Kua Moua Kia e Koe e ‘Agaga he Kupu Moli’?
Kua Moua Kia e Koe e ‘Agaga he Kupu Moli’?
‘To foaki mai ai he Matua ki a mutolu e taha lagomatai, kia nofo mau a ia ia mutolu tukulagi. Ko ia ko e agaga he kupu moli.’—IOANE 14:16, 17.
1. Ko e heigoa e vala tala aoga ne age e Iesu ke he hana tau tutaki he tau magaaho fakahikuhiku hana mo lautolu he poko tapa ki luga?
“KO E Iki na e, to haele atu a koe ki fe?” Ko e taha a ia he tau huhu ne huhu age he tau aposetolo ha Iesu ki a ia he tau magaaho fakahikuhiku hana mo lautolu ke he poko tapa ki luga i Ierusalema. (Ioane 13:36) Ke he fakalatahaaga ia, ne tala age a Iesu ki a lautolu kua toka fai e ia a lautolu ke liu atu ke he hana Matua. (Ioane 14:28; 16:28) To nakai liu a ia ke fakalataha mo lautolu ke he tino ke fakaako a lautolu mo e tali e tau huhu ha lautolu. Ne fakamafana e ia a lautolu, he talahau ai: “To tala age foki au ke he Matua, ati foaki mai ai e ia kia mutolu e taha lagomatai [po ke, fakamafana], kia nofo mau a ia ia mutolu tukulagi.”—Ioane 14:16; matahui tala NW.
2. Ko e heigoa ne mavehe e Iesu ke age ke he tau tutaki ka fano kehe a ia?
2 Ne fakakite e Iesu e lagomatai ia mo e fakamaama e puhala ka lagomatai hana tau tutaki. Ne tala age a ia ki a lautolu: “Nakai tala atu e au e tau mena nai kia mutolu ke he kamataaga, ha ko e mena ha i ai au ia mutolu. Ka ko e fano ne fai au kia ia ne fakafano mai au . . . Kua aoga kia mutolu ke fano kehe au; ha ko e mena ka nakai fano kehe au, ti nakai haele mai e lagomatai kia mutolu; kaeke ke fano au, ti fakafano mai e au a ia kia mutolu. Ka haele mai a ia, ko e agaga [he] kupu moli haia; ti takitaki e ia a mutolu ke he kupu moli oti.”—Ioane 16:4, 5, 7, 13.
3. (a) I ne fe he ‘agaga he kupu moli’ ne fakafano ke he tau Kerisiano fakamua? (e) Ko e heigoa taha puhala aoga ne maeke he agaga mo “lagomatai” ki a lautolu?
3 Ko e maveheaga nei ne fakakatoatoa ai he Penetekoso 33 V.N., tuga he fakamoli he aposetolo ko Peteru: “Ko Iesu hanā kua liu fakatu mai he Atua, ko e tau tagata talahau a mautolu oti ke he mena ia. Hanai, ha kua fakatokoluga a ia he lima matau he Atua, mo e moua mai e ia he Matua e talahauaga he agaga tapu, kua liligi hifo e ia e mena nai kua kitia e mutolu mo e fanogonogo ai nai.” (Gahua 2:32, 33) To kitia ai e tautolu fakamui, ne liligi hifo e agaga tapu he Penetekoso nukua fakamoli ai e tau mena loga ma e tau Kerisiano fakamua. Ka e mavehe mai a Iesu ko e ‘agaga he kupu moli’ ka ‘fakamanatu foki kia lautolu e tau mena oti kua tala atu ai e au kia lautolu.’ (Ioane 14:26) To fakamalolo ki a lautolu ke manatu e fekafekauaga mo e tau fakaakoaga ha Iesu, ti pihia mo e tau kupu oti kana hana ti fakamau hifo ai e tau mena oti nei ke he tohi. To aoga pauaki e mena nei ke he fuakau ko e aposetolo ko Ioane he matahiku he senetenari fakamua V.N. he kamata a ia ke tohi hana Evagelia. Ko e fakamauaga ia nukua putoia ai e tomatomaaga uho ne talahau e Iesu he fakatu e ia e Fakamanatuaga he hana mate.—Ioane, tau veveheaga 13-17.
4. Maeke fefe ke lagomatai he ‘agaga he kupu moli’ e tau Kerisiano fakauku fakamua?
4 Ne mavehe foki a Iesu ke he tau tutaki fakamua ia to ‘talahau he agaga kia lautolu e tau mena oti’ mo e ‘takitaki e ia a lautolu ke he tau kupu moli oti.’ To lagomatai he agaga a lautolu ke maama e tau mena hokulo he tau Tohiaga Tapu mo e fakahao e fakalatahaaga ha lautolu he manamanatuaga, maamaaga, mo e amaamanakiaga. (1 Korinito 2:10; Efeso 4:3) Kua fakamalolo he agaga tapu a lautolu e tau Kerisiano fakamua ia ke gahua auloa mo “fekafekau fakamoli mo e loto matala” ke foaki ke he tau Kerisiano fakauku takitaha e “tau mena kai ke he tau magaaho.”—Mataio 24:45.
Fakamoli Mai e Agaga
5. (a) Ko e heigoa e foliaga fou ne hafagi e Iesu ke he hana tau tutaki he po Nisana 14, 33 V.N.? (e) Ko e heigoa e matagahua he agaga tapu ne taute he fakamoli e maveheaga ha Iesu?
5 He po he Nisana 14, 33 V.N., ne fakamafana age a Iesu ke he hana tau tutaki ka nakai leva to fakalataha ai a lautolu mo e nonofo mo ia mo e hana Matua he lagi. Ne tala age a ia ki a lautolu: “Ne loga e tau mena ke nonofo ai ke he fale he haku a Matua; ane nakai, po kua tala atu e au kia mutolu; ke fano au ke taute taha mena ke nonofo ai a mutolu. Kaeke foki ke fano au mo e taute taha mena ke nonofo ai a mutolu, to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.” (Ioane 13:36; 14:2, 3) To pule a lautolu mo ia ke he hana Kautu. (Luka 22:28-30) Ma lautolu ke moua e amanakiaga nei he lagi to “fanau mai . . . he agaga” a lautolu ko e tau fanau fakaagaga he Atua mo e fakauku ke eke mo tau patuiki mo e tau ekepoa mo Keriso he lagi.—Ioane 3:5-8; 2 Korinito 1:21, 22; Tito 3:5-7; 1 Peteru 1:3, 4; Fakakiteaga 20:6.
6. (a) Kamata ne fe e ui mai he lagi, ti tokofiha ne moua e uiaga nei? (e) Ko lautolu ne ui nukua papatiso ke he heigoa?
6 Ko e “ui mai he lagi” nei kua kamata he Penetekoso 33 V.N. mo e vala lahi nukua fakahiku he lotouho he atu tau 1930. (Heperu 3:1) Ko e numera ha lautolu ne ufitia he agaga tapu ke fakalataha he Isaraela fakaagaga ko e 144,000, “ko lautolu ia ne fakafua mai he tau tagata.” (Fakakiteaga 7:4; 14:1-4) Ne papatiso a lautolu nei ke he tino fakaagaga ha Keriso, ke he hana fakapotopotoaga, ti hoko tuai ke he hana mate. (Roma 6:3; 1 Korinito 12:12, 13, 27; Efeso 1:22, 23) He mole atu ha lautolu a papatisoaga ke he vai mo e fakauku aki e agaga tapu, ne huhu atu a lautolu ke he tuaga poa, ko e moui he fakamoli ke hoko ke he mate ha lautolu.—Roma 6:4, 5.
7. Kua tonuhia he ha ko e tau Kerisiano fakauku ni hokoia ke fakalataha ke he tau mena fakatai he Fakamanatuaga?
7 Ha ko e tau Isaraela fakaagaga, ko e tau Kerisiano fakauku nei ne ha ha he maveheaga fou ne taute he vahaloto ha Iehova mo “Isaraela he Atua.” (Kalatia 6:16; Ieremia 31:31-34) Kua fakagahua e maveheaga fou ha ko e toto ne liligi e Keriso. Nukua talahau e Iesu e mena nei he magaaho ne fakatu e ia e Fakamanatuaga he hana mate. Ne tohi e Luka: “Ati toto ai e ia e areto, mo e fakaaue, ti tofitofi, mo e age kia lautolu, kua pehe age, Ko e haku a tino a enei, kua foaki atu ma mutolu; kia eke e mutolu e mena nai mo fakamanatuaga kia au. Kua pihia foki e kapiniu, ka kua oti he kai mena, kua pehe atu, Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:19, 20) Ko e tau tagata fakauku po ke ne toe agaia he 144,000 ke he lalolagi, ko lautolu ia kua tonuhia ke fakalataha ke he falaoa mo e uaina fakatai he Fakamanatuaga ke he mate he Keriso.
8. Iloa fefe e lautolu ne fakauku kua moua tuai e lautolu e ui mai he lagi?
8 Iloa fefe e lautolu kua fakauku na moua e lautolu e ui mai he lagi? Kua moua mitaki e lautolu e fakamoli mai he agaga. Ne tohi he aposetolo ko Paulo ki a lautolu ia: “Ha ko lautolu oti kua takitaki he agaga he Atua, ko e tau tama he Atua a lautolu. . . . Kua fakamoli mai e agaga ia ni ke he tau agaga ha tautolu, ko e fanau he Atua a tautolu. Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso; kaeke kua mamahi a tautolu fakalataha mo ia kia fakamonuina foki a tautolu fakalataha mo ia.” (Roma 8:14-17) Ko e fakamoli nei he agaga kua malolo lahi ti ko lautolu ne fakauaua ai he moua e ui mai he lagi kua lata ke talahau kua nakai ma ha lautolu ia, ti lata ke taofi ne lautolu a lautolu mai he fakalataha ke he tau mena fakatai he Fakamanatuaga.
Ko e Agaga mo e Tau Mamoe Kehe
9. Ko e heigoa e tau matakau ua ne talahau he tau Evagelia mo e he tohi ha Fakakiteaga?
9 He manatu e numera tote ia he tau Kerisiano ne ui ke fakalataha he Isaraela fakaagaga, ne hagaao a Iesu ki a lautolu ko e “fuifui mamoe gahoa.” Nukua fakaata a lautolu ke he “lotopa” he maveheaga fou, ne kehe ai mo e numera lahi he ‘tau mamoe kehe’ nukua talahau e Iesu kua lata foki ke takitaki mai. (Luka 12:32; Ioane 10:16) Ko lautolu e tau mamoe kehe ne fakapotopoto mai he vaha he fakaotiaga ka fakakatoa e “moto tagata tokologa,” ke hao mai he “matematekelea lahi” aki e amaamanakiaga he moui tukulagi ke he lalolagi parataiso. Fuluola ai, ko e fakakiteaga ne mailoga e Ioane he matahiku he senetenari fakamua V.N. kua fakakehe mai e moto tagata tokologa nei mo e tau tagata 144,000 he Isaraela fakaagaga. (Fakakiteaga 7:4, 9, 14) Kua moua foki kia he tau mamoe kehe e agaga tapu, ti kaeke ke pihia, lauia fefe e tau momoui ha lautolu?
10. Papatiso fefe e tau mamoe kehe “ke he higoa he Matua, mo e Tama, mo e agaga tapu”?
10 Kua taute moli he agaga tapu e vala aoga ke he tau momoui he tau mamoe kehe. Kua fakamailoga e lautolu e tukuleleaga ki a Iehova he papatiso “ke he higoa he Matua, mo e Tama, mo e agaga tapu.” (Mataio 28:19) Kua mailoga e lautolu e pule katoatoa ha Iehova, muitua ki a Keriso ko e ha lautolu a Patuiki mo e Laveaki, mo e muitua ke he gahua he agaga he Atua, po ke gahuahua malolo, he tau momoui ha lautolu. He taha aho mo e taha aho, kua fakaata e lautolu e tau momoui ha lautolu ke feaki e “tau fua he agaga” ko e ‘fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata.”—Kalatia 5:22, 23.
11, 12. (a) Maeke fefe ia lautolu ne fakauku ke fakatokoluga he puhala pauaki? (e) Ke he puhala fe kua tokoluga e tau mamoe kehe mo e tapu?
11 Kua lata foki e tau mamoe kehe ke fakaata e Kupu he Atua mo e hana agaga tapu ke fakamea, po ke fakatokoluga, a lautolu. Kua fita a lautolu ne fakauku he fakatokoluga ke he puhala pauaki, nukua talahau tututonu mo e tapu ko e kitofaitane ha Keriso. (Ioane 17:17; 1 Korinito 6:11; Efeso 5:23-27) Ko e perofeta ko Tanielu ne talahau hagaao ki a lautolu kua “tapu kia ia ne Mua ue atu,” nukua moua e Kautu i lalo hifo he “Tama he tagata,” ko Keriso Iesu. (Tanielu 7:13, 14, 18, 27) Fakamua, puhala ia Mose mo Arona, ne fakapuloa e Iehova ke he motu ha Isaraela: “Ha ko au ko Iehova ko e ha mutolu a Atua; kia fakatapu e mutolu a mutolu, ti tapu a mutolu; ha ko au nai kua tapu ni au.”—Levitika 11:44.
12 Ko e kupu “fakatapuaga” kua kakano ko e “puhala po ke fakatokaaga he taute ke tapu, vevehe kehe, po ke toka kehe ma e fekafekauaga po ke fakaaoga ha Iehova ko e Atua; ko e tuaga he tapu, tokoluga, po ke tavana.” He mataulu he 1938, ne talahau he The Watchtower ko e tau Ionatapu, po ke falu mamoe kehe, “kua lata ke fakauku [tukulele] mo e fakatokoluga kua manako ki a lautolu takitokotaha ke eke mo vala he tau tagata tokologa mo e moui he lalolagi.” He fakamailoga he moto tagata tokologa, ne fakamau he tohi ha Fakakiteaga, ne tutala ki a lautolu nukua “unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe” mo e uta ki a Iehova e “fekafekau ki a ia ke he aho mo e po ke he faituga hana.” (Fakakiteaga 7:9, 14, 15) Fakalataha mo e lagomatai he agaga tapu, kua eketaha e tau mamoe kehe ke lagotatai ke he tau tuaga tapu ha Iehova.—2 Korinito 7:1.
Taute e Mitaki ke he Tau Matakainaga ha Keriso
13, 14. (a) Hagaao ke he fakataiaga ha Iesu he tau mamoe mo e tau koti, falanaki ke he heigoa e fakamouiaga he tau mamoe? (e) He magaaho nei he fakaotiaga, kua taute mitaki fefe e tau mamoe kehe ke he tau matakainaga ha Keriso?
13 Ne talahau e Iesu e pipiaga tata he tau mamoe kehe mo e fuifui mamoe gahoa he hana fakatai he tau mamoe mo e tau koti, lauia ai he hana perofetaaga ke he “fakaotiaga he lalolagi.” He fakataiaga ia, ne fakakite fakamaali e Keriso ko e fakamouiaga he tau mamoe kehe kua matutaki tata ke he ha lautolu a mahani ki a lautolu ne fakauku, nukua ui e ia ko e “haku a tau matakainaga.” Ne talahau e ia: “Ati tala age ai e Patuiki kia lautolu ha he fahi matau hana, O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi . . . Ko e moli, ke tala atu e au kia mutolu, ha ko e tau mena ne eke e mutolu ke he taha ne muikau ia lautolu ko e haku a tau matakainaga nai, ko au haia ne eke e mutolu ki ai.”—Mataio 24:3; 25:31-34, 40.
14 Ko e talahauaga “ha ko e tau mena ne eke e mutolu” kua hagaao ke he tau gahua he lalagoaga fakaalofa ne age ke he tau matakainaga fakaagaga he Keriso, nukua taute he lalolagi ha Satani ko e tau tagata kehe, mo e tolo falu ia lautolu ke he fale pouli. Kua manako mena kai, mena tui, mo e lagomataiaga leveki tino a lautolu. (Mataio 25:35, 36, matahui tala, NW) He magaaho fakahiku nei, tali mai he 1914, tokologa ia lautolu ne fakauku nukua ha ha he tuaga nei. Ko e talahauaga tala he vaha fou nei he Tau Fakamoli a Iehova ne fakamoli ai kua lalago a lautolu he tau kau gahua fakamoli ha lautolu, ko e tau mamoe kehe, ha kua omoi he agaga a lautolu.
15, 16. (a) Ko e heigoa e matagahua pauaki ne lagomatai he tau mamoe kehe e tau matakainaga fakauku he Keriso he lalolagi? (e) Fakakite fefe e lautolu ne fakauku e fakaaue ha lautolu ke he tau mamoe kehe?
15 Ko e tau matakainaga fakauku he Keriso he lalolagi he vaha fakahiku nei ne moua pauaki e lalago malolo he tau mamoe kehe he taute e poakiaga ne foaki he Atua ke “fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti.” (Mataio 24:14; Ioane 14:12) Ha kua to hifo e numera ha lautolu ne fakauku he lalolagi he tau tau kua mole atu, ko lautolu he tau mamoe kehe ne tupu ke he tau miliona. Totou afe a lautolu nei ne eke mo tau tagata fakamatala tumau—ko e tau paionia, mo e tau misionare—hane talahau atu e tala mitaki he Kautu ke he “ke hoko ni ke he fakaotiaga he lalolagi.” (Gahua 1:8) Kua lahi e fakalataha atu he falu ke he gahua fakamatala ke he mena kua maeke ia lautolu mo e lalago fiafia e gahua aoga nei ke he puhala fakatupe.
16 Kua fakaaue lahi ha ia e tau matakainaga fakauku he Keriso ke he lalago fakamoli nei mai he tau kau gahua he tau mamoe kehe ha lautolu! Kua fakakite mitaki e tau logonaaga ha lautolu he tohi Worldwide Security Under the “Prince of Peace,” ne foaki mai he vahega fekafekau he 1986. Kua talahau: “Tali mai he Felakutaki II he Lalolagi, ko e fakamoliaga he perofetaaga ha Iesu ma e ‘fakaotiaga he lalolagi’ kua falanaki katoatoa ke he gahua ne taute he ‘moto tagata tokologa’ he ‘tau mamoe kehe.’ . . . Ko e fakaaue lahi, mogoia, ke he ‘moto tagata tokologa’ vagahau kehekehe he lalolagi katoa ma e vala lahi nukua taute e lautolu he fakamoli e perofetaaga [ha Iesu] ia Mataio 24:14!”
‘Nakai Katoatoa ka Nakai Ha i Ai a Tautolu’
17. Ko e heigoa e puhala ha lautolu ne fakamoli i tuai ka liu fakatu mai ke he lalolagi ka ‘nakai katoatoa ka nakai ha i ai’ a lautolu ne fakauku?
17 He tutala ko e taha ia lautolu ne fakauku mo e hagaao ke he tau tagata tane mo e fifine tua fakamoli ne momoui fakamua ia Keriso, ne tohi he aposetolo ko Paulo: “Ko lautolu oti ia ne talahaua mitaki ke he tua, nakai moua e lautolu e mena ne talahaua mai, kua taute he Atua e taha mena kua mua he mitaki ma tautolu [ko lautolu ne fakauku], kia nakai katoatoa ai a lautolu ka nakai ha i ai a tautolu.” (Heperu 11:35, 39, 40) He Meleniamu, ko Keriso mo e hana tau matakainaga fakauku ne 144,000 he lagi ka eke mo tau patuiki mo e tau ekepoa mo e foaki e tau aoga he poa he Keriso he lalolagi. To moua he tau mamoe kehe e ‘mitaki katoatoa’ ke he tino mo e manamanatuaga.—Fakakiteaga 22:1, 2.
18. (a) Ko e heigoa kua lata he tau fakamoliaga faka-Tohiaga Tapu ke lagomatai e tau mamoe kehe ke fakaaue? (e) Ko e heigoa e amaamanakiaga ha ne fakatalitali e tau mamoe kehe “ke he fakakite[aga] he tau tama he Atua”?
18 Ko e tau mena oti nei kua lata ke fakamalolo aki e tau manamanatuaga he tau mamoe kehe e kakano kua hagaaki mai he tau Tohiaga Tapu Heleni e puhala ki a Keriso mo e hana tau matakainaga fakauku mo e matapatu gahua ha lautolu he gahuahuaaga he tau finagalo ha Iehova. Ko e kakano haia ati taute he tau mamoe kehe e kotofaaga pauaki ia ke lalago e matakau fekafekau fakauku ke he tau puhala oti ka e hane fakatalitali ke he “fakakite[aga] mai e tau tama he Atua” i Amaketo mo e he Meleniamu. Onoono atu fakalahi a lautolu ke “toka noa ai e tau mena ne eke mai he tupaaga ke he mena kua popo vave kia hoko atu ai ke he tokanoaaga ha ha he monuina he fanau he Atua.”—Roma 8:19-21.
Fakalataha ke he Agaga he Fakamanatuaga
19. Ko e heigoa he ‘agaga he kupu he Atua’ ne taute ma lautolu ne fakauku mo e tau eke gahua ha lautolu, ti kaufakalataha pauaki fefe a lautolu he po ia Mati 28?
19 He liogi fakahiku hana he po Nisana 14, 33 V.N., ne pehe a Iesu: “Nakai fakaigati haku a liogi ma lautolu nai, ka ko lautolu foki ka tua kia au, ha ko e ha lautolu a kupu. Kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe, kia taha a lautolu ki loto ia taua; kia talia ai he lalolagi ne fakafano mai e koe au.” (Ioane 17:20, 21) Mai he fakaalofa, ne fakafano mai he Atua hana Tama ke foaki hana moui ma e fakamouiaga ha lautolu ne fakauku mo e he lalolagi he tau tagata omaoma. (1 Ioane 2:2) Ko e ‘agaga he kupu moli’ nukua fakalataha aki e tau matakainaga he Keriso mo e ha lautolu a kau gahua. He afiafi ia Mati 28, mole e toaga la, ko e tau matakau ua nei ka fakalataha auloa ke fakamanatu e mate he Keriso mo e manatu e tau mena oti ne taute e Iehova ma lautolu he puhala mai he poa he hana Tama fakahele, ko Keriso Iesu. Kia fakamalolo he fakalataha mai ha lautolu ke he magaaho aoga nei e kaufakalataha mo e fakafouaga he fifiliaga ha lautolu ke fakatumau e taute he finagalo he Atua, he fakakite kua fiafia a lautolu ke auloa mo lautolu kua fakaalofa a Iehova ki ai.
Puhala he Fakamanatu
• I ne fe ne fakafano e ‘agaga he kupu he Atua’ ke he tau Kerisiano fakamua, ti eke fefe mo “lagomatai”?
• Iloa fefe e lautolu ne fakauku kua moua e lautolu e ui mai he lagi?
• Ke he puhala fe he agaga he Atua kua gahuahua ke he tau mamoe kehe?
• Taute mitaki fefe e tau mamoe kehe ke he tau matakainaga he Keriso, mo e ko e ha ka ‘nakai katoatoa a lautolu ka nakai ha i ai a lautolu’ ne fakauku?
[Tau Huhu he Fakaakoaga]
[Fakatino he lau 25]
Ko e ‘agaga he kupu he Atua’ ne liligi ke he tau tutaki he Penetekoso 33 V.N.
[Tau Fakatino he lau 27]
Ne taute mitaki e tau mamoe kehe ke he tau matakainaga he Keriso he lalago a lautolu he fakamoli e poakiaga faka-Atua ke fakamatala