Tau Huhu Mai he Tau Tagata Totou

Ko e heigoa e “okiokihaga” ne hagaao ki ai ia Heperu 4:​9-11, mo e “hao atu [fefe taha] ke he okiokihaga ia”?

Ke he tau Kerisiano Heperu he senetenari fakamua, ne tohia he aposetolo ko Paulo: “Kua toka agaia e okiokihaga tuga e aho sapati mo e tau tagata he Atua. Ha ko ia kua hao atu ke he hana okiokihaga, kua okioki foki a ia ke he hana tau gahua, tuga e Atua ke he hana ni. Hanai, kia eke taha a tautolu ke hao atu ke he okiokihaga ia.”—Heperu 4:9-11.

He vagahau a Paulo hagaao ke he okiokihaga he Atua mai e Hana gahua, kua hagaaki a ia ke he mena ne talahau ia Kenese 2:2, ne totou e tautolu: “Kua fakaoti he Atua ke he aho fitu hana gahua ne eke e ia; ko e aho fitu foki ne okioki ai a ia he hana tau gahua oti ne eke e ia.” Ko e ha ne ‘okioki ai a [Iehova] he aho fitu’? Nakai ha kua manako a ia ke liu moua e malolo mai “he hana tau gahua oti ne eke e ia.” Ne foaki he kupu ne mui mai e tali: “Ti fakamonuina ai he Atua e aho fitu, mo e fakatapu ai; ha kua okioki ai a ia he hana tau gahua oti kana he Atua ne eke e ia.”—Kenese 2:3; Isaia 40:26, 28.

Kua kehe e “aho fitu” mai he tau aho ono fakamua, ha ko e aho a ia ne fakamonuina mo e fakatapu ai he Atua, ko e pehe a ia, ko e aho toka kehe, po ke tukulele, ma e finagalo pauaki. Ko e heigoa e finagalo ia? He magaaho fakamua, ne fakakite he Atua e finagalo hana hagaao ke he tau tagata mo e lalolagi. Ke he tagata tane fakamua mo e hana hoana, ne talahau he Atua: “Kia fanau a mo e fakatokologa, kia fakapuke foki e lalolagi, mo e kautu ki ai; kia pule foki ke he tau ika he tahi, mo e tau manu lele he pulagi, katoa mo e tau mena momoui oti kua totolo ke he kelekele.” (Kenese 1:28) Pete he foaki he Atua ke he tau tagata mo e lalolagi e kamataaga mitaki katoatoa, to fai magaaho ma e lalolagi katoa ke kautu mo e taute ai ke eke mo parataiso kua puke ke he magafaoa mitaki katoatoa, tuga ne finagalo he Atua. Ti, he “aho fitu,” ne okioki e Atua mai he tau gahua tufugatia he lalolagi ke fakaata e tau mena ne kua fita he tufuga e ia ke tupu ke he mena ne finagalo e ia. He fakahiku he “aho” ia, ko e tau mena oti ne finagalo he Atua to fakamoli ni. To fiha e leva he okiokihaga ia?

Liliu ke he mena ne talahau e Paulo ia Heperu, mailoga e tautolu ne talahau e ia “kua toka agaia e okiokihaga tuga e aho sapati mo e tau tagata he Atua,” mo e fakamafana e ia e tau katofia Kerisiano hana ke eke taha ke “hao atu ke he okiokihaga ia.” Fakakite he mena nei he magaaho ne tohia e Paulo e tau kupu ia, ko e “aho fitu” he okiokihaga he Atua, ne kamata he kavi 4,000 tau fakamua, ti kua mailoga agaia. To nakai fakaoti ato fakamoli katoatoa e finagalo he Atua hagaao ke he tau tagata mo e lalolagi he matahiku he Pule Afe Tau ha Iesu Keriso, ko e ‘Iki he sapati.’—Mataio 12:8; Fakakiteaga 20:1-6; 21:1-4.

Mo e amaamanaki homo ia i mua, ne fakamaama e Paulo e puhala ka hao atu taha ke he okiokihaga he Atua. Ne tohia e ia: “Ko ia kua hao atu ke he hana [Atua] okiokihaga, kua okioki foki a ia ke he hana tau gahua.” Tala mai e mena nei ki a tautolu ko e pete ni he mitaki katoatoa e kamataaga, kua nakai la hao atu e tau tagata ke he okiokihaga he Atua. Kua pihia e mena nei ha kua nakai leva e mailoga e Atamu mo Eva e okiokihaga he Atua he “aho fitu” he talia e fakaholoaga hana ma laua. Ka kua fakafualoto a laua mo e manako ke tu kehe mai he Atua. Ne fanogonogo a laua ke he lagatau ha Satani ka e nakai talia e takitakiaga fakaalofa he Atua. (Kenese 2:15-17) Ko e fua, ne galo e laua e amaamanakiaga ke moui tukulagi he parataiso he lalolagi. Mai he mogoia, ne eke e tau tagata oti ke fakatupa ke he hala mo e mate.—Roma 5:12, 14.

Kua nakai fakakaumahala he fakafualoto he tau tagata e finagalo he Atua. Ne fakatumau atu e aho okioki hana. Pete ia, ne taute e Iehova e foakiaga fakaalofa—ko e lukutoto—he puhala he hana Tama, ko Iesu Keriso, ti ko lautolu oti ne talia ai he fakave ke he tua ka amaamanaki ke hao atu mo e okioki mai he pehia he hala mo e mate. (Roma 6:23) Ko e kakano haia ne fakamafana e Paulo e tau katofia Kerisiano hana ke ‘okioki ke he ha lautolu tau gahua.’ Kua lata ia lautolu ke talia e foakiaga he Atua ma e fakahaoaga mo e nakai lali ke talahau ne lautolu ha lautolu a vaha i mua ke he puhala ni ha lautolu, ke tuga a Atamu mo Eva. Kua lata foki ia lautolu ke kalo mai he tutuli e tau gahua fakamakona fakatagata ha lautolu.

 He tuku kehe e tau tutuliaga fulukovi po ke fakalalolagi he tagata ke taute e finagalo he Atua kua hauhau mo e totoka moli. Ne tuogo atu e Iesu e uiina nei: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.”—Mataio 11:28-30.

Ko e tutalaaga ha Paulo ke he okiokihaga he Atua mo e puhala ka hao atu taha ki ai, ko e punaaga moli he fakamafanaaga ma e tau Kerisiano Heperu i Ierusalema, ne fakauka ke he tau favale mo e tau fakafiu loga ha ko e ha lautolu a tua. (Gahua 8:1; 12:1-5) Kua eke foki e tau kupu ha Paulo mo punaaga he mafanatia ke he tau Kerisiano he vaha nei. He mailoga ko e fakamoliaga he maveheaga he Atua ke tamai e lalolagi parataiso ki lalo he Kautu tututonu hana kua tata lahi mai, ti kua lata foki ia tautolu ke okioki mai he tau gahua ha tautolu mo e eke taha ke hao atu ke he okiokihaga ia.—Mataio 6:10, 33; 2 Peteru 3:13.

[Tau Fakatino he lau 31]

Ko e maveheaga he Atua ke he lalolagi parataiso to mailoga ai he fakahikuaga he aho okioki hana