka 9:48) Kaeke tuga taofi e lautolu ne takitaki he fakapotopotoaga taha kotofaaga mai ia koe, kia kumikumi hifo ki a koe ni ke kitia ko e heigoa la ka taute e koe ke fakalaukauka e aga fakatagata po ke puhala taute mena hau. He nakai lata ke ita ha ko e tau kotofaaga ne nakai moua e koe, kia fakaaoga katoatoa e kotofaaga ne ha ha ia koe—ko e kotofaaga ke lagomatai falu ke o mai ke iloa a Iehova. E, “kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ai.”—1 Peteru 5:6.
Tua ke he Tau Mena Nakai Kitia
11, 12. (a) Ko e ha ne galo ke he falu he fakapotopotoaga e logona mafiti ha lautolu? (e) Fakatoka fefe e Aperahamo e fakafifitakiaga mitaki he ati e moui hana he tua ke he tau maveheaga he Atua?
11 Liga tupu taha kamatamata ha kua tuga fakatuai e fakaotiaga he fakatokatokaaga kelea nei. Hagaao ke he 2 Peteru 3:12, kua lata he tau Kerisiano ke “fakatalitali mo e foli atu kia hoko mai e aho he Atua.” Ti kua tokologa ne fakatalitali ke he “aho” nei ke he tau tau loga, falu ke he tau hogofulu tau. Ko e fua, liga fakalolelole falu mo e galo e logona mafiti ha lautolu.
12 Kia kitekite foki ke he fakafifitakiaga ha Aperahamo. Ne ati e ia e moui katoa hana he tua ke he tau maveheaga he Atua, pete ni to nakai fakamoli he vaha moui hana. Moli, kua moui loa a ia ati kitia e tama tane hana ko Isaako ne lahi hake. Ka e, to loga la e tau senetenari ato fakatatai e fanau ha Aperahamo ke he “tau fetu he lagi” po ke “oneone he matafaga.” (Kenese 22:17) Pete kua pihia, ne nakai fakafualoto po ke fakalolelole a Aperahamo. Ka kua talahau he aposetolo ko Paulo hagaao ki a Aperahamo mo e falu tupuna tane: “Kua mamate a lautolu oti kana na mo e t[u]a, kua nakai moua e tau mena ne talahau mai, ka kua iloa ai ka e mamao, ne tua foki ki ai, ti talia mo e fiafia e lautolu, mo e talahau mai ko e tau tagata kehe a lautolu mo e tau tagata o fano ke he lalolagi.”—Heperu 11:13.
13. (a) Fakatatai fefe e tau Kerisiano he vaha nei ke he “tau tagata o fano”? (e) To tamai he ha e Iehova e fakaotiaga ke he fakatokaaga nei?
13 Kaeke ati viko e Aperahamo e moui hana ke he tau maveheaga ne “mamao” agaia, kua lata lahi foki ke taute pihia e tautolu he vaha nei, ha kua tata lahi mai e fakamoliaga he tau mena nei! Tuga a Aperahamo, kua lata ia tautolu ke mailoga ne tautolu a tautolu ko e “tau tagata o fano” he fakatokaaga ha Satani, he nakai fia loto ke nonofo mau he puhala moui fulukovi. Ati manako lahi ai a tautolu ke hoko mai e “fakatulakiaga he tau mena oti,” nakai ni tata mai. (1 Peteru 4:7) Liga hane matematekelea lahi a tautolu ke he tau lekua malolo tino. Po ke liga fakamamafa he tau peehi he fahi tupe a tautolu. Kua lata ia tautolu mogoia ke manatu, na tamai e Iehova e fakatulakiaga nakai ni ke laveaki a tautolu mai he tau tutuaga fakaatukehe ka ke fakatapu hana na higoa. (Esekielu 36:23; Mataio 6:9, 10) To hoko mai e fakatulakiaga, nakai pehe he magaaho ne lata mo tautolu, ka e he magaaho tonu ma e finagalo ha Iehova.
14. Aoga fefe e fakauka he Atua ke he tau Kerisiano he vaha nei?
14 Kia manatu, foki, “kua nakai mule mai e Iki ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Manatu na “fakauka mai [e Atua] kia tautolu”—ne haia he fakapotopotoaga Kerisiano. Ka kua moli, kua lata ke fai magaaho e falu ia tautolu ke taute e tau hikihikiaga ke “moua e ia a mutolu mo e monuina, kua nakai fai ila, mo e nakai talahaua kelea.” (2 Peteru 3:14) Ti kia nakai loto fakaaue a tautolu mogoia, he fakakite he Atua e fakauka pihia?
Kia Moua e Fiafia Pete ko e Tau Fakalavelaveaga
15. Maeke fefe ia Iesu ke fakatumau e fiafia ki mua he tau kamatamata, mo e aoga fefe e tau Kerisiano he vaha nei he fifitaki ki a ia?
15 Kua fakaako mai he moui a Aperahamo e tau fakaakoaga loga ke he tau Kerisiano he vaha nei. Ne fakakite e ia nakai ni ko e tua ka ko e fakauka, lotomatala, malolo, mo e fakaalofa nakai fulukovi. Ne eke e ia e tapuakiaga a Iehova mo mena fakamua he moui hana. Ka kua lata ke manatu, ko e fakafifitakiaga ne mua atu ma tautolu ke fifitaki, ne fakatoka mai e Iesu Keriso. Ne fehagai foki a ia mo e tau kamatamata loga, ka ke he tau mena oti ia, ne nakai galo ia ia e fiafia hana. Ko e ha? Ha kua fakatonu atu ni e manamanatu hana ke he amaamanakiaga i mua. (Heperu 12:2, 3) Ati liogi ai a Paulo: “Kia foaki atu kia mutolu he Atua hana e fakauka, mo e fakamafanaaga, ke fakalataha ha mutolu a tau loto ke lata mo e finagalo a Keriso Iesu.” (Roma 15:5) Mo e manamanatuaga hako, maeke ia tautolu ke moua e fiafia pete ko e tau fakalavelaveaga ne tolo mai e Satani ki mua ha tautolu.
16. Ko e heigoa ha tautolu kua lata ke taute ka tuga mamafa lahi e tau mena vihi ha tautolu?
16 Kaeke kua tuga mamafa lahi e tau mena vihi, kia fakamanatu e koe a koe ni ko e tuga he fakaalofa a ia ki a Aperahamo, kua fakaalofa a Iehova ki a koe. Kua manako a ia ki a koe ke kautu. (Filipi 1:6) Kia falanaki katoatoa ki a Iehova, he mauokafua to “nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Korinito 10:13) Feaki e aga mau ke totou tumau e Kupu he Atua he tau aho takitaha. (Salamo 1:2) Fakatumau ke he liogi, ole ki a Iehova ke lagomatai a koe ke fakauka. (Filipi 4:6) To “foaki [e ia] e Agaga Tapu kia lautolu ka ole atu ai kia ia.” (Luka 11:13) Kia fakaaoga fakamitaki e tau foakiaga ne mai e Iehova ki a tautolu ke fakamalolo fakaagaga aki a tautolu, tuga e tau tohi fakave ke he Tohi Tapu ha tautolu. Taha mena foki, kia kumi e lagomatai he tau matakainaga. (1 Peteru 2:17) Kia o fakamoli ke he tau feleveiaaga Kerisiano, ha ko e mena to moua e koe i ai e fakamaloloaga ne lata ia koe ke fakauka. (Heperu 10:24, 25) Kia olioli ke he iloaaga nei, kua takitaki atu e fakauka hau ke he tuaga fiafia ki mua he Atua, ti kua fakafiafia ai he tua fakamoli hau e loto hana!—Tau Fakatai 27:11; Roma 5:3-5.
17. Ko e ha ne nakai mahala e tau Kerisiano ke he fakaatukehe?
17 Ne fakaalofa e Atua ki a Aperahamo ko e “kapitiga” hana. (Iakopo 2:23) Pete he pihia, kua puke e moui ha Aperahamo he tau kamatamata mo e tau matematekelea fakaatukehe. Ti kua nakai lata e tau Kerisiano ke tote hifo e mena ka tutupu ki a lautolu he magahala he “tau aho fakamui” kelea nei. Ha kua hataki mai e Tohi Tapu ki a tautolu “ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea.” (2 Timoteo 3:1, 13) He nakai mahala atu ke he fakaatukehe, kia mailoga kua fakamoli he tau kamatamata ne fakafehagai mo tautolu e tata he fakaotiaga he fakatokaaga ha Satani. Ka e fakamanatu mai a Iesu ki a tautolu “ko ia ke tumau ato hoko ke he fakaotiaga, to fakamoui na ia.” (Mataio 24:13) Ti, ‘aua neke fakalolelole ke he mahani mitaki.’ Kia fifitaki a Aperahamo, mo e fakalataha mo lautolu ne “moua tuai ke he tua mo e fakauka e tau mena kua talahaua mai.”—Heperu 6:12.
Mailoga Nakai e Koe?
• Ko e lata he ha e tau tagata ha Iehova he vaha nei ke talifaki ke he tau kamatamata mo e matematekelea?
• Liga ke he puhala fe ka tau fakahako mai a Satani?
• Maeke fefe e tau taufetoko he tau Kerisiano ke fakamafola?
• Maeke fefe he mahani fakaikaluga mo e hula noa ke fakatupu e tau kamatamata?
• Ko e heigoa e puhala ne fakatoka e Aperahamo e fakafifitakiaga mitaki he fakatalitali ma e fakamoliaga he tau maveheaga he Atua?
[Tau Huhu he Fakaakoaga]
[Fakatino he lau 18]
Tokologa e tau Kerisiano fuata ne matematekelea ke he favaleaga, he va he tau atutau ha lautolu
[Fakatino he lau 21]
He vaha a Aperahamo ko e fakamoliaga he tau maveheaga he Atua kua “mamao,” pete ia ne ati viko e ia e moui hana i ai